Diospa munakuynenqa wiñaypaj kallanqapuni

1, 2. Llakiypi rikukusqankurayku, ¿imaynataj ashkha hermanos kashanku?

SINCHʼI wayrapi purishaj barcopi piensarina. Mar yakusqa sinchʼita qhollchoqeyaspa patamantaj uramantaj barcota oqharishan. May kallpawan wajtamuspataj kayman jaqayman apaykachashan. Ajina kajtin barcotaqa sayachina ganchollanwan sayachiyta atinkuman.

² Sinchʼi llakiypi rikukushanchej chayqa ichapis chay barco jina kashasunman. Chay llakiyninchejtaj barcota jina patamantaj uramantaj oqhariwasunman. Uj diaqa Jehová munakuwasqanchejmanta, yanapawasqanchejmanta sumaj seguros kashasunman, qʼayantintaj yuyasunman Jehovaqa llakiyninchejta ni reparallasqantapis (Sal. 10:1; 13:1). Ichapis uj amigonchej kʼachitu palabraswan kallpachariwasunman, chaywantaj uj tiempota allillan kasunman (Pro. 17:17; 25:11). Chaymantataj watej iskayrayasunman. Ichapis yuyasunman Jehová manaña noqanchejmanta llakikusqanta. Ajinapi rikukushanchej chay, ¿imataj noqanchejpaj barco sayachina ganchonchej jina kanman, nisunman imatá ruwasunman Jehová munakuwasqanchejmanta, yanapawasqanchejmanta ima mana iskayrayanapaj ni kunan, ni aswan qhepaman?

3. ¿Imatataj Salmos 31:7; 136:1 versículos yachachiwanchej Jehovaj munakuyninmanta, chanta imaraykutaj paylla ajinata munakuyta atin? (Dibujotawan qhawariy).

³ Sinchʼi llakiypi rikukuspaqa yuyarikunanchejpuni tiyan Jehová munakuwasqanchejta, chay munakuynintaj wiñaypaj kasqanta. Chayqa barco sayachina ganchota kachaykuy jina (Salmos 31:7; 136:1 leey). Kay versiculopi “munakuy” palabrata oqharisqanqa, hebreo parlaypi niyta munan pitapis tukuy sonqo munakuy, chay munakuytaj mana tukukuyniyoj kasqanta. Ajina munakuytataj Jehovalla sumajta rikuchiyta atin. Chayrayku Biblia nin “may jina munakuyniyoj” kasqanta (Éxo. 34:6, 7). Chantá nillantaj: “Munakuyniykeqa may jina jatun, qanmanta yanapata mañakusojkunapaj”, nispa (Sal. 86:5). Chaywanqa nishawanchej Jehovaqa ni jaykʼaj kamachisninta saqerparisqanta. Chayta yuyarikoyqa llakiykunapi rikukojtinchej sinchʼita sayanallapajpuni yanapawasunman (Sal. 23:4).

BIBLIA YACHACHIN JEHOVÁ MUNAKUWASQANCHEJTA, CHAYTA YUYARIKUNAPUNI

4. ¿Imastataj yachakorqanchej Bibliata estudiayta qallarishaspa, chanta imajtintaj mana piwanpis engañachikullanchejchu wajta yachachiwajtinchej?

⁴ ¿Imataj yanapallawasunmantaj llakiykunapi kajtinchej barco sayachina ganchonchejta kachaykunapaj, nisunman Jehová munakuwasqanchejmanta mana iskayrayanapaj? Yuyarikunanchej tiyan Bibliaqa Jehová munakuwasqanchejta yachachisqanta. Bibliata estudiayta qallarishaspa, ¿imastataj yachakorqanchej? Yachakorqanchej Diospa sutin Jehová kasqanta, Jesús kʼata Wawan kasqanta, wañusqas ni imata yachasqankuta, kay jallpʼa kʼachitu paraisoman tukunanta, runastaj chaypi wiñaypaj kausakunankuta (Sal. 83:18; Ecl. 9:5; Juan 3:16; Apo. 21:3, 4). Chay imasta yachakusqanchej cheqapuni kasqanta sutʼitaña yachaspa, ¿manacharí piwanpis engañachikullanchejchu wajta yachachiwajtinchej? Yachanchejña chay imasta yachakusqanchejqa Bibliaman jinapuni kasqanta. Jehová munakuwasqanchejtapis Bibliata estudiayta qallarishaspa yachakorqanchej. Chayrayku manallataj iskayrayananchejchu tiyan Jehová munakuwasqanchejmanta, llakikuwasqanchejmantapis. Chaymanta astawan parlarina.

5. ¿Imaynatataj llulla yachachiykunapi manaña creenchejchu?

⁵ Niraj Bibliata estudiashaspa ichapis wakin llulla yachachiykunapi creej kanchej. Bibliata estudiayta qallarejtinchej, ¿imataj yanapawarqanchej manaña chay llullaspi creenapaj? Ichapis religionninchejpi yachachiwasqanchejta Bibliaj nisqanwan kikincharqanchej. Ichapis ñaupajta creej kanchej Jesús Dios kasqanta. Bibliata estudiasqanchejman jinataj, “¿ciertopunichu chay kanman?” nispa tapukorqanchej. Bibliata sumajta qhawaykurispataj repararqanchej chayqa llulla yachachiy kasqanta. Chayrayku manaña chaypi creerqanchejchu, manaqa Biblia cheqa kajta yachachisqanpi. Bibliaqa yachachin Jesusqa ‘tukuy ima ruwasqa kajmanta ñaupaj kaj’ kasqanta, ‘Diospa kʼata Wawantaj’ kasqanta (Col. 1:15; Juan 3:18). Jinapis llulla yachachiykunaqa “sumaj perqasman” rijchʼakunkuman, nitaj thuñiyta atillasunmanchu (2 Cor. 10:4, 5). Pero cheqa kajta yachakuspañaqa manaña chay llulla yachachiykunapi ni imarayku creenchejchu (Fili. 3:13).

6. ¿Imajtintaj 136 Salmopi ashkha kutista nin ‘Jehovaj munakuynin wiñaypaj’ kasqanta?

⁶ Kikillantataj ruwana llakiypi rikukuspa Jehová munakuwasqanchejmanta iskayrayanchej chayqa. Tapukusunman: “¿Ciertopunichu chay kanman?”, nispa. Chaymantataj iskayrayasqanchejta Bibliaj nisqanwan kikinchana. Kay yachaqanapaj ajllasqa textopi, nisunman Salmo 136:1 versiculopi, Biblia nin Jehová munakuwasqanchejta. Chay versiculopi ‘munakuy’ palabrata oqharisqanqa, hebreo parlaypi niyta munan chay munakuynin mana tukukuyniyoj kasqanta. ¿Imajtintaj nin Jehovaj munakuynin mana tukukuyniyoj kasqanta? ¿Imajtintaj chay salmopi 26 kutista nin ‘Jehovaj munakuynin wiñaypaj’ kasqanta? Reparanchej jina Bibliaqa sutʼita yachachin Diosqa llajtanta manchaytapuni munakusqanta. Chayrayku Jehová munakuwasqanchejqa qallariypi yachakuspa japʼikorqanchej chay waj yachachiykuna jinallataj. Jehová noqanchejmanta mana llakikusqanta yuyayqa llulla. Chayrayku amapuni chay llullapi creenachu, imaynatachus waj llulla yachachiykunapi mana creenchejchu ajinata.

7. ¿Ima textostaj reparachiwanchej Jehová munakuwasqanchejtapuni?

⁷ Bibliapi may chhika textos sutʼita reparachiwanchej Jehová munakuwasqanchejtapuni. Iskaymanta parlarina. Uj textopeqa Jesús discipulosninman nerqa: “Qankunaqa ashkha pʼisqetusmantapis astawanraj valenkichej”, nispa (Mat. 10:31). Payqa mana nerqachu: “Qankunaqa ashkha pʼisqetusmantapis ichapis astawanraj valenkichej”, nispa. Jehovataj llajtanta nerqa: “Noqa kallpachasqayki, noqa yanapasqayki. Justiciata ruwaj paña makiywan japʼisqayki”, nispa (Isa. 41:10). Payqa mana nerqachu: “Noqa ichapis yanapasqayki”, nispa. Chay textosqa sutʼita reparachiwanchej Jehová munakuwasqanchejtapuni. Chayrayku llakiypi rikukuspa Dios munakuwasqanchejmanta iskayrayashanchej chayqa, chay jina textos mayta yanapawasun: mana Jehová munakuwasqanchejta reparanallapajchu, manachayqa Jehová munakuwasqanchejmanta ni imarayku iskayrayanapaj. Chayrayku chay textospi tʼukurina, iskayrayasqanchejtataj Jehovaman willakuna. Chayta ruwasun chayqa, ñaupa cristianos jinallataj nisun: “Noqanchejtaj yachanchej, creenchejtaj Dios munakuwasqanchejta”, nispa (1 Juan 4:16).a

8. ¿Imatá ruwasunman Jehová munakuwasqanchejmanta iskayrayashallanchejpuni chay?

⁸ Sichus Jehová munakuwasqanchejmanta iskayrayashallanchejpuni chayqa, yuyasqanchejta imatachus yachasqanchejwan kikinchana. Ichapis yuyanchej Dios mana munakuwasqanchejta. Jinapis yachanchej chayqa llulla kasqanta, Biblia Jehová munakuwasqanchejta yachachisqanrayku. Bibliaj nisqantaj cheqapuni, sonqonchejtaj chʼaukiyawasunman. Biblia nin: “Diosqa munakuymin”, nispa (1 Juan 4:8). Chayrayku sichus Jehová mana munakuwasqanchejta yuyasunman chayqa, chay nisqan llulla kasqanta nishasunman.

JEHOVÁ MUNAKUWASQANCHEJPI TʼUKURINA

9, 10. ¿Imamantataj Jesús parlasharqa “Tatayqa munakusunkichej” nishaspa? (Juan 16:26, 27; fotostawan qhawariy).

⁹ Jehová munakuwasqanchejmanta mana iskayrayanapaj yanapallawasunmantaj Jesuspa nisqanta ukhunchariy. Payqa discipulosninta nerqa: “Tatayqa munakusunkichej”, nispa (Juan 16:26, 27 leey). ¿Imajtintaj Jesús chayta nerqa? ¿Discipulosninta kusirichinallanpajchu? Mana. Ñaupaj versículos reparachiwanchej mana discipulosnin imaynachus kashasqankumantachu parlashasqanta, manachayqa oracionmanta.

¹⁰ Jesusqa discipulosninta nerqa sutinpi mañakunankuta, manataj paymanta mañakunankutachu (Juan 16:23, 24). Chaytataj sumajta entiendenanku karqa. ¿Imajtin? Discipulosnin kasqankurayku Jesús kausarimojtin ichapis paymanta mañakuyta munankuman karqa. Ichapis yuyankuman karqa Jesús paykunata manchayta munakusqanrayku mañakusqankuta uyarinallanta, chay mañakusqankutataj Tatanman willananta. Jesustaj paykunaman sutʼincharqa mana ajinachu kasqanta. Chayrayku nerqa: “Tatayqa munakusunkichej”, nispa. Arí, Jehovaqa manchayta munakuwasqanchejrayku paypuni mañakusqanchejta uyariwanchej. Chaytataj Bibliapuni yachachin. Noqanchejpis Bibliata estudiaspa Jesusta rejserqanchej, munakorqanchej ima (Juan 14:21). Jinapis ñaupa tiempomanta discipulosnin jinallataj Diosmanta mañakunanchej tiyan, mana Jesusmantachu. Diostaj mañakusqanchejta uyariwasunpuni mayta munakuwasqanchejrayku. Chayrayku Jehovamanta mañakuspaqa ‘munakuwasqanchejpi’ creesqanchejta rikuchishanchej (1 Juan 5:14).

IMAJTINCHUS ISKAYRAYASQANCHEJTA SUTʼITA REPARANA

11. ¿Imajtintaj Satanás kusikun Jehová munakuwasqanchejmanta iskayrayajtinchej?

¹¹ ¿Imajtintaj iskayrayasunman Jehová munakuwasqanchejmanta? Ichapis yuyasunman chaypaj Satanás juchayoj kasqanta. Chaytaj ajinapuni. Diabloqa sapa ujninchejta ‘oqoykuyta munashawanchej’, Jehová mana munakuwasqanchejtataj yuyachiyta munawanchej (1 Ped. 5:8). Jehovaqa munakuwasqanchejrayku Wawanta kachamorqa. Satanastaj yuyachiyta munawanchej mana chay regalopaj jinachu kasqanchejta (Heb. 2:9). Jehová munakuwasqanchejmanta iskayrayajtinchej, ¿pitaj kusikun? Satanás. Llakiypi kaspa Jehovamanta karunchakojtinchejrí, ¿pitaj kusikun? Satanasllataj. Jinapis paytamin Diosqa manaña munakunchu. Pero Satanasqa noqanchejta yuyachiyta munawanchej Jehová mana munakuwasqanchejta, nitaj allinpajchu qhawawasqanchejta. Chay trampawan payqa runasta astawan urmachin (Efe. 6:11). Ajinata engañayta munawasqanchejta yachasqanchejrayku, paypa contranta astawan sayaykusunchej (Sant. 4:7).

12, 13. ¿Imajtintaj jucha Jehová munakuwasqanchejmanta iskayrayachiwasunman?

¹² Jehová munakuwasqanchejmantaqa mana Satanasllachu iskayrayachiwasunman, juchata herenciata jina japʼisqanchejpis iskayrayachillawasunmantaj (Sal. 51:5; Rom. 5:12). Juchaqa Diosninchejmanta karunchawanchej. Chantapis yuyayninchej, sonqonchej, cuerponchejpis jucharayku manaña cabalchu.

¹³ Juchasapas kasqanchejrayku sonqonchej juchachawanchej, llakikunchej, iskayrayanchej, pʼenqakunchej ima. Tukuypis juchallikuspa ajina sientekunchej. Pero mana juchallikuspallachu ajina sientekusunman, manachayqa pantaj runas kasqanchejta yachasqanchejraykupis ajina sientekullasunmantaj. Diostaj mana ajina pantaj runas kananchejpajchu ruwawarqanchej (Rom. 8:20, 21). Pantaj runas kasqanchejrayku chʼusu ruedayoj auto jinallaña kanchej. Chʼusu ruedayoj autoqa manaña allintachu purin, ajinallataj noqanchejpis kanchej pantaj runasña kasqanchejrayku. Chayrayku wakin kuteqa Jehová munakuwasqanchejmanta iskayrayasunmanpuni. Ajinata iskayrayaspa, yuyarikuna Jehovaqa “aswan jatun Dios” kasqanta, payta ‘munakojkunata, kamachisqasninta kasukojkunatapis munakusqanta’ (Neh. 1:5).

14. ¿Imaynatataj Jehová Wawanta kachamusqanpi tʼukuriy yanapawanchej Jehová munakuwasqanchejmanta mana iskayrayanapaj? (Romanos 5:8; “Pajtataj ‘juchaj atiyninwan engañachikusunman’” nisqa recuadrotawan qhawariy).

¹⁴ Ichapis wakin kuteqa yuyasunman mana Jehová munakunawanchejpaj jinachu kasqanchejta. Chaytaj ajinapuni kanpis, jinapis chayllataj reparachiwanchej Jehovaqa manchaytapuni munakuwasqanchejta. Noqallanchejmantaqa ni imata ruwayta atisunmanchu Jehová munakunawanchejpaj. Jinapis payqa manchayta munakuwasqanchejrayku Wawanta kachamorqa juchasninchejta perdonanawanchejpaj (1 Juan 4:10). Chantapis yuyarikunapuni Jesusqa mana cheqan runasta salvajchu jamusqanta, manachayqa juchasapasta (Romanos 5:8 leey). Jehovaqa mana suyanchu imatapis ruwajtinchej ni imitata pantananchejta, yachan pantaj runas kasqanchejta. Pantaj runas kasqanchejraykutaj Dios munakuwasqanchejmanta iskayrayasunmanpuni. Chayta entiendeytaj yanapawanchej chay yuyayta umanchejmanta orqhonapaj astawan kallpachakunapaj (Rom. 7:24, 25).

DIOSMANTA AMAPUNI KACHARIKUNACHU

15, 16. Jehovamanta mana kacharikusunchejchu chay, ¿imatataj paypis ruwanqa? (2 Samuel 22:26).

¹⁵ Llakiykunapi tarikojtinchej Jehovaqa munan allinta ajllananchejta, ‘paymantaj kʼaskaykunanchejta’ (Deu. 30:19, 20). Sichus noqanchej paymanta mana karunchakusunchu chayqa, paypis manallataj noqanchejmanta karunchakonqachu, nitaj ni jaykʼaj saqerpariwasunchu (2 Samuel 22:26 leey).

¹⁶ Yachakunchej jina llakiypi tarikuspaqa barco sayachina ganchonchejta kachaykunanchej tiyan, nisunman yuyarikunanchej tiyan Jehová munakuwasqanchejta, yanapanawanchejpajtaj chaypipuni kananta. Sichus maykʼajllapis Jehová munakuwasqanchejmanta iskayrayanchej chaytaj, imatachus Diospa munakuyninmanta yachasqanchejta yuyarikuna, amataj sonqonchej niwasqanchejta kasunachu. Amapuni iskayrayanachu Jehovaj munakuynin mana tukukuyniyoj kasqanmanta, wiñaypajtaj kasqanmanta. Chaytaqa Bibliapuni yachachin.