Perdonay

BIBLIAJ YUYAYCHASQAN: “Sapa uj perdonanakuychej, imaynatachus Diospis Cristopi perdonasorqachej, ajinata” (Efesios 4:32).

¿Ima niyta munan? Bibliapeqa juchallikuyta manuwan kikinchakun, perdonaytataj manuta juntʼaywan (Lucas 11:4, MT, 1956). Uj libro nisqanman jinaqa, griego qallupi “perdonay” palabra, “manusqanchejmanta qonqapuspa manaña kutichipunawanchejta suyay” niyta munan. Chayrayku contranchejpi juchallikojta perdonajtinchejqa, manaña manunchej jinachu. Perdonayqa mana niyta munanchu juchanta allillanpaj qhaway chayri mana sonqonchej nanasqanta. Astawanpis perdonaspaqa mana phiñasqallapunichu kanchej.

¿Chay yuyaychay yanapawanchejchu? Tukuy runas pantanchej juchasapas kasqanchejrayku (Romanos 3:23). Chayrayku wajkunata perdonay allinpuni imajtinchus maykʼajllapis perdonanawanchejta necesitasun. Chantapis perdonayqa allinninchejpaj. ¿Imaraykú?

Phiñasqallapuni kaspa nitaj perdonanchejchu chayqa, noqallanchejpaj. Chantapis mana kusisqaschu kasun, mana allintachu kausakusun, llakichiwasuntaj. Onqochiwasunman ima. Uj libro nin: “Kay qhepa wataspi yachakusqanman jina, phiñakoyqa sonqopaj mana allinchu”, nispa. (Journal of the American College of Cardiology). Chayta nerqanku doctor Yoichi Chida, profesor de psicología Andrew Steptoe ima.

Perdonayqa allinninchejpaj. Imajtinchus wajkunawan sonqo tiyasqa, ujchasqataj kausakunchej. Astawanqa Dios jina ruwashanchej payqa juchallikojkunata, pantasqankumanta pesachikojtinku perdonan, pay jina ruwananchejtataj munan (Marcos 11:25; Efesios 4:32; 5:1).