Wañupuqpa familianta sunquchana
1. Familiankuta wañuypi chinkachiqkuna, ¿imaraykutaq sunquchanata necesitanku?
1 Pillapis familiapi wañupuptin, manchay phutiy, astawanraq wañusqas kawsarimunanta mana yachaqkunapaqqa (1 Tes. 4:13). Chayrayku tapukunku: “¿Imaraykutaq wañupun? ¿Maymantaq ripun? ¿Juktawan rikusaqchu?”, nispa. Kay yachaqanapi yachakusqanchikqa, willayninchikpi chay runasta sunquchananchikpaq, yanapawasun (Isa. 61:2).
2. Pillapis phutisqa kachkasqanta willawaptinchik, ¿unaytachu paywan parlana tiyan?
2 Wasimanta wasi. Kaypi tʼukurina, ichá pipis familian wañupusqanta niwasunman. ¿Sutʼichu waqasqan rikukun? ¿Phutisqaschu chay familiapi kachkanku? Jina kaptinqa, mana allinchu kanman unayta parlananchik (Ecl. 3:1, 7). Astawanpis paykunamanta phutikusqanchikta nisunman, chantapis sunquchananpaqjina juk tratadota chayri juk folletota saqiytawan, ripusunman. Pisi tiemponmantaq kutiyta atisunman, imatachus Biblia wañusqasmanta nisqanmanta yachachinapaq.
3. Familian wañupusqanmanta phutisqa kaq runawan parlaptinchik, ¿ima pʼitikunatataq Bibliamanta rikuchisunman?
3 Wak kutispitaq, ichapis mana pisillatachu parlana kanqa. Chaywanpis pantasqa yuyayninman mana churanakusunchu, manaqa Biblia wañusqas kawsarimunankuta parlasqanta rikuchisunman (Juan 5:28, 29). Chantapis ichá allin kanman, imatachus Biblia wañusqasmanta nisqanta, sutʼinchananchik (Ecl. 9:5, 10). Chayri imaynatachus juk wañusqa kawsarimusqanmanta, Bibliamanta ñawiripusunman (Juan 11:39-44). Job imaynatachus Jehovapi suyakusqanmanta, chay runaman qhawarichillasunmantaq (Job 14:14, 15). Chantapis manaraq ripuchkaspa, ichapis juk tratadota chayri kay folletosta jaywasunman: ¿Qué nos sucede cuando morimos?, Cuando muere un ser querido nisqata ima. Saqillasunmantaq ¿Imatapunitaq Biblia yachachin? librota, chay libromantataq, 6 yachaqanata rikuchispa, juktawan kutinanchikta nisunman.
4. ¿Maykʼaqtaq runasta sunquchallasunmantaq?
4 Wak kutispi. Tantakunapaq wasipi, wañusqata pʼampanapaq discurso kaptin, ichapis Diosta mana yupaychaq runas jamunqanku. Chay runasta suquchanapaqtaq, publicacionesta jaywayta atisunman. Wakin hermanosqa, funerariasman publicacionesta saqinku, wañusqapaq cajonta rantiqkunaman jaywanankupaq, funerariamanta kaqkunataq chay ruwasqankuta may allinpaq qhawanku. Chantapis pikunaqtachus periodicospi familianku wañupusqanmanta rikhuriptin, chay runasman sunquchanapaq qillqayta atisunman. Juk hermanoqa, juk viudoman, warmi wawanmanwan cartata qillqaspa, tratadostawan apachirqa. Juk pʼunchaytaq, chay viudo warmi wawanpiwan, chay hermanop wasinman risqanku, nisqankutaq: “¿Qamkunachu kay cartata apachimuwarqayku? Ñuqaykuqa Bibliamanta astawan yachakuyta munayku”, nispa. Chaymantapacha chay runa, wawan ima, Bibliamanta yachakuyta, tantakuykunaman riyta ima, qallarirqanku.
5. ¿Imaraykutaq familiankuta wañuypi chinkachiqkunata sunquchanapaq wakichisqa kana tiyan?
5 Eclesiastés 7:2 nin: “Wañuy wasiman riyqa aswan allin fiesta wasiman rinamanta nisqaqa”. Arí, kusikuyllata maskʼaqkunamanta nisqaqa, familiankuta wañuypi chinkachiqkunaqa, Diospa Palabranta astawan sumaqta uyarinku. Chayrayku, familiankuta wañuypi chinkachiqkunata sunquchanapaq wakichisqa kana.