Guerras, chʼajwas kajtinpis allinta kausakuyta atisunman
Garyqa ñaupajta ejercitopi kasharqa, pay nin: “Niraj Bibliata estudiashajtiy mana entiendeyta aterqanichu imaraykuchus mundontinpi chay chhika problemas kasqanta, mana justicia kasqanta, runas may jina sajras kasqankutapis. Jinapis kunanqa manaña anchata llakikunichu. Yachani Jehová jallpʼamanta chay tukuy imasta chinkachinanta, allin lugarmantaj tukuchinanta”.
Bibliaqa mana Garyllatachu yanaparqa, manaqa waj runastapis. Qhawarina imaynatachus paykunata yanapasqanta.
BIBLIA NIN: “Jehová Diosníy, qanmin kʼacha kanki, perdonanapajpis wakichisqa kashanki”, nispa (Salmo 86:5).
¿IMAYNATÁ YANAPAWANCHEJ? Colombiamanta Wilmar nin: “Chay palabrasqa yachachiwan Jehová may khuyakuyniyoj kasqanta, chaytaj mana anchata llakikunaypaj yanapawan. Yachani guerrapi kashajtiy imastachus ruwasqaymanta Jehová perdonayta munawasqanta”, nispa.
BIBLIA NIN: “Mosoj cielota, mosoj jallpʼatawan ruwasaj, ñaupa imastaj manaña yuyarisqachu kanqa, manaña sonqomanpis kutirimonqachu”, nispa (Isaías 65:17).
¿IMAYNATÁ YANAPAWANCHEJ? Estados Unidosmanta Zafirah nin: “Ejercitopi kashaspa imatachus rikusqayta nipuni qonqayta atinichu, mayta llakikuni, depresión onqoyniyojtaj kani. Jinapis chay textoqa yuyarichiwan Jehová tumpamantawan imaschus llakichiwan chay imasta qonqachinawanta. Chay imasqa manaña sonqoyta nanachiwanqachu. Chaypachamá manaña llakikusajchu”, nispa.
BIBLIA NIN: “Pay kamachishajtenqa cheqan runas tʼikarenqanku. Allin kausaytaj wiñaypaj kanqa, cielopi killa mana kanankama”, nispa (Salmo 72:7).
¿IMAYNATÁ YANAPAWANCHEJ? Ucraniamanta Olexandra nin: “Chay textoj nisqanpi kutin kutinta tʼukurini. Tumpamantawan guerraspis, ima llakiykunastachus rikhurichin chay imaspis chinkanqa. Chantapis niña llakikusunchu familiaresninchejta imatapis ruwarparinankumanta”, nispa.
BIBLIA NIN: “Wañusqasniykeqa kausarimonqanku. […] Rijchʼariychej, kusiywan qhapariychej jallpʼa ukhupi kajkuna”, nispa (Isaías 26:19).
¿IMAYNATÁ YANAPAWANCHEJ? Ruandamanta Marie nin: “Tutsi ayllumanta kajkunata kantumanta wañuchishajtinku casi tukuynin familiayta wañucherqanku. Jinapis chay textoqa sutʼita reparachiwan familiaywan watejmanta tinkukapunayta. Chay día chayamunallantaña munani kusisqas parlasqankuta watejmanta uyarinaypaj”, nispa.
BIBLIA NIN: “Uj chhikamantawanqa niña sajra runas kanqankuñachu. [...] Llampʼu sonqoyoj runastajrí kay jallpʼata herenciata jina japʼenqanku, ni ima llakiyniyojtaj allin kusisqa kausakonqanku”, nispa (Salmo 37:10, 11).
¿IMAYNATÁ YANAPAWANCHEJ? Tayikistanmanta Daler nin: “Kaypi guerra tukukojtinñapis manaraj justicia kanchu, sajra runaspis kashallankupuni. Jinapis chay texto mayta kallpachawan. Jehovaqa tukuy imata qhawamushan, sumajtataj entiendewan. Chantapis Jehová niwanchej chay tukuy imasta chinkasqata chinkachinanta”, nispa.
Kay revistapi experienciasninkuta willariwarqanchej chaykunaqa, kunan Jehovaj testigosnin kanku. Mundontinpeqa may chhika testigos tiyan. Paykunaqa Bibliata estudiasqankurayku manaña anchata manchikunkuchu. Ñaupajtaqa ichapis wajkunata chejnikoj kanku piwanpis japʼinakusqankurayku, waj ayllumanta, waj nacionmanta kasqankurayku chayri rijchʼayninkurayku. Jinapis yachakorqanku manaña pitapis chejnikuyta (Efesios 4:31, 32). Jehovaj testigosnenqa mana politicaman satʼikuykuchu, nitaj guerraspi, ni maqanaku chʼajwaspipis yanapakuykuchu (Juan 18:36).
Jehovaj testigosnenqa mundontinpi uj familia jinalla kayku, purajmantataj yanapanakuyku (Juan 13:35). Olexandramanta parlarerqanchejña, payqa nacionninpi guerra kasqanrayku hermananwan khuska waj nacionman ayqekorqa, pay nin: “Fronterata pasajtiykukama chay nacionmanta testigoswan tinkorqaykupacha, paykunaqa chunka makiwan japʼikuwarqayku. Yanapawasqaykuraykutaj chay nacionman yachaykukuyta atillarqayku”.
Tantakuykunasniykuman jamuriy. Chaypeqa astawan yachakunki imatachus ruwanaykita sonqo tiyasqa kanaykipaj, yachakullankitaj Dios allin kausayta apamusaj nisqanmanta. Tiyakunki chay qayllapi maypichus tantakusqaykuta yachanaykipajqa, internetpi jw.org nisqapi maskʼay. Chay paginapeqa mañakullawajtaj mana pagaspalla Bibliamanta yachachisunankuta, jinapi Jehovaj testigosninmanta ujnin Bibliamanta yachachisonqa Wiñaypaj kusisqa kausakuy librowan.