2 Crónicas

9 Sabamanta reinaqa+ uyarisqa Salomonmanta parlajta, chayrayku Jerusalenman jamorqa Salomonta tapoj mana kutichiy atina tapuykunata.* Payqa may chhika kamachisninwan jamorqa, camellosninpitaj apamorqa bálsamo aceiteta, ashkha qorita,+ valorniyoj rumistawan. Salomonpaman yaykuspataj taporqa imastachus yachayta munarqa chayta.+ 2 Salomontaj reinaj tukuynin tapuykunasninta kuticherqa. Salomonpajqa mana imapis karqachu mana kutichiyta atinanpaj jinaqa, tukuy imata sutʼincharqa.

3 Sabamanta reinaqa rikorqa Salomón yachayniyoj kasqanta,+ rikullarqataj ruwasqan wasita,+ 4 mesanpi mikhunasninta,+ kamachisnin imaynatachus tiyakusqankuta, meserosnin imaynatachus atiendesqankuta, imayna ropasniyojchus kasqankutapis. Rikullarqataj coperosninta,* imayna ropasniyojchus kasqankutapis, rikullarqataj Jehová Diospa wasinpi sapa kuti uywasta qʼolachisqantapis.*+ Chay tukuy imasta rikuspa reinaqa maytapuni tʼukorqa. 5 Chantá rey Salomonta nerqa: “Llajtaypi kashaspa imastachus ruwasqaykimanta,* sumaj yachayniyoj kasqaykimanta uyarisqayqa ciertopuni kasqa. 6 Noqaqa mana creerqanichu chay willawasqankuta, kayman jamuspapuni, kikin ñawisniywan rikuspapuni creeni.+ Ni kantuntapis willawasqankuchu.+ May jina yachayniyoj kasqanki, willawasqankumantapis astawanraj.+ 7 Ima kusisqachus kanku qanwan kashanku chay runasqa, jinallataj kamachisniykipis. Paykunaqa ñaupaqeykipi kashanku sapa día sumaj yachaywan parlasqaykita uyarispa. 8 Jehová Diosniykeqa alabasqa kachun, paymin qanta munakuspa kamachina tiyananman tiyaykuchisunki, Jehová Diosniykej sutinpi rey jina kamachinaykipaj. Diosniykeqa Israelta mayta munakun,+ wiñaypajtaj kanallantapuni munan, chayrayku qanta churasunki Israelpa reynin kanaykipaj, cheqanta juzganaykipaj, justiciawantaj kamachinaykipaj”, nispa.

9 Sabamanta reinaqa rey Salomonman qorita qorqa 4.104 kilosta,*+ qollarqataj may chhika bálsamo aceiteta, valorniyoj rumistapis. Sabamanta reina jinaqa, ni pipis chay chhika bálsamo aceiteta apamorqachu rey Salomonpajqa.+

10 Hirampa kamachisninwan Salomonpa kamachisninwanqa Ofirmanta qorita apamoj kanku,+ paykunallataj apamorqanku sándalo maderasta, valorniyoj rumistapis.+ 11 Rey Salomonqa chay sándalo maderasmanta gradasta ruwacherqa Jehová Diospa wasinpaj,+ reypa wasinpajpis.*+ Chantá ruwachillarqataj arpasta, takejkunapajpis cuerdasniyoj tocanasta.+ Chay jina sumaj maderasqa manaraj jaykʼajpis Judá nacionpi rikukorqachu.

12 Rey Salomonqa Sabamanta reinaman qorqa tukuy ima mañakusqanta, tukuy ima munasqantapis, rey Salomonpaj apamusqanmantapis astawanraj. Chantá reinaqa kamachisninwan khuska llajtanman kutiporqa.+

13 Salomonpajqa sapa wata apamoj kanku may chhika qorita, 22.777 kilostapuni.*+ 14 Chantapis wajllata apamoj kanku comerciantes, ranqheros, arabespa reyesninku, nacionnintinmanta autoridadespis. Paykunaqa qorita, qolqe metalta Salomonpaj apamoj kanku.+

15 Rey Salomonqa 200 jatuchaj jarkʼakuna escudosta ruwarqa qorita metalwan chajruspa+ (sapa escudoman qanchis kilos jina* metalwan chajrusqa qori yaykorqa).+ 16 Ruwallarqataj 300 juchʼuy escudosta qorita metalwan chajruspa (sapa escudoman iskay kilos jina* qori yaykorqa). Chantá reyqa chay escudosta Líbano Monte Wasiman churamorqa.+

17 Chantá reyqa marfilmanta uj sumaj kamachina tiyanata ruwallarqataj, oro purowantaj forraykorqa.+ 18 Kamachina tiyanamanqa sojta gradas wicharej, chayman kʼaskasqataj uj chaki saruna karqa oromanta ruwasqa. Chay tiyanapeqa puraj ladonpi makista churanapaj karqa, chay maki churanas ladonpitaj iskay leones+ sayasharqanku, sapa ladopi uj. 19 Kallarqataj 12 leones,+ chay sojtantin gradaspi sayasqas, sapa gradapi iskay leones, sapa puntapi uj. Ni mayqen nacionpipis ajinataqa ruwasqankuchu. 20 Rey Salomonpa tukuy vasosnenqa oromanta ruwasqa karqa. Líbano Monte Wasipipis tukuynin copas, platos, tukuy imaspis oro puromanta ruwasqa karqa. Salomonpa tiemponpi qolqe metalqa mana valejchu, chayrayku ni imatapis qolqe metalmanta ruwarqankuchu.+ 21 Hirampa kamachisnenqa+ reypa barcosninpi Tarsisman+ rej kanku. Sapa kinsa wata Tarsis barcosqa chayamoj kanku orowan, qolqe metalwan, marfilwan,+ monoswan, pavo realeswan cargasqas.

22 Rey Salomonqa kay jallpʼa patapi tukuynin reyesmanta aswan qhapaj karqa, aswan yachayniyojtaj.+ 23 Jallpʼantinmanta tukuy reyes Salomonpaman jamuyta munaj kanku yachayninta uyarinankupaj, mayqentachus cheqa Diosqa* Salomonpa sonqonman churarqa chayta.+ 24 Runasqa Salomonpaj apamoj kanku kay jina regalosta: qolqe imasta, qori imasta, pʼachasta,+ guerrapaj armasta, bálsamo aceiteta, caballosta, mulastapis. Watan watan ajinata apamoj kanku. 25 Salomonpataqa kaporqa 4.000 corrales* caballosninpaj, kapullarqataj may chhika carretasnin, 12.000 caballosnin.*+ Chaykunatataj sayachej carretasta sayachinapaj llajtaspi, jinallataj Jerusalenpi, rey tiyakoj chay qayllapi.+ 26 Salomonqa tukuynin reyesta gobernarqa Mayumantapacha* filisteospa jallpʼasninkukama, Egipto jallpʼawan tinkuykama.+ 27 Reyqa Jerusalenpi ashkha qolqe metalta tantarqa, rumita jinapuni. Cedro maderastapis ashkhata tantarqa, Sefelapi higo sachʼasta jinapuni.+ 28 Chantapis Salomonpajqa caballosta apamoj kanku Egiptomanta,+ tukuynin nacionesmantapis.

29 Salomonpa tukuy kausayninmantaqa+ qallariymantapacha tukukuykama qhelqasqa kashan profeta* Natanpa+ qhelqasqasninpi, Silomanta profeta Ahiyaj+ qhelqasqasninpi, profeta Idoj+ qhelqasqasninpipis. Idoqa mosqoypi jina willaykunata Diosmanta japʼerqa, qhelqarqataj Nebatpa wawan Jeroboanmanta.+ 30 Salomonqa Jerusalenpi 40 watasta tukuynin Israelta kamacherqa. 31 Chantá Salomonqa ñaupa tatasnin jina wañuporqa, tatan Davidpa Llajtanpitaj+ pʼamparqanku. Wawan Rehoboamtaj cuentanmanta rey karqa.+