¿Sumaqtachu revistasta willaypi apaykachachkanki?
1 Juk hermana, La Atalaya 1 de enero 2008 watamanta revistata, ñawiriytawan jinata nirqa: “¡Kay revistata willaypi runaman saqimunaypuni tiyan!”, nispa. Tukuypaq urqhusqa revistaqa, sumaq yachaqanasniyuq kachkan. ¿Ñawirichkankichu? ¿Yachankichu imaynatachus runaman willaypi saqinaykita?
2 “Jesuspa yachachiykunasnin.” Kay yachachiyqa, runasta Bibliamanta yachachiyta qallarinapaq yanapawasun, ¿icharí? Manaraq jinata ruwachkankichu chayqa, allin kanman jinata ruwanayki: chay yachachiypa titulonta ñawiripuy, chantá ñawpaq kaq parrafoq tukukuyninpi, Jesús nisqanta qhawarichiwaq. Chay runa astawan uyariyta munaptintaq, subtítulos nisqamanta parlawaq, chaykunataq tʼukurichinapaqjina kachkan. Chantapis, chay runata tapuriwaq, pay imatachus chaymanta yuyasqanta, chay dibujosmantapis sutʼinchariwaq, qhipan parrafoman pasanaykipaq. Chay kutipiqa chay yachaqanamanta khuskallanta yachachiwaq, kutispataq chay yachaqanata yachachiyta tukuwaq. Chantapis sumaq wakichisqa riy kay Yachachin librowan yachachinallaykipaqpuni.
3 “Familiaspaq yuyaychaykuna.” Kay yachaqanaqa, qusasta warmista, tatasta ima, yanapan familiapi chʼampaykuna kaptin, Bibliap yuyaychasqanmanjina allinchanankupaq. Kay yachaqanaqa mana cristianos kaqkunatapis yanapan, Bibliapi may sumaq yachachiykuna kasqanta yachanankupaq (2 Tim. 3:16, 17).
4 “Waynaspaq.” Kay yachaqanapiqa, waynasta, sipaskunata ima, mana Bibliamanta astawan yachakunallankutachu nin, manaqa imatachus yachakusqankumanta, yuyasqankumanta ima, wakkunaman willanankuta ima, nin. Chayrayku chay yachaqanaqa willayninchikpi waynasman, sipaskunaman ima, Diospa Palabranta yachakuy may sumaq kasqanta rikuchinapaq, sumaqta yanapawasun (Sal. 119:9, 105). Chantapis, kay: “Tatasmanta wawasman”, yachaqanata, tatasman rikuchiyta atillasunmantaq, chaytaq tatasta wawasninkuman imatachus Bibliapi, wakin runas ruwasqankumanta yachachinankupaq yanapanman. Qamri, ¿chay yachaqanasta wawasniykiwan ñawirichkankichu?
5 Wak yachaqanas. “Ñawiriqkuna yachayta munanku”, kay yachaqanapiqa, juk tapuyman kutichikun, chay tapuytataq, mana cristianos kaqkuna tapukunkuman, chayrayku, wasimanta wasi willanapaq yanapawasun. Kay: “...Carta” nisqapiqa, misioneros chayri wak hermanos, ima chʼampaykunawanchus willayninkupi tinkusqankumanta parlan. Chay willachkasqankuqa, Cristop kutimuyninpi allin willaykuna pachantinpi willakunan juntʼakuchkasqanta rikuchin (Mat. 24:3, 14).
6 Chantapis, “Diosman qayllaykuy”, yachaqanaqa, llampʼu sunqu runasta, Diosmanta astawan yachakunankupaq yanapan, kaytaq Diosmanta Parlayta Yachanapaq, tantakuypi, Biblia ñawirikusqanmanta urqhusqa kachkan. Kay: “Iñiyniyuq kaqkunamanta yachakuna”, yachaqanapiqa, runasta, Biblia runaspa kawsayninmanta parlasqanta yachakunankupaq yanapan, jinamanta ñawirispa, chay runasmanta, —ruwasqankumanta, chʼampayninkumanta, iñiyninkumanta ima— sumaqta tʼukurinankupaq yanapan.
7 ¡Willaypi runaman jaywanapaq, sapa kimsa killa Torremanta Qhawaq revistata japʼiyqa, may sumaqpuni! Chayrayku allin kanman, imasmantachus chaypi parlachkasqanta sumaqta yachananchik, jinamanta kay revistata, willayninchikpi sumaqta apaykachasun.