“Ancianosta wajyakuchun”

1. ¿Imaynatá Jehová rikuchin tukuynin ovejitasninta mayta munakusqanta?

JEHOVAQA tukuynin ovejitasninta maytapuni munakun. Paykunataqa Jesuspa yawarninwan rantikorqa. Ancianostataj churan congregacionesta cuidanankupaj (Hech. 20:28). Chayrayku munan ancianosqa ovejitasninta munakuywan cuidanankuta. Congregacionpa umanqa Jesús. Chayrayku ancianosqa Jesuspa kamachisqanman jina Jehovaj ovejitasninta kallpachanku, ima peligromantapis jarkʼanku (Isa. 32:1, 2).

2. ¿Pikunamantataj Jehová astawan llakikun? (Ezequiel 34:15, 16).

² Jehovaqa tukuynin ovejitasninmanta mayta llakikun, astawanraj llakiypi tarikojkunamanta. Wakenqa ichapis ajina llakiypi kashanku juchallikusqankurayku. Jehovataj ancianoswan paykunata yanapachin (Ezequiel 34:15, 16 leey). Chayrayku, ¿imatá ruwasunman yanapata necesitajtinchej? Diosninchejqa munan paymanta mañakunanchejta, munallantaj congregacionmanta ‘michejkunawan, yachachejkunawan’ yanapachikunanchejta (Efe. 4:11, 12).

3. ¿Imajtintaj kay yachaqana tukuyta yanapawasunchej?

³ Kay yachaqanapi yachakusunchej imaynatachus Jehová llauchʼiyapojkunata ancianoswan yanapachisqanta. Kay tapuykunaman kutichisun: ¿Maykʼajtaj ancianospa yanapanta maskʼana tiyan? ¿Imaraykutaj paykunawan yanapachikuna tiyan? ¿Imaynatá paykuna yanapawanchej? Ichapis noqanchejqa creeypi sinchʼi sayasqa kashanchej. Kay yachaqanataj noqanchejtapis yanapallawasuntaj imaynatachus Jehová ancianoswan yanapachiwasqanchejmanta astawan agradecekunapaj, ancianospa yanapanta necesitajtinchejtaj imatachus ruwanata yachanapaj.

¿MAYKʼAJTAJ ANCIANOSTA WAJYAKUNA TIYAN?

4. ¿Imaynapí yachanchej Santiago 5:14-16, 19, 20 versículos Jehovawan allinyakuyta necesitajkunamanta parlashasqanta? (Fotostawan qhawariy).

⁴ Santiagoqa sutʼincharqa imaynatachus Jehová ancianoswan yanapachiwasqanchejta. Pay nerqa: “Qankuna ukhupi, ¿pillapis onqosqachu kashan? Congregacionmanta ancianosta wajyakuchun”, nispa (Santiago 5:14-16, 19, 20 leey). Santiagoqa chay onqosqata nin ancianosta wajyakunanta, manataj doctortachu. Chantapis nillantaj juchasninmanta perdonasqa kaspa sanoyapunanta. Chayrayku chay versiculopi Santiagoqa mana onqosqa kajkunamantachu parlashan, manaqa Jehovawan allinyakuyta necesitajkunamanta. Jehovawan allinyakuyta necesitaspaqa onqosqa jinallataj kanchej. Onqoykuspaqa doctorman rinchej, imanchejchus nanawasqanchejtataj willanchej, doctor niwasqanchejman jinataj ruwanchej. Chayman rijchʼakoj imasllatataj ruwanchej Jehovawan allinyakuyta necesitaspa: Ancianospa yanapanta maskʼanchej, imaynachus kashasqanchejta willarinchej, Bibliawan yuyaychariwasqanchejman jinataj ruwanchej.

5. ¿Imatá ruwasunman Jehovaj ñaupaqenpi imaynachus kashasqanchejta yachanapaj?

⁵ Santiago 5 capituloqa niwanchej Jehovamanta karunchakunapaj jina kashasqanchejta reparakuspa, ancianosta wajyakunanchejta. Jinapis niraj Jehovamanta karunchakushaspaqa yanapata mañakunanchej tiyan, manataj karunchakuytawanrajchu. Ichapis noqanchejmantaqa yuyasunman Jehovaj ñaupaqenpi allillan kashasqanchejta, nitaj jinachu kanman. Chayrayku Biblia niwanchej sumajta qhawarikunata mana engañakunapaj (Sant. 1:22). Sardis congregacionmanta wakin cristianospis yuyarqanku Jehovaj ñaupaqenpi allillan kashasqankuta, Jesustaj nerqa mana jinachu kasqanta (Apo. 3:1, 2). ¿Imaynatá yachasunman Jehovaj ñaupaqenpi imaynachus kashasqanchejta? Allinta qhawarikusunman bautizakorqanchej chaypachas jinallapunichus manachus Jehovata kusiywan sirvishasqanchejta (Apo. 2:4, 5). Kay tapuykunapi piensarisunman: “¿Ñaupajta jinallapunichu Bibliata leeywan, chaypi tʼukuriywan gustachikuni? ¿Ñaupajta jinallapunichu tukuynin tantakuykunaman rishani, chaykunapaj sumajtachu wakichikuni? ¿Predicaspa ñaupajta jinallapunichu kusikuni, chayri waj imasta ruwaychu astawan gustawan? ¿Qolqellapiñachu kunan astawan yuyani?”. Chay tapuykunapi piensarispa reparasunman Jehovawan imaynachus kashasqanchejta. Mana allinchu kashasqanchejta reparakunchej chayqa, kallpachakuna creeyninchejta astawan sinchʼiyachinapaj. Sichus sapallanchejmanta mana chayta ruwayta atinchejchu, chayri Jehovaj chejnisqan imasta ruwanchejña chayqa, ancianosta wajyakuna yanapanawanchejpaj.

6. ¿Imatataj juchallikoj ruwanan tiyan?

⁶ Sichus pillapis congregacionmanta orqhosqa kananpaj jina jatun juchata ruwan chayqa, uj ancianowan parlarinan tiyan (1 Cor. 5:11-13). Chay juchallikojqa Jehovawan allinyakunanpaj yanapata necesitan. Jehovataj arrepientekusqanta ‘ruwasqasninwan’ rikuchejtillan payta perdonanqa (Hech. 26:20). Chay ruwasqasninmanta ujnintaj kashan chay juchanta ancianosman willakuy.

7. ¿Pikunataj ancianoswan yanapachikuyta necesitallankutaj?

⁷ Ancianosqa mana jatun juchapi urmajkunallatachu yanapanku, llauchʼiyapojkunatapis yanapallankutaj (Hech. 20:35). Wakenqa ichapis sajra munayninkuwan maqanakushanku, yuyankutaj mana atipayta atinankuta. Ichapis wakenqa niraj testigo kashaspa drogakoj kanku, pornografiata qhawaj kanku, chayri khuchichakoj kanku. Chayraykutaj paykunapajqa chay sajra munayninkuta atipay aswan dificilraj kanman. Jinapis mana sapallankuchu chay maqanakupi kashanku. Atinkuman de confianza ancianoman willarikuyta. Paytaj sumajta yuyaycharenqa, yuyarichenqataj chay sajra munayninkuwan mana atipachikojtinkoqa Jehovaj ñaupaqenpi allillanpajpuni qhawasqa kanankuta (Ecl. 4:12). Wakenqa ichapis desanimasqa kashankuman chay sajra munayninku mana chinkasqanrayku. Ancianostaj yuyarichinkuman yanapata maskʼasqankumanta Jehová mayta kusikusqanta. Yanapata mañakusqankoqa rikuchin mana paykunallapichu atienekusqankuta, Jehovatataj kusichiyta munasqankuta (1 Cor. 10:12).

8. ¿Tukuy imatapunichu ancianosman willananchej tiyan?

⁸ Mana tukuy ima pantasqanchejtapunichu ancianosman willananchej tiyan. Ichá imatapis nisqanchejwan uj hermanoj sonqonta nanacherqanchej chayri mayta phiñarikorqanchej. Ajina kajtin uj ancianowan parlanamantaqa, Jesús yuyaychasqanman jina chay hermanowan allinyakusunman (Mat. 5:23, 24). Chantapis publicacionesninchejpi yuyaychaykunata maskʼasunman aswan llampʼu sonqo kaymanta, pacienciakuymanta, nitaj munayninchejwan atipachikuymanta. Chay imasta ruwaspaña nipuni allinchanchejchu chayqa, ichapis uj ancianowan yanaparichikusunman. Filipensesman cartanpi apóstol Pabloqa congregacionmanta uj hermanota nerqa, Evodiatawan Sintiquetawan allinyakunankupaj yanapananta. Ajinallatataj noqanchejtapis uj anciano yanapariwasunman (Fili. 4:2, 3).

¿IMAJTÍN ANCIANOSTA WAJYAKUNANCHEJ TIYAN?

9. Pʼenqakojtinchejpis, ¿imajtintaj ancianoswan parlarinanchejpuni tiyan? (Proverbios 28:13).

⁹ Jatun juchapi urmaspa chayri sajra munayninchejta nipuni atipananchejta yuyaspa yanapata mañakuna. Yanapata mañakunapajtaj Jehovapi atienekunanchej tiyan, nitaj manchachikunanchejchu tiyan. Mana pʼenqakunanchejchu tiyan ancianoswan chaymanta parlariyta. ¿Imajtin? Imajtinchus Jehovaqa ancianosta churan creeypi sinchʼi sayasqa kanapaj yanapanawanchejpaj. Chayrayku ancianoswan parlaspaqa Jehovapi atienekusqanchejta rikuchishanchej, paytataj kasukushanchej. Yachanchej allin kajta ruwanapaj Jehovaj yanapayninta necesitasqanchejta (Sal. 94:18). Jatun juchapi urmanchej chaytaj, chay juchanchejta rimarejtinchej, niñataj chay juchata ruwajtinchej Jehová khuyakuwasunchej, perdonawasunchejtaj (Proverbios 28:13 leey).

10. ¿Imataj kanman juchasninchejta pakaykojtinchej?

¹⁰ Juchasninchejta ancianosman willakojtinchej Jehovaqa perdonawasun, ñaupaqenpitaj watejmanta allinpaj qhawasqa kayta atisun. Mana willakojtinchejtaj noqallanchejpajtaj mana allinchu kanqa. Ajina karqa rey Davidwan. Payqa juchanta pakaykusqanrayku mayta llakikorqa, Jehová niña allinpajchu qhawasqanta yachaspataj llauchʼillaña karqa (Sal. 32:3-5). Uj heridata ruwaykukojtinchej mana chay rato jampikusunmanchu chayqa, astawan jatunyaykunman. Kikillantaj kanman jatun juchapi urmajtinchej. Mana ancianospa yanapanta chay rato maskʼajtinchejqa, niña Jehovaj ñaupaqenpi allinpajchu qhawasqa kasunman. Jehovaqa chayta yachan. Chayraykutaj niwanchej ancianoswan ‘parlarinanchejta’, paykuna yanaparinawanchejpaj (Isa. 1:5, 6, 18).

11. ¿Imataj kallanmantaj jatun juchasta pakaykojtinchej?

¹¹ Juchanchejta pakaykojtinchejqa wajkunatapis perjudicallasunmantaj. Juchanchejrayku Jehovaqa niña congregacionman espíritu santonta qonmanchu, nitaj hermanospura congregacionpi allinta kausakuyta atisunmanñachu (Efe. 4:30). Congregacionninchejmanta pillapis jatun juchapi urmasqanta yachaspaqa ninanchej tiyan ancianoswan parlarinanta.a Juchanta pakaykuspaqa noqanchejpis juchallayojtaj kasunman (Lev. 5:1). Jehovata munakusqanchejrayku mana chay juchanta pakaykusunchu. Ajinamanta yanapakusun congregación llimphu kananpaj, juchallikojtaj watejmanta Jehovaj ñaupaqenpi allinpaj qhawasqa kananpaj.

¿IMAYNATÁ ANCIANOS YANAPAWANCHEJ?

12. ¿Imaynatá ancianos yanapanku llauchhiyapojkunata?

¹² Bibliaqa ancianosta nin llauchhiyajkunata yanapanankuta (1 Tes. 5:14). Jatun juchapi urmajtinchej, paykunaqa allinta yuyaychakuspa ichapis wakin imasta tapuriwasun. Ajinamanta imatachus yuyasqanchejta, imaynatajchus sonqonchejpi kashasqanchejta yachanankupaj (Pro. 20:5). Ichapis paykunawan parlariyta mana atillasunmanchu. Ichá pʼenqakusunman chay juchanchejta willariyta. Jinapis juchanchejta mana pakaspa willasun chayqa, paykunata yanapasunchej. Ama llakikunachu parlaspa pantananchejmanta (Job 6:3). Ancianosqa parlaspa pantajtinchejpis mana chay ratochu juchachawasun. Paykunaqa sumajtaraj uyariwasunchej, sumajta entiendespa yuyaycharinawanchejpaj (Pro. 18:13). Ancianosqa yachanku Jehovaj ovejitasninta cuidayqa tiempopaj kasqanta, wakin imastaj mana ujta parlaspallachu allinchakusqanta.

13. ¿Imatawán ancianos ruwanqanku yanapanawanchejpaj? (Fotostawan qhawariy).

¹³ Ancianosqa mana sonqoyki astawan juchachasunanpajchu qanwan parlanqanku, manaqa qanpaj mañapusonqanku. Jehovataj chay “manchay atiyniyoj” mañakusqankuta uyarenqa, qantaj may kallpachasqa sientekunki yuyasqaykimantapis astawanraj. Chantapis ancianos yanapasusqankoqa ‘Jehová Diospa sutinpi aceitewanpis’ jawiykushasunkuman jina qanpaj kanqa (Sant. 5:14-16). Chay aceiteqa Diospa Palabranmanta cheqa kaj kashan. Chayrayku paykunaqa Bibliata sumajta apaykachanqanku sonqoykita tiyaykuchinankupaj, sonqochasunankupaj, Jehovamantaj watejmanta qayllaykunaykipaj (Isa. 57:18). Bibliawan yuyaycharisusqankoqa kallpata qosonqa allin kajta ruwanallaykipajpuni. Jehovaqa paykunanejta nisonqa: “Kaymin cheqan ñanqa. Kayninta riy”, nispa (Isa. 30:21).

14. Gálatas 6:1 nisqanman jina, ¿imaynatataj ancianos wistʼuykojkunata yanapanku? (Fotostawan qhawariy).

¹⁴ (Gálatas 6:1 leey). Uj cristiano “wistʼuykushan” chayqa, mana Diospa munayninman jinachu ruwashan. Ichapis ajinata wistʼuykushanman kausayninpi imatapis mana allintachu ajllasqanrayku, chayri jatun juchata ruwasqanrayku. Ancianostaj munakusqankurayku chay wistʼuykoj runata ‘cheqan ñanman kutirichimunku’. Chaytataj ruwanku “llampʼu sonqowan”. Griego parlaymanta traducikusqan “cheqan ñanman kutirichimuychej” palabrasqa niyta munallanmantaj chʼutasqa tulluta lugarninman kutiykuchipuy, allinta sanoyapunanpaj. Uj doctorqa chʼutasqa tulluta sumaj cuidadowan lugarninman kutiykuchipun jampichikoj runata mana anchata nanachispalla. Ancianospis ajinallatataj kʼachallamanta juchallikoj runata cheqanchanku mana sonqonta nanachispalla. Chantapis Bibliaqa sapa ancianota nillantaj wajkunata yuyaycharishaspa paykuna kikinkuta ‘allinta qhawarikunankuta’. Chaynejta pitapis yuyaycharishaspaqa yuyarikunankupuni tiyan paykunapis pantaj runasllataj kasqankuta. Chayrayku chay juchallikoj hermanopaj rimanankumanta, chayri paymanta aswan cheqan runas kasqankuta yuyakunankumantaqa, kʼumuykukoj sonqos kanku, paymantataj khuyakunku (1 Ped. 3:8).

15. ¿Imatá ruwasunman uj problemanchej kajtin?

¹⁵ Congregacionmanta ancianospi atienekusunman. Paykunaqa yachanku mana willananku imastaqa mana pimanpis willaykunallankuchu kasqanta. Chantapis wakichisqa kanku Bibliaman jinapuni yuyaycharinawanchejpaj, manataj yuyasqankuman jinallachu. Wakichisqallataj kanku llakiykunapi rikukojtinchej siga yanapanallawanchejpajpuni (Pro. 11:13; Gál. 6:2). Ancianosqa mana tukuychu kikin kanku, wakenqa aswan experienciayoj kanku. Jinapis uj problema kapuwajtinchejqa mayqennillankuwanpis parlariyta atisunman. Pero mana allinchu kanman ujtataj ujtataj tapukunanchej munasqallanchejta ninawanchejkama. Chaytachus ruwasunman chayqa, ‘uyariyta munasqallanchejta’ maskʼashasunman, manataj Diospa Palabranmanta ‘cheqa yachachiytachu’ (2 Tim. 4:3). Ima problemanchejtapis uj ancianoman willarejtinchej, ichapis tapuriwasun sichus waj ancianoswan parlasqanchejtaña, imatatajchus paykuna yuyaychariwasqanchejta. Llampʼu sonqo kasqanraykutaj ichapis niwasun waj ancianotawan tapurinanta (Pro. 13:10).

¿IMATÁ SAPA UJNINCHEJ RUWANANCHEJ TIYAN?

16. ¿Imatataj sapa ujninchej ruwananchej tiyan?

¹⁶ Ancianosqa cuidawanchej, yuyaychawanchej, jinapis mana niwanchejchu imatachus ruwananchejta. Sapa ujninchej parlasqanchejwan ruwasqanchejwan rikuchinanchej tiyan Jehovata munakusqanchejta, kusichiytataj munasqanchejta. Jehovataj allinta ajllanapaj yanapawasun, paytataj tukuy sonqo sirvinapaj (Rom. 14:12). Chayrayku ancianosqa mana niwanchejchu imatachus ruwanata, manaqa Bibliawan entiendechiwanchej imatachus Jehová yuyasqanta, saqenkutaj noqanchej chayman jina ajllakunanchejta. Chaytaj yanapawanchej imatachus Jehová yuyasqanta ‘reparananchejpaj’, allintataj ajllananchejpaj (Heb. 5:14).

17. ¿Imatá ruwananchej tiyan yanapata necesitaspa?

¹⁷ Jehovaj ovejitasnin kayqa may sumajpuni. Payqa “sumaj michej” Jesusta kachamorqa kacharichinawanchejpaj, ajinamanta wiñay kausayta japʼinanchejpaj (Juan 10:11). Chantapis ancianosnejta kay nisqanta juntʼashan: “Michejkunata churapusqaykichej, munayniyman jina ruwanankupaj. Paykunaqa yachayta, allin yuyaytawan mikhunata jina qosonqachej”, nispa (Jer. 3:15). Chayrayku sichus llauchhi, chayri onqosqa jina kashanchej chayqa, ancianosta wajyakuna yanapanawanchejpaj. Jehovaqa ancianosta uj regalota jina qowanchej, noqanchejtaj chaywan sumajta yanapachikuna.