Llakisqa runasta sunquchanapaq
1 Mana jaykʼaqpis kunanjinaqa, llakisqa runata sunquchana karqachu. Chayrayku, ñuqanchikpis Jesucristo Reyninchikjina, ‘llakisqasta sunquchayta’ munanchik (Isa. 61:1).
2 Imaynatá sunquchasunchik. Parlasqanchikwan runata sunquchanapaqqa, maychus kaqta parlananchik tiyan, tukuy sunquwantaq parlananchik tiyan. Biblia chiqa kaq yachachisqanta, Dios sumaq suyakuyta quwasqanchikta ima, astawan sumaqta rikuchinapaq, saqra ruwaykunamanta, llulla yachachiykunamanta ima, mana anchata parlasunchu. ¿Kaywanqa nichkanchikchu, Armagedonmanta mana parlanata? Mana, imaptinchus ñuqanchikqa, ‘Tata Diospa kʼacha yanapaynin wata chayamusqanmanta, [jinallataq] Diosninchikpa vengakunan pʼunchayninmanta’ willananchik tiyan. Chaywanpis, Armagedonmanta willachkaspa, mana Diospa ‘Reinonmanta evangeliota’ pisipaqchu qhawachisunchik (Isa. 61:2; Eze. 3:18; Mat. 24:14).
3 Wasimanta wasi. Unqusqankumanta, familiapi pillapis wañupusqanmanta, mana allin ruwaykunamanta, mana qullqita tariyta atisqankumanta ima, llakisqa runataqa tukuyniqpi tarikun. Chayrayku cristianosqa, willaypi chay runasman khuyakuyninkuta rikuchinanku tiyan, imaynatachus Cristo juk viudamanta ‘khuyakurqa’ ajinallatataq (Luc. 7:13; Rom. 12:15). Chay runasman Bibliamanta ichapis iskay pʼitita chayri juk pʼitita ñawiripuptinchik, ‘uyariyta yachananchik tiyan’, ajinamanta ima llakiychus sunqunpi kasqanta willawasunchik (Sant. 1:19). Paykunap parlasqankuta uyarispaqa, aswan sumaqta sunquchasunchik.
4 Yachanayki tiyan maykʼaqchus kayta niyta: “Qampaq kay sumaq willaykunata Bibliamanta ñawiripuyta munani”, nispa. Runa ima pantasqa yuyayta niwaptinchikpis, ñuqanchikqa allin yuyaywan kutichisunchik. Ñuqanchikqa, Bibliap nisqanwan llakisqa runata sunquchayta munanchik. Razonamiento a partir de las Escrituras, libropi “Estímulo” sutichasqapi, 144-148 paginaspi, sumaq willaykuna kachkan runata sunquchanapaq. Allinllataq kanman, kay Consuelo para los deprimidos, tratadota jawarinanchik, chaymantataq paykunawan ñawirisunman.
5 Astawan runata sunquchayta maskʼana. ¿Riqsinchikchu familiaykimanta, vecinosniykimanta, llamkʼayniykimanta, escuelaykimanta, llakisqa runata? ¿Manachu wasinman rispa Bibliawan sunqucharimuwaq? Imamantachus llakisqa kasqanta yachaspaqa, imaynatachus sunquchanaykita yachanki. Wakin hermanosqa, cartasta qillqanku, mana chayqa telefononiqta waqyarinku. Imaynamantapis yanapasunchik. Chayta ruwanapaqqa runa masinchikta munakusqanchik tanqawasunchik, khuyakuspataq, Bibliap nisqanwan sunquchasunchik (Luc. 10:25-37).
6 Ñuqanchikqa, llakisqasta sunquchananchik tiyan, sunqu pʼakisqasta, mana suyakuyniyuq runasman juk sumaq suyakuyta willananchik tiyan. Tukuyniqpi runaqa sumaq willaykunawan sunquchananchikta nesecitanku. Ñuqanchikqa, Dios sumaq ruwaykunata ruwananmanta kusiywan willamuspa, kʼacha sunquyuq runata sunquchasunman, juk suyakuytataq riqsichisunman. Ama qunqanachu, llakisqa runata sunquchayta.