1 Crónicas
22 Chantá Davidqa nerqa: “Kaypi ruwakonqa Jehová Diospa wasin, cheqa Diospa* wasin. Kayllapitaj ruwakonqa altarpis, chay altarpi Israel nacionqa qʼolachina* ofrendasta jaywanqa”,+ nispa.
2 Chantá Davidqa tantachimorqa Israelpi tiyakusharqanku chay waj llajtayoj runasta.+ Paykunatataj churarqa rumista kʼutunankupaj, rumista chʼeqonankupaj, chay rumiswan cheqa Diospa wasinta ruwanankupaj.+ 3 Chantapis Davidqa may chhika fierrota tantarqa, punkuspaj clavosta ruwanankupaj, tinkuykunapaj japʼichinastawan ruwanankupaj. Tantallarqataj may chhika cobreta, mana pesay atinata.+ 4 Tantallarqataj may chhika cedro maderasta.+ Chay cedro maderastaqa sidonioswan+ tirioswan+ Davidpaj apamorqanku, allin ashkhatapuni. 5 Davidqa nerqa: “Waway Salomonqa jovenllaraj, mana experienciayojchu.+ Jehová Diospa wasenqa sumaj ruwasqa kanan tiyan, imayna sumajchus,+ imayna kʼachituchus+ kasqanta tukuy nacionespi yachanankupaj.+ Chayrayku noqaqa wawaypaj ashkha imasta listota saqepusaj”, nispa. Chayrayku Davidqa niraj wañupushaspa ashkha imasta listotaña saqerqa.
6 Chantapis Davidqa wawan Salomonta wajyaspa, kamacherqa uj wasita ruwananta Israelpa Diosnin Jehovapaj. 7 Davidqa wawan Salomonta nerqa: “Wawáy, noqaqa tukuy sonqoywan uj wasita ruwapuyta munarqani Jehová Diosniypa sutinpaj.+ 8 Jehová Diostaj kayta willachimuwarqa: ‘Qanqa ashkha runaspa yawarninta jichʼarqanki, jatuchaj guerraspitaj maqanakorqanki. Sutiypajqa mana qanchu wasita ruwanki,+ kay jallpʼa patapi ashkha yawarta ñaupaqeypi jichʼasqaykirayku. 9 Uj wawayki tiyapusonqa,+ paytaj sonqo tiyasqa kausakonqa,* paytaqa muyuyninpi kaj enemigosninmanta samarichisaj,+ sutintaj Salomón*+ kanqa. Kamachishajtenqa Israel nacionman allin kausayta apachimusaj, ni ima llakiyniyoj kausayta.+ 10 Paymin sutiypaj uj wasita ruwapuwanqa.+ Payqa waway kanqa, noqataj tatan kasaj.+ Kamachina tiyanantaqa Israelpi sinchʼita sayachisaj wiñaypaj wiñaynintinpaj’, nispa.+
11 ”Kunanqa wawáy, Jehová Diosqa qanwanpuni kachun Jehová Diosniykej wasinta ruwaypi allin risunanpaj, qanmanta parlasqanman jina.+ 12 Israel nacionta kamachinaykipaj churasojtin Jehová Diosqa allin yuyayta, yachaytawan qosuchun+ Jehová Diosniykej leyninta kasukunaykipaj.+ 13 Allinta kasukuy kamachisqasninta,+ juiciopi nisqasnintapis, mayqentachus Jehová Diosqa Moisesta kamacherqa Israel nacionman qonanta chayta.+ Sichus chayta allinta kasukunki chayqa, allin risonqa. Wawáy, kallpachakuy, waputaj kay. Ama manchachikuychu, nitaj kharkatiychu.+ 14 Jehová Diospa wasinta ruwanaykipaj, may jina trabajowan wakichisqata saqeshani tres millones cuatrocientos veinte mil kilos* qorita, treinta y cuatro millones doscientos mil kilos* qolqeta, mana pesay atina may chhika cobreta, jinallataj may chhika fierrotapis.+ Chantá wakichisqataña saqeshani maderasta, rumistapis,+ qantaj chayman yapachillankiña. 15 Trabajadorespis may chhika tiyapusunki: rumita kʼutojkuna, albañiles,+ carpinteros, waj imasmanta sumajta yachaj trabajadorespis.+ 16 Qoripis, qolqepis, cobrepis, fierropis may chhikapuni, mana tanteay atina.+ Wawáy, ruwayta qallariypacha, Jehová Diostaj qanwan kachun”,+ nispa.
17 Chantá Davidqa Israelmanta tukuy kuraj kamachejkunata kamacherqa wawan Salomonta yanapanankuta, nerqataj: 18 “¿Nichu qankunawan Jehová Diosniykichej kashan? ¿Nichu payllataj tukuynejpi allin kausayta qosunkichej?* Paymin kay nacionmanta tukuy runasta makisniyman churarqa. Tukuy nacionnintin Jehová Diospa makinpi kashan, nacionninpa makinpipis. 19 Kunanqa mana iskaychakuspa tukuy sonqoykichejwan, tukuy kausayniykichejwan* Jehová Diosniykichejta maskʼaychej,+ Jehová Diospa templonta ruwaj churakuychej, cheqa Diospa templonta.+ Chantá apamunkichej Jehová Diospa trato ruwasqan arcata, cheqa Diospaj tʼaqasqa imasnintawan,+ Jehová Diospa sutinpaj ruwakonqa chay wasiman”,+ nispa.