Precursor regular kasqaykimanta, ¿yuyakunkichu?
1. May chhika hermanos, ¿ima llamkʼaypitaq kusisqa yanapakurqanku? ¿Imatá wakinkuna ruwarqanku?
1 Watas pasasqanmanjina may chhika hermanos “Cristo Jesusmanta yachachispa”, precursores regularesjina llamkʼarqanku (Hech. 5:42). Chay llamkʼaypi kusisqas kaspapis, wakinkunaqa saqirqanku. Ichá chay llamkʼayta qampis saqirqanki, kawsayniykipi mana tukuy imapis kikillanpunichu kasqanrayku, ¿watiqmanta precursorjina llamkʼanaykipaq tʼukurirqankichu?
2. Precursoresjina ñawpaqta llamkʼaqkuna, ¿imapi watiqmanta tʼukurinkuman?
2 Kawsaypi mana tukuy imapis kikillanpunichu. Ichá precursor regularjina llamkʼayta juk jarkʼay rikhurisqanrayku saqirqanki, kunantaq manaña chay jark’ay kanchu. Ichapis 90 horasta mana juntʼayta atisqaykirayku saqirqanki, kunantaq 70 horasllaña kasqanrayku, ¿manachu watiqmanta precursorjina llamkʼawaq? Ichapis manaña familiaykipaq achkhata llamkʼanaykichu tiyan, chayri manaña achkha ruwanasniyuqchu kanki. Juk hermana unqusqa kasqanrayku, precursorajina llamkʼayninta saqirqa, 89 watasniyuq kachkaspa, wata kuraqtaña hospitalmanta lluqsimusqanmanta, watiqmanta precursorajina llamkʼarqa allillan sientekusqanrayku.
3. Familiapi mayqillanpis precursorjina llamkʼananpaq, ¿imaynatá yanapankuman?
3 Ichá qam precursorjina mana llamkʼarqankichu chaywanpis familiaykimanta pillapis chay llamkʼayninta saqirqa. Ichapis familiaykimanta pillapis unqusqa kasqanrayku, chayri machuyasqa tatasniykita qhawananrayku saqirqa (1 Tim. 5:4, 8). ¿Manachu qam chayri pillapis familiaykimanta precursorjina llamkʼananpaq yanapawaqchik? Allin kanman familiajina kaymanta parlarinaykichik (Pro. 15:22). Familiamanta jukllapis precursorjina llamkʼananpaq yanapaptiykichikqa, tukuypis chay llamkʼaypi yanapakuchkankichik.
4. Watiqmanta precursor regularjina manaraq llamkʼayta atispa, ¿imatá ruwawaq?
4 Precursorjina watiqmanta mana llamkʼayta atisqaykirayku ama phutikuychu. Precursor kayta munasqaykiqa Jehovata mayta kusichin (2 Cor. 8:12). Precursor kachkaspa yachakusqaykiwan, Diosmanta willaypi yanapachikullaypuni. Chantapis precursor kayta munasqaykita Jehovaman mañakuyniykipi willallaypuni, ichá ima ratopis watiqmanta precursor kayta atiwaq, chaypaqtaq wakichisqa kallaypuni (1 Juan 5:14). Qhipamanqa ichapis Jehová “sumaj jatun punku[ta] kichari[sunqa]” precursorjina watiqmanta may kusisqa llamkʼanaykipaq (1 Cor. 16:9 Qheshwa Biblia).