Job libro yanapawasunman sumajta yuyaycharinapaj

1, 2. ¿Imatataj Elihuwan Jobpa kinsa rejsisqasninwan ruwayta aterqanku?

JOBQA manchay qhapajtaj rejsisqataj kashaspa mana imayoj rikhurerqa. Chaytataj usqhayllata tukuy yacharqorqanku. Kinsa rejsisqasninpis Elifazwan, Bildadwan, Zofarwan chayta yachaspa Uz jallpʼaman rerqanku Jobta sonqochamunankupaj. Imaynachus Job kashasqanta rikuspataj mayta tʼukorqanku.

² Imaynachus Job kashasqanpi piensarina. Tukuy imanta pierdesqanrayku qʼara pampapi rikhurerqa. Tukuynin camellosnin, ovejasnin, wakasnin, burrosnin wañuchisqa karqanku, wakintataj suwarqanku. Chantapis casi tukuynin kamachisnin wañuchisqa karqanku. Maypichus wawasnin kasharqanku chay wasi urmaykusqanraykutaj, enteron wawasnin wañorqanku. Mana chayllachu, Jobpis manchay onqosqa kasharqa, tukuynin cuerpon sarnawan juntʼa. Qayllaykusqankuman jinataj chay kinsa rejsisqasnenqa ushpha patapi tiyashajta rikorqanku, manchay sonqo pʼakisqata. ¿Imatá ruwarqanku? Jobpa ladonman chukuykorqanku qanchis pʼunchayta, qanchis tutatawan, manataj ni mayqenninku uj simillatapis nerqankuchu Job sufrishasqanta rikuspapis (Job 2:12, 13). Chaymantataj Elihú sutiyoj joven chayaspa qayllankuman tiyaykorqa. Chantá Jobqa parlarispa nacekusqan pʼunchayta maldicerqa, wañullaytaña munasqantataj nerqa (Job 3:1-3, 11). Chay kutipi Jobqa maytapuni necesitasharqa amigosnin yanaparinankuta. Chayrayku paykunaqa Jobta kallpachariyta atinkuman karqa. Parlasqasninkuwan, ruwasqasninkuwantaj rikuchiyta atinkuman karqa paymanta llakikusqankuta. Qhawarina chaytachus manachus ruwasqankuta.

3. ¿Imatataj kay yachaqanapi qhawarisun?

³ Jehovaqa Moiseswan qhelqacherqa imatachus Jobpa kinsa rejsisqasninwan Elihuwan nisqankuta, ruwasqankuta ima. Elihuj nisqasnenqa Jehová yuyaychasqanman jina karqa. Elifazpa wakin nisqasnintaj uj demonio yuyaychasqanman jinasina karqa (Job 4:12-16; 33:24, 25). Chayrayku Job libropeqa sumaj yuyaychaykuna tiyan, jinallataj wakin mana allin yuyaychaykunapis. Kay yachaqanapitaj qhawarisun imaynatachus Job libro yanapawasqanchejta pitapis yuyaycharinanchej kajtin. Ñaupajtaqa kinsa rejsisqasninpa mana allin yuyaychasqankuta qhawarisun, chaymantataj Elihú sumajta yuyaycharisqanta. Qhawarillasuntaj imatachus israelitas Job libromanta ichapis yachakusqankuta, imatachus noqanchejpis yachakunanchejta.

JOBPA KINSA REJSISQASNINPA YUYAYCHASQANKU

4. ¿Imajtintaj Jobpa kinsa rejsisqasnin mana sonqocharqankuchu? (Dibujotawan qhawariy).

⁴ Biblia nisqanman jina Jobta ima llakiykunachus qhatirisqanta yachaspa, chay kinsa rejsisqasnenqa “tinkukorqanku Jobta waturikoj rinankupaj, sonqocharinankupajtaj parlarikusqankuman jina” (Job 2:11). Jinapis kay kinsa imasrayku mana allinta Jobta sonqochayta aterqankuchu. Uj, mana allinta yachaspalla parlarqanku. Paykunaqa mayta pantaykorqanku Jobta ima juchanraykuchá Dios castigashasqanta nispa (Job 4:7; 11:14).a Iskay, yuyaychasqankoqa mana Jobta yanapananpaj jinachu karqa. Mana kʼachamantachu yuyaycharqanku, astawanpis sonqonta nanachinanpaj jina. Paykunamantaqa sumajta yuyaychasharqanku, jinapis qhasilla karqa (Job 13:12). Bildadqa ni tumpata khuyarikuspa Jobta nerqa anchata parlasqanta (Job 8:2; 18:2). Zofartaj mana reparayllata ‘tʼuru uma’ nispa nerqa (Job 11:12). Kinsa, ichapis mana qhapariykorqankuchu. Jinapis jatunchakuspa jina parlarqanku, mana kʼachamantachu, mana respetowanchu, juchachaspa jinataj (Job 15:7-11). Chay kinsa runasqa mana Jobta sonqochaytachu, nitaj creeyninta kallpachaytachu munasharqanku, manachayqa pantasqanta yuyachiyta munasharqanku.

5. ¿Imatá Job ruwarqa Elifazwan, Bildadwan, Zofarwan mana allinta yuyaychasqankurayku?

⁵ Elifazwan, Bildadwan, Zofarwan Jobta yuyaychasqankoqa manapuni allinchu karqa, astawanpis kʼumuykachachillarqanku (Job 19:2). Imatachá mana allintachu ruwasqanta nejtinku, Jobqa defiendekorqa mana ajinachu kasqanta rikuchinanpaj. Chayrayku ni imanakuyta atispa imatapis parlashallarqaña (Job 6:3, 26). Elifazwan, Bildadwan, Zofarwan parlasqankoqa mana Dios yuyasqanman jinachu karqa, mana khuyakuspataj Jobta tukuy imata nerqanku. Ajinamanta mana reparakuspalla Satanaspa munasqanta ruwasharqanku (Job 2:4, 6). ¿Imaynatataj israelitas ichapis chaywan yanapachikorqanku, chanta imaynatá noqanchejtapis yanapawasunman?

6. ¿Imatataj Israelmanta kurajkuna ichapis yachakorqanku Elifazwan, Bildadwan, Zofarwan mana allintachu yuyaychasqankumanta?

⁶ ¿Imaynatataj ichapis israelitasta yanaparqa? Israel nación rikhurejtin, Jehovaqa problemasta allinchayta yachajkunata ajllarqa kamachiykunasninman jina nacionta juzganankupaj (Deu. 1:15-18; 27:1). Chay juecesqa, nisunman chay kurajkunaqa niraj pitapis yuyaychashaspa chayri juchachashaspa sumajtaraj uyarinanku karqa (2 Cró. 19:6). Chantapis tukuy imata allintaraj qhawaykurinanku karqa, tapurinankutaj karqa sumajta yachanankupaj ajinapunichus manachus kasqanta (Deu. 19:18). Pipis yanapata mañakuspa paykunaman rejtin, kʼachamanta parlarinanku karqa, nitaj sonqonta nanachinankupaj jinachu. Sichus mana kʼachamantachu parlankuman karqa chayqa, mana willarikuyta atillankumanchu karqa imaynachus sonqonkupi kashasqankuta (Éxo. 22:22-24). Israelmanta kurajkunaqa chay sumaj imasta Jobpa kausayninmanta yachakuyta aterqanku.

7. ¿Pikunataj Israelpi yuyaychayta atillarqankutaj, chanta imatataj yachakuyta aterqanku Jobpa rejsisqasninmanta? (Proverbios 27:9).

⁷ Mana Israelmanta kurajkunallachu Israelpi yuyaychayta aterqanku. Mayqennillankupis jovenpis, machitupis, qharipis, warmipis wajkunata yuyaychariyta aterqanku Jehovaman astawan qayllaykunankupaj, pantaykusharqanku chaytaj cheqancharinankupaj (Sal. 141:5). Sumaj amigoqa chaytapuni ruwan (Proverbios 27:9 leey). Elifazwan, Bildadwan, Zofarwan mana allintachu yuyaychasqankupi tʼukurispa, tukuynin israelitas yachakuyta aterqanku wajkunata yuyaycharishaspa imatachus mana parlanankuchu kasqanta, imatachus mana ruwanankuchu kasqantapis.

8. Pitapis yuyaycharishaspa, ¿imastataj mana ruwanachu tiyan? (Fotostawan qhawariy).

⁸ ¿Imaynatá yanapawasunman? Hermanosninchej llakiykunapi rikukojtinku tukuypis yanapariyta munanchejpuni. Jinapis ama Jobpa chay kinsa rejsisqasnin jina kay imaspi pantanachu: Uj, niraj imatapis nishaspa allintaraj tukuy imata yachana. Iskay, Diospa Palabranman jinapuni yuyaycharina, manataj yuyasqanchejman jinallachu, nitaj yachasqanchejman jinallachu, imaynatachus Elifaz ruwarqa ajinata (Job 4:8; 5:3, 27). Kinsa, yuyaychashaspa amapuni rimarpanachu, nitaj kʼumuykachachinachu. Elifazwan compañerosninwan wakin imasta nisqankoqa ciertolla karqapis. Chayrayku apóstol Pablopis chay nisqasninkumanta wakinta Dios yuyaychasqanman jina Bibliapi qhelqarqa (Job 5:13 versiculota 1 Corintios 3:19 versiculowan kikinchay). Jinapis astawanqa llullasllata Diosmanta parlarqanku, Jobtataj astawan llakichillarqanku. Chayrayku Jehová nerqa nisqasninkoqa llulla kasqanta (Job 42:7, 8). Pillatapis yuyaycharishaspa ni jaykʼaj yuyachinachu Jehová sajra kasqanta, nitaj Jehová mana munakunanpaj jinachu kasqanta. Kunan qhawarina imatachus Elihumanta yachakuyta atisqanchejta.

ELIHUJ YUYAYCHASQAN

9. ¿Imajtín Job yanapata necesitashallarqapuni, chanta imaynatá Jehová yanaparerqa?

⁹ Jobwan chay kinsa rejsisqasninwanqa unayta discuterqanku. Chayrayku Bibliamanta 28 capitulospipuni parlasqanku qhelqasqa kashan. Parlasqankupitaj sutʼita reparakun rabiasqa, phiñasqa kashasqankuta. Chayraykuchá Jobqa astawan desanimakorqa, sonqocharinankuta, cheqanchanankutataj necesitarqa. ¿Imatá Jehová ruwarqa yanaparinanpaj? Elihuwan yuyaychacherqa. Chanta, ¿imajtín Elihú chay chhika unayta chʼinlla karqa? Payllataj nerqa: “Noqaqa jovenllaraj kani, qankunataj kurajkunaña kankichej. Noqaqa respetaykichej, chanta chʼinlla karqani”, nispa (Job 32:6, 7). Elihuqa yacharqa kurajkunapuni allin yachaywan parlasqankuta aswan unayta kausasqankurayku, experienciayoj kasqankurayku. Jinapis Jobtawan chay kinsa rejsisqasnintawan pacienciawan uyarispa, niña chʼinlla kakuyta aterqachu. Chayrayku nerqa: “Runasqa mana ashkha watasniyoj kaspallachu yachayniyojman tukunku. Nitaj machu runasllachu yachanku imachus allin kasqantaqa”, nispa (Job 32:9). ¿Imatawán Elihú nerqa chanta imaynatá parlarqa? Chayta qhawarina.

10. ¿Imatá Elihú ruwarqa niraj Jobta yuyaycharishaspa? (Job 33:6, 7).

¹⁰ Niraj yuyaycharishaspa Elihuqa Jobpa sonqontaraj tiyaykucherqa, ajinamanta sumajta uyarinanpaj. ¿Imatá chaypaj ruwarqa? Bibliaqa nin qallariypi Elihuqa manchay phiñasqa kashasqanta. Chayrayku payraj phiñakuyninta ñitʼiykukorqa (Job 32:2-5). Chaymantataj mana Jobta rimarparqachu, nitaj kʼumuykachacherqachu. Astawanpis kʼachamanta, munakuywan parlarqa. Payqa Jobta nerqa: “Noqaqa Diospa ñaupaqenpi qan jinalla kani”, nispa (Job 33:6, 7 leey). Chaymantataj Jobpa parlasqanta allinta uyarisqanrayku imatachus nisqanta watejmanta nerqa (Job 32:11; 33:8-11). Chantá waj imastawan yuyaycharishaspa Jobpa nisqasninta oqharillarqataj (Job 34:5, 6, 9; 35:1-4).

11. ¿Imaynatataj Elihú Jobta yuyaycharerqa? (Job 33:1).

¹¹ Elihuqa Jobta respetowan yuyaycharerqa, nitaj kʼumuykachacherqachu. Payqa sutinmanta Jobta parlarqa, Jobpa chay kinsa rejsisqasnintaj nisina Jobpa sutinta oqharillarqankupischu (Job 33:1 leey). Chantapis Elihuqa yuyarikorqa Jobwan chay kinsa rejsisqasninwan parlashajtinku paypis mayta parlayta munasqanta. Chayrayku Jobta yuyaycharishaspa kʼachamanta nerqa “parlayta munanki chayqa, parlallay” nispa (Job 32:4; 33:32). Chantapis nerqa wakin imasta parlasqanta allinta qhawarikunanta, yuyaricherqataj Jehovaqa manchay yachayniyoj, atiyniyoj kasqanta, cheqan kajtapuni ruwasqanta, munakuyniyoj kasqanta ima (Job 36:18, 21-26; 37:23, 24). Elihuqa kʼachamanta parlasqanwan Jobta wakicherqa Jehovaj cheqanchasqanta japʼikunanpaj (Job 38:1-3). ¿Imaynatataj israelitas ichapis Elihuj ruwasqanwan yanapachikorqanku, chanta imaynatataj noqanchejtapis yanapawasunman?

12. ¿Imaynatataj Jehová profetasnejta llajtanta yanaparqa, chanta imatataj ichapis israelitas Elihumanta yachakorqanku?

¹² ¿Imaynatataj ichapis israelitasta yanaparqa? Jehovaqa ashkha kutispi profetasta churarqa israelitasman munayninta rejsichinankupaj, cheqanchanankupaj ima. Jueces kashajtin Jehovaqa profetisa Deboramanta, jovencito Samuelmanta ima valekorqa, nacionninta yuyaychananpaj, kamachiykunata qonanpaj ima (Jue. 4:4-7; 5:7; 1 Sam. 3:19, 20). Reyes kamachishajtinkutaj Jehovaqa kutin kutita profetasta kacharqa, llajtanta yanapanankupaj munasqanman jina payta yupaychanallankupajpuni, mana kasukojtinkutaj cheqanchanankupaj (2 Sam. 12:1-4; Hech. 3:24). Elihuj ruwasqanqa tukuy paykunata ichapis yanaparqa, imaynatachus pitapis allinta cheqancharinankuta yachanankupaj, kʼachamanta yuyaycharinankupajpis.

13. ¿Imaynatataj Elihú jina hermanosninchejta kallpacharisunman?

¹³ ¿Imaynatá yanapawasunman? Cristianosqa Elihú jinallataj, Israelmanta profetas jinallataj Diospa munayninta rejsichinchej, Bibliaman jinapunitaj yachachinchej. Chantapis hermanosninchejta yuyaycharishaspa kallpachakunchej kallpacharinapaj jinapuni, kʼachamantataj parlanapaj (1 Cor. 14:3). Ancianosqa astawanraj kʼachamantapuni, munakuywanpuni hermanosta sonqocharinanku tiyan, pikunachus llakiypi rikukuspa phiñarpakunku chayri imatapis nirpallanku chaykunatapis (Job 6:3; 1 Tes. 5:14).

14, 15. ¿Imaynatá uj anciano Elihú jina ruwanman?

¹⁴ Kaypi tʼukurina: Uj ancianoqa yachan congregacionninmanta uj hermana desanimasqa kashasqanta, chayrayku waj hermanowan khuska kallpacharinankupaj visitarej rinku. Visitarishajtinkutaj hermanaqa nin reunionesman, predicacionman rejtinpis mana kusisqachu kasqanta. Jina kajtin, ¿imatá chay anciano ruwanman?

¹⁵ Uj, ñaupajtaqa sumajtaraj entiendenan tiyan imaraykuchus ajina llakisqa kashasqanta. Chaypajtaj wakin imastaraj tapurinman, sumajtataj uyarinan tiyan. Ichapis chay hermanaqa yuyashanman mana Dios munakunanpaj jinachu kasqanta, chayri ichapis “llakiykunasninwan” atipachikushanman (Luc. 21:34). Iskay, allin imasta ruwasqanmanta kallpacharinanpuni tiyan. Ichapis felicitanman ajina llakisqa kaspapis reunionesman, predicacionmanpis mana faltakusqanmanta. Kinsa, chay hermanaj llakiyninta allintaraj entiendespa, imaraykuchus ajina llakisqa kashasqanta allintaraj yachaspa, Bibliawan reparachinman Jehovapaj may munasqa kasqanta (Gál. 2:20).

JOB LIBROMANTA YACHAKUNALLAPUNI

16. ¿Imatá ruwananchej tiyan Job libromanta yachakunallapajpuni?

¹⁶ Job librota ukhuncharispa sumaj imastapuni yachakunchej. Ñaupaj yachaqanapeqa yachakorqanchej imaraykuchus Dios ñakʼariykuna kananta saqesqanta, imaynatachus aguantananchejtapis. Kay yachaqanapitaj yachakunchej sumajta yuyaycharinapajqa mana Jobpa kinsa rejsisqasnin jinachu ruwananchej kasqanta, manachayqa Elihú jina. Pillatapis yuyaycharinanchej kajtin imastachus kunan yachakusqanchejta watejmanta qhawaykurisunman. Job librota unayña mana leerqanchejchu chaytaj watejmanta leenapaj kallpachakusunman. Chayta ruwasun chayqa Job libromanta sumaj imasta yachakullasunpuni.