Kunanmantapacha wakichikuna
1. Jesuspa wañuyninta yuyarinapaj tiempopi, ¿imatataj ruwayta atisun, chantá imatataj sapa uj ruwanchej tiyan?
1 Sapa wata, Jesuspa wañuyninta yuyarinapaj tiempoqa, kʼacha Diosta jatunchanapaj mayta yanapawanchej (Sal. 109:30, 31). Chiqamantapuni Diosman, wañuymanta rantiwasqanchejmanta may agradecesqa kasqanchejrayku, marzo killapi runasman astawan willamusunchej. Kunanmantapachataj chaypaj wakichikuna (Pro. 21:5).
2. Qayna wata abril killapi, precursor auxiliar jina llankʼanapaj 30 horasllata ruwana kasqanta yachaspa, ¿imayná hermanos sientekorqanku? ¿Imayná qan sientekorqanki?
2 Precursor auxiliar jina llankʼana. Qayna wata abril killapi, precursor auxiliar jina llankʼanapaj pisi horasllata ruwana kasqan mayta kusichiwarqanchej. Chaymanta parlaspa uj wayna nerqa: “Escuelallapiraj kasqayrayku, niraj precursor regular jina llankʼayta atinichu. Chaywanpis abrilpi precursor auxiliar jina 30 horasta ruwanaypaj llankʼasaj, kallpachakusajtaj 50 horasman chayanaypaj”, nispa. Diantinta llankʼaj uj hermana nillarqataj: “¿Kinsa chunka horasllata? ¡Chaytaqa juntʼayta atisaj!”, nispa. Qotuchakuypi precursor auxiliar jina llankʼanapaj 30 horaslla kasqanta willakojtin, uj hermana 80 watasniyoj jina, pichus precursora regular karqa, nerqa: “¡Noqaqa precursora jina watejmanta llankʼayta munani! Precursora kashajtiy may kusisqa kasqayta Jehová yachan”, nispa. Chay killapi wakin hermanosqa, precursores auxiliares jina mana llankʼayta atispapis, willamunankupaj astawan kallpachakorqanku.
3. Marzo, abril, mayo killaspi, ¿imaraykutaj precursor auxiliar jina llankʼana tiyan?
3 Precursor auxiliar jina llankʼanapaj, marzo killaqa sumaj kanqa, watejmanta ajllayta atisunchej 30 chayri 50 horasta willayta. Chantapis marzo 17 pʼunchaymantapacha, tukuy runasta Jesuspa wañuyninta yuyarinapaj tantakuyman wajyarisunchej, chay tantakuyqa abril killamanta 5 pʼunchayninpi ruwakonqa. Marzo killapi ashkha hermanos precursor auxiliar jina sumajta llankʼakusqanrayku, abril, mayo killapi ima 50 horasta juntʼanankupaj kallpachakuyta munanqanku.
4. ¿Imatá astawan willamunanchejpaj ruwasunman? ¿Ima bendicionestataj japʼisunchej?
4 Familiapi Diosta Yupaychanapaj Chʼisipi, familiamanta mayqellanpis wajyarina tiempopi Diospaj astawan llankʼanapaj parlariwajchej (Pro. 15:22). Kallpachakusqaykichejtataj, Jehová bendecinanta mañakuychej (1 Juan 3:22). Chantá willaypi astawan llankʼaspa, Jehovata astawan jatunchasqaykichejta, astawan kusikunaykichejta ima ama qonqaychejchu (2 Cor. 9:6).