Leejkunaj tapuyninku
¿Imajtín 2 Samuel 21:7-9 nin Davidqa Mefibosetta khuyakusqanta, chanta nillantaj Mefibosetta wañuchinankupaj entregaykusqanta?
Chay versiculosta pata patallanta leespaqa noqanchejpis ichá kikillantataj tapukusunman. Jinapis chay versiculospeqa kikin sutiyoj iskay runasmanta parlashan, allinta leerispataj chaymanta uj imata yachakusunman.
Israelmanta rey Saulqa qanchis qhari wawasniyoj, iskay warmi wawasniyojtaj karqa. Kuraj wawanqa Jonatán sutikorqa. Tanta warmin Rizpapipis uj wawan tiyapullarqataj Mefibóset sutiyoj. Jonatanpatapis wawanqa Mefibosetllataj sutikorqa. Chayrayku Saulpa wawanpis allchhinpis Mefibóset sutikorqanku.
Rey Saulqa israelitas ukhupi tiyakoj gabaonitasta chejnikuyta qallarerqa, chinkachiytataj munarqa. Ashkha gabaonitassina wañuchisqa karqanku. Chaytaj nipuni allinchu karqa. Imaraykuchus Josuej tiemponpi Israelmanta kamachejkunaqa, allinyakuy tratota gabaonitaswan ruwarqanku (Jos. 9:3-27).
Chay tratoqa Saulpa tiemponpi valeshallarqaraj. Saultaj chay tratota mana valechispa gabaonitasta chinkachiyta munarqa. Chayrayku Saulwan familianwan ‘juchayoj karqanku yawarta jichʼasqankumanta’ (2 Sam. 21:1). David reyña kajtintaj, puchoj gabaonitasqa Davidman chayta willarqanku. Davidtaj paykunata taporqa imawanchus Saulpa juchanmanta pagayta atisqanta, ajinamanta jallpʼata Jehová bendecinallanpajpuni. Gabaonitastaj mana qolqetachu mañarqanku, astawanpis Saulpa qanchis wawasninta paykunaman entregaykunanta mañakorqanku wañuchinankupaj (Núm. 35:30, 31). Davidtaj mañakusqankuta ruwarqa (2 Sam. 21:2-6).
Chay tiempopaj Saulwan Jonatanwanqa maqanakupi wañorqankuña. Jonatanpa wawan Mefibosettaj kausakushallarqaraj. Payqa kacharparisqankurayku wawitamantapacha suchitu karqa. Chayrayku mana awelonwan khuska imatapis gabaonitaspa contranpi ruwarqachu. Davidtaj amigon Jonatanwan uj tratota ruwasqa. Chay tratotaj wawasninpajwan karqa, wawan Mefibosetpajpis (1 Sam. 18:1; 20:42). Bibliaqa Davidmanta nin: “Reyqa Jonatanpa wawan Mefibosetta khuyakorqa, Saulpa allchhinta, Davidwan Saulpa wawan Jonatanwan Jehová Diospa ñaupaqenpi juramentota ruwasqankurayku”, nispa (2 Sam. 21:7).
Davidqa gabaonitaspa mañakusqankuman jina ruwarqa. Saulpa iskay wawasninta entregaykorqa, ujnenqa karqa Mefibóset, entregaykullarqataj Saulpa phishqa allchhisnintawan (2 Sam. 21:8, 9). Chaywan Davidqa jallpʼapaj chay maldicionta chinkacherqa.
Kayta reparana: Sichus Saulpa chay iskay wawasnin, phishqa allchhisninpis mana juchayojchu kankuman karqa chayqa, Jehovaqa mana saqenmanchu karqa paykunata wañuchinankuta. Diospa Leyninpeqa sutʼita nerqa wawasqa mana tatasninkoj juchasninkurayku wañuchisqachu kanankuta. Astawanpis chay Leypi nin: “Sapa uj juchanrayku wañuchisqa kanqa”, nispa (Deu. 24:16). Chayrayku Saulpa chay iskay wawasnin, chay phishqa allchhisninpis juchayojpunichá karqanku gabaonitasta wañuchisqankumanta. Chay juchankuraykutaj qanchisnintin wañorqanku.
¿Imatá noqanchej chaymanta yachakusunman? Mana pipis juchanta pasachillanmanchu “kamachiwasqallankuta ruwarqani” nispaqa. Astawanpis tukuyninchej Bibliaj kay nisqanta kasukunanchej tiyan: “Purinayki ñantaqa pichay. Chaywanqa ñanniykita allinta purispa ñaupajman rinki” (Pro. 4:24-27; Efe. 5:15).