Willamunapaj yanapa
1. “Runawan Bibliamanta parlarispa” nisqa yachaqana, ¿imapajtaj orqhokun?
1 Wakin kutis, tukuypaj Torremanta Qhawaj revistapi, “Runawan Bibliamanta parlarispa” nisqa yachaqana llojsimun. Orqhokuntaj, 1) Bibliaj yachachisqanta runa japʼikunanpaj jina sutʼinchananpaj, 2) yachachiykunata llampʼu sonqowan sutʼinchayta yachachinawanchejpaj ima (1 Ped. 3:15). ¿Imaynatá kay yachaqana yanapawasunman?
2. ¿Imaynatá chay yachaqanata tapuykunaman kutichinapaj apaykachasunman?
2 Tapuykunaman kutichinapaj. Allin kanman, chay yachaqanayoj Torremanta Qhawaj revistasta jallchʼananchej. Jinamanta yachakojkuna chayri pillapis, chaypi llojsimoj tapuykuna kikinta tapuwajtinchej, chay revistata jaywasunman. Munajtintaj paywan khuska ukhunchasunman. Mana chay revista kapuwanchej chaytaj, Internetpi jw.org nisqamanta uraqachisunman.
3. ¿Imaynatá yachaqanata runawan ukhunchasunman?
3 ¿Imaynatá chay yachaqanata runawan ukhunchasunman? Wakenqa, yachaqanapi hermanoj nisqanta jatunmanta leenku. Piwanchus parlarishan chaytataj, wasiyojpa nisqanta leerinanta ninku. Chayta ruwaspaqa, wasiyojman mana reparayllata imapichus creesqanchejta sutʼinchanku. Wasiyojtaj chayta japʼikuyta atillan (Deu. 32:2).
4. ¿Imatá yachaqanamanta yachakusunman?
4 Yachakunapaj, yachachinapajtaj. “Runawan Bibliamanta parlarispa” nisqa yachaqanasta leeshaspa, willaj hermano ima textostachus rikuchisqanta, imaswanchus sutʼinchasqanta, imaynatachus tʼukurichisqanta chayri parlarisqanta qhawarina. Chantá willashaspa kikinta ruwanapaj kallpachakuna (Pro. 1:5, 6; 9:9). Uj hermana nerqa: “Chay yachaqanata leeyqa, ‘sumaj yachayniyoj’ precursorta rikuy jina, pichus tukuy tapuykunaman kutichiyta atin”, nispa.
5. ¿Imaynatá yachakojta willaypaj wakichisunman?
5 Chay yachaqanaqa, yachakojta willaypaj wakichinanchejpaj yanapawasun. Chaypaj paywan khuska yachaqanata leerisunman, yachakojtaj paypis sutʼinchashanman jina leerinman. Jinamanta creeyninta allin yuyaywan, runa masinta jatunpaj qhawaspataj sutʼinchayta yachakonqa (Col. 4:6). Arí, chay yachaqanaqa Jehovamanta uj sumaj yanapa. Ruwananchejta allinta juntʼanapajtaj yanapawasun (2 Tim. 4:5).