2 Crónicas
10 Rehoboamqa Sichem*+ llajtaman rerqa, tukuynin israelitaspis Sichemman rillarqankutaj Rehoboamta reyta churanankupaj.+ 2 Nebatpa wawan Jeroboantaj+ chayta uyarispa Egiptomanta chay rato kutinporqa (Jeroboanqa Egiptollapiraj kasharqa, payqa rey Salomonmanta ayqekusqa).+ 3 Chaypacha israelitasqa Jeroboanta wajyachimorqanku. Chantá Jeroboanqa tukuynin israelitaswan khuska Rehoboampaman rispa nerqanku: 4 “Tataykeqa ancha sinchʼita trabajachiwarqayku,+ kunanqa sichus pisiyachinki tatayki ancha sinchʼita trabajachiwasqaykuta chayqa, noqaykoqa qanta sirvisqayku”,* nispa.
5 Rehoboamtaj paykunata nerqa: “Kinsa diasmanta kutimunkichej”, nispa. Runastaj riporqanku.+ 6 Rey Rehoboamtaj kurajkunata tapukamorqa, paykunaqa tatan Salomonta sirvisqanku kausakushajtin. Kayta taporqa: “¿Imatá kutichiyman israelitasman? ¿Imatá yuyaychariwankichejman?”, nispa. 7 Paykunataj kuticherqanku: “Sichus israelitaswan kʼacha kanki, nisqankuta ruwanki, mañakusqankutapis uyarinki chayqa, paykunaqa sirvillasonqankupuni”, nispa.
8 Rehoboamtaj chay kurajkunaj yuyaychasqankuta mana japʼikorqachu. Astawanpis payqa paywan wiñarqanku chay jovenesta tapukamorqa, chay jovenesqa payta yanapaj kanku.+ 9 Rehoboamqa paykunata taporqa: “¿Ima niwajchejtaj? Runasqa mañakuwanku: ‘Tatayki ancha sinchʼita trabajachiwasqaykuta pisiyachiy’, nispa. ¿Imatá paykunaman nisunman?”, nispa. 10 Paywan khuska wiñasqanku chay jovenestaj nerqanku: “Sichus israelitas mañakusunku: ‘Tataykeqa ancha sinchʼita trabajachiwayku, qantaj chayta pisiyachinayki tiyan’, nispa chayqa, qanqa kay jinata kutichinayki tiyan: ‘Uña dedoyqa tataypa caderanmantapis aswan rakhuraj kanqa. 11 Tatayqa ancha sinchʼita trabajachisorqachej, noqatajrí aswan sinchʼitaraj trabajachisqaykichej. Tatayqa seqʼonasllawan seqʼochisorqachej, noqataj filo puntasniyoj seqʼonaswan seqʼochisqaykichej’, nispa”.
12 Jeroboantaj tukuynin israelitaswan khuska kinsa diasmanta kutimorqa rey Rehoboampaman, pay nisqanman jina: “Kinsa diasmanta kutimunkichej”,+ nispa. 13 Rey Rehoboamtaj mana khuyarispa runasman kuticherqa. Payqa chay kurajkunaj yuyaychasqankuta mana japʼikorqachu. 14 Astawanpis reyqa chay jovenespa yuyaychasqankuta japʼikuspa kay jinata runasman kuticherqa: “Noqaqa aswan sinchʼita trabajachisqaykichej, aswan sinchʼitapuni. Tatayqa seqʼonasllawan seqʼochisorqachej, noqataj filo puntasniyoj seqʼonaswan seqʼochisqaykichej”, nispa. 15 Ajinata reyqa mana runasta uyarerqachu. Chaytaqa cheqa Diospuni* ruwacherqa,+ ajinamanta juntʼakunanpaj imatachus Jehová Dios silonita Ahiyanejta+ parlasqanta Nebatpa wawan Jeroboanman.
16 Reyqa israelitasta mana uyarerqachu, chayrayku tukuynin israelitasqa reyman kuticherqanku: “¿Imaykutaj David kasqa? Noqaykoqa Jesej wawan Davidmanta ni imatapis japʼisqaykuchu.* Israelitas, sapa ujniykichej diosesniykichejman kutipuychej. Davidpa mirayninmanta kajkuna, qankunallaña cuidakuychej”,+ nispa. Chaymanta israelitasqa tukuyninku wasisninkuman kutiporqanku.+
17 Rehoboamtajrí gobernashallarqapuni Judá llajtaspi tiyakoj israelitasta.+
18 Chantá rey Rehoboamqa Hadoramta+ kacharqa israelitasman. Hadoramqa reypaj tukuy trabajajkunamanta encargado karqa. Israelitastaj rumiswan chʼanqaspa Hadoramta wañucherqanku. Rey Rehoboamtaj usqhayllata carretanman wicharispa Jerusalenman ayqerqa.+ 19 Ajinamanta israelitasqa Davidpa mirayninpa contranpi oqharikorqanku, kunan pʼunchaykama.