¿Imastataj Diospa Gobiernon ruwanqa?

¿IMASTATAJ DIOSPA GOBIERNON RUWANÑA?

Kay revistaj 8, 9, 10 paginasninpi yachakorqanchej jina, Jesusqa nerqa tʼukuna imas pasananta. Chaytaj sutʼita rikuchin Diospa Gobiernon cielopi sayachisqaña kasqanta, Jesucristotaj Rey kasqanta.

Bibliaqa nin Jesús kamachinanpaj atiyta japʼiytawan Satanasta, supaykunasninta ima cielomanta wijchʼumusqanta. Paykunaqa jallpʼallapiña sajra imasta ruwayta atinku. Chayrayku 1914 watamantapacha tukuy ima astawan sajrayan (Apocalipsis 12:7, 9).

Kay jallpʼapi kausay astawan sajrayashajtinpis, Jesusqa, Diospa Gobiernonpi Rey kasqanrayku, runasta yanapananpaj tukuy imata ruwashan. Jesusqa nerqa mundontinpi Bibliamanta yachachikunanta. Chayrayku ashkha runas Bibliaj nisqanman jina kausakunankupaj kallpachakushanku (Isaías 2:2-4). Paykunaqa yachakunku mana trabajollaman qokunata, familiankuwan sumajta kausakuyta, kapusqallankuwantaj kusisqa kausakuyta. Chantá Bibliamanta yachakusqankurayku kausayninkuta cambianku, Diospa Gobiernonpi kausakunankupajtaj wakichikushanku.

¿IMASTATAJ DIOSPA GOBIERNON TUMPAMANTAWAN RUWANQA?

Jesús cielopi kamachishajtinñapis, kay jallpʼapi runas kamachishallankupuni. Chaywanpis Diosqa, Jesusta kamacherqa: “Qantaj enemigosniyki ukhupi kamachinki”, nispa (Salmo 110:2). Jesusqa tumpamantawan tukuynin enemigosninta chinkarparichenqa, Diosta kasukuyta munajkunaj llakiyninkutapis chinkachenqa.

Chay tiempopitaj Diospa Gobiernonqa kay imasta ruwanqa:

• Llulla religionta chinkachenqa. Llulla religionesmanta parlaspa, Bibliaqa nin khuchi warmi jina kasqanta, tumpamantawantaj chinkachisqa kananta. Llulla religionesqa Diosmanta mana cheqatachu yachachinku, runastataj mayta sufrichinku. Chayrayku chinkachisqa kanqanku. Chinkachisqa kashajtinkutaj ashkha runas mayta tʼukonqanku (Apocalipsis 17:15, 16).

• Jallpʼamanta gobiernosta chinkachenqa. Diospa Gobiernonqa jallpʼamanta tukuy gobiernosta tukuchenqa (Apocalipsis 19:15, 17, 18).

• Sajra runasta chinkachenqa. Sajrallatapuni ruwayta munajkuna, nitaj Diospa Gobiernonman kʼumuykukuyta munajkuna, “kay pachamanta wijchʼusqa kanqanku” (Proverbios 2:22).

• Satanasta supaykunasnintawan chinkachenqa. Satanaswan supaykunasninwanqa manaña ‘nacionesta pantachiyta’ atenqankuchu (Apocalipsis 20:3, 10).

¿Imataj kanqa Diospa Gobiernonpi kausakuyta munajkunapaj?

¿IMASTATAJ DIOSPA GOBIERNON RUNASPAJ RUWANQA?

Jesucristoqa cielopi gobierno kashaspa, ni mayqen gobierno jina tukuy imata runaspaj ruwanqa. Chantapis Jesustaqa yanapanqanku 144.000 reyes, pikunachus jallpʼamanta rantisqa karqanku, chaykuna (Apocalipsis 5:9, 10; 14:1, 3). Jesusqa jallpʼapi Diospa munayninta juntʼachenqa. ¿Imastataj Diospa Gobiernon runaspaj ruwanqa?

• Onqoyta, wañuyta ima chinkachenqa. “Mana pipis nenqachu: Onqosqa kani, nispaqa”, “manañataj wañuy kanqachu” (Isaías 33:24; Apocalipsis 21:4).

• Allin kausaylla kanqa. “Tukuy kawsakonqanku ni imata manchachikuspa; sapa uj samarikuyta atenqa uvasninkoj llanthumpi, jinataj higo sachʼankoj llanthumpi” (Isaías 54:13; Miqueas 4:4).

• Tukuy runas trabajoyoj kanqanku. “Ajllasqasniypis makisninkoj tarpusqanta mikhurikonqanku. Paykunaqa mana qhasipajchu llankʼanqanku” (Isaías 65:22, 23).

• Manaña saqenqachu jallpʼa chʼichichasqa kananta. “Chʼin pampapis, tʼojra pampapis kusikonqanku. Qʼara pampapi kusikuspa, qhallallarishaj rosas jina tʼikanqa” (Isaías 35:1).

• Runasta wiñaypaj kausakunankupaj imatachus ruwanankuta yachachenqa. “Kaymin wiñay kausayqa: Qan kʼata cheqa Diosta rejsisunanku, kachamusqayki Jesucristotapis” (Juan 17:3).

Diosqa munan chay bendicionesta japʼinaykita (Isaías 48:18). Qhepan yachaqanapi yachakunki imatachus kunan ruwanayki kasqanta paraisopi kausakunaykipaj.