Jehovaqa maypi kaspapis kusisqa sirvinaykupaj yanapawarqayku

Matswan Ann-Catrinwanqa Galaad escuelaman 1979 watapi rerqanku. Chay kutimantapacha watas pasasqanman jina asignarqanku Iranman, Mauricioman, Myanmarman, Tanzaniaman, Ugandaman, Zaireman ima. Galaad escuelamanta ujnin instructorninkoqa karqa Jack Redford. Paytaj chay escuelapi nerqa: “Maypichus plantasusqankupi tʼikariy”, nispa. Chaywanqa nisharqa maymanchus asignasqa kasqankupi tukuy sonqo sirvinankuta. Ajinapunitaj Matswan Ann-Catrinwan karqa. Ashkha lugaresman asignasqas karqanku. Paykuna kausayninkumanta willariwasunchej.

Mats, Ann-Catrin, ¿imaynatá Jehovata rejserqankichej?

Mats: Segunda Guerra Mundial kashajtin tatayqa Poloniapi tiyakorqa, rikorqataj Iglesia catolicapeqa puraj uyas kasqankuta. Jinapis papasoyqa niyta yachaj “cheqa religionqa kanpunichari” nispa. Ajinapunitaj karqa. Leenaypaj maukʼa librosta rantikuytapuni yachaj kani. Uj diataj rantikorqani La verdad que lleva a vida eterna nisqa azul librota. Chay titulonqa mayta gustaykuwarqa. Chayrayku chay chʼisipacha librontinta leeyta tukorqani. Qʼayantin paqarintaj cheqa religionta tarisqayta repararqani.

Abril de 1972 watamantapacha Jehovaj testigosninpa publicacionesninkuta astawan leeyta qallarerqani. Chaypitaj imastachus Bibliamanta tapukoj kani chayta entienderqani. Jesús parlarqa chay sumaj perlasta maskʼaj ranqhero jina karqani. Chay ranqheroqa may valorniyoj perlata tarispa usqhayllata tukuy imasninta vendemuspa chay perlata rantisqa. Noqapis ajinallatataj ruwarqani. Doctorpaj estudianaypaj universidadman rinaymantaqa Jehovata sirviyta ajllarqani (Mat. 13:45, 46). 10 de diciembre de 1972 watapitaj bautizakorqani.

Uj watanman jina tataywan sullkʼa hermanoywan Bibliamanta yachakuytawan bautizakorqanku. Julio de 1973 watapitaj precursor regular karqani. Congregacionniykupeqa Ann-Catrin sutiyoj precursora kasharqa. Payqa may kʼachita karqa, Jehovatataj mayta munakoj. Paywan rejsinakorqayku, 1975 watapitaj casarakorqayku. Chaymantataj tawa watasta Strömsund llajtitapi sirverqayku, chayqa Sueciapi kashan. Chaypitaj ashkha runas Bibliamanta yachakuyta munarqanku.

Ann-Catrin: Papasoyqa Estocolmopi universidadpi estudiayta tukuchashaspa Jehovata rejsisqa. Kinsa killitasniyojllaraj kashajtiypis payqa predicacionman, reunionesmanpis apawajpuni. Chaytaj mamaymanqa mana gustarqachu. Chayrayku payqa tukuy imata ruwarqa testigos pantasqa kashasqankuta rikuchinanpaj, nitaj aterqachu. Chayrayku paypis tiemponman bautizakorqa. Noqaqa 13 watitasniyoj kashaspa bautizakorqani. 16 watasniyojtaj precursora regular karqani. Umeapitaj sirverqani, chaypeqa predicanapaj ashkha yanapa necesitakorqa. Chaypi kashajtiytaj precursora especial jina sirviyta qallarerqani.

Matswan casarakusqaytawan ashkha runasta yanaparqayku Jehovata rejsinankupaj. Chaykunamanta ujnintaj jovencita Maivor karqa. Payqa uj deportepi trabajaspa ashkha qolqeta gananman karqa, may rejsisqataj kanman karqa. Jinapis chayta qhesacharqa. Chaymantataj sullkʼa hermanaywan khuska precursoras karqanku. 1984 watapitaj Galaad escuelaman khuska rerqanku. Kunantaj Ecuadorpi misioneras kashanku.

Qankunaqa misioneros jina ashkha lugarespi sirverqankichej. ¿Imataj yanapasorqachej chay lugarespi tukuy sonqo Jehovata sirvinaykichejpaj?

Mats: Ashkha kutispi waj lugaresman asignawarqayku. Jinapis sapa asignacionpi kallpachakorqayku Jesús jina ruwanaykupaj, astawanqa kʼumuykukoj sonqos kanaykupaj (Col. 2:6, 7). Sapa asignacionpeqa mana suyajchu kayku hermanos noqayku jina ruwanankuta. Astawanpis kallpachakoj kayku paykunata entiendenaykupaj, culturankuta rejsinaykupaj, imaraykuchus waj jinamanta yuyasqankuta yachanaykupajpis. Astawan Jesús jina kanaykupaj kallpachakojtiykoqa, “correshaj yaku kantupi plantasqa sachʼa jina” karqayku. Chayraykutaj mayman asignasqa kaspapis kusisqa Jehovata sirverqayku (Sal. 1:2, 3).

Ann-Catrin: Uj plantitata waj ladoman plantajtinchej sigue wiñanallanpajpuneqa, necesitan intej kʼanchayninta, kʼajaynintawan. Jehovaqa chay “inti jina” noqaykupaj karqa (Sal. 84:11). Payqa kʼacha hermanoswan munakuyniyoj hermanoswan mayta bendeciwarqayku. Irán nacionmanta Teheranpi kaj congregacionmanta hermanosqa, manchay kʼachaspuni noqaykuwan karqanku. Ñaupa tiempomanta Jehovaj kamachisnin jina wajyarikuwaj kayku. Mayta munaykuman karqa Iranpi astawan qhepakuyta. Jinapis julio de 1980 watapi gobiernoqa Jehovaj testigosninta prohiberqa. Noqaykutataj niwarqayku 48 horaspi chay suyumanta ripunaykuta. Jinapitaj Africapi kaj Zaire suyuman kachawarqayku, kunantaj chay suyu sutikun República Democrática del Congo.

Africaman kachanawaykuta yachaspa waqarikorqani. Imaraykuchus uyarerqani chaypi kataris, onqoykunapis juntʼa kasqanta. Chaytataj mayta manchachikorqani. Jinapis iskay amigosniyku Africapi ashkha watastaña sirverqanku. Paykunaqa niwarqayku: “Ama manchachikuychejchu. Africaqa manchay kʼachitu, mayta gustasonqachej”, nispa. Jinapunitaj karqa. Africamanta hermanosqa manchay kʼachas kanku. Sojta watastaña chaypi kashajtiyku gobiernoqa testigosta prohiberqa. Chayraykutaj Zairemanta riporqayku. Jinapis niraj ripushaspa Jehovamanta mañakorqani chaypi qhepakunaykupaj. Jinapitaj repararqani qallariypi mana chay lugarman ripuyta munaspapis, mayta chay lugarman yachaykukusqaytaña.

Kay chhika watasta Jehovata sirvispa, ¿ima sumaj bendicionestataj japʼerqankichej?

Mats: Uj bendicionqa kanman ashkha suyusmanta misioneroswan sumaj amigos ruwakusqayku. Chantapis wakin lugarespeqa ashkha estudiosniyoj karqayku. Wakin kutisqa sapa ujniyku hasta 20 estudiosta yachachej kayku. Chantapis manapuni qonqakunichu Africamanta hermanos may kʼacha, munakuyniyojtaj kasqankumanta. Tanzaniapi congregacionesta visitashajtiyku, wasisituykoqa uj auto karqa. Chayrayku wakin kutis chay autoykutaqa hermanospa wasin qayllapi sayachej kayku. Hermanostaj tukuy imata jaywariwaj kayku, “atisqankumantapis astawanraj” (2 Cor. 8:3). Chantapis señoraywan khuska sapa día niraj puñukapushaspa, imaynachus chay día riwasqaykumanta willanarikoj kayku. Chaytataj sutichaj kayku “Willanarikuna hora” nispa. Chay kutispeqa Jehovamanpis mayta agradecekoj kayku mana saqerpariwasqaykumanta.

Ann-Catrin: Maytapuni gustawarqa tukuy ladomanta hermanosta rejsiy. Chantapis ashkha parlaykunata yachakorqayku: francesta, lugandata, persata, suajilitapis. Imaymana culturasniyoj runastapis rejserqayku. Chantapis ashkha runasta yanaparqayku Jehovaj testigosninman tukunankupaj. Paykunawanqa sumaj amigos ruwakorqayku, khuskataj Jehovata kusiywan sirverqayku (Sof. 3:9).

Chantapis Diospa tukuy imaymana ruwasqasninta qhawayta aterqayku. Uj asignacionta japʼejtiykoqa Jehovapis waj lugaresta rejsichishawaykuman jina karqa. Jehovaqa ashkha lugaresta rejsichiwarqayku, ashkha imastataj yachachiwarqayku. Noqallaykumantaqa mana chay lugaresta rejsiykumanchu karqa, nitaj waj imastapis yachakuykumanchu karqa.

¿Ima llakiykunapitaj rikukorqankichej? Chanta, ¿imá yanapasorqachej chay llakiykunata aguantanaykichejpaj?

Mats: Jehovata sirvisqayku wataspi ashkha imasmanta onqoykorqayku, chaymanta ujnintaj karqa malaria onqoy. Señoraytaqa ashkha kutispi de emergencia operarqanku. Chantapis mayta llakikullarqaykutaj tatasniyku machitusña kasqankumanta. Mana paykunata qhawayta atejtiykupis hermanosniyku paykunata qhawarqanku pacienciawan, munakuywan, mana saykʼuspataj. Chaymantataj mayta agradecekuyku (1 Tim. 5:4). Jinapis wakin kutisqa karupi kasqaykurayku mana tatasniykuta yanaparisqaykumanta llakikoj kayku.

Ann-Catrin: 1983 watapi Zairepi kashajtiyku maytapuni onqoykorqani. Doctortaj qosayta nerqa: “Kunitanpacha apay waj suyuman”, nispa. Qʼayantin paqarintaj Sueciaman rinaykupaj uj avionllata tarerqayku. Chay aviontaj cargata apanapaj karqa, manataj pasajerosta apananpajchu. Jinapis chaypi rerqayku.

Mats: Doctorqa niwarqayku señorayqa niña kutiripunanta. Jinapis sanoyaporqa. Chaywanpis mayta waqarikorqayku, imajtinchus yuyarqayku niña misioneros kayta atinaykuta. Pero uj watanman Zaireman kuterqayku, watejmantataj uj juchʼuy congregacionpi sirviyta qallarerqayku, suajili parlaypi. Chay congregacionqa Lubumbashipi kashan.

Ann-Catrin: Lubumbashipi kashajtiyku onqoj rikhurerqani. Jinapis wawayqa niraj nacekunanpi wañuporqa. Mana tatas kayta yuyarqaykuchu, jinapis waway wañupojtenqa maytapuni llakikorqani. Chay jina llakiypi kashajtiyku Jehovaqa maytapuni yanapawarqayku. Ni jaykʼaj jina aswan ashkha estudiosniyoj rikhurerqayku. Congregacionpis niraj watapi 35 publicadoresmanta 70 publicadoresman yapakorqa. Reunionespipis ñaupajtaqa 40 tantakoj kayku, chaymantataj 220 tantakorqayku. May ocupasqapuni kasharqayku predicaspa. Jehová ajinata bendeciwasqaykutaj mayta sonqochawarqa. Jinapis wawaykumantaqa yuyarikullaykupuni. Tʼukuriykutaj imaynatachus Jehová chay llakiyniykuta paraisopi chinkachinanpi.

Mats: Tiemponman señorayqa ujllata debilitakaporqa, saykʼusqallataj karqa. Noqatataj chaypachasllataj niwarqanku manchay avanzasqa cancerniyoj kasqayta. Chayraykutaj operachikorqani. Jinapis kunanqa allinña kashani. Señoraypis tukuy atisqanta Jehovata sirvishallanpuni.

Yachayku mana noqallaykuchu ajina llakiykunapi kashasqaykuta. Ruandamanta hermanospis may llakiypi rikukullarqankutaj. 1994 watapi Ruandapi ashkha runasta wañuchisqankutawan chay lugaresmanta ayqekoj hermanosta visitamorqayku. Chaypi rikorqayku hermanosqa sinchʼi creeyniyoj kasqankuta, mayta aguantasqankuta, tukuy sonqotaj jaywarikuyta, wajyarikuyta yachasqankuta. Sutʼitataj repararqayku Jehovaqa ima kajtinpis kamachisninta jarkʼananpaj, cuidananpaj ima may atiyniyoj kasqanta (Sal. 55:22).

Ann-Catrin: 2007 watapi waj llakiypiñataj rikukorqayku. Chaypacha Uganda sucursalta Jehovaman jaywaporqanku, chaymantaj rerqayku. Chay pasayta Nairobi llajtaman viajasharqayku wakin misioneroswan betelitaswan ima, enteroykupi 25 jina karqayku. Nairobi llajtaqa Kenia suyupi kashan. Niraj Kenia fronteraman chayashajtiyku uj camion ñaupaqeykuman yaykuykamuspa chocaykuwarqayku. Choferwan phishqa hermanoswantaj chay rato wañuporqanku. Uj hermanataj hospitalman apasqankutawan wañuporqa. Maytapuni suyakushayku watejmanta paykunata rikukapuyta (Job 14:13-15).

Tiemponman chay accidentemanta nanasqaniy sanoyaporqa. Jinapis qosaywan, wajkunapiwanqa chay accidentemanta manchay mancharisqas qhepakorqayku. Tutanqa mana puñukuyta atejchu kani, may mancharisqataj sonqoypis sayarpashawanman jina rijchʼarej kani. Jehovamanta mayta mañakorqayku chay llakiywan mana atipachikunaykupaj. Chantapis gustawasqayku textosta leererqayku, chaypitaj tʼukurerqayku. Chaymanta yachaj doctoreswanpis yanapachikorqayku. Kunanqa niña anchata llakikuykuchu. Jehovamantataj mañakuyku chay jina llakiykunapi kajkunata sonqochanaykupaj yanapanawaykuta.

Llakiykunapi kashajtiykichej Jehovaqa “chawa runtusta” jina cuidasusqaykichejta ninkichej. ¿Imaynataj chay, willariwaykumanchu?

Mats: Suajili parlaypi kayta niyta yachanku: “Chawa runtusta jina apawarqayku”, nispa. Chawa runtustaqa mana pʼakirpanapaj sumaj cuidadowan apaykachanchej. Ajinallatataj Jehovapis tukuy asignacionesniykupi munakuywan cuidawarqayku. Imatachus necesitasqaykoqa kapuwarqaykupuni, wakin kutistaj necesitasqaykumantapis astawanraj. Jehovaqa llajtanta kamachejkunanejta mayta munakuwasqaykuta, khuyakuwasqaykutataj rikuchiwarqayku.

Ann-Catrin: Qosay nin jina Jehovaqa maytapuni cuidawarqayku. Uj diaqa wajyamuwaspa niwarqanku tatay hospitalpi may sinchʼi onqosqa kashasqanta. Qosaytaj chaypachasllaraj malaria onqoymanta sanoyapusharqa. Chayrayku mana qolqeyku karqachu Sueciaman avionpi rinaykupaj. Chayman rinaykupaj autoykuta vendeyta munasharqayku. Jinallapi uj qhariwarmi wajyamuwarqayku. Paykunaqa imapichus rikukushasqaykuta yachasqanku, niwarqaykutaj avionpi rinaykupaj ujnin pasajeykuta pagapunawaykuta. Chaymantaqa uj kuraj hermanitañataj wajyamuwarqayku. Payqa uj cajitapi qolqeta jallchʼasqa. Chay cajitamantaj uj letreritota churasqa: “Kayqa necesitajkunapaj”, nispa. Ajinata Jehovaqa uj ratollapi avionpi rinaykupaj pasajeta pagapuwarqayku (Heb. 13:6).

¿Imastá yachakunkichej 50 watastaña Jehovata tukuy atisqaykichejta sirvisqaykichejmanta?

Ann-Catrin: Yachakorqani kallpataqa japʼisqanchejta sonqo tiyasqalla kaspa, Jehovapitaj atienekuspa. Jehovapi atienekojtinchejqa, pay llakiykunasninchejwan maqanakun, nisunman llakiykunasninchejta aguantanapaj yanapawanchej (Isa. 30:15; 2 Cró. 20:15, 17). Sapa asignacionniykupi Jehovapaj tukuy atisqaykuta llankʼarqayku. Paytaj maytapuni bendeciwarqayku. Nichá chay chhika bendicionesta japʼiykumanchu karqa kay mundopi waj imasta ruwaspaqa.

Mats: Noqaqa mayta yachakuni ima llakiypi rikukuspapis Jehovapipuni atienekunay kasqanta. Ajinallamanta reparayta atini imaynatachus pay yanapawasqanta (Sal. 37:5). Jehovaqa palabranpi nin jina ladoykupipuni karqa. Kunanpis sutʼita reparayku kay Myanmar Betelpipis noqallaykuwanpuni kashasqanta.

Jehovaqa ni jaykʼaj saqerpariwarqaykuchu, tukuy imaynasmantataj munakuyninta rikuchiwarqayku. Sonqomantapacha munayku Jehovapaj astawan llankʼayta munaj jovenespis chay munakuyninta japʼinankuta. Jóvenes, chaytaqa japʼiyta atinkichej ima asignacionpipis Jehovawan yanapachikuspalla.