“Khuyakuyniyoj” kanachik
1. ¿Imatá kay tiempopi runas mayta necesitanku?
1 Runasqa ni jaykʼaqjina khuyakuywan yanapanata mayta necesitanku. Kay pachapi kawsay mana allinchu kasqanrayku, runasqa mana kusikuyniyuq, sinchi llakiyniyuq, nitaq suyakuyniyuqchu kanku. Cristianosqa may chhika runas yanapata necesitasqankuta yachanchik, ñuqanchiktaq khuyakuyta rikuchiyta atinchik (Mat. 22:39; Gál. 6:10). ¿Imaynatá runasta yanapayta munasqanchikta rikuchisunman?
2. ¿Imaynamantá khuyakuyniyuq kasqanchikta rikuchisunman?
2 Khuyakuywan willana. Dioslla chiqamanta sunquchawanchik (2 Cor. 1:3, 4). Jehová payjina khuyakuyniyuq kananchikta niwanchik, Diospa Reinonmantataq vecinosninchikman willaq rinata kamachiwanchik (1 Ped. 3:8). Diospa Reinollan ñakʼariykunata chinkachinanta yachasqanchikrayku, willaypi mana saykʼuspa ‘llakisqastaʼ sunquchayta atinchik (Isa. 61:1). Jehová llaqtanta mayta munakusqanrayku, tumpamantawan tukuy saqra ruwaykunata chinkachinqa, musuq pachatataq sayachinqa maypichus chiqan kawsaylla kanqa (2 Ped. 3:13).
3. ¿Imaynamantá Jesusjina runasta qhawasunman?
3 Jesusjina runasta qhawana. Jesús achkha runasman willaspapis, sapa runata jatunpaq qhawaq. Imatachus espiritualmente necesitasqankutapis yacharqa, mana michiqniyuq ovejasjina kasqankuraykutaq pacienciawan yachachirqa (Mar. 6:34). Jesusjina runasta qhawasun chayqa, chiqamanta khuyakuyninchikta rikuchisunchik. Kaytaq imaynatachus paykunawan parlasqanchikpi sutʼita rikukunqa. Chantapis Reinomanta willayta kawsayninchikpi ñawpaqman churasunchik, runaspa llakiyninmanjinataq parlasunchik (1 Cor. 9:19-23).
4. ¿Imaraykutaq khuyakuymanta “pʼachawanjina pʼachalliku[nan]chej” tiyan?
4 May chhika runas tukuy suyusmanta Diospa Reinonmanta willasqanchikrayku, khuyakuyninchikta rikuchisqanchikrayku ima, yachakuchkanku. Khuyakuywan “pʼachawanjina pʼachalliku[ptin]chej”, khuyakuq Jehová Diosninchikta jatunchanchik, kusichinchik ima (Col. 3:12).