7 YACHAQANA
15 TAKIY Jatunchasqa Cristo
Jehovaj perdonnin sapa ujta yanapawanchej
“Diosníy, perdonaspaqa perdonaytapuni yachanki” (SAL. 130:4).
TEMA
Bibliapi wakin kikinchaykunata qhawarisun imaynatachus Jehová sapa ujninchejta perdonawasqanchejmanta. Kay yachaqanaqa yanapawasunchej Jehovaj perdonninmanta astawan agradecekunapaj.
1. Pillapis “perdonayki” niwajtinchej, ¿imaraykutaj mana yachayta atillasunmanchu imatapunichus niyta munashawasqanchejta?
PEJ sonqontapis nanachejtinchej pay “perdonayki” nispa niwajtinchejqa, sonqonchej phaj nirin. Pero chayta niwajtinchej, ¿imatapunitaj niyta munashawanchej? Mana tukuychu perdonmanta kikinta yuyasqanchejrayku, wakin kutis mana yachayta atisunmanchu imatachus niyta munashawasqanchejta. Chaywanqa ichapis niyta munashawanchej ñaupajta jinallapuni sumaj amigos kananchejta. Chayri ichá niyta munashawanchej chayta qonqapullaytaña munasqanta, niñataj ñaupajta jinachu amigos kananchejta.
2. ¿Imatá Biblia nin Jehovaj perdonninmanta? (Sutʼinchaynintawan qhawariy).
2 Jehovatajrí mana runas jinallachu perdonawanchej. Uj salmista nerqa: “Diosníy, perdonaspaqa perdonaytapuni yachanki. Chaywan runaspa sonqonta suwanki tukuy sonqo respetasunankupaj”, nispa (Sal. 130:4).a Arí, Jehovaj perdonnenqa mana mayqen perdón jinallachu. Payqa ‘perdonaspa perdonanpuni’. Pay jina perdonayta munanchej chayqa, imaynatachus perdonasqanta sumajta entiendenanchej tiyan. Hebreo Qhelqasqaspeqa wakin kutis uj palabrata oqharin Jehovaj perdonnillanmanta parlananpaj, nitaj chay palabrata oqharinchu runas perdonasqankumanta parlananpaj.
3. ¿Imaraykutaj Jehovaj perdonnin mana runaspa perdonnin jinachu? (Isaías 55:6, 7).
3 Pitapis Jehová perdonan chayqa, juchanta qʼalata chinkachin, saqentaj watejmanta sumaj amigon kananta. Jehovaqa mana michʼakuspa perdonasqata perdonan. Chayqa tʼukunapaj jinapuni (Isaías 55:6, 7 leey).
4. ¿Imatataj Jehová Palabranpi churachipuwarqanchej perdonasqatapuni perdonawasqanchejta entiendenapaj?
4 Jehovaj perdonnin mana pantaj runaspa perdonnin jinachu kasqanrayku, mana sapallanchejmanta entiendeyta atisunmanchu imaynatapunichus Jehová perdonasqanta. Chaywanpis Jehovaqa chayta astawan entiendenapaj ashkha kikinchaykunata Palabranpi churachipuwarqanchej. Kay yachaqanapi wakinkunamanta parlarisunchej. Ajinamanta reparasun imastachus Jehová ruwasqanta juchasta chinkachinanpaj, watejmantataj amigosnin kayta atinanchejpaj. Chayta yachakuytaj yanapawasunchej Jehovata astawan munakunapaj, astawantaj agradecekunapaj kʼacha kasqanmanta, khuyakuwasqanchejmanta ima. Payqa imaymanasmanta perdonawanchej.
JEHOVÁ JUCHASTA APAKAPUN
5. ¿Imatá Jehová ruwan juchasninchejwan?
5 Bibliaqa juchasta ashkha kutispi llasa qʼepiswan kikinchan. Rey David nerqa: “Pantasqasneyqa umay patata wasarishan, llasa qʼepi jina ancha llasapuni noqapajqa”, nispa (Sal. 38:4). Jinapis Jehovaqa juchasninkumanta arrepientekojkunata perdonan (Sal. 25:18; 32:5). Kay versiculospi ‘pedonay’ nispa traducikun chay palabraqa, hebreo parlaypi niyta munan “oqhariy” chayri “apay”. Chayqa yuyachiwanchej Jehová uj kallpasapa runa jina kasqanta, juchanchej uj llasa qʼepi jina mayta llasaykushawajtinchejtaj oqharispa apakapusqanta.
“Perdonawarqanki” (Sal. 32:5).
6. ¿Maymantaj Jehová juchasninchejta apakapun?
6 Chanta, ¿maymantaj Jehová juchasninchejta apakapun? Salmo 103:12 chayta sumajta entiendenapaj yanapawanchej. Chaypi nin: “Imaynatachus inti llojsimuy ladoqa may jina karupi kashan inti yaykuy ladomanta, ajinata Diosqa pantasqasninchejta noqanchejmanta may jina karuman churan”, nispa. Inti llojsimuy ladoqa inti yaykuy ladomanta may jina karupipuni kashan. Ni jaykʼaj tinkunkumanchu, manchay karupipuni kasqankurayku. Chayrayku kay versiculoqa entiendechiwanchej Jehovaqa juchasninchejta perdonaspa may jina karumanpuni apakapusqanta. Chayta yachaytaj mayta sonqochawanchej.
“Inti llojsimuy ladoqa may jina karupi kashan inti yaykuy ladomanta” (Sal. 103:12).
7. ¿Imatataj Jehová ruwan juchasninchejwan? (Miqueas 7:18, 19).
7 Jehová juchasninchejta karuman apakapuspa, ¿waqaychakunchu? Mana. Rey Ezequías nerqa: “Tukuy juchasniyta qonqayman churanki”, nispa. Sutʼinchayninpitaj nin: “Tukuy juchasniyta ñaupaqeykimanta chinkachinki”, nispa (Isa. 38:9, 17, sutʼinchaynin). Juchasninchejmanta arrepientekojtinchej Jehovaqa chayta ñaupaqenmanta karuman choqan, manaña jaykʼaj ujtawan rikunanpaj jina. Chayrayku kay versículo ajinamanta traducikullanmantaj: “Juchasniytaqa chinkachinki manapis ni jaykʼaj juchallikuymanchu jina”, nispa. Chayta aswan sumajta entiendenanchejpaj, Bibliaqa Miqueas 7:18, 19 (leey) versiculospi uj kʼachitu kikinchayta oqharin. Chaypeqa nin Jehová tukuy juchasninchejta mar qocha ukhuman wijchʼuykusqanta. Ñaupa tiempopi imapis mar qocha ukhuman chinkaykojtin, niña chaymanta jaykʼajpis orqhokapuyta atejchu kanku.
“Tukuy juchasniyta ñaupaqeykimanta chinkachinki” (Isa. 38:17, sutʼinchaynin).
“Qanqa tukuynin juchasninkuta mar qocha ukhuman wijchʼuykunki” (Miq. 7:19).
8. ¿Imatataj kaykama Jehovaj perdonninmanta yachakunchej?
8 Chay kikinchaykuna entiendechiwanchej, Jehovaqa juchasninchejta perdonaspa patanchejmanta uj llasa qʼepita jina apaqaspa karuman apakapusqanta. David nerqa jinapuni, “kusisqa kanku sajra ruwasqasninkuta Dios perdonajtin, kusisqallataj kanku juchasninkuta Dios pampachajtin. Kusisqamin runaqa, Jehová Dios juchanta qonqayman churajtin” (Rom. 4:6-8). Chaymá perdonayqa.
JEHOVÁ JUCHASTA CHINKACHIN
9. ¿Ima kikinchaykunawantaj Jehová entiendechiwanchej juchasninchejta qʼalatapuni perdonasqanta?
9 Kunanqa waj kikinchaykunatañataj Bibliapi qhawarina, chaykuna yanapawasun aswan sumajta entiendenapaj imaynatachus Jehová Jesuspa wañuyninmanta valekuspa arrepientekojkunaj juchasninkuta qʼalata chinkachisqanta. Bibliaqa nin Jehová juchasta mayllaspa juchallikojta llimphuchasqanta (Sal. 51:7; Isa. 4:4; Jer. 33:8). Chayta ruwasqanrayku imachus kasqanmanta Jehová nin: “Juchasniykichej ancha puka kajtinpis, ritʼi jina yurajman tukonqa. Juchasniykichej puka tela jina kajtinpis, yuraj millma jina kanqa”, nispa (Isa. 1:18). Ima ropallatapis manchay pukawan pintaykojtinchej mana chayta orqhoyta atillanchejchu. Jehovaqa chay kikinchaywan entiendechiwanchej juchasninchejta qʼalatapuni chinkachisqanta.
“Juchasniykichej ancha puka kajtinpis, ritʼi jina yurajman tukonqa” (Isa. 1:18).
10. ¿Ima kikinchaywantaj Jehová entiendechiwanchej juchasninchejta mana michʼakuspa perdonasqanta?
10 Ñaupaj yachaqanapi yachakorqanchej jina, juchasqa manus jina kanku (Mat. 6:12; Luc. 11:4). Chayrayku Jehovaj contranta sapa juchallikuspa, sapa kuti aswan manu rikhurishanchej. Chaywanpis Jehovaqa juchasninchejta perdonaspa, may chhika manunchejtapis perdonapuwasunman jina ruwan. Chayraykutaj manaña payman manuchu kanchej. Arí, Jehová juchasninchejta perdonawanchej chayqa, manaña chaymanta uj manuta jina cobrawanchejchu. Chay jinata Jehová perdonawasqanchejta yachayqa mayta sonqochawanchej.
“Manuchakusqaykutapis perdonawayku” (Mat. 6:12, sutʼinchaynin).
11. ¿Imaynatá Jehová juchasninchejta chinkachin? Kikinchariy (Hechos 3:19).
11 Jehovaqa juchasninchejta perdonaspa, mana imaynatachus uj manuta perdonaspa papelpi raqhaykunku ajinallatachu ruwan, manaqa qʼalata chinkachin (Hechos 3:19, sutʼinchaynintawan leey). Uj runa uj manuta perdonaspaqa, maypichus chay manu anotasqa kasharqa chay numerosta raqhaykunman, ajinapis chay numerosqa yachakunmanraj. Bibliataj mana uj manuta raqhaykuymanta jinallachu parlashan, manaqa qʼalata chinkachiymanta. Ñaupa tiempopeqa carbontawan, gomatawan, yakutawan chajruspalla tintata ruwaj kanku. Chayrayku chay tintawan escribisqataqa, uj joqʼo esponjallawan borrayta atikoj. Chayrayku uj manuta perdonaspaqa mana raqhaykullajchu kanku, manaqa qʼalata borrapoj kanku. Niña ni ima rikukusqanrayku, mana pipis yachayta atejchu mashkhachus chaypi anotasqa kasqanta. Chay manoqa ni jaykʼajpis kanmanchu jina karqa. Jehovapis juchasninchejta perdonaspa ajinata qʼalata chinkachin, chayta ruwasqanmantataj maytapuni agradecekunchej (Sal. 51:9).
“Juchasniykichej chinkachisqa kananpaj” (Hech. 3:19, sutʼinchaynin).
12. ¿Imatataj yachakunchej Isaías 44:22 versiculopi kaj kikinchaymanta?
12 Isaías 44:22 versiculopi Jehová waj kikinchaymanta parlan imatachus juchasninchejwan ruwasqanta entiendenapaj. Chaypi nin: “Pantasqasniykitaqa chinkarichisaj phuyupis pakaykunman jina. Juchasniykitapis chinkarichisaj yana phuyupis tapaykunman jina”, nispa. Jehovaqa juchasninchejta perdonaspa, yana phuyuwanpis tapaykunman jina ruwan. Ajinamanta mana pipis chayta watej rikunanpaj.
“Pantasqasniykitaqa chinkarichisaj phuyupis pakaykunman jina” (Isa. 44:22).
13. ¿Imayná sientekunchej Jehová juchasninchejta perdonapuwajtinchej?
13 ¿Imatá chay kikinchaykunamanta yachakunchej? Jehová juchasninchejta perdonawajtinchejqa, mana yuyananchejchu tiyan anotasqapis kanman jina qhepakusqanta. Juchasninchej Jesucristoj yawarninwan pagasqa kasqanrayku, manaña watejmanta pagananchejchu tiyan. Juchasninchejqa qʼala chinkachisqa, manapis ni jaykʼaj juchallikusunmanchu jina. Ajinata Jehovaqa juchasninchejta chinkachin arrepientekojtinchej. Payqa perdonasqatapuni perdonawanchej.
JEHOVAQA WATEJMANTA AMIGOSNINPAJ JAPʼIKUWANCHEJ
Tatanchej Jehová perdonawasqanchejqa paywan sumaj amigos kanapaj yanapawanchej (14 parrafota qhawariy).
14. ¿Imaraykutaj ninchej Jehová perdonawasqanchejtapuni? (Fotostawan qhawariy).
14 Jehová perdonawajtinchejqa ama iskayrayanachu pay watejmanta amigonchej kasqanmanta. Chayta yachasqanchejrayku manaña sonqonchej juchachawanchejchu. Chantapis mana yuyanchejchu Jehová noqanchejpaj phiñasqallapuni kashasqanta, chayri waj kutipi chaymanta castiganawanchejta. Mana jaykʼajpis Jehová chayta ruwanqachu. ¿Imaraykú chayta ninchej? Pay kikin profeta Jeremiasman nerqa: “Noqaqa pantasqankuta perdonasaj, manañataj juchankumanta yuyarikusajchu”, nispa (Jer. 31:34). Apóstol Pabloqa chay nisqanta oqharerqa kayta nispa: “Manañataj juchasninkumanta yuyarikusajchu” (Heb. 8:12). ¿Ima niytá munan chay palabras?
“Manañataj juchankumanta yuyarikusajchu” ( Jer. 31:34).
15. ¿Ima niytá munan Jehová niña jaykʼajpis juchasninchejta yuyarikunanta nisqan?
15 Bibliapi yuyarikuy palabraqa mana imachus kasqanta yuyarikuymantapunichu parlashan. Wakin kutisqa niyta munan pimantapis yuyarikuspa payrayku imatapis ruway. Jesuspa ladonpi kʼaspipi clavasqa kasharqa chay suwa runaqa, Jesusta nerqa: “Gobiernoykiman yaykuspa noqamanta yuyarikunki ari”, nispa (Luc. 23:42, 43). Chaywanqa mana nisharqachu Gobiernonman yaykuspa paymanta yuyarikunallanta. Jesustaj payman entiendecherqa paymanta yuyarikuspa kausarichimunanta. Chayrayku Jehová juchanchejta manaña yuyarikunanta nisqanqa, niyta munan chay juchanchejrayku mana imatapis contranchejpi ruwananta, niñataj chayta yuyarichinawanchejta, ni kunan, ni qʼaya, nitaj jaykʼajpis. Payqa juchanchejta perdonasqata perdonan.
16. ¿Imaynataj sientekunchej Jehová perdonawajtinchej?
16 Jehová perdonawajtinchejqa kacharichisqa jina sientekunchej. Chayta astawan entiendenapaj Bibliapi waj kikinchaymantañataj yachakuna. Tukuypis pantaj runas kasqanchejrayku, “juchaj esclavosnin” kanchej. Jehová juchasninchejta perdonawajtinchejtaj, “juchamanta kacharichisqa kanchej” (Rom. 6:17, 18; Apo. 1:5). Jehová juchasninchejta perdonawasqanchejta yachayqa, manchaytapuni kusichiwanchej, imaynatachus uj esclavopis kacharichisqa kaspa mayta kusikun ajinata.
“Juchamanta kacharichisqa kasqaykichejrayku” (Rom. 6:18).
17. ¿Imaraykutaj ninchej Jehová perdonawajtinchej uj onqoymanta jina sanoyachiwasqanchejta? (Isaías 53:5).
17 (Isaías 53:5 leey). Waj kikinchaymantawan parlarina. Bibliaqa nin juchaqa wañuchej onqoy jina kasqanta. Jehovataj chay onqoyninchejmanta sanoyachiwanchej Wawanpa wañuyninnejta (1 Ped. 2:24). Ajinamanta watejmanta paywan amigos kayta atinchej, niñataj juchanchej paymanta karunchawanchejchu. Uj sinchʼi onqoyniyoj runaqa sanoyapuspa manchaytapuni kusikun, ¿icharí? Noqanchejpis ajinallatataj kusikunchej Jehová perdonawajtinchej, paywan watejmanta allin kanapajtaj yanapawajtinchej.
“Nanasqasninrayku sanoyachisqa kanchej” (Isa. 53:5).
JEHOVAJ PERDONNIN MAYTA YANAPAWANCHEJ
18. ¿Imatataj Jehovaj perdonninmanta yachachiwanchej kunan estudiarqanchej chay kikinchaykuna? (“¿Imaynatá Jehová perdonawanchej?” nisqa recuadrotawan qhawariy).
18 ¿Imatataj Jehovaj perdonninmanta yachachiwanchej kunan estudiarqanchej chay kikinchaykuna? Jehová perdonawajtinchejqa juchasninchej qʼalata, wiñaypajtaj chinkasqanta. Tatanchej Jehová perdonawasqanchejqa paywan may sumaj amigos kanapaj yanapawanchej. Chaywanpis kayta ama qonqanachu: Ni pipis Jehovaj perdonninta japʼinapaj jinachu kanchej, nitaj pipis payman nisunmanchu “perdonanawaykipuni tiyan” nispaqa. Astawanpis Jehovaj perdonnenqa uj regalo. Chaytataj qowanchej munakuwasqanchejrayku, may kʼachataj kasqanrayku (Rom. 3:24).
19. 1) ¿Imamantataj agradecekunchej? (Romanos 4:8). 2) ¿Imatataj qhepan yachaqanapi yachakusunchej?
19 (Romanos 4:8 leey). Maytapuni agradecekunchej Jehová “perdonaspaqa perdonaytapuni” yachasqanmanta (Sal. 130:4). Chaywanpis Jehová perdonanawanchejpajqa, Jesuspa kay nisqanta ruwananchejpuni tiyan. Pay nerqa: “Manachus contraykichejta juchallikojkunata perdonankichej chayqa, manallataj Tataykichejpis juchasniykichejta perdonasonqachejchu”, nispa (Mat. 6:14, 15). Chayrayku Jehová jina perdonananchejpuni tiyan. Qhepan yachaqanapi yachakusun imaynatachus chayta ruwanata.
46 TAKIY Gracias Tatayku Jehová
a Salmo 130:4 versiculopi hebreo parlaypeqa mana mayqen perdonllamantachu parlashan. Chaypeqa nin Jehová “perdonaspaqa perdonaytapuni” yachasqanta. Diospa Palabran Biblianchejpitaj mana waj Bibliaspi jinachu “perdonan” nispalla nin.