CRISTIANO KAUSAYNINCHEJ

Waj parlayniyoj runasman predicanapaj yanapanakuna

Uj qhariwarmi predicashaspa, waj parlayniyoj tatawan wawitanwan ima tinkukushanku

Runasqa parlayninkupi predicajtinchej, astawan uyariyta munawanchej. Chayraykuchá Pentecostés 33 watapi, Jehovaqa “kay mundopi kaj tukuy llajtasmanta” judiosta sumaj willaykunata parlayninkupi uyaricherqa. Ichá chay runasqa, hebreota chayri griegota parlayta yacharqanku (Hch 2:5, 8). Kay tiempopipis, ashkha congregaciones waj parlaypi predicanku, kikin lugarespitaj. Chay congregaciones sapa kuti mana kikin wasillamantaj chayanankupaj, nitaj vecinosta phiñachinankupaj, kay urapi yuyaychakusqanman jina ruwankuman.

Parlarikuna (Pr 15:22): Superintendente de servicio nisqa hermanosqa, parlarinanku tiyan imaynatachus waj parlayniyoj runasman territorionkupi predicanankumanta. Territorio juchʼuylla chayqa, ichapis waj parlaypi predicaj congregacionesqa, parlayninkupi kaj wasista mana predicananchejta niwasun. Jinapis territorionku jatun kajtin, ichá niwasun tukuynin wasista predicanallanchejta, yachakuyta munajkunata tarispataj willarinanchejta (od-S pág. 93 párr. 37). Manachayrí ichapis chay congregacionqa, parlayninkupi runasta maskʼaspa yanaparinanchejta niwasunman. Ajinamanta chay runaspa direccionninkuta registronkupi waqaychanankupaj (km 7/12 pág. 5, recuadro). Yuyarikunataj, uj wasipeqa ichá mana tukuychu uj qallullata parlanku. Territorionchejta imaymanamanta predicajtinchejpis, runasta jarkʼaj leyesman jina ruwananchej tiyan.
Yanapanakuna (Ef 4:16): Superintendente de servicio nisqa hermano, kamachiwasqanchejta kasukunanchej tiyan. Ichapis waj parlayniyoj runaman Bibliamanta yachachishanchej, congregacionninchejtaj mana chay parlaypichu predican. Allin kanman chay runata parlayninpi kaj congregacionman chayri qotituman pasachipunanchej. Ajinamanta astawan ñauparinanpaj.
Wakichikuna (Pr 15:28; 16:1): Predicashaspa waj parlayniyoj runasta tarispaqa, sumaj willaykunata parlayninkupi willarinapaj kallpachakuna. Chaypajtaj predicanchej chaypi, runas ima qallustachus parlasqankuta reparana. Chantá Bibliata, wakin videosta ima parlayninkupi uraqachikuna. Waj parlaypi saludayta yachakunapaj, JW Language nisqawan yanapachikusunman.