2 Crónicas
28 Ajazqa*+ kamachiyta qallarishaspa 20 watasniyoj karqa, Jerusalenpitaj 16 watasta kamacherqa. Ajazqa Jehová Diospa qhawayninpi sajra imasta ruwarqa, manataj ñaupa tatan David jinachu ruwarqa.+ 2 David jina ruwananmantaqa Ajazqa Israelpa reyesninpa chakinta qhaterqa,+ Baal santostapis metalmanta* ruwacherqa.+ 3 Chantapis Hinón wayqʼopi* jaywanasta qʼoshñicherqa, qhari wawasnintapis ninapi ruphaykucherqa.+ Chaytaqa ruwarqa waj nacionespa millay costumbresninkuman jina,+ Jehová Diosqa chay nacionesta israelitaspa ñaupaqenkumanta qharqojtinñapis. 4 Ajazqa pata lugarespi,+ lomaspi, tukuynin ramarara sachʼa uraspipis + waj diosespaj jaywanasta ruphachispa qʼoshñichej.
5 Chayrayku Jehová Diosnenqa Ajazta Siriaj reyninpa makinman jaywaykorqa.+ Siriosqa Ajazta atipaspa ashkha presosta Damascoman apakaporqanku.+ Chantapis Diosqa Israelpa reyninpa makinman jaywaykullarqataj. Israelpa reynenqa ashkha runasta wañurachispa Ajazta atipaykorqa. 6 Uj pʼunchayllapi Remaliaspa wawan rey Pecahqa+ 120.000 wapu runasta Judapi wañuracherqa, ñaupa tatasninkoj Diosninku Jehovata saqerparisqankurayku.+ 7 Efraimita soldado Zicritaj wañucherqa reypa wawan Maaseyata, reypa kamachina wasinmanta cargoyoj Azricamta, Elcanatapis. Elcanaqa reypa qhepanta atiyniyoj karqa. 8 Chantapis israelitasqa 200.000 hermanosninkuta Judamanta apakaporqanku presosta jina, warmista, qhari wawasta, warmi wawastawan. Ashkha imastawan saqueaspa Samariaman+ apakaporqanku.
9 Chaypitaj kasharqa Jehová Diospa profetan Oded. Payqa tinkoj rerqa Samariaman kutinpusharqa chay ejercitowan, paykunatataj nerqa: “Ñaupa tatasniykichejpa Diosninku Jehovaqa Judá nacionpaj phiñasqa kasqanrayku paykunata makiykichejman jaywaykusorqachej,+ qankunataj sinchʼita rabiakuspa mana khuyarispa paykunata wañucherqankichej, chaytaj cielokama chayan. 10 Kunantaj qankunaqa Judamanta, Jerusalenmantawan runasta esclavosniykichejman, esclavasniykichejman tukuchiyta munashankichej.+ Jinapis, ¿nichu qankunaqa Jehová Diosniykichejpa ñaupaqenpi juchayojllataj kashankichej? 11 Chayrayku uyariwaychej, presosta apamorqankichej chay hermanosniykichejta kutichipuychej. Jehová Diosqa allin phiñasqapuni qankunapaj kashan”, nispa.
12 Chayta uyarispa efraimitasmanta wakin kamachejkunaqa, nisunman Jehohananpa wawan Azarías, Mesilemotpa wawan Berekías, Salumpa wawan Jehizquías, Hadlaijpa wawan Amasapis maqanakumanta kutimoj soldadosman sayaykorqanku, 13 nerqankutaj: “Ama presosta kayman apamuychejchu, Jehová Diospa ñaupaqenpi juchayoj rikhurisunchej. Chay munasqaykichejta ruwajtiykichejqa juchallanchejta yapaykunkichej, ña juchanchejqa may jatunña, Diostaj Israelpaj may phiñasqaña kashan”, nispa. 14 Chay soldadostaj entregarqanku apamusqanku chay presosta, tukuy ima saqueasqankutapis+ kuraj kamachejkunaman, tukuynin tantasqa kajkunamanpis. 15 Chantá runasta ajllarqanku, chay runastaj presosta yanaparqanku, paykunaqa saqueasqanku imasmanta ropasta orqhorqanku qʼalaslla kasharqanku chay presosman qonankupaj. Chantá chay presosta visterqanku, qorqankutaj jukʼutasta,* mikhunata, yakuta, jawikunapaj aceitetapis. Jinaspataj tukuy presosta Jericopi kaj hermanosninkuman pusarqanku, nisunman palma sachʼasniyoj llajtaman, mana kallpayoj presostaqa burrosman montaykuchispa pusarqanku. Chantá Samariaman kutinporqanku.
16 Chaypacha rey Ajazqa Asiriaj reyesninmanta yanapata mañakorqa.+ 17 Edomitasqa watejmanta Judaman yaykuykamuspa maqanakorqanku, runastapis presosta apakaporqanku. 18 Filisteospis+ Judaman yaykuykamullarqankutaj Sefelapi+ kaj llajtasman, Neguebpi kaj llajtasmanpis. Japʼikaporqankutaj Bet-Semes+ llajtata, Ayalón llajtata,+ Guederot llajtata, Socó llajtata muyuyninpi kaj ranchosnintinta, Timná llajtata+ muyuyninpi kaj ranchosnintinta, Guimzó llajtata muyuyninpi kaj ranchosnintinta, chaykunapitaj tiyakaporqanku. 19 Jehová Diosqa Judá nacionta kʼumuykachacherqa, Israelpa reynin Ajazpa juchanrayku. Ajazqa qhawallarqa Judá nacionnintin millay imasta ruwanankuta. Chayrayku runasqa Jehová Diospa contranta millay juchasta ruwarqanku.
20 Asiriaj reynin Tilgat-Pilneserqa+ Ajazta yanapananmantaqa paywan maqanakorqa, ñakʼaricherqataj.+ 21 Ajazqa Jehová Diospa wasinmanta, reypa wasinmanta,*+ kuraj kamachejkunaj wasisninkumantawan tukuy imata orqhomorqa Asiriaj reyninman qonanpaj. Chay qosqanpis qhasilla karqa. 22 Ajazqa mayta ñakʼarishaspapis Jehová Diospa contranta astawanraj juchallikorqa. 23 Ajazqa payta atiparqanku chay Damascomanta runaspa diosesninkupaj jaywanasta qʼolachipusharqa.*+ Payqa nisharqa: “Siriamanta reyestaqa diosesninku yanapashanku. Noqapis jaywanasta chay diosespaj qʼolachipusaj yanapanawankupaj”,+ nispa. Paykunataj Ajazta, tukuynin Israeltapis desgraciaman chayacherqanku. 24 Chantapis Ajazqa cheqa Diospa* wasinpi sirvinapaj karqa chay imasta tantaykorqa, chantá tʼunata ruwarqa cheqa Diospa wasinpi sirvinapaj karqa chay imasta.+ Ajazqa Jehová Diospa wasi punkusnintapis wisqʼaykorqa,+ Jerusalenpa tukuy kʼuchusninpitaj altaresta ruwachikorqa. 25 Judá nacionpa tukuy llajtasninpipis pata lugaresta ruwacherqa waj diosespaj jaywanasta qʼoshñichinankupaj,+ chaywantaj ñaupa tatasninpa Diosninku Jehovata phiñacherqa.
26 Ajazpa tukuy kausayninmanta, imastachus ruwasqanmantapis qallariymantapacha tukukuykama qhelqasqa kashan Judajpa, Israelpa Reyesninmanta Libropi.+ 27 Chantá Ajazqa ñaupa tatasnin jina wañuporqa, Jerusalén llajtapitaj pʼamparqanku, jinapis mana Israelpa reyesninpa sepulturasninkupichu.+ Wawan Ezequiastaj paypa cuentanmanta rey jina kamachiyta qallarerqa.