Kay killamantapacha, ¿imapi astawan llamkʼasunman?
1. ¿Ima ruwaytataq kay killamantapacha maskʼasunman?
1 Qutuchakuypi ñawpaqman rinallanchikpaqpuni, Diospaq astawan ruwayta munananchik tiyan. ¿Ima ruwaytataq kay killamantapacha maskʼasunman? Allin kanman precursor auxiliarjina llamkʼananchikta; atiptinchikqa mana juk killallatachu, manaqa achkha killasta. Chaypaqqa kunanmantapacha allinta wakichikusunman. ¿Imaraykutaq precursor kayta maskʼananchik tiyan?
2. ¿Imaraykutaq precursor auxiliar kayta munanchikri?
2 Imaraykutaq precursor auxiliar kayta munasunman. Precursor auxiliar kaqkunaqa, astawan runaman willasqankurayku, “astawan” Diospaq llamkʼanku (1 Tes. 4:1). Jehovaqa, munakuwasqanchikrayku yanapawanchik, chaypi tʼukuriptinchikqa, siminchikwan Payta yupaychayta munallasunpuni (Sal. 34:1, 2). Astawan willamunapaq tukuy imata ruwasqanchiktaqa, Jehová mana pisipaqchu qhawan, manaqa chayta qhawaspa sunqun kusirikun (Heb. 6:10). ¡Mayta ñuqanchikpis kusikunchik llamkʼayninchikwan Jehovata kusichiyta atisqanchikrayku! (1 Cró. 29:9.)
3, 4. ¿Imaynatá precursor auxiliar kayqa yanapawanchik?
3 Ima llamkʼaytapis kusisqa, sumaqta ima, ruwananchikpaqqa, kutin kutita chay llamkʼayta ruwananchik tiyan. Chayrayku, kutin kutita runaman willamuptinchikqa, mana mancharikuspa, sumaqta Bibliawan yachachispa, punkusninkupi paykunawan parlarisunchik. Diosninchikmanta astawan parlaptinchikqa, iñiyninchikqa astawan kallpachakunqa. Astawanpis, Precursor auxiliar kaspaqa, Bibliamanta yachakuyta munaqkunata tarisunchik, paykunamantaq yachachiyta qallarisunchik.
4 Chantapis, precursor auxiliar kayqa, willayninchikta mana llasapaq qhawananchikpaq yanapawanchik. Juk hermanoqa, precursor regular unay karqa. Kunan llamkʼayninllanman ququsqanta reparasqanrayku, precursor auxiliarjina llamkʼayta qallarirqa. Pay nirqa: “Mana creenaypaqjina, juk killallapi, iñiyniyqa manchayta kallpachakun. Chayrayku, wakichikuni sapa killa precursor auxiliar kanaypaq, aswan qhipamantaq, precursor regularjina watiqmanta llamkʼayta qallarini.”
5. Mana sumaq yachachiqjina qhawakuptinchikqa, ¿imata ruwasunman?
5 Jarkʼaykunata atipana. Wakinkunaqa, iskaychakunku precursor auxiliar kanankumanta, mana sumaq yachachiqjina qhawakusqankurayku. Jinata yuyaptinchikqa, Jehová yanapanawanchikta mana qunqanachu. Ajinata unayqa Jeremiasta yanaparqa, Moisestapis, “qalloyqa parlashajtiy, watakullawampuni” niptinpis, Jehovaqa payta akllarqa yanapaspa munayninta ruwananpaq (Jer. 1:6-10; Éxo. 4:10-12). Chayrayku, mana sumaq yachachiqjina qhawakuptinchikqa, Jehovamanta yanapayninta mañakuna.
6. ¿Imaynatá precursor auxiliar kasunman, achkha ruwanayuq, chayri unqusqa kachkaptinchikpis?
6 ¿Precursor auxiliar kayta manchachikunchikchu, achkha ruwanayuq chayri unqusqa kasqanchikrayku? Unqusqa kachkanchik chayqa, atisqanchikmanjina willaspaqa, 50 horasta juntʼayta atillasunchik. Achkha ruwanayuq kachkaptinchikqa, ichapis aswan qhipapaq wakin ruwananchikta saqisunman. Wakin hermanosqa ajinata ruwanku. Pʼunchaynintinta llamkʼaptinkupis, juk pʼunchayta, chayri iskayta vacacionesta urqhuspa, precursor auxiliarjina llamkʼayta atinku (Col. 4:5).
7. Diosmanta mañakuchkaspa, ¿imaraykutaq precursor kayta munasqanchikmanta parlarisunman?
7 Imaynatá atisunman. Jehovamanta mañakuchkaptinchikqa, astawan Paypaq ruwayta munasqanchikmanta parlarisunman, tʼinkanta mañakuspa tukuy imata ruwasqanchikrayku precursor kananchikpaq (Rom. 12:11, 12). Paytaq yanapawasun ruwananchikta allinta akllaspa tiempochakunanchikpaq (Sant. 1:5). Willayninchikpi mana kusiyta tariptinchikqa, Jehovamanta yanapayninta mañakuna kusiyta tarinapaq (Luc. 10:1, 17).
8. ¿Imaynatá Proverbios 15:22 nisqanqa precursor auxiliar kananchikpaq yanapawasunman?
8 Familianchikwanpis parlarillasunmantaq (Pro. 15:22). Familianchikmanta, tukuyninchik yanapaptinchik, jukllapis precursor auxiliar kanman. Qutuchakuymanta hermanoswanpis, ñuqanchikjina kaqkunawan, precursor kayta munasqanchikmanta parlallasunmantaq. Ichapis jinamanta, precursor kayta astawan munasunchik.
9. ¿Ima killaspi precursor auxiliar kayta atisunman?
9 Septiembre killamantapacha, imatachus ruwananchik tiyan, chayta qhawarikuna, ima killapichus precursor auxiliarjina llamkʼayta qallarisunman tʼukurispa. Pʼunchaynintinta llamkʼaptinchikqa, chayri yachay wasipi yachakuchkaptinchikqa, ichapis ima killaschus phichqa sabadosniyuq, chayri phichqa domingosniyuq kanku, chay killaspi precursor auxiliarjina llamkʼasunman. Septiembre, diciembre, marzo, agosto ima killasqa, phichqa sabadosniyuq, domingosniyuq ima. Mayo killaqa phichqa sabadosniyuq, junio killataq phichqa domingosniyuq. Unqusqa kaspaqa, ichapis qʼuñi killasta akllasunman. Superintendente de circuito jamuptin ichapis chay killa precursor auxiliarjina llamkʼasunman. Jinamanta, superintendente precursoreswan tantakuptinqa, ñuqanchikpis khuskan horata kayta atisunchik. Qhipan watapi, Señorpa Cenanta marzo killapi 22 pʼunchayninpi yuyarikunqa, chayrayku marzo, abril, mayo killasqa, allin kanku, precursor auxiliarjina llamkʼananchikpaq. Mayqin killatapis akllaptinchikqa, allinta wakichikuna 50 horasta allinmanta juntʼananchikpaq.
10. Manapuni precursor auxiliar kayta atiptinchikqa, ¿imata ruwasunman?
10 Manapuni precursor auxiliar kayta atiptinchikqa, tukuy sunquwan, tukuy atisqanchikwan ima willallasunchikpuni. Kaytaqa Jehovata kusichiyta munasqanchikrayku sumaqta ruwasunchik (Gál. 6:4). Precursor auxiliarjina llamkʼaqkunata, allinta ruwasqankuta nina. Chantapis yanapanapaq, semanapi ruwananchikta qhawaspa, juk pʼunchaytawan akllasunman precursoreswan runaman willamunanchikpaq.
11. ¿Imaraykutaq Diospa pʼunchaynin qʼayapis jamuchkanmanjina kawsananchik tiyan?
11 Diosta kasukuqkunaqa, Diospa pʼunchaynin qʼayapis jamuchkanmanjina kawsanchik. Chayrayku, tukuy imata ruwananchik tiyan, runaman willamunallapaqpuni. Runa kawsayninta salvananpaq mana ancha tiempo kanchu (1 Cor. 7:29-31). Diosta, runata ima, munakuyninchik, astawan willananchikpaq tanqawanchik. Tukuy sunquwan, allinta wakichikuspa ima, may chhika hermanos precursor auxiliar kayta atinsunchik.