Guerrasrayku runas mayta sufrinku
Guerraspis chʼajwaspi maqanakuykunaspis, runasta sinchʼi llakiykunapi rikhurichin. Mundontinmanta soldados, mana soldados kajkunapis guerras chaupipi kasqankurayku mayta sufrinku.
SOLDADOS
Gran Bretañamanta Gary nin: “Guerrapi kayqa manchay fieropuni. Rikorqani runasta imata jina wañurpachisqankuta, wakintataj parti wañusqasta saqerparisqankuta. Ima ratopis wañurpachinawankuta yuyarqani”.
Colombiamanta Wilmar nin: “Wasaypipis uyaypipis baleawarqanku, chaytaj tʼiripacha kashan. Rikorqani may chhika runasta wañuchisqankuta, wawitasta, awelitostapis. Chay imasta guerrapi rikusqayqa sonqoyta rumiyacherqa”.
Estados Unidosmanta Zafirah nin: “Ñaupaqeypi uj runata balearparqanku. Chay runata wañuchisqankutaqa mana qonqayta atinichu. Yuyarikullanipuni nanaywan qhaparikusqanta, ayqosqantapis”.
MANA SOLDADO RUNAS
Ucraniamanta Olexandra nin: “‘Niñachá jaykʼajpis kusisqa kasajchu’ nerqani. Wañuchinawankuta yuyarqani. Astawanqa manchachikorqani familiayta, amigosniyta wañuchinankuta”.
Tayikistanmanta Daler nin: “Mikhunata japʼikunaypaj 2 de la mañanamantapacha 11 de la nochekama filakoj kani. May mancharisqa suyakoj kani, ima ratollapis balearpanawankuta yuyaspa”.
Ruandamanta Marie nin: “Tatasniyta guerrapi wañucherqanku. Sapay qhepakorqani. Ni pi karqachu cuidanawanpaj, ni sonqochanawanpajpis”.
Paykunaqa guerras chaupipi kasqankurayku sufrerqanku, jinapis kunanqa kusisqas kausakushanku. Chantapis mana iskayrayankuchu guerras, chʼajwaspi maqanakuykunapis tumpamantawan chinkananmanta. Kay revistataj Bibliawan sutʼinchawanchej imaynatachus guerras, chʼajwaspi maqanakuykunapis tukukunanta.