¿Imaynatá predicaspa aswan kusisqa kasunman?

1. ¿Imaynataj wakin hermanosninchej sientekunku predicaspa? (Fototawan qhawariy).

JEHOVAJ kamachisnenqa Tatanchej Jehovata munakusqanchejrayku, runas payta rejsinankuta munasqanchejrayku predicanchej. Ashkha hermanosmanqa predicay mayta gustan. Wakintajrí mana atillankuchu kusiywan predicayta. ¿Imarayku? Wakenqa ancha manchalis kasqankurayku mana sumajtachu yachachisqankuta yuyanku. Wakintaj mana rejsisqa runaswan parlariyta mana atillankuchu. Wakintaj yuyanku runas mana uyarinankuta. Wakintajrí wawitamantapacha yachakorqanku mana phiñanakusta rikhurichinankuchu kasqanta. Tukuy chay hermanosninchejqa Jehovata maytapuni munakunku. Chaywanpis mana atillankuchu sumaj willaykunata mana rejsisqasman willariyta. Jinapis yachanku chay willayta runasman apananchejpuni kasqanta, chayrayku predicankupuni. Jehovataj maytachá chaymanta kusikun.

2. Predicaspa mana kusisqachu kashanchej chay, ¿imaraykutaj mana desanimakunanchejchu tiyan?

² Noqanchejrí, ¿predicaspa kusisqachu kanchej? Wakin kuti mana kusisqachu kanchej chayqa, ama desanimakunachu. Mana predicayta atisqanchejta yuyaspaqa, kʼumuykukoj sonqo kasqanchejta rikuchishasunman. Ichapis mana munanchejchu runaswan qhawachikuyta, nitaj chʼajwasta rikhurichiytapis. Chantapis ni piman gustawanchejchu runas mana uyarinawanchejqa, astawanraj yanaparillayta munasqanchejrayku. Tatanchej Jehovaqa sumajta yachan imaspichus rikukusqanchejta, yanapariytataj munawanchej (Isa. 41:13). Ajina sientekojtinchej, ¿imataj yanapawasun predicaspa aswan kusisqa kanapaj? Kay yachaqanapi phishqa imasta yachakusun.

DIOSPA PALABRANPI KALLPATA JAPʼINA

3. ¿Maymantataj Jeremías kallpata japʼerqa predicananpaj?

³ Ñaupa tiempomanta Diospa kamachisnenqa, wakin kuti mana atina ruwaykunata japʼerqanku. Imatachus Dios willanankuta kamachisqantaj chayta ruwanankupaj kallpata qorqa. Profeta Jeremiasmanta parlarina. Jehová predicananta kamachejtin, payqa mana atisqanta yuyaspa nerqa: “Noqaqa mana parlayta atinichu. Jovencitollaraj kani”, nispa (Jer. 1:6). ¿Imataj yanaparqa manaña manchachikunanpaj? Diospa nisqan kallpata qorqa. Chayrayku nerqa: “Paypa nisqasnenqa sonqoypi nina jina kʼajarerqa, tullusniy ukhupipis kʼajarishanman jina karqa. Sonqoyta ñitʼiykukuyta munashaspapis mana aterqanichu”, nispa (Jer. 20:8, 9). Maypichus Jeremías predicanan karqa chaypeqa, mana predicayta atinapaj jinallachu karqa. Chanta, ¿imataj kallpata qorqa predicananpaj? Imatachá Dios willananta nisqan.

4. ¿Imaynatá yanapawanchej Diospa Palabranta leey, chaypitaj tʼukuriy? (Colosenses 1:9, 10).

⁴ Noqanchejtapis Diospa Palabranmanta willayqa kallpachallawanchejtaj. Apóstol Pabloqa Colosasmanta cristianosman escribishaspa, Jehovaj munayninta allinta rejsinankumanta parlarqa. Nerqataj chayqa yanapananta “imastachus Jehová Diosta yupaychajkuna ruwanku chay imasta” ruwanankupaj, “allin” kajtataj ruwanankupaj (Colosenses 1:9, 10 leey). Allin kajta ruwaytaj sumaj willaykunata willay. Chayrayku Diospa Palabranta leenapuni, chaypitaj tʼukurina. Ajinamanta Jehovapi creesqanchej astawan sinchʼiyanqa. Aswan sumajtataj entiendesun imaraykuchus Gobiernonmanta willananchej kasqanta.

5. ¿Imatá ruwasunman Bibliawan sumajta yanapachikunapaj?

⁵ Diospa Palabranwan sumajta yanapachikunapajqa mana usqhay usqhayllatachu leerparinanchej chayri estudiarpananchej tiyan. Tʼukurinapajpis tiempochakunanchej tiyan. Bibliamanta uj textota mana allintachu entiendenchej chay, ¿imatá ruwasunman? Mana chayta pasarpapunallachu. Astawanqa Jehovaj testigosnin yachaqanasta maskʼanankupaj nisqa publicacionpi chayri waj publicacionespi maskʼasunman. Chay versiculomanta imatachus sutʼinchakusqanta maskʼana. Sumajta estudianapaj tiempochakusun chayqa, Diospa Palabranpi astawan atienekusun (1 Tes. 5:21). Bibliapi astawan atienekuspataj, imatachus yachakusqanchejmanta kusiywan runasman willarisun.

PREDICANAPAJ SUMAJTA WAKICHIKUNA

6. ¿Imaraykutaj predicanapaj sumajta wakichikunanchej tiyan?

⁶ Predicanapaj sumajta wakichikusun chayqa, runaswan parlariyta atillasun. Jesusqa discipulosninta niraj predicanankupaj kachashaspa, wakicherqaraj (Luc. 10:1-11). Paykunataj Jesús yachachisqanman jina ruwasqankurayku, maytapuni kusikorqanku imastachus ruwasqankumanta (Luc. 10:17).

7. ¿Imaynatá predicanapaj wakichikusunman? (Fototawan qhawariy).

⁷ ¿Imaynatá predicanapaj wakichikusunman? Tʼukurina imatachus ninanchejpi, imaynatachus chayta parlasqanchejman jinalla ninanchejpipis. Chantapis ñaupajmantaña tʼukurinanchej tiyan predicashanchej chaypi imastachus runas ninawanchejpi, imatachus noqanchej kutichinanchejpipis. Ajinamanta runaswan parlarishaspaqa mana manchachikusunchu, atisuntaj asirispa kʼachallamanta paykunawan parlariyta.

8. ¿Imapitaj cristianos tʼuru vasosman rijchʼakunchej?

⁸ Apóstol Pabloqa uj kikinchaywan sutʼincharqa predicajkunamanta parlaspa. Pay nerqa: “Tʼuru vasos jinalla kajtiykupis may sumaj llankʼayta japʼerqayku”, nispa (2 Cor. 4:7). Chanta, ¿imataj chay llankʼay? Diospa Gobiernonmanta predicasqanchej, chay willaytaj runasta salvan (2 Cor. 4:1). Tʼuru vasosrí, ¿pikunawantaj ninakun? Noqanchejwan, sumaj willaykunata willasqanchejrayku. Pabloj tiemponpi comerciantesqa, valorniyoj imasta tʼuru vasospi apaj kanku: mikhunata, vinota chayri qolqeta. Kunanpis Jehovaqa uj sumaj llankʼayta qowanchej, chaytaj sumaj willaykunata willay kashan. Yanapayninwantaj chay willayta runasman apallasunpuni.

MANA MANCHACHIKUNAPAJ JEHOVAMANTA MAÑAKUNA

9. ¿Imatá ruwasunman runasta mana manchachikunapaj? (Fototawan qhawariy).

⁹ Wakin kuteqa ichapis manchachikusunman runas willasqanchejman churanakunawanchejta, chayri mana uyarinawanchejta. ¿Imataj chay kutispi yanapawasunman? Apostolesta manaña predicanankuta kamachejtinku, imatachus Diosmanta mañakusqankupi piensarina. Paykunaqa mana manchachikuyninkuwan atipachikorqankuchu, manaqa Jehovamanta mañakorqanku “palabranta mana manchachikuspa” willanallankupajpuni. Jehovataj chay rato mañakusqankuman kuticherqa (Hech. 4:18, 29, 31). Noqanchejpis runasta manchachikunchej chayqa, Jehovaj yanapayninta mañakuna. Ajinamanta manchikuyninchejta runasta munakusqanchejwan atipanapaj.

10. ¿Ima yanapastaj kapuwanchej predicanallapajpuni? (Isaías 43:10-12).

¹⁰ Jehová ajllawarqanchej testigosnin kananchejpaj, mana manchachikunapajtaj yanapanawanchejta nin (Isaías 43:10-12 leey). Payqa tawanejmanta yanapawanchej. Ñaupaj kaj, sumaj willaykunata willajtinchej Jesús noqanchejwan kashan (Mat. 28:18-20). Iskay kaj, Jehovaqa angelesninwan yanapachiwanchej (Apo. 14:6). Kinsa kaj, espíritu santonta qowanchej imatachus yachakusqanchejta yuyarichinawanchejpaj (Juan 14:25, 26). Tawa kaj, hermanasta, hermanosta churapuwanchej noqanchejwan khuska predicanankupaj. Jehová yanapawasqanchejrayku, hermanosninchejpis munakuywan yanapawasqanchejrayku, manchachikuyninchejta atipayta atisunpuni.

RUNASPA NECESITASQANKUTA REPARANA, KUSIYLLAWANPUNITAJ WILLANA

11. ¿Imatá ruwasunman aswan ashkha runasta tarinapaj? (Fototawan qhawariy).

¹¹ Predicashajtinchej pisi runasllata wasisninkupi tarispa, ¿desanimakuyta yachanchejchu? Jina kajtenqa kaykunata tapurikusunman: “¿Maypitaj runas kashankuman? ¿Trabajashankumanchu chayri mercadopichu kashankuman?”, nispa (Hech. 16:13). ¿Nichu allin kanman callespi predicananchej? Joshua sutiyoj hermano nin: “Sumajpuni riwan mercadospi predicajtiy, autos sayan chaykunapi predicajtiypis”, nispa. Paywan señoran Bridgetwanqa, aswan ashkha runasta wasisninkupi tarinku tardesninta predicaspa, chayri domingo tardesta predicaspa (Efe. 5:15, 16).

12. ¿Imaynatá yachasunman runas imapichus creesqankuta, imatajchus llakichisqantapis?

¹² Predicajtinchej runas mana sumajtachu uyariwanchej chayqa, reparana imapichus creesqankuta, imatajchus llakichishasqantapis. Joshuawan Bridgetwanqa tratadospa tapanpi rikhurin chay tapuykunaman jina runaswan parlariyta qallarinku. ¿Biblia Diospa Palabranpunichu? nisqa tratadota jaywashajtinku niyta yachanku: “Wakin runasqa Biblia Diosmanta jamusqanta ninku, wakintaj ‘mana’ ninku. Qan, ¿imatá niwaj?”, nispa. Ajinamanta ashkha runaswan parlayta atillanku.

13. Predicacionpi ni pipis uyariwajtinchej, ¿imajtintaj kusisqa kayta atisunman? (Proverbios 27:11).

¹³ Predicacionpi allin rinawanchejqa mana runas uyarinawanchejmantachu kashan. Noqanchejqa wajkunaman predicaspa, imatachus Jehovawan Jesuswan kamachiwasqanchejta juntʼashanchej (Hech. 10:42). Chayrayku ni pita predicacionpi tarinchejchu chaypis, chayri mana uyariyta munawajtinchejpis, mayta kusikunchej Tatanchej Jehovata kusichisqanchejmanta (Proverbios 27:11 leey).

14. ¿Imaraykutaj kusikunchej uj hermanonchej Bibliamanta yachakuyta munaj runata tarejtin?

¹⁴ Uj hermanonchej Bibliamanta yachakuyta munaj runata tarejtin, tukuyninchej mayta kusikunchej. Torremanta Qhawaj revistapeqa, llankʼayninchejta uj chinkasqa wawata maskʼaywan kikincharqa. Chay wawataqa ashkha runas tukuy ladota maskʼanku. Tarispataj mana chay wawata tarejllachu kusikun, manachayqa tukuy maskʼajkuna kusikunku. Uj runata Jesuspa discipulonman tukuchinapajpis, congregacionmanta tukuyninchej yanapakunchej. Tukuy runasman chayananchejpajqa, tukuyninchej yanapakunanchej tiyan predicaspa. Uj runa tantakuykunasninchejman jamojtintaj, tukuyninchej kusikunchej.

MUNAKUY YANAPAWANCHEJ

15. ¿Imataj yanapawasun aswan sonqo kʼajaywan predicanapaj? (Mateo 22:37-39; tapapi fototawan qhawariy).

¹⁵ Sichus Jehovata, runa masinchejtapis munakusun chayqa, aswan sonqo kʼajaywan predicasun (Mateo 22:37-39 leey). Jehovaqa maytachá kusikun predicajta rikuwajtinchej. Bibliata estudiayta qallarejkunapis yachakusqankumanta mayta kusikonqanku. Chantapis willayninchejta japʼikojkunaqa salvacionta tarenqanku. Chaytaqa amapuni qonqakunachu (Juan 6:40; 1 Tim. 4:16).

16. Wasinchejmanta mana llojsiyta atispapis, ¿imatá ruwasunman predicaspa kusiyta tarinapaj? Uj experienciamanta parlariy.

¹⁶ Ichapis ima kasqanrayku mana wasinchejmanta llojsiyta atinchejchu. Jina kajtenqa tukuy atisqanchejta ruwana Jehovata, runa masinchejtapis munakusqanchejta rikuchinapaj. Coronavirus onqoy kashajtin, Samuelwan Daniawanqa wasillankupi quedakunanku karqa. Chay llakiy tiempopi kaspapis, paykunaqa telefononejta predicaj kanku, cartasta escribej kanku, Zoomnejtataj runasman Bibliamanta yachachej kanku. Chantapis Samuelqa maypichus cancerninmanta tratamientota ruwaj chay clinicapi predicajpuni. Pay nin: “Llakiykunasninchejqa saykʼuchiwasunman, phutichiwasunman, creeyninchejtapis pruebaman churanman. Chayrayku necesitanchej Jehovata sirvispa kusisqa kayta”, nispa. Chay kutillataj, warmin Daniaqa urmaykusqanrayku kinsa killasta camallapi karqa. Chaymantataj sojta killasta silla de ruedaspi karqa. Pay nin: “Tukuy atisqayta ruwallarqanipuni. Visitawaj chay enfermeraman predicarej kani, mañakusqay imasta wasiykama apamojkunamanpis. Chantapis telefononejta uj señorawan sumajta parlarej kani. Payqa doctoreswan trabajaj empresamanta karqa”, nispa. Reparanchej jina, Samuelwan Daniawanqa ajinapi rikukuspapis, tukuy atisqankuta ruwasqankurayku may kusisqa karqanku.

17. Kay yachaqanapi yuyaychaykuna yanapanawanchejpaj, ¿wakillantachu ruwananchej tiyan?

¹⁷ Kay yachaqanapi yachakusqanchejta tukuyninta ruwasun chayqa, sumajta yanapawasun. Por ejemplo, imata waykʼunapajpis ashkha imitas necesitakun. Miskʼisitu llojsinanpajtaj, chay imitastaqa tukuynintapuni churananchej tiyan. Kay yachaqanapi imastachus yuyaychawasqanchejqa chay imitas jina kanku. Tukuyninta ruwasun chayqa, manaña desanimakusunchu, aswan kusisqastaj predicasun.