Jueces
19 Maypachachus Israelpi manaraj uj rey karqachu chay pʼunchaykunapi,+ uj levita tiyakorqa Efrainpa aswan karu orqosninpi.+ Payqa Judapi kaj Belenmanta+ uj warmiwan tantakorqa.* 2 Chay tanta warmintajrí, payta wasanchaspa Judapi kaj Belenman riporqa, tatanpa wasinman. Chaypitaj tawa killata qhepakorqa. 3 Ajinapi qosanqa payta maskʼamoj rerqa, kutinakunankupaj parlamoj. Chay levitaqa uj kamachinta pusakorqa, iskay burrostawan. Chayajtin warmenqa tatanpa wasinman pusaykorqa, tatantaj mayta kusikorqa payta rikuspa. 4 Chayrayku suegronqa, chay warmej tatanqa chay levitata kinsa diastapuni qhepaykucherqa. Ajinamanta chay levitaqa kinsa diasta chaypi qhepakorqa mikhuspa, ujyaspa, puñuspa ima.
5 Tawa kaj diapeqa tutamantaña jatarikorqanku ripunankupaj. Chay warmej tatantajrí tolqanta nerqa: “Niraj ripushaspa mikhurikuyraj, chaywan kallpacharikunaykipaj. Chanta ripullankichej”, nispa. 6 Ajinapi iskayninku khuska tiyaykukuspa mikhorqanku, ujyarqanku ima. Chaymanta warmej tatanqa nerqa: “Ama jina kaspa kay chʼisitawan kaypi qheparikuy ari, astawan kusirikunaykipaj”, nispa. 7 Chay levitaqa ripunanpaj sayarikorqa. Chaywanpis suegronqa kutin kutita nerqa qhepakunanta. Chayrayku payqa chay chʼisitawan chaypi qhepakorqa.
8 Phishqa kaj diapi levitaqa tutamanta jatarikorqa ripunanpaj. Chay warmej tatantajrí watej nillarqataj: “Ama jina kaspa mikhurikuyraj, chaywan kallpacharikunki”, nispa. Ajinamanta khuska mikhurikorqanku. Chaykamataj tardeyaykusharqaña. 9 Levita tanta warminwan kamachinwan ripunanpaj sayarikojtin, suegronqa nerqa: “Ñapis laqhayaykushanña. Ama jina kaspa kay chʼisitawan kayllapi puñukuychej. Chʼisiyaykushanñaqa. Kunantawan qheparikuy astawan kusirikunaykipaj. Qʼaya paqarin tutamanta ripullankichej wasiykiman”,* nispa. 10 Chaywanpis chay levitaqa manaña chay chʼisitawan qhepakuyta munarqachu. Chayrayku riporqapuni tanta warminwan, kamachinwan, iskaynin burrosninwan ima. Ajinata paykunaqa Jebusman rerqanku, chay llajtaj ujnin sutenqa Jerusalén.+
11 Jebús llajtaman qayllaykushajtinku, ñapis tarde horasña karqa. Chayrayku kamachenqa levitaman nerqa: “¿Jebuseospa llajtankuman yaykuspa chayllapiña kunan chʼisi qhepakusunman chayrí?”, nispa. 12 Levitatajrí kuticherqa: “Mana kay llajtapi qhepakusunmanchu, kay llajtaqa mana israelitaspatachu. Guibeakama+ rinanchej tiyan”, nispa. 13 Chantá levitaqa kamachinman nillarqataj: “Jaku Guibeakama chayri Ramakamapis.+ Chaypi puñukusunchej”, nispa. 14 Ajinapi paykunaqa rillarqankupuni. Guibeamantaj inti yaykupushajtinña chayarqanku. Chay llajtaqa Benjamín ayllojta* karqa.
15 Paykunaqa Guibeá llajtaman yaykorqanku, chay chʼisi chaypi qhepakunankupaj. Plazaman rispataj tiyaykukorqanku, manataj pipis paykunata wasinman wajyarikorqachu.+ 16 Ñapis tutaña kashajtin, uj machitu runa campopi llankʼasqanmanta kutimushaspa chay plazanta pasarqa. Payqa Efraín orqosmanta karqa,+ chaypitaj forastero jinalla uj tiempota tiyakusharqa. Guibeá llajtapi tiyakojkunataj benjaminitas karqanku.+ 17 Chay machitu runaqa levitata plazapi tiyashajta rikuspa tapurerqa: “¿Maymantataj jamushankiri? ¿Maymantaj rishankiri?”, nispa. 18 Levitataj kuticherqa: “Judapi kaj Belenmanta jamushayku, rishaykutaj Efrainpa aswan karu orqosninman. Chaypi noqa tiyakuni. Judapi kaj Belenman rerqani,+ kunantaj Jehová Diospa wasinman rishani.* Kaypitaj mana pipis wasinman wajyarikuwanchu. 19 Burrosniykupajqa tiyapuwayku pajawan qʼachuwan.+ Noqaykupajtaj tiyapuwayku tʼantawan+ vinowan, noqapaj, tanta warmiypaj, kamachiypajpis. Mikhunaykoqa kashallan”, nispa. 20 Chay machitu runataj nerqa: “Walejta jamunki.* Imapis pisisojtenqa qollasqayki. Ama kay chʼiseqa kay plazapi qhepakuychu”, nispa. 21 Chantá chay machitu runaqa paykunata wasinman pusarqa, burrosninkumantaj qararqa. Paykunataj chakisninkuta mayllakuspa mikhorqanku, ujyarqanku ima.
22 May kusiy karikushajtinku, chay llajtamanta mana imapaj valej runasqa wasinta muyuykuspa punkuta takamorqanku. Chay machitu runatataj nerqanku: “¡Chayakamusunki chay runata orqhomuy, paywan puñuykunaykupaj!”,+ nispa. 23 Chay wasiyojtaj llojsispa nerqa: “Ama hermanosníy, ama jina kaspa ama chay millaytaqa ruwaychejchu. Kay runaqa wasiyman chayakamuwan. Ama chay millay juchataqa ruwaychejchu. 24 Kaypi kashan doncella waway, kay runaj tanta warminpis, paykunata orqhonpusqaykichej.+ Munasqaykichejta paykunawan ruwaychej.* Chaywanpis kay runawanqa amapuni chay millaytaqa ruwaychejchu”, nispa.
25 Chay runastajrí mana kasorqankuchu. Jinapi levitaqa tanta warminta+ jawaman tanqarqamorqa. Chay runastaj chay warmita violarqanku, munasqankuta payta abusarqanku tutantin, sutʼiyamunankama. Sutʼiyamushajtinraj kachaporqanku. 26 Sutʼiyaytaña chay warmeqa chay machitu runaj wasinman chayarqa, qosan* kasharqa chayman. Punku chaypi choqakuspataj, chaypi wijchʼurayarqa sutʼi pʼunchayña kanankama. 27 Sutʼiyayta qosanqa* ripunanpaj punkuta kicharispa, rikorqa tanta warminta punku chaypi choqasqata, punku yaykuna patapi makisnin aysasqata. 28 Chantá nerqa: “Sayarikuy, jaku ripunachej”, nispa. Warmitaj mana kuticherqachu. Chantá payqa cuerponta ujnin burronman cargaykuspa wasinman riporqa.
29 Wasinman chayaytawantaj, tanta warminpa cuerponta cuchillowan* chunka iskayniyojman parterqa. Chay partisqantataj tukuy Israel jallpʼaman apacherqa ujtakama. 30 Chay apachisqanta rikojkunataj nerqanku: “Egiptomanta israelitas llojsimusqankumantapacha, mana jaykʼajpis kay jinaqa karqachu. Allinta qhawaykuriychej, parlarikuychej,+ niwaykutaj imatachus ruwananchejta”, nispa.