Yachakuna Jehová jina, Jesús jina yuyayta

1, 2. 1) ¿Ima niytá munan Jehovata munakuy? 2) ¿Imaynatá Jesús Tatanta tukuy yuyayninwan munakusqanta rikucherqa?

“JEHOVÁ DIOSNIYKITAQA munakunayki tiyan tukuy sonqoykiwan, tukuy kausayniykiwan, tukuy kallpaykiwan, tukuy yuyayniykiwantaj” (Luc. 10:27). Jesusqa nerqa chaypuni Moisespa Leyninmanta aswan kuraj kamachiy kasqanta. Jehovataqa munakunanchej tiyan tukuy kausayninchejwan, nisunman imastachus ruwayta munasqanchejwan, tukuy sonqonchejwan, tukuy kallpanchejwantaj. Chantapis Jehovata munakunanchej tiyan tukuy yuyayninchejwan, nisunman imaynatachus yuyasqanchejwan. Runasqa ni jaykʼaj imaynatapunichus Jehová yuyasqanta entiendeyta atisunmanchu. Chaywanpis estudiasunman “Cristoj yuyaynin” kapunawanchejpaj, chaytaj yanapawasun Jehovaj yuyayninta entiendenapaj. Imaraykuchus Jesusqa Tatanpa yuyayninta sumajta rejsin, pay jinataj yuyan (1 Cor. 2:16, “nosotros sí tenemos la mente de Cristo” nisqa nota de estudiotawan leeriy).

² Jesusqa tukuy yuyayninwan Jehovata munakorqa, yacharqa imata ruwanantachus Dios munasqanta, chaytataj ruwaytapuni munarqa ñakʼarinanta yachaspapis. Tatanta kusichiytapuni munasqanrayku mana saqerqachu imapis pantachinanta.

3. ¿Imatá Pedro Jesusmanta yachakorqa, chanta imata ruwanankutataj cristianosman nerqa? (1 Pedro 4:1).

³ Pedropis chay ujnin apostolespis Jesuswan khuska purerqanku, yachakorqankutaj imaynatachus yuyasqanta. Pedro ñaupaj kaj cartanta qhelqashaspa cristianosman nerqa Cristo jina yuyanankupaj wakichikunankuta (1 Pedro 4:1 leey). Pedroqa “wakichikuychej” nispa nerqa. Chay palabratataj griego parlaypi oqharej kanku soldados wakichikunankuta ninankupaj. Chaywan nisharqa Jesús jina yuyayta yachakoyqa uj arma jina kasqanta. Chaywan maqanakuyta atisun sajra munayninchejpa contranpi, Satanaspa mundonpa contranpipis (2 Cor. 10:3-5; Efe. 6:12).

4. ¿Imatá kay yachaqanapi yachakusun?

⁴ Kay yachaqanapi yachakusun imaynatachus Jesús yuyasqanta, imaynatachus pay jina yuyanatapis. Qhawarisun imatachus ruwana kasqanta 1) Jehová jina yuyayta yachakunapaj, 2) kʼumuykukoj sonqos kanapaj, 3) allin yuyayniyoj kanapajpis.

JEHOVÁ JINA YUYAYTA YACHAKUNA

5. ¿Maykʼajtaj Pedro mana Jehová jinachu yuyarqa?

⁵ Uj kuti Pedroqa mana Jehová jinachu yuyarqa. Jesusqa apostolesninman nerqa Jerusalenman rinanpuni kasqanta, chaypitaj religionta kamachejkuna presochanankuta, chaymantataj ñakʼarichinankuta, wañuchinankutapis (Mat. 16:21). Pedro yacharqa Jesús Mesiaspuni kasqanta, Diospa llajtantataj salvananta. Chayrayku nichá entiendeyta atillarqachu imaraykuchus Jehová Wawanta wañuchinankuta saqenanta (Mat. 16:16). Jinapi Pedroqa Jesusta wajnejman pusarqa, nerqataj: “Señor, ama chaytaqa parlallaypischu. Mana chay imaspeqa rikukunkichu”, nispa (Mat. 16:22). Pedroqa mana Jehová jinachu yuyasharqa. Chayrayku yuyasqanqa Jesuspa yuyasqanwan mana kikinchu karqa.

6. ¿Imaynatá Jesús Jehová jina yuyasqanta rikucherqa?

⁶ Jesusqa Tatan jinallataj yuyarqa. Chayrayku Pedrota nerqa: “¡Riy kaymanta Satanás! Qanqa pantachiyta munawanki, mana Dios yuyasqanman jinachu yuyashanki, manachayqa runas yuyasqankuman jinalla”, nispa (Mat. 16:23). Jesusqa yacharqa Tatanpa munayninta juntʼananpaj sufrinanpuni kasqanta, wañunantaj kasqanta. Chayrayku Pedrota mana kasorqachu. Pedroqa ichapis yanapayta munaspa chayta nerqa. Jesuspa nisqanwantaj repararqa Jehová jina yuyayta yachakunanraj kasqanta. Noqanchejpis mayta chaymanta yachakusunman.

7. ¿Imaynatá Pedro rikucherqa Jehová jina yuyananpaj kallpachakushasqanta? (Dibujota qhawariy).

⁷ Aswan qhepaman Pedroqa rikucherqa Jehová jina yuyananpaj kallpachakushasqanta. Chay kutillaraj Jehová nerqa mana judío kajkunaqa llajtanmanta kayta atisqankutaña. Chayrayku Pedrota nerqa Corneliota predicamunanta. Judiosqa mana judíos kajkunawan nipuni masichakojchu kanku. Chayrayku Pedroqa nichá chayta ruwayta atillarqachu. Jinapis imachus Jehovaj munaynin kasqanta reparaytawankama yuyayninta cambiarqa. Cornelio wajyachejtintaj “mana iskayrayaspa” rerqa (Hech. 10:28, 29). Pedroqa Corneliota, wasinmanta kajkunatawan predicarqa, paykunataj bautizakorqanku (Hech. 10:21-23, 34, 35, 44-48). Ajinamanta Cornelioqa mana judío kajkunamanta ñaupaj kaj cristiano karqa.

8. ¿Imaynatá rikuchisunman Jehová jina yuyasqanchejta? (1 Pedro 3:8, sutʼinchaynintin).

⁸ Watasninman Pedroqa cristianosman yuyaycharqa: “Tukuyniykichej uj yuyaylla kaychej”, nispa (1 Pedro 3:8, ñaupaj kaj sutʼinchaynintawan leey). Jehovaj testigosnin uj yuyaylla kananchejpajqa Jehová jina yuyananchej tiyan. Imaynatachus Jehová yuyasqantaj Bibliapi kashan. Jesusqa discipulosninman nerqa ñaupajta Diospa Gobiernonta maskʼanallankutapuni (Mat. 6:33). Ichapis congregacionmanta uj hermano Jehovapaj astawan llankʼayta munanman. Noqanchejrí, ¿Pedro jinachu desanimachiyta munasun? Mana. Astawanqa chayta ruwayta munasqanmanta felicitasun, yanaparisuntaj.

KʼUMUYKUKOJ SONQOS KANA

9, 10. ¿Imaynatá Jesús kʼumuykukoj sonqo kasqanta rikucherqa?

⁹ Wañuchinankupaj uj chʼisi faltashajtin, Jesusqa Pedrota, waj apostolesnintawan kʼumuykukoj sonqo kanankuta yachacherqa. Jesusqa Pedrotawan Juantawan nerqa tukuy imata wakichimunankuta, niraj wañuchishajtinku discipulosninwan khuska mikhunanpaj. Paykunaqa wakichillarqankutajchá fuenteta, toallastawan, niraj mikhushajtinku invitadospa chakisnin mayllasqa kananpaj. Chanta, ¿pitaj chakisninkuta mayllanman karqa?

¹⁰ Chaytaqa uj esclavo ruwaj, jinapis Jesusqa mana iskaychakuspa chakisninkuta mayllarqa. Apostolesqa maytachá tʼukorqanku Jesús mantonta orqhokuspa, uj toallata oqharispa cinturanman wataykukojtin, fuenteman yakuta jichʼaspataj chakisninkuta mayllajtin (Juan 13:4, 5). Jesusqa nichá uj ratollapichu 12 apostolesninpa chakisninkuta mayllarqa, nisunman Judaspa chakisnintawan, pichus wasanchananpaj kasharqa chaypata. Jesusqa may kʼumuykukoj sonqopuni karqa. Mayllaytawantaj pacienciawan discipulosninta nerqa: “¿Yachankichejchu imapajchus chakisniykichejta mayllasqayta? Qankunaqa niwankichej Yachachejníy, Señorníy nispa, chaytaqa maychus kajllata niwankichej, noqaqa chaypuni kani. Noqachus Señorniykichejtaj Yachachejniykichejtaj kashaspa chakisniykichejta mayllarqaykichej chayqa, kikillantataj qankunapis purajmanta chakisniykichejta mayllanakunaykichej tiyan”, nispa (Juan 13:12-14).

11. ¿Imaynatá Pedro rikucherqa kʼumuykukoj sonqo kayta yachakusqanta? (1 Pedro 5:5; dibujotawan qhawariy).

¹¹ Pedroqa Jesús kʼumuykukoj sonqo kasqanmanta yachakorqa. Jesús cieloman kutipusqantawan Pedro uj suchu runata milagronejta sanoyacherqa. Chay runaqa ajina suchitupuni nacekusqa (Hech. 1:8, 9; 3:2, 6-8). Chayta ruwajtin ashkha runas muyuynintinman tantaykakamorqanku (Hech. 3:11). ¿Imatá Pedro ruwanman karqa? Judiospajqa wajkunawan jatunchachikoyqa may sumaj karqa. Jina kajtin, ¿Pedropis jatunchachikunmanchu karqa? Mana. Kʼumuykukoj sonqo kasqanrayku Jehovata, Jesustawan jatunchaspa nerqa: “Jesuspa sutinnejta, chay sutipi creesqaykuraykutaj kay runaj chakisnin sanoyapun, pitachus qankuna rikushankichej, rejsinkichejtaj chaypata”, nispa (Hech. 3:12-16). Aswan qhepamantaj Pedroqa cristianosman nerqa kʼumuykukoj sonqopuni kanankuta. Chay nisqantaj ichá yuyarichiwanchej Jesús cinturanman uj toallata wataykukuspa, apostolespa chakisninkuta mayllasqanta (1 Pedro 5:5 leey).

12. Pedro jinallataj, ¿imaynatá kʼumuykukoj sonqo kayta yachakusunman?

¹² Pedro jinallataj noqanchejpis kʼumuykukoj sonqo kayta yachakusunman. ¿Imataj chaypaj yanapawasunman? Yuyarikunanchej tiyan kʼumuykukoj sonqo kayqa mana parlasqallanchejpichu rikukunan kasqanta, manachayqa sonqonchej ukhumantapacha llojsimunan kasqanta. Pedro ‘kʼumuykukoj sonqo’ kananchejta nispa chaytapuni niyta munasharqa. Wajkunapaj imallatapis ruwaspaqa paykunata munakusqanchejrayku, Jehovata munakusqanchejrayku ruwanchej, manataj alabachikuyta munaspachu. Jehovata, hermanosninchejtapis kusiywan sirvina, nitaj wajkunawan allinpaj qhawachikuyta munaspachu. Ajinamanta kʼumuykukoj sonqo kasqanchejta rikuchisun (Mat. 6:1-4).

“ALLIN YUYAYNIYOJ” KANACHEJ

13. ¿Ima niytá munan “allin yuyayniyoj” kay?

¹³ ¿Ima niytá munan “allin yuyayniyoj” kay? (1 Ped. 4:7). Niraj imata ajllashaspa reparananchej tiyan imatachus Jehová chaymanta yuyasqanta. Chantapis yuyarikunanchej tiyan Jehovawan amigos kasqanchej imamantapis aswan importante kasqanta. Allin yuyayniyoj kanchej chayqa, noqanchejmanta maychus kajllata yuyasun, nitaj tukuy imata yachasqanchejtachu yuyasun. Chantapis kʼumuykukoj sonqowan Jehovamanta yanapata mañakusunpuni, ajinamanta paypi atienekusun.a

14. ¿Ima kutipitaj Pedro mana Jehovapi atienekorqachu?

¹⁴ Wañuchinankupaj uj chʼisi faltashajtin, Jesús discipulosninman nerqa: “Tukuyniykichej kunan tuta saqerpariwankichej”, nispa. Pedrotaj manapuni pantananta yuyaspa nerqa: “Tukuyninku saqerparisojtinkupis, noqaqa ni jaykʼaj saqerparisqaykichu”, nispa. Chay chʼisi Jesusqa wakin discipulosninta yuyaycharqa: “Rijchʼarisqallapuni kaychej, Diosmantapis mañakullaychejpuni”, nispa (Mat. 26:31, 33, 41). Sichus Pedro chay yuyaychasqanta japʼikunman karqa chayqa, ichapis mana manchachikuspa ninman karqa Jesuspa discipulon kasqanta. Chay yuyaychayta mana japʼikusqanraykutaj Jesusta mana rejsisqanta nerqa. Chaymantataj maytapuni pesachikorqa (Mat. 26:69-75).

15. Wañupunan ñaupaj chʼisi, ¿imataj Jesusta yanaparqa allin yuyayniyoj kananpaj?

¹⁵ Jesusqa tukuy sonqo Jehovapipuni atienekorqa. Mana pantaj runa kajtinpis wañunanpaj ñaupaj chʼisi kutin kutita Jehovamanta mañakorqa, ajinamanta má manchachikuspa Tatanpa munayninta ruwarqa (Mat. 26:39, 42, 44; Juan 18:4, 5). Pedro nichá qonqarqachu Jesús chay chʼisi Tatanmanta kutin kutita mañakusqanta.

16. ¿Imaynatá Pedro rikucherqa allin yuyayniyoj kayta yachakusqanta? (1 Pedro 4:7).

¹⁶ Tiemponwan Pedroqa astawan Jehovapi atienekuyta yachakorqa, chayrayku Jehovaj yanapayninta mañakojpuni. Jesusqa kausarimuytawan Pedrota, waj apostolesnintapis nerqa predicamunankupaj espíritu santota japʼinankuta. Chay atiyta japʼinankukamataj Jerusalén llajtapi suyanankuta nerqa (Luc. 24:49; Hech. 1:4, 5). Chayta suyashaspa, ¿imatá Pedro ruwarqa? Paywan, waj cristianoswan ‘tantakojpuni kanku Diosmanta mañakunankupaj’ (Hech. 1:13, 14). Qhepamantaj ñaupaj kaj cartanpi Pedro cristianosta kallpacharqa allin yuyayniyoj kanankupaj, Jehovapitaj atienekunankupaj paymanta mañakuspa (1 Pedro 4:7 leey). Pedroqa Jehovapi atienekuyta yachakorqa, congregacionpitaj uma jina karqa (Gál. 2:9).

17. Wakin imasta ruway noqanchejpaj facillla kajtinpis, ¿imatá ruwananchej tiyan? (Fototawan qhawariy).

¹⁷ Allin yuyayniyoj kanapaj Jehovamanta mayta mañakuna tiyan. Jehovaj yuyaychayninta mañakunanchejpuni tiyan wakin imasta ruway noqanchejpaj facillla kajtinpis. Astawanraj mañakunanchej tiyan kausayninchejpi jatun imasta ajllananchej kajtin. Jehovalla yachan imachus noqanchejpaj allin kasqanta.

18. Pedro jinallataj, ¿imatá ruwayta atisunman?

¹⁸ Mayta agradecekunchej Jehová pay jina kʼacha kaykunasniyoj kanapaj ruwawasqanchejmanta (Gén. 1:26). Yachanchej mana pay jinapunichu imatapis ruwayta atisqanchejta (Isa. 55:9). Jinapis Pedro jinallataj yachakusunman Jehová jina yuyayta, kʼumuykukoj sonqo kayta, allin yuyayniyoj kaytapis.