“Qamqa precursor regularjina sumaqta llamkʼawaq”
1. ¿Imatataq juk hermana precursora regularjina llamkʼasqanmanta nirqa?
1 Juk hermana, Kathe B. Palm sutiyuq, precursora regularjina unayta llamkʼarqa, Chilepitaq achkha lugarespi willarqa, nirqataq: “Precursora regularjina llamkʼaspa kusiyta tarirqani, achkha bendicionestataq japʼikurqani, ni jaykʼaq ajina wak llamkʼayta tariymanchu karqa”, nispa. Precursoresta ajina kusiyta tarisqankuta rikuspa, ichá pillapis ajinata nisunki: “Qamqa precursor regularjina sumaqta llamkʼawaq”, nispa.
2. Diospaq llamkʼayqa imaraykuchus kusiyta apamusqanta sutʼinchay.
2 Kawsayninchikpi astawan kusiyta tarinchik. Jesuspaqqa Tatanpa munayninta juntʼay kallpachakunanpaq mikhunajina karqa (Juan 4:34). Chayrayku discipulosninman Jehová Diospaq llamkʼayqa, kusiyta, sunqu juntʼasqa kayta ima apamusqanta nirqa. Arí, Diospa munayninta ruwaspaqa, kusiyta tarinchik. Chayrayku runa masinchikta yanapanapaq tiemponchikmanta, kallpanchikmanta, kapuwasqanchikmanta ima astawan quspaqa, astawan kusiyta tarisunchik (Hech. 20:31, 35).
3. Astawan willaq lluqsiptinchik, ¿imataq kusiyta apamullawasunchiktaq?
3 Chantapis, astawan willaq lluqsispaqa, Bibliamanta yachakuyta munaqkunata astawan tarisunchik, chaypis kusiyta apamullawasuntaq. Wakin runas mana uyariyta munasuptinkupis, astawan sumaqta willayta yachakusqaykimanjina tukuy runaswan parlayta atisqaykita reparanki. Chantá precursor regularjina juk watataña llamkʼachkaspa, Escuela del Servicio de Precursor nisqaman riyta atiwaq, imaynatachus runasman willanamanta astawan sumaqta yachakunaykipaq (2 Tim. 2:15). Runasman Diospa Reinonmanta allin willaykunata mana saqispa willallankipuni chayqa, wakin runas chay allin willaykunata japʼikusqankuta rikunki (Ecl. 11:6).
4. Colegiopi yachakuyta tukuchkankuña chayqa, ¿imapitaq allin kanman waynas chayri sipaskuna tʼukurinanku?
4 Wayna chayri sipas, precursor kanaykipi tʼukuriy. Colegiopi yachakuyta tukuchkankiña chayqa, ¿imatachus kawsayniykiwan ruwanaykipi tʼukurinkiñachu? Kunanqa colegioman rinaykipaq, tareasniykita ruwanaykipaq ima tukuy tiempoykita churachkanki. Colegiomanta lluqsiytawan, ¿imamantaq chay tiempoykita churanki? Universidadman yaykunaykipi tʼukurinaykimantaqa, ¿Diosmanta mañakuspa, precursor regular kanaykipi tʼukuriwaqchu? Precursorjina llamkʼaspaqa, imaymana runaswan parlayta, llakiykunata atipayta, tukuy imapaq tiempochakuyta, allinta yachachiyta ima yachakunki, chaytaq tukuy kawsayniykipi yanapasunqa.
5. Waynas, sipaskuna ima precursores kayta munanankupaq, ¿imaynatá tatasninku, qutuchakuypi hermanos ima yanapankuman?
5 Tatas, ¿precursores regulares kanankupaq wawasniykichikta yanapachkankichikchu? Precursorjina llamkʼaymanta allinta parlasqaykichik, sunqu kʼajaywan willamusqaykichik ima, wawasniykichikta yanapanqa Diospa Reinonta ñawpaqta maskʼanankupaq (Mat. 6:33). Ray, colegiomanta lluqsiytawan precursorjina llamkʼayta qallarirqa, nintaq: “Mamayqa precursorjina llamkʼayqa, kusiyta apamusqanta niqpuni”. Qutuchakuypi hermanospis, wakin hermanosta yanapankuman precursores kanankupaq. Españamanta José nin: “Qutuchakuypi hermanosqa, precursorjina llamkʼay waynaspaq may allin kasqanta niqpuni kanku. Precursorjina llamkʼaymanta allinta parlasqanku, precursor kanaypaq yanapawasqanku ima, precursorjina llamkʼayta qallarinaypaq mayta yanapawarqa”, nispa.
6. Precursor kayta munay sunquykipi mana kaptin, ¿imatá ruwawaq?
6 ¿Imaynatá wakin jarkʼaykunata atipawaq? Ichá pillapis ninman: “Precursor kayta munayqa mana sunquy ukhupi kanchu”, nispa. Jinallatataq qampis yuyanki chayqa, juk mañakuypi Diosman jinata niy: “Precursor kayqa manasina ñuqapaqchu. Chaywanpis munayniykita ruwayta munani”, nispa (Sal. 62:8; Pro. 23:26). Chantá, Palabranpi, llaqtanpi ima, yanapanta maskʼay. Achkha precursores regularesqa, ñawpaqta precursores auxiliaresjina llamkʼarqanku, kusiyta tarisqankuta ‘qhawaspataq’, precursores regulares kanankupaq kallpachakurqanku (Sal. 34:8).
7. Sapa killa 70 horasta mana juntʼayta atinaykita yuyanki chayqa, ¿imatá ruwawaq?
7 Wakinkunaqa, sapa killa 70 horasta mana juntʼayta atinankuta yuyanku. Qampis ajinata yuyanki chayqa, ichá wak precursoreswan yuyaychachiykuwaq imaynatachus juntʼanaykipaq (Pro. 15:22). Chantá, achkha horariosta ruwakuy chaykunamanta jukta akllanaykipaq. Wak ruwanasmanta tiempota urqhukuspa, killantinpi 70 horasta juntʼay atinapaqjinalla kasqanta reparanki (Efe. 5:15, 16).
8. ¿Imaraykutaq wakin kuti allin kanman imatachus ruwachkasqanchikpi tʼukurinanchik?
8 Kawsayniykipi imatachus ruwachkasqaykipi tʼukuriy. Kawsayninchikpiqa mana tukuy imapis kikillanpunichu. Sutʼincharinapaq, ¿llamkʼayniykimanta jubilakuytañachu yuyachkanki? Randy niraq jubilakunan kachkaptin llamkʼayninmanta lluqsipurqa, nintaq: “Astawan tiempoyuq kasqayrayku warmiywan khuska precursoresjina llamkʼayta qallarirqayku, chantá maypichus pisi willaqkuna tiyan chayman ripurqayku. Chayta ruwasqaymanta achkha bendicionesta japʼikurqani, chaykunamanta aswan sumaqqa, Diospa ñawpaqinpi allinpaq qhawasqa kasqay”, nispa.
9. ¿Imapitaq casarasqa kaqkuna tʼukurinanku kanman?
9 Wakin qhariwarmisqa, kapusqallankuwan kusisqa kaspa, mana anchata llamkʼanankupunichu kasqanta reparanku. Manaraq unaychu, Johnpa warminqa Diosmanta astawan willananpaq llamkʼayninta saqirqa. Johntaq nin: “Pʼunchaynintinta warmiy Diospaq llamkʼachkasqanta yachasqayqa, mayta kusichiwan”, nispa.
10. ¿Imaraykutaq precursorjina llamkʼaypi tʼukurinanchik tiyan?
10 Munakuyninchikta, iñiyninchikta ima rikuchinchik. Mana ima llamkʼaypis Diosmanta willaywan kikinchakunmanchu, imaraykuchus Jehovaqa runasman willananchikta munan. Tumpamantawan kay saqra pachaqa chinkachisqa kanqa, Diospa sutinta uqhariqkunalla salvakunqanku (Rom. 10:13). Diosta mayta munakusqanchikrayku, Payman may agradecesqas kasqanchikrayku ima, runasman willamunanchikpaq Churin kamachiwasqanchiktaqa, kasukuyta munanchik (Mat. 28:19, 20; 1 Juan 5:3). Astawanpis qhipa pʼunchaykunapipuni kawsachkasqanchikta mana qunqapuspa, tiempo kachkaptillanraq tukuy atisqanchikta runasman willamusunchik, manataq kay pachap imasninpi tiemponchikta usuchisunchikchu (1 Cor. 7:29-31).
11. Pillapis ‘precursorjina sumaqta llamkʼayta atiwaq’ nispa nisuptinqa, ¿imaynatá chay nisusqanta japʼikunayki tiyan?
11 Diosta munakusqanchikrayku precursorjina llamkʼayta munanchik, manataq qanchis chunka horasta juntʼayta munasqanchikraykullachu. Chayrayku pillapis: “Qamqa precursorjina sumaqta llamkʼawaq”, nispa nisuptinqa, chay nisusqanta allinta japʼikuy. Jehovamanta yanapata mañakuy, kusisqa precursoresmanta juknin kanaykipaqtaq allinta yuyaychakuy.
[4 paginapi sutʼinchaynin]
Tatas, ¿precursores regularesjina kanankupaq wawasniykichikta yanapachkankichikchu?
[5 paginapi sutʼinchaynin]
Mana ima llamkʼaypis Diosmanta willaywan kikinchakunmanchu, imaraykuchus Jehovaqa runasman willananchikta munan