Jehová munakususqanmanta ama iskayrayaychu

1. ¿Imaraykutaj kausayniykita Jehová Diosman qoporqanki? (Fototawan qhawariy).

¿YUYARIKUNKICHU maypachachus Jehová Diosman kausayniykita qoporqanki chay pʼunchayta? Chayta ruwarqanki payta rejsisqaykirayku, maytataj munakusqaykirayku. Chayraykutaj nerqanki chaymantapacha munaynillantaña ruwanaykita, tukuy sonqoykiwan, tukuy kausayniykiwan, tukuy yuyayniykiwan, tukuy kallpaykiwantaj munakunaykita (Mar. 12:30). Chay kutimantapachataj payta munakusqayki astawan wiñarqa. Chayrayku pillapis “¿Diosta munakunkipunichu?” nispa tapusojtin, chay rato kutichinki: “Arí, munakunipuni. Jehovata jinaqa ni pita munakunichu”, nispa.

2, 3. 1) ¿Imatataj Jehová munan? (Jeremías 31:3). 2) ¿Imatá kay yachaqanapi yachakusun?

² “¿Dios munakusunkichu?” nispa tapusojtinkurí, ¿imatá kutichiwaj? Ichapis sonqoyki ukhupi yuyawaj mana Jehová munakusunanpaj jinachu kasqaykita. Chayraykutaj chay tapususqankuman mana kutichiyta atillawajchu. Uj hermanapis chayta nerqa. Payqa imillita kashaspa mana munasqachu karqa. Paytaj nin: “Noqaqa Jehová Diosta tukuy sonqo munakuni. Jinapis wakin kutis yuyani pay mana munakuwasqanta”, nispa. Qantarí, ¿Jehová munakusunkimanchu?

³ Jehovaqa mana munanchu munakususqanmanta iskayrayanaykita (Jeremías 31:3 leey). Jehovaqa amigon kanaykita munasqanrayku payman pusamusorqa. Kausayniykita payman qopojtiyki, bautizakojtiykitaj Jehovaqa jatun munakuyninta rikuchisorqa. Chay jina munakuynintataj kamachisnillanman rikuchin. Chayqa niyta munan mayta munakususqanta, nitaj jaykʼajpis saqerparisunanta. Ajinata munakususqanrayku “paypataña kanki” (Mal. 3:17). Jehovaqa mana munanchu munakususqanmanta iskayrayanaykita. Astawanpis munan apóstol Pablo jina ninaykita: “Allintapuni yachani, ni wañuypis, ni kausaypis, ni angelespis, ni gobiernospis, ni kaypi kaj imaspis, ni jamoj imaspis, ni atiykunapis, ni patapi kaj imaspis, ni urapi kaj imaspis, nitaj waj ruwasqa kaj imaspis tʼaqayta atiwasunmanchu Diospa munakuyninmantaqa”, nispa (Rom. 8:38, 39). Kay yachaqanapi yachakusun Jehová munakuwasqanchejmanta imaraykuchus mana iskayrayananchejchu kasqanta, chantapis imachus yanapanawanchejta munakuwasqanchejmanta astawan convencekunapaj.

¿IMAJTÍN MANA ISKAYRAYANACHU JEHOVÁ MUNAKUWASQANCHEJMANTA?

4. ¿Ima trampawantaj Satanás astawan urmachiyta munawanchej, chanta imaynatá contranpi sayaykusunman?

⁴ Sichus Jehová munakuwasqanchejmanta mana iskayrayasunchejchu chayqa, ‘Diabloj trampasninman mana urmasunchejchu’ (Efe. 6:11). Manaña Jehovata sirvinanchejpaj, ¿ima trampatataj Diablo astawan churawanchej? Payqa creechiyta munawanchej Jehová mana munakuwasqanchejta. Satanasqa aprovechakunanpaj manchay vivo. Bibliaqa nin león jina kasqanta (1 Ped. 5:8, 9). Leonesqa pisi kallpayoj animalitostapuni japʼerqoyta yachanku. Kikillantataj Diablopis pisi kallpa kashajtinchejpuni japʼerqoyta munawanchej. Ichapis saykʼusqas, desanimasqas kashasunman ñaupajpi imapis pasawasqanchejrayku, kunan problemasniyoj kashasqanchejrayku, chayri imachus qhepaman pasananmanta llakikushasqanchejrayku (Pro. 24:10). Diablo mana urmachinawanchejpaj, nitaj gustonwan llojsinanpaj contranpi sayaykunanchej tiyan, kallpachakunanchejtaj tiyan Jehová munakuwasqanchejmanta mana iskayrayanapaj (Sant. 4:7).

5. ¿Imajtintaj reparananchejpuni tiyan Jehová munakuwasqanchejta, maytataj valorawasqanchejta?

⁵ Jehová munakuwasqanchejmanta mana iskayrayasunchejchu chayqa, payman astawan qayllaykusun. Jehovaqa munakunanchejpaj, munasqa kananchejpajtaj ruwawarqanchej. Chayrayku pillapis munakuwanchej chayqa noqanchejpis munakullanchejtaj. Sichus reparasun Jehová mayta munakuwasqanchejta, mayta valorawasqanchejta chayqa, payta astawan munakusunchej (1 Juan 4:19). Biblia nin: “Diosman qayllaykuychej, paytaj qankunaman qayllaykamusonqachej”, nispa (Sant. 4:8). Chayrayku payta astawan munakojtinchej paypis munakullawasuntaj. ¿Imataj yanapawasunman Jehová munakuwasqanchejmanta mana iskayrayanapaj? Chayta qhawarina.

¿IMÁ YANAPAWASUNMAN JEHOVAJ MUNAKUYNINMANTA MANA ISKAYRAYANAPAJ?

6. Jehová munakuwasqanchejta mana creeyta atillanchejchu chay, ¿imatá paymanta mañakusunman?

⁶ Jehovamanta kutin kutinta mañakuna imajtinchus munakuwasqanchejta entiendenapaj yanapanawanchejta (Luc. 18:1; Rom. 12:12). Ichapis diapi ashkha kutista mañakunanchej kanqa munakuwasqanchejta reparachinawanchejta. Sichus sonqonchej Jehová munakuwasqanchejta nipuni entiendenchu chayqa, yuyarikuna Jehovaqa sonqonchejmanta nisqa aswan kuraj kasqanta (1 Juan 3:19, 20). Jehovaqa rejsikusqanchejmanta nisqapis aswan sumajtaraj rejsiwanchej, allin imastataj noqanchejpi rikun chayta mana reparakojtinchejpis (1 Sam. 16:7; 2 Cró. 6:30). Chayrayku sonqonchejpi imaynachus kashasqanchejta payman willarikunapuni, munakuwasqanchejmanta mana iskayrayanapajtaj yanapata mañakuna (Sal. 62:8). Orakuytawantaj mañakusqanchejman jina ruwana. ¿Imaynamanta? Chayta qhawarina.

7, 8. ¿Imaynatataj Salmos libro yanapawanchej Jehová munakuwasqanchejmanta mana iskayrayanapaj?

⁷ Jehovaj nisqanta creena. Diosqa Bibliata qhelqajkunata espíritu santonwan yanaparqa imaynachus kasqanmanta maychus kajsituta qhelqanankupaj. Davidqa Jehová Diosmanta kay jina kʼachituta nerqa: “Jehová Diosqa sonqo pʼakisqa runaspa qayllallanpi kashan. Paymin llakisqa kajkunataqa salvan”, nispa (Sal. 34:18). Ajina llakisqa kashaspa ichá noqanchejpis yuyasunman ni pi entiendeyta atiwasqanchejta, nitaj ni pi yanapayta atiwasqanchejta. Jehovataj yachan ajinapi rikukushajtinchej paypa yanapanta astawan necesitasqanchejta, chayraykutaj niwanchej ladonchejpipuni kananta. Waj salmopitaj David nerqa: “Diosníy, waqasqaytaqa sapa sutʼuyta botellaykipi waqaychay ari”, nispa (Sal. 56:8). Chay jina qara botellapeqa viajajkuna yakuta apakoj kanku ni imaynitata usuchinankupaj, nitaj ni uj sutʼuysitullatapis pierdenankupaj. Kikillantataj Jehovapis llakiykunarayku waqajtinchej sapa sutʼuysitutapuni botellanpi waqaychan. Chayta ruwan llakiyninchejmanta sonqon nanasqanrayku, noqanchejmantataj mayta llakikusqanrayku. Davidqa Jehovamanta nillarqataj: “Tukuy ruwasqayta sumajta yachanki”, nispa (Sal. 139:3). Chayqa niyta munan Jehovaqa tukuy ruwasqasninchejtapuni yachasqanta, allin ruwasqasninchejtataj astawan qhawasqanta (Heb. 6:10). Chaytaqa ruwan payta kusichinanchejpaj imastachus ruwasqanchejta mayta valorasqanrayku.a

⁸ Chay versiculosqa maytapuni kallpachawanchej. Chaypeqa Jehová kayta nishawanchej: “Mayta munakususqayta yachanaykita munani, qanmantataj mayta llakikusqayta”, nispa. Jinapis yachakunchej jina, Satanasqa mana munanchu Jehová munakuwasqanchejta creenanchejta. Sichus wakin kutis Jehová munakuwasqanchejmanta iskayrayanchej chayqa, kayta tapurikuna: “¿Pitataj creesaj? ¿‘Llullakuypa tatan’ Satanastachu chayri ‘cheqa kajta parlaj Diostachu’?”, nispa (Juan 8:44; Sal. 31:5).

9. ¿Imatá Jehová nin payta munakojkunaman? (Éxodo 20:5, 6).

⁹ Piensarina payta munakojkunata imaynatachus Jehová munakusqanta. Imatachus Jehová Moisesman, israelitasmanwan nisqanpi tʼukurina (Éxodo 20:5, 6 leey). Payqa nerqa payta munakojkunata khuyakunallantapuni, nisunman jatun munakuyninta rikuchinallantapuni. Chay munakuynenqa mana tukukuyniyoj. Chayrayku payta munakojkunataqa munakullanqapuni, ni jaykʼajtaj saqerparenqachu (Neh. 1:5). Chayrayku Jehová munakuwasqanchejta mana creeyta atillanchejchu chayqa kayta tapurikuna: “¿Noqa Jehovata munakunichu?”. Sichus qan payta munakunki, kusichinaykipajtaj kallpachakushanki chayqa, paypis mayta munakullasunkitaj, chaymantaqa amapuni iskayrayaychu (Dan. 9:4; 1 Cor. 8:3). Jehovata munakusqaykimanta mana iskayrayankichu chayqa, ¿imaynatataj Jehová munakususqanmanta iskayrayawajri? Payqa munakusunkipuni, ni jaykʼajtaj saqerparisonqachu.

10, 11. ¿Imaynatá Jehová munan Jesuspa wañuyninta qhawananchejta? (Gálatas 2:20).

¹⁰ Jesuspa wañuyninpi tʼukurina. Jehovaj aswan jatun regalonqa runasrayku Wawanta kay jallpʼaman kachamusqan kashan (Juan 3:16). Manataj tukuy runasrayku wañunallanpajchu kachamorqa, manaqa sapa ujninchejrayku wañunanpaj. Apóstol Pablopi piensarina. Payqa niraj cristiano kashaspa allin sajra runapuni karqa, cristianoman tukuspañataj siga kallpachakunan karqa mana pantananpaj (Rom. 7:24, 25; 1 Tim. 1:12-14). Jinapis Pablo nerqa Jesusqa payrayku wañusqanta, chay regalotaqa Dios payman qosqanta (Gálatas 2:20 leey). Chay nisqantataj Diosqa Bibliapi qhelqacherqa, noqanchej chaymanta yachakunanchejpaj (Rom. 15:4). Jehovaqa munallantaj Jesuspa wañuyninta sapa ujninchejpaj uj sumaj regalota jina qhawananchejta. Ajinata qhawasunchej chayqa, astawan convencekusunchej Jehová munakuwasqanchejmanta.

¹¹ Maytapuni agradecekunchej Jehová noqanchejrayku Wawanta wañunanpaj kachamusqanmanta. Jinapis Jesusqa mana runasrayku kausayninta qonallanpajchu jamorqa, manaqa Diosmanta cheqa kajta yachachinanpajpis. Payqa yachacherqa Jehová wawasninta mayta munakusqanta (Juan 18:37).

JESÚS YACHACHIWARQANCHEJ JEHOVÁ MAYTA MUNAKUWASQANCHEJTA

12. ¿Imajtintaj Jesús Tatanmanta yachachisqan atienekunapaj jinapuni?

¹² Jesusqa kay jallpʼapi kashaspa imaynachus Jehová kasqanmanta yachachispa mayta kusikoj (Luc. 10:22). Tatanmanta imatachus yachachisqantaj atienekunapaj jinapuni. Payqa may chhika watasta cielopi Tatanwan khuska karqa, chayrayku paylla ni pi jina sumajta rejsin (Col. 1:15). Jesusqa yachan Tatan payta maytapuni munakusqanta. Chantá ñawisninwan rikorqa kasukoj wawasnintapis maytapuni munakusqanta, cielopi wawasninta, kay jallpʼapi wawasnintapis. Kunan qhawarina imaynatachus Jesús wajkunata yanapasqanta Jehovaj munakuyninmanta mana iskayrayanankupaj.

13. ¿Imaynatá Jesús munan Jehovata qhawananchejta?

¹³ Jesusqa munan Jehovata manchay munakuyniyoj Tatanchejta jina qhawananchejta. Jesusqa Evangeliospi 160 kutismanta astawan Jehovata Tatáy nispa nerqa. Discipulosninwan parlashaspataj ‘cielopi kaj Tataykichej’ nispa nej (Mat. 5:16; 6:26). Biblia de estudiopi Mateo 5:16 versiculoj sutʼinchaynin nin: “Ñaupa tiempo Diospa kamachisnenqa Jehovata nej kanku ‘Tukuy Atiyniyoj Dios’, ‘Aswan Patapi kaj Dios’, ‘Ruwawaj Jatun Diosníy’ nispa. Jesustajrí ‘Tatáy’ nispalla Jehovata nej. Chayqa reparachiwanchej Jehová Diosninchejqa munakuyniyoj Tatanchejta jina qhawananchejta munasqanta”. Qhawarina iskay kutispi Jesús Jehovata “Tatáy” nispa nisqanmanta.

14. ¿Imaynatataj Jesús reparachiwanchej Jehová sapa ujninchejta mayta munakuwasqanchejta? (Mateo 10:29-31; dibujotawan qhawariy).

¹⁴ Ñaupajta qhawarina imatachus Jesús Mateo 10:29-31 (leey) versiculospi nisqanta. Chaypi nerqa: “Ni uj pʼisqetullapis pampaman urmanchu mana Tataykichejpa yachanantaqa”, nispa. Pʼisqetusqa mana Jehovata yupaychankuchu, nitaj munakunkuchu. Jinapis Jehovaqa paykunamanta mana qonqakunchu. Noqanchejtaj Jehovata yupaychanchej payta munakusqanchejrayku. Chayrayku, ¿nichu sapa ujninchejta astawanraj munakuwasunman? 30 versiculotaj nin: “Umaykichejmanta chujchasniykichejpis tukuyninku yupasqa kashanku”, nispa. Biblia de estudiopi chay versiculoj sutʼinchaynintaj nin: “Chujchitanchejtapis Jehová yupasqanqa reparachiwanchej maytapuni munakuwasqanchejta”. Chaypi reparanchej Jesusqa convencesqa kananchejta munasqanta Tatanchej Jehová sapa ujninchejta mayta munakuwasqanchejmanta.

15. ¿Imatá Juan 6:44 Jehovamanta yachachiwanchej?

¹⁵ Juan 6:44 (leey) versiculopi Jesusqa Jehovata “Tatay” nillarqataj. Tatanchej Jehovaqa allin sonqoyoj kasqanchejta rikusqanrayku payman pusamuwarqanchej (Hech. 13:48). Biblia de estudiopi Juan 6:44 versiculoj sutʼinchaynin nisqanman jina, ichapis Jesusqa kay yachaqanapaj textomanta parlasharqa. Chay textopi nin: “Noqaqa munakuywan noqaman kʼaskachikorqayki”, nispa. Chayqa traducikullanmantaj: “Chayrayku noqaqa munakullarqaykipuni”, nispa (Jeremías 31:3 versiculota, sutʼinchaynintawan Oseas 11:4 versiculowan kikinchay). Chayqa niyta munan noqanchej mana reparakojtinchejpis, Tatanchej Jehovaqa noqanchejpi allin imastapuni qhawashasqanta, maytataj munakuwasqanchejta.

16. 1) ¿Imatá Jesús Jehovamanta yachachiwanchej, chanta imajtín chay nisqanta creesunmanpuni? 2) ¿Imataj yanapawasunman Jehová kʼacha Tatanchej kasqanmanta mana iskayrayanapaj? (“Tukuyninchej ajina Tatata necesitanchej” nisqa recuadrota qhawariy).

¹⁶ Jesusqa Jehová Tatanchej kasqanta nispa kayta nishawarqanchej: “Jehovaqa Tatallaykitaj, mana noqaj Tatallaychu. Payqa mayta munakusunki, qanmantataj llakikun”, nispa. Chayrayku Jehová munakuwasqanchejta mana creeyta atillanchejchu chayqa, kaypi piensarina: Jesusqa ni jaykʼaj llullakunmanchu, imaraykuchus payqa ni pi jina Tatanta sumajta rejsin. Chayrayku Jehová munakuwasqanchejta nispaqa ni llullakushawanchejchu (1 Ped. 2:22).

KALLPACHAKUNALLAPUNI JEHOVÁ MUNAKUWASQANCHEJMANTA AMA ISKAYRAYANAPAJ

17. ¿Imajtintaj sapa día astawan convencekunanchej tiyan Jehová munakuwasqanchejmanta?

¹⁷ Qhawarinchej jina Satanasqa manchay vivo, tukuy imatataj ruwan Jehovamanta karunchanawanchejpaj. ¿Imataj ujnin trampan? Payqa creechiyta munawanchej Jehová mana munakuwasqanchejta. Noqanchejtaj amapuni gustonta qonachu (Job 27:5). Chayrayku tukuy atisqanchejta sapa día kallpachakunallapuni Jehová munakuwasqanchejmanta astawan convencekunapaj.

18. ¿Imataj yanapawasunman Jehová munakuwasqanchejmanta astawan convencekunapaj?

¹⁸ ¿Imastaj yanapawasunman Jehová munakuwasqanchejmanta astawan convencekunapaj? Yachakorqanchej jina, Jehovamanta mañakusunman imaraykuchus munakuwasqanchejta reparachinawanchejta. Kamachisninta maytapuni munakusqanmanta parlaj textospi tʼukurisunman. Chantapis amapuni qonqanachu Jehovaqa payta munakojkunata munakunallantataj, ni jaykʼajtaj saqerparinanta. Chantapis Wawanta wañunanpaj kachamusqanta, sapa ujninchejpaj regalota jina qhawana. Jesús nerqa jinataj Jehovata Tatanchejta jina qhawana. Ajinamanta pillapis “¿Jehová munakusunkichu?” nispa tapuwajtinchej, chay rato kutichisun: “Arí, munakuwanpuni. Noqapis sapa día kallpachakuni payta munakunaypaj”, nispa.