Jehová perdonasusqanmanta ama iskayrayaychu

1, 2. ¿Imatá Jehová ruwan arrepientekojtinchej, chayta yachaspa imaynataj sientekunchej? (Tapapi dibujotawan qhawariy).

REY Davidtaqa sonqon maytapuni juchacharqa ñaupajpi jatun juchasta ruwasqanmanta (Sal. 40:12; 51:3 qallariynin). Jinapis sonqomantapacha arrepientekusqanrayku Jehová perdonarqa (2 Sam. 12:13). Jehová perdonasqanta yachaspataj maytapuni kusikorqa, sonqonpis phaj nirerqa (Sal. 32:1).

² Noqanchejpis Jehová perdonawasqanchejta yachaspaqa David jinallataj kusikunchej, sonqonchejtaj phaj nirin. Jatun juchasta ruwajtinchejpis sonqomantapacha arrepientekojtinchej, chay juchanchejta willakojtinchej, manaña chay juchata ruwanapajtaj tukuy atisqanchejta kallpachakojtinchej Jehovaqa perdonawanchej. Chayta yachaytaj sonqonchejta tiyaykuchin (Pro. 28:13; Hech. 26:20; 1 Juan 1:9). Jehovaqa juchasninchejta perdonaspa qonqasqata qonqapun. Ñaupaqenpeqa manapis ni jaykʼaj juchallikusunmanchu karqa jina kanchej. Chayta yachaytaj maytapuni sonqochawanchej (Eze. 33:16).

3, 4. 1) ¿Imaynataj Jennifer kasharqa? 2) ¿Imatá kay yachaqanapi yachakusun?

³ Ichapis wakin kuteqa mana creeyta atillasunmanchu Jehová perdonawasqanchejta. Ajina karqa Jenniferwan. Payqa wawitamantapacha Jehovamanta yachakorqa, sipasyashaspataj maytapuni pierdeykukorqa, pakayllamantataj sajra imasta ruwarqa. Watasninmantaj Jehovaman kutinporqa, tiempowantaj bautizakorqa. Pay nin: “Ñaupajtaqa qolqe ganayllaman qokorqani, piwanpis puriykullaj kani, machayman qokorqani, manchay phiñataj karqani. Chay juchasniymantaqa perdonta mañakorqaniña, arrepientekorqaniñataj. Chayrayku umaypeqa yuyaj kani Cristoj wañuyninrayku Jehová perdonawasqantaña, sonqoytajrí juchachallawajpuni”, nispa.

⁴ Ichá noqanchejpis ñaupajpi jatun juchasta ruwarqanchej, sonqonchejpitaj iskayrayanchejraj Jehová perdonawasqanchejmanta. Jina kajtenqa yuyarikuna imatachus Jehová munasqanta. Payqa munan khuyakuwasqanchejmanta, perdonawasqanchejmantapis David jina mana iskayrayananchejta. Kay yachaqanapi yachakusun imaraykuchus Jehová perdonawasqanchejmanta mana iskayrayananchejchu kasqanta, imatajchus mana iskayrayanapaj yanapanawanchejta.

¿IMARAYKÚ JEHOVÁ PERDONAWASQANCHEJMANTA MANA ISKAYRAYANACHU?

5. ¿Imatataj Satanás creechiyta munawanchej? Corinto congregacionmanta parlariy.

⁵ Jehová perdonawasqanchejmanta mana iskayrayasunchu chayqa, mana Satanaspa trampanpi urmasunchu. Payqa tukuy imata ruwan Jehovamanta karunchanawanchejpaj. ¿Imataj ujnin trampan? Creechiyta munawanchej manchay jatun juchatapuni ruwasqanchejta, Jehovataj ni jaykʼaj perdonanawanchejta. Ajina karqa Corinto congregacionmanta uj runawan. Payqa khuchichakuy juchapi urmasqanrayku congregacionmanta orqhosqa karqa (1 Cor. 5:1, 5, 13). Chaymantataj arrepientekorqa. Jinapis Satanasqa mana munarqachu hermanos perdonanankuta, nitaj congregacionman kutinpojta saqenankutapis. Ajina kajtintaj Satanasqa chay runata yuyachinman karqa juchan mana perdonniyoj kasqanta. Chayraykutaj “anchata llakikusqanwan” atipachikunman karqa, niñataj Jehovata sirvinmanchu karqa. Kunankamapis Satanasqa kikillantapuni ruwashan, noqanchejtajrí yachanchej “ima mañasniyojchus pay kasqanta” (2 Cor. 2:5-11).

6. ¿Imataj yanapawasunman manaña sonqonchej juchachanawanchejpaj?

⁶ Jehová perdonawasqanchejmanta mana iskayrayasunchu chayqa, manaña sonqonchej juchachawasunchu. Juchallikojtinchejqa sonqonchej juchachawanchejpuni (Sal. 51:17). Chaytaj allin, imajtinchus yanapawanchej cambianapaj, allin kajtataj ruwanapaj (2 Cor. 7:10, 11). Jinapis arrepientekusqanchejmantaña sonqonchej juchachallawasunmanpuni chayqa, desanimakusunman, Jehovatataj niña sirvisunmanchu. Jehová perdonawasqanchejmanta mana iskayrayasunchu chaytaj, niña sonqonchej juchachawasunchu. Ajinamanta Jehovata munasqanman jina sirvisunchej llimphu sonqowan, may kusiywantaj (Col. 1:10, 11; 2 Tim. 1:3). Kunan qhawarina Jehová perdonawasqanchejmanta mana iskayrayanapaj imachus yanapanawanchejta.

¿IMÁ YANAPAWASUNMAN JEHOVAJ PERDONNINMANTA MANA ISKAYRAYANAPAJ?

7, 8. ¿Imatá Jehová pay kikinmanta nerqa Éxodo 34:6, 7 versiculospi, chanta imaynatá chay nisqan yanapawanchej?

⁷ Jehová imayna Dioschus kasqanta willariwasqanchejpi tʼukurina. Yuyarikuna imatachus Sinaí orqopi Moisesman nisqanta (Éxodo 34:6, 7 leey).a Jehovaqa imaynachus kasqanmanta ashkha imasta niyta atinman karqa. Jinapis “khuyakoj Dios, kʼacha sonqoyoj” Dios kasqanta willaspa rejsichikorqa. ¿Ajina Dios kasqanta nishaspachu payta munakojkunata, juchankumanta arrepientekojkunata mana perdonanman? Sichus Jehová mana perdonanman chayqa, sajra Dios kanman. Jehovataj mana ajina Dioschu.

⁸ Jehovaqa ni jaykʼaj llullakunchu. Chayrayku khuyakoj Dios kasqanta nispaqa mana llullakushawanchejchu (Sal. 31:5). Jehová perdonawasqanchejta mana creeyta atishallanchejchu chayqa, kayta tapurikuna: “¿Creenichu Jehová khuyakoj Diospuni, kʼacha sonqoyoj Diospuni kasqanta, juchankumanta arrepientekojkunatataj perdonasqantapuni?”. Chayta creenchej chayqa, amallataj iskayrayanachu Jehová noqanchejtapis perdonawasqanchejmanta.

9. ¿Imatá Salmo 32:5 yachachiwanchej Jehovaj perdonninmanta?

⁹ Jehová perdonawasqanchejmanta imatachus Biblia nisqanpi tʼukurina. David nerqa: “Diosníy, pantasqasniyta, juchasniytapis perdonawarqanki”, nispa (Salmo 32:5 leey). Hebreo parlaypi chay versiculomanta “perdonay” palabraqa niyta munallanmantaj “qʼepiraysiy” chayri “apaysiy”. Chaywanqa Jehová nisharqa Davidta perdonaspa qʼepinta qʼepiraysispa pay apapusqanta. Jehovaqa juchanta perdonasqata perdonarqa. Chayta yachaspa Davidqa manchay kusisqa kasharqa (Sal. 32:2-4). Sichus noqanchejpis tukuy sonqo arrepientekusun chayqa David jinallataj kasun. Manaña juchasninchejta llasa qʼepita jina apananchejchu kanqa, Jehová chay qʼepinchejta apakapusqanrayku.

10, 11. ¿Imatá Salmo 86:5 yachachiwanchej Jehovamanta?

¹⁰ (Salmo 86:5 leey). Davidqa Jehovamanta nerqa: “Perdonanapajpis wakichisqa kashanki”, nispa. Uj libro nisqanman jina, chayqa niyta munan Diosqa mana perdonayta yachakunanrajchu kasqanta. Chanta, ¿imajtintaj Diosninchej arrepientekojkunawan chay jina kʼachapuni? Chay versículo nillantaj: “Munakuyniykeqa may jina jatun, qanmanta yanapata mañakusojkunapaj”, nispa. Ñaupaj yachaqanapi yachakorqanchej jina, Jehovaqa payta munakojkunata munakullantaj, ni jaykʼajtaj saqerparenqachu. Chay jinata munakuwasqanchejraykutaj, arrepientekojtinchej perdonasqata perdonawanchej (Isa. 55:7). Sichus qanpis Jehová perdonasusqanmanta iskayrayashankiraj chayqa, kaypi piensariy: ¿Creenkichu Jehová juchankumanta arrepientekojkunata, khuyakuyninta mañakojkunata perdonasqanta? Chayta creenki chayqa amallataj iskayrayaychu qantapis perdonasusqanmanta.

¹¹ Biblia nisqanman jina Jehovaqa yachallantaj imayna ruwasqachus kasqanchejta, pantaj runastaj kasqanchejta. Chayta yachaytaj mayta sonqochawanchej (Sal. 139:1, 2). Chayta aswan sumajta entiendenapaj imatachus David waj salmopi nisqanta ukhuncharina. Chayqa yanapawasun Jehová perdonawasqanchejmanta mana iskayrayanapaj.

IMATACHUS JEHOVÁ YUYARIKUSQALLANTA YUYARIKUY

12, 13. Salmo 103:14 nisqanman jina, ¿imatataj Jehová yuyarikun, chanta imatataj ruwayta munan?

¹² (Salmo 103:14 leey). Davidqa Jehovamanta nerqa: “Payqa yuyarikun jallpʼalla kasqanchejta”, nispa. Chayqa niyta munan pantaj runas kasqanchejta mana qonqakusqanta, chayraykutaj arrepientekojtinchej perdonanawanchejpaj wakichisqapuni kasqanta. Chay versiculota astawan ukhuncharina.

¹³ David nillarqataj: “Diosqa allinta yachan imayna ruwasqachus kasqanchejta”, nispa. Jehová Diosqa Adanta “jallpʼamanta ruwarqa”. Chayrayku yachan imayna ruwasqachus kasqanchejta, imatachus necesitasqanchejtapis. Runaqa necesitanchej samayta, mikhuyta, puñuyta ima. Mana pantaj runas kajtinchejpis chay imastaqa necesitallasunmanpuni (Gén. 2:7). Jinapis Adanwan Evawan juchallikusqankumantapacha, “jallpʼalla” kasqanchejqa niyta munallantaj tukuy Adanmanta jamojkuna pantaj runasña kasqanchejta, mana allin imasta ruwaymanpunitaj sonqonchej aysawasqanchejta. Jehovataj mana pantaj runas kasqallanchejtachu yachan. Manaqa David nerqa jina chayta “yuyarikun”. Hebreo parlaypi chayqa niyta munallantaj Jehovaqa pantaj runas kasqanchejta yachasqanrayku khuyakuwasqanchejtapuni. Chayrayku chay versículo nishawanchej Jehovaqa imaraykuchus wakin kutis pantasqanchejta entiendellawasqanchejta. Sichus arrepientekusun chaytaj payqa khuyakuwasunchej, perdonawasunchejtaj (Sal. 78:38, 39).

14. 1) ¿Imatá Salmo 103:12 yachachiwanchej Jehová imaynatachus perdonawasqanchejmanta? 2) ¿Imaynatá Davidpa kausaynin rikuchiwanchej Jehovaqa perdonasqata perdonawasqanchejta? (“Jehovaqa perdonaspa qonqapun” nisqa recuadrota qhawariy).

¹⁴ ¿Imatawantaj Salmo 103 yachachiwanchej imaynatachus Jehová perdonasqanmanta? (Salmo 103:12 leey). David nerqa Jehová perdonawajtinchej juchanchejta may jina karuman churasqanta, “imaynatachus inti llojsimuy ladoqa may jina karupi kashan inti yaykuy ladomanta” ajinata. Yachanchej jina inti llojsimuy ladoqa inti yaykuy ladomanta may jina karupipuni kashan. ¿Imatá chay yachachiwanchej? Uj libro nisqanman jina, chay versiculoqa niyta munan Diosqa juchanchejta chay jina karuman apasqanrayku, juchanchejmanta ni imitapuni quedasqanta, chinkasqata chinkasqanta. Chayrayku Diosninchejqa chay juchanchejmanta niña ujtawan yuyarikunchu, nitaj yuyarichiwanchejchu. Yachanchej jina wakin kutisqa uj qʼapaysitullaraj imatapis yuyarichiwanchej. Jehová perdonawajtinchejtaj nipuni imapis quedanchu, ni qʼapaysitullanpis. Chayrayku niña chay juchanchejmanta ujtawan yuyarikunchu, nitaj yuyarichiwanchejchu (Eze. 18:21, 22; Hech. 3:19).

15. ¿Imapí piensarisunman ñaupa juchasninchejmanta sonqonchej juchachallawajtinchejpuni?

¹⁵ Sichus ñaupa juchasniykimanta sonqoyki juchachashallasunkipuni chayqa, Salmo 103 imatachus nisqanpi tʼukuriy. Chayqa yanapasonqa Jehová perdonasusqanmanta convencekunaykipaj. Kayta tapurikuy: “Sichus Jehová pantaj runa kasqaymanta yuyarikun, arrepientekusqayraykutaj perdonanawanpaj wakichisqa kashan chay, ¿nichu noqapis chayta yuyarikunallaytaj kanman? Sichus Jehová ñaupa juchasniyta qonqayman churan, nitaj jaykʼajpis ujtawan yuyarichiwanchu chay, ¿nichu noqapis qonqapunallaytaj kanman?”, nispa. Paychus juchasniykita qonqasqata qonqan chay, ¿nichu qanpis kikillantataj ruwanayki kanman? (Sal. 130:3). Jehová perdonasqata perdonasusqanmanta convencekunki chayqa, manaña sonqoyki juchachasonqachu, Jehovatataj kusiywan sirvillankipuni.

16. ¿Imajtintaj mana allinchu ñaupa juchasnillanchejpipuni yuyay? (Dibujotawan qhawariy).

¹⁶ Ñaupa juchasnillanchejpipuni yuyayqa, autota manejashaspa qhepata qhawanapaj espejo qhawarisqalla kay jina kanman. Autota manejajkunaqa chay espejonkumanta maypi jina qhepata qhawarinkupuni ima kajtin ladonchakunankupaj. Jinapis allinta manejanankupajqa, astawan ñaupajtapuni qhawananku tiyan. Kikillantataj ñaupa juchasninchejpi wakin kutis piensarisunman chaymanta yachakunapaj, manataj kikin juchapi urmanapaj. Jinapis chay yuyarisqalla kasun chayqa sonqonchej juchachallawasunpuni, nitaj Jehovata allinta sirviyta atisunchu. Chayrayku astawan yuyana Jehovata sirviypi, paraisopi imaynachus kausay kananpiwan. Chaypeqa kay tiempomanta sajra imas “manaña yuyarisqachu kanqa” (Isa. 65:17; Pro. 4:25).

SONQOYKITA CONVENCELLAYPUNI

17. ¿Imajtín convencekunallanchejpuni tiyan Jehová munakuwasqanchejmanta, perdonawasqanchejmantapis?

¹⁷ Tukuypis sonqonchejta convencenanchej tiyan Jehová munakuwasqanchejmanta, perdonanawanchejpajtaj wakichisqa kasqanmanta mana iskayrayanapaj (1 Juan 3:19). ¿Imarayku? Satanasqa Jehová mana munakuwasqanchejta, ni jaykʼajtaj perdonanawanchejta creechiyta munallawasunpuni. Chayta ruwan Jehovamanta karunchanawanchejpaj. Paypaj pisi tiempollaña kasqanta yachasqanraykutaj, ni jaykʼaj jina astawanraj chayta ruwanqa (Apo. 12:12). Noqanchejtaj amapuni Satanaswan chʼaukiyachikunachu.

18. ¿Imatá ruwawaj Jehová munakususqanmanta, perdonasusqanmantapis mana iskayrayanaykipaj?

¹⁸ Ñaupaj yachaqanapi yachakorqanchej Jehová munakuwasqanchejmanta mana iskayrayanapaj imachus yanapawasqanchejta. Kay yachaqanapitaj yachakunchej, Jehová perdonawasqanchejmanta mana iskayrayanapaj kay imasta ruwana kasqanta: Tʼukurina imatachus Jehová pay kikinmanta nisqanpi, imatatajchus Biblia pay perdonawasqanchejmanta yachachisqanpi. Amataj kayta qonqakunachu: Payqa ni jaykʼaj qonqanchu pantaj runas kasqanchejta, khuyakuwanchejtaj. Chantapis yuyarikuna Jehovaqa juchasninchejta perdonasqata perdonasqanta. Ajinamanta David jina nisun: “Gracias Jehová Diosníy, ‘pantasqasniyta, juchasniytapis’ perdonawasqaykimanta”, nispa (Sal. 32:5).