¿Imaynatá Job libro yanapawanchej llakiypi kashajtinchej?

1, 2. ¿Ima kinsa imasraykutaj Job librota leey may allinpuni?

¿KUNALLANRAJ Job librota leererqankichu? Qhelqakusqanmanta 3.500 watas jinaña pasajtinpis, ashkha runasqa ninku tukuynin librosmanta aswan sumaj kasqanta. Chay librota qhelqajtataj alabanku facilta entiendenapaj jina escribisqanrayku, kʼachituta escribisqanrayku, sonqoman chayananpaj jinataj escribisqanrayku. Chay sumaj librota Moisés qhelqajtinpis, Jehová yuyaycharqa chayta qhelqananpaj (2 Tim. 3:16).

² Kay kinsa imasrayku Job libroqa Bibliaj librosninmanta may importante. 1) Reparachiwanchej angelespis runaspis Jehovaj sutinta jatunchaytachus manachus ajllananchejpuni kasqanta. 2) Diosninchejta aswan sumajta rejsinapaj yanapawanchej: munakuyniyoj kasqanta, yachayniyoj kasqanta, cheqan kajta ruwasqanta, atiyniyoj kasqanta ima. Tukuynin Bibliamanta Job librollapi aswan ashkha kutista Jehová “Tukuy Atiyniyoj” Dios kasqanta nin, chay palabrastaqa 31 kutistapuni oqharin. 3) Job libropi sutʼinchan imajtinchus Dios sufrinanchejta saqesqanta, mana kutichiy atina waj tapuykunamantaj kutichin.

3. Job librota estudiay, ¿imaynatá yanapawasunman?

³ Job librota leeyqa uj orqo pataman wichariy jina. Orqo patamantaqa tukuy imata aswan sumajta rikunchej. Job librota leespapis, ajinallatataj llakiykunasninchejmanta imatachus Jehová yuyasqanta aswan sutʼita yachayta atinchej. Kay yachaqanapi yachakusun sufrishajtinchej imaynatachus Job libro yanapawasqanchejta. Yachakullasuntaj imaynatachus Jobpa kausaynin ñaupa tiempopi israelitasta ichapis yanapasqanta, imaynatachus kay tiempopipis yanapanawanchejta. Chantá qhawarillasuntaj imaynatachus Job librowan wajkunata yanaparinata.

JOB SUFRINANTA DIOS SAQEN

4. ¿Imapitaj Job mana kikinchu karqa Egiptopi kaj wakin israelitasmanta?

⁴ Jobqa israelitas Egiptopi esclavos kasharqanku chay tiempollapitaj Uz jallpʼapi tiyakorqa. Ichapis Uz jallpʼaqa Sumaj Jallpʼamanta inti llojsimuy ladopi kasharqa, Arabiamantataj norte ladonpi. Wakin israelitasqa Egiptopi santosta yupaychayta qallarerqanku, Jobtaj Jehovata tukuy sonqo sirverqa (Jos. 24:14; Eze. 20:8). Chayrayku Diosqa Jobmanta nerqa: “Pay jinaqa mana pipis jallpʼa patapi kanchu”, nispa (Job 1:8).a Jobqa ashkha imasniyoj karqa, inti llojsimuy ladopi tiyakojkunamantataj aswan qhapaj, respetasqataj (Job 1:3). Satanasqa maytachá phiñakorqa chay jina rejsisqa, respetasqa runa Jehovata tukuy sonqo sirvisqanmanta.

5. ¿Imaraykutaj Jehová saqerqa Job ñakʼarinanta? (Job 1:20-22; 2:9, 10).

⁵ Satanás nerqa Jobqa sinchʼita ñakʼarispa Jehovata wasanchananta (Job 1:7-11; 2:2-5). Jehovaqa Jobta mayta munakorqa, jinapis saqerqa Satanás rikuchinanta Jobmanta imatachus nisqan ciertochus manachus kasqanta (Job 1:12-19; 2:6-8). Chayrayku Satanasqa Jobpa uywasninta wañuracherqa, wakintataj suwaykucherqa, chunka wawasninta wañuracherqa, paytataj millay sarna onqoywan onqoykucherqa. Jinapis chayta ruwasqanqa qhasilla karqa, imajtinchus Jobqa tukuy sonqo Jehovata kasukullarqapuni (Job 1:20-22; 2:9, 10 leey). Chaymantataj Jehovaqa Jobta sanoyacherqa, yanaparqataj watejmanta qhapajyananpaj, respetasqa kananpaj, chunka wawaswantaj watejmanta bendicerqa. Chantapis unaytawanraj kausacherqa. Jobqa 140 watastawanraj kausakorqa. Payqa rejserqaraj wawasninta, allchhisninta, allchhisninpa wawasninta, allchhisninpa allchhisnintapis (Job 42:10-13, 16). ¿Imaynatá Jobpa kausaynin ñaupa tiempomanta Diospa kamachisninta ichapis yanaparqa, imaynatá noqanchejtapis yanapawanchej?

6. ¿Imaynatá Jobpa kausaynin israelitasta ichapis yanapanman karqa? (Dibujotawan qhawariy).

⁶ ¿Imaynatataj ichapis israelitasta yanaparqa? Israelitasqa Egiptopi kashaspa maytapuni sufrerqanku. Josuepiwan Calebpiwan piensarina. Paykunaqa jovencitosmantapacha esclavos karqanku. Wakin israelitas mana kasukusqankuraykutaj, 40 watasta chʼin jallpʼapi purerqanku. Sichus israelitas Jobpa pruebasninmanta, imaynatachus payta Jehová bendecisqanmanta yacharqanku chayqa, maytachá paykunata, aswan qhepaman kausaj israelitastapis kallpacharqa. Jinamanta entienderqanku pichus ñakʼariykuna kananpaj juchayoj kasqanta. Chantapis aswan sumajta entienderqanku imaraykuchus Dios ñakʼariykuna kananta saqesqanta, llakiypi rikukuspapis payta tukuy sonqo kasukojkunata munakusqanta, bendecisqantataj.

7, 8. ¿Imaynatá Job libro sufrejkunata yanapanman? Hazelmanta parlariy.

⁷ ¿Imaynatá yanapawasunman? Llakikunapaj jina kay tiempopi ashkha runasqa mana entiendenkuchu imaraykuchus allin runasta sajra imas pasasqanta, chayraykutaj manaña Diospi creenkuchu. Ajina karqa Ruandamanta Hazelwan.b Payqa sipas kashaspa Diospi creej. Chaymantataj mana allin imas qhatirerqa. Tatasnin divorciakorqanku, mamantaj wajwan casaraykorqa. Chay padrastrontaj maytapuni Hazelta sufrichej. Chantapis jovencita kashajtin, uj runa payta abusarqa. Hazelqa iglesianpi sonqochayta maskʼarqa, nitaj tarerqachu. Uj kutitaj Diosman kay cartata qhelqarqa: “Chay jinata qanmanta mañakuyki, maytataj kallpachakuni allin kajta ruwanaypaj, qantaj ñakʼariyllawan pagawanki. Chayrayku manaña yupaychasqaykichu, munasqayllataña ruwasaj kusisqa kanaypaj”, nispa. Maytapuni llakikunchej Hazel jina ashkha runas engañasqas kasqankumanta. Chayrayku creenku llakiykuna kananpaj Dios juchayoj kasqanta.

⁸ Noqanchejtajrí Job librota leespa yachakunchej ñakʼariykuna kananpajqa mana Dioschu juchayoj kasqanta, manaqa Satanás. Yachakullanchejtaj runasqa mana imatapis ruwasqankuraykuchu ñakʼarisqankuta. Imaraykuchus Bibliaqa nin: “Desgracia tiempopis, mana yuyasqallamanta ima llakiypis tukuyninkuman chayan”, nispa (Ecl. 9:11; Job 4:1, 8). Yachakullanchejtaj llakiykunapi kaspapis Jehovata tukuy sonqo sirvillaspapuneqa, Satanás llulla kasqanta rikuchinanpaj Diosninchejta yanapakusqanchejta (Job 2:3; Pro. 27:11). Biblia yachachiwanchej imajtinchus noqanchejpis familiaresninchejpis sufrisqanchejta. Chayta yachasqanchejmantataj maytapuni agradecekunchej. Chantá, ¿imataj Hazelwan karqa? Payqa Jehovaj testigosninwan Bibliamanta yachakuyta qallarerqa, repararqataj mana Dioschu llakiykuna kananpaj juchayoj kasqanta. Pay nin: “Tukuy imata Jehovaman willakorqani, nerqanitaj llakiypi kaspalla niña payta yupaychanayta nisqayta. Mana payta allinta rejserqanirajchu. Recién yachani Jehová munakuwasqanta, kusisqataj kani”, nispa. Maytapuni kusikunchej mana Dioschu llakiykuna kananpaj juchayoj kasqanta yachaspa. Kunan qhawarina llakiypi kashajtinchej imaynatachus sapa ujninchejta Jobpa kausaynin yanapawasqanchejta.

¿IMAYNATÁ JOBPA KAUSAYNIN AGUANTANAPAJ YANAPAWANCHEJ?

9. ¿Imaynataj Job kashanman karqa sufrishaspa? (Santiago 5:11).

⁹ Jobqa ushpha patapi tiyasqa kasharqa, tukuynin cuerponpi sarnawan juntʼa, nanayta niña aguantayta atispa. Payqa lastimay tullitullaña kasharqa, sarnasninrayku aycha qaranpis tʼakarakushallarqaña. Kallpitanpis niña karqañachu, kʼanalla pʼakisqaswan sarnasninta apenasllataña khitukusharqa, nanaywantaj ay ay nispallaña nisharqa. Jobqa ñakʼayllataña kausaspa jinasharqa, pero mana jinachu karqa. Payqa aguantashallarqapuni Jehovapi siga atienekuspa (Santiago 5:11 leey). ¿Imataj yanaparqa Jehovata tukuy sonqo kasukunallanpajpuni?

10. ¿Imaraykutaj Job Jehovaman tukuy imata willakuyta atillarqa?

¹⁰ Jobqa sonqonpi kaj chhikata Jehovaman willakuyta atillaj (Job 10:1, 2; 16:20). 3 capitulopi reparanchej payqa imachus qhatirisqanmanta mayta quejakusqanta, llakiykunasninta Jehová apachimusqanta yuyaspa. Chaymantataj kinsa amigosnin kutin kutinta nerqanku juchasninrayku Jehová castigashasqanta. Jobtaj nillarqapuni mana juchayoj kasqanta. Chaywan entiendecherqa Diosmanta aswan cheqan kasqanta (Job 10:1-3; 32:1, 2; 35:1, 2). Jobqa reparakorqa defiendekuyta munaspa ‘imatapis parlashallasqantaña’ (Job 6:3, 26). 31 capitulopitaj reparanchej Jobqa Jehová uyarinanta munasqanta, mana juchayoj kasqantataj ninanta (Job 31:35). Jehovataj ni imarayku Jobman sutʼinchananchu karqa imaraykuchus sufrishasqanta.

11. ¿Imaynatá Jehová Jobta cheqancharqa?

¹¹ Jobpa nisqanpi reparanchej Jehovaj sumaj amigon kasqanta. Chantapis yacharqa mana qhasillamanta kʼamirpananta. Jehovataj muyoj wayra ukhumantapacha parlamuspa mana Jobman sutʼincharqachu imaraykuchus sufrishasqanta, nitaj quejakusqanmanta, kutin kutinta cheqan runa kasqanta nisqanmanta kʼamirparqachu. Astawanpis munakuyniyoj tata jina cheqancharqa. Chaywan Jobpa sonqonman chayarqa. Jobtaj kʼumuykukoj sonqowan reparakorqa pisillata yachasqanta, mana yuyaychakuspalla parlasqanmantataj arrepientekorqa (Job 31:6; 40:4, 5; 42:1-6). ¿Imaynatá Jobpa kausaynin ñaupa tiempomanta runasta ichapis yanapanman karqa, chanta imaynatá noqanchejtapis yanapawanchej?

12. ¿Imaynatataj ichapis israelitasta Jobpa kausaynin yanaparqa?

¹² ¿Imaynatataj ichapis israelitasta yanaparqa? Moisespi tʼukurina. Israelitasta pusayqa paypaj mana facilchu karqa. Paykunaqa ashkha kutispi Jehovata mana kasukuspa Moisesta rabiaykucherqanku, desanimacherqankutaj. Israelitasqa kutin kutita Jehovaj contranpi thutorqanku, Moisestaj mana paykuna jinachu karqa. Astawanpis imachus llakichisqanta Jehovaman willakorqa (Éxo. 16:6-8; Núm. 11:10-14; 14:1-4, 11; 16:41, 49; 17:5). Jobpa kausaynenqa maytachá Moisesta yanapallarqataj Jehová cheqanchajtin. Israelitas Cadespi jarasqa kashajtinku, ichapis 40 watastaña chʼin jallpʼata purisharqanku. Chaypitaj Moisesqa “mana allinta yuyaychakuspa parlaykorqa”, nitaj Jehovata jatuncharqachu (Sal. 106:32, 33). Chayrayku Jehovaqa mana saqerqachu Sumaj Jallpʼaman yaykunanta (Deu. 32:50-52). Moisesqa maytachá chaymanta llakikorqa. Jinapis kʼumuykukoj sonqowan cheqanchasqanta japʼikorqa. Jobpa kausaynenqa ichapis aswan qhepaman kausaj israelitasta llakiyninkuta aguantanankupaj yanapallarqataj. Jobpa kausayninpi tʼukurisqankoqa ichapis yanaparqa Jehovaman tukuy imata willakunankupaj, mana Diosmanta aswan cheqan kasqankuta yuyakunankupaj, kʼumuykukoj sonqowantaj cheqanchasqanta japʼikunankupaj.

13. ¿Imaynatá Jobpa kausaynin yanapawasunman aguantanapaj? (Hebreos 10:36).

¹³ ¿Imaynatá yanapawasunman? Cristianospis aguantanallanchejtaj tiyan (Hebreos 10:36 leey). Ichapis sinchʼi onqosqa kashanchej, depresión onqoyniyoj kanchej, chayri familianchejpi problemas tiyan, manachayrí ichapis ujnin familiarninchej chayri munasqa amigonchej wañupun, chayri waj llakiypi rikukushanchej. Chay patamantaj ichá pillapis parlasqanwan ruwasqanwan astawan llakiyninchejta yapaykunman (Pro. 12:18). Job librotaj yachachiwanchej sonqonchejpi kaj chhikata Jehovaman willakuyta atisqanchejta, paytaj uyarinawanchejtapuni (1 Juan 5:14). Payqa mana phiñakonqachu Job jina llakiypi kashaspa imatapis parlarpajtinchej. Astawanpis aguantanapaj kallpata, yachayta ima qowasun (2 Cró. 16:9; Sant. 1:5). Imapi cheqanchanawanchej kajtintaj, Jobta jina cheqanchawasun, ichapis Palabrannejta, llajtannejta, uj ancianonejta, chayri wiñay tukusqa amigonchejnejta. Jobmantaqa yachakunchej Jehová cheqanchawajtinchej payta sirvinallatapuni (Heb. 12:5-7). Jobtaqa Jehovata uyarisqan mayta yanaparqa, noqanchejtapis yanapallawasuntaj kʼumuykukoj sonqo kanapaj, yuyaychaykunatataj japʼikunapaj (2 Cor. 13:11). Chay sumaj imasta Jobpa kausayninmanta yachakunchej. Chanta, ¿imaynatataj Jobpa kausayninwan wajkunata yanapawasunman? Chayta qhawarina.

JOB LIBROWAN WAJKUNATA YANAPANA

14. ¿Imaynatataj runasman sutʼinchariyta yachanchej imaraykuchus llakiykuna kasqanta?

¹⁴ Predicaj rejtinchej wakin runasqa tapukuyta yachawanchej imaraykuchus sufrisqanchejta. Noqanchejtaj Bibliawan sutʼinchariyta yachanchej. Ñaupajtaqa sutʼincharinchej imachus Edén huertapi pasasqanta. Ichapis ninchej sajra ángel Satanás Adantawan Evatawan engañasqanta, chayraykutaj paykuna mana Diosta kasukusqankuta (Gén. 3:1-6). Chaymantataj ichapis sutʼincharinchej Adanwan Evawan Diospa contranta oqharikusqankurayku tukuy sufrisqanchejta, wañusqanchejta ima (Rom. 5:12). Chantataj ichapis ninchej Diosqa tiempo pasananta saqeshasqanta Satanás llulla kasqanta rikuchinanpaj, runastaj mana pantayniyojman tukuyta atisqanchejta yachanankupaj (Apo. 21:3, 4). Chayta sutʼincharisqanchejqa may sumajpuni, ashkha runastataj yanapanman imaraykuchus sufrisqanchejta entiendenankupaj.

15. Imaraykuchus ñakʼariykuna kasqanta tapuwajtinchej, ¿imaynatataj Job librowan sutʼincharisunman? (Fotostawan qhawariy).

¹⁵ Imaraykuchus ñakʼariykuna kasqanta wajkuna tapuwajtinchej Jobpa kausayninmanta parlaspa sutʼinchallasunmantaj. Ñaupajtaqa felicitasunman chay sumaj tapuyta ruwawasqanchejmanta. Chaymantataj nisunman ñaupa tiempomanta Job sutiyoj runa ñakʼarishaspa ajinallatataj tapukusqanta. Jobqa Dios ñakʼarichishasqanta piensarqapis (Job 7:17-21). Ñaupa tiempomanta runas kikillantataj tapukusqankuta yachaspa, ichapis wasiyojqa tʼukonqa. Chaymantataj nisunman Jobtaqa mana Dioschu ñakʼarichisqanta, manaqa Diablo. Diabloqa nerqa runasqa Diosta sirvisqankuta pay allin imasta qosqanraykulla, ima desgraciapis qhatirejtintaj payta wasanchanankuta. Chayta rikuchiyta munaspa Jobta ñakʼaricherqa. Chaymanta sutʼincharillasunmantaj Jobta mana Dioschu sufrichejtinpis, Satanás ñakʼarichinanta saqesqanta. ¿Imajtin? Imajtinchus Diosqa yacharqa runasqa payta tukuy sonqo kasukuyta atisqankuta, Satanás llulla kasqantataj rikuchiyta atisqankuta. Chaymantataj nisunman Diosqa Jobta tukuy sonqo kasukusqanrayku bendecisqanta. Reparanchej jina, runasta sonqocharisunman mana Dioschu ñakʼariykunata apachimusqanta willarispa.

16. ¿Imaynatá Job libro Mariota yanaparqa?

¹⁶ Qhawarina imaynatachus Job libro Mario sutiyoj runata yanapasqanta. 2021 watapi uj hermana telefononejta predicashaspa payman ñaupajta wajyasqa. Paymanqa uj textota leeripusqa, sutʼincharisqataj Diosqa mana mañakuykunasnillanchejtachu uyarisqanta, manaqa aswan qhepamanpis sumaj kausayta qonawanchejta. Chaymantataj tapurisqa imaynachus chay versículo rijchʼasqanta. Mariotaj willarisqa niraj wajyamushajtin wañuchikunanpaj familiaresninman uj cartata qhelqashasqanta. Pay nisqa: “Noqaqa Diospi creeni. Jinapis kay paqarin yuyarqani Diosqa niña noqawanchu kashasqanta”, nispa. Qhepan kutipi wajyarejtintaj Jobpa ñakʼariykunasninmanta parlarisqanku. Mariotaj tukuynin Job librota leerinanta nisqa. Chayrayku hermanaqa jw.org nisqamanta uj enlaceta apachisqa, chaypi leenanpaj. Ajinamanta Marioqa Bibliamanta yachakuyta qallarisqa, maytataj kusikusqa payta munakoj Diosmanta siga yachakuspa.

17. ¿Imajtín agradecekunki Job librota Jehová Palabranpi qhelqachisqanmanta? (Job 34:12).

¹⁷ Bibliaqa manchay atiyniyojpuni, runasta yanapan, sufrejkunatapis sonqochan (Heb. 4:12). Maytapuni agradecekunchej Jobpa kausayninmanta Jehová Palabranpi qhelqachisqanmanta (Job 19:23, 24). Job libroqa sutʼita rikuchiwanchej “Diosqa manapuni sajra kajtaqa” ruwasqanta (Job 34:12 leey). Chantapis yachachiwanchej imaraykuchus ñakʼariykuna kananta Dios saqesqanta, imaynatachus aguantananchejtapis. Sufrejkunata sonqochanapajpis mayta yanapallawanchejtaj. Qhepan yachaqanapitaj waj imastawan Job libromanta yachakusun. Qhawarisun imaynatachus wajkunata sumajta yuyaycharinata.