2 Crónicas
12 Rehoboampa gobiernonqa sumaj sayasqaña karqa,+ paypis sumaj atiyniyojman tukorqa. Pisi tiemponmantaj payqa Jehová Diospa Leyninta manaña kasorqachu,+ tukuynin israelitaspis kikinta ruwarqanku. 2 Rey Rehoboam phishqa watataña kamachishajtin, Egiptomanta rey Sisacqa+ Jerusalenman jamorqa Jerusalenta japʼikapunanpaj, chayqa ajina karqa israelitas Jehová Diospa contranta juchallikusqankurayku. 3 Rey Sisacpata tiyaporqa 1.200 carretasnin, 60.000 caballospi purej soldadosnin, mana yupay atina soldadosninpis. Paykunaqa Egiptomantapacha Sisacwan khuska jamorqanku. Chay soldadosqa karqanku libios, sukiyim, etíopes ima.+ 4 Sisacqa Judamanta sumaj jarkʼachasqa llajtasta atiparqa, chantá Jerusalenman chayamorqa.
5 Rehoboamwan Judamanta kuraj kamachejkunawanqa Sisacta manchachikuspa Jerusalenpi tantakusqanku. Profeta Semayataj+ chayman rispa paykunata nerqa: “Jehová Diosqa kayta nisunkichej: ‘Qankunaqa saqerpariwankichej, chayrayku noqapis qankunata saqerparisqaykichej,+ Sisacpa makinmantaj jaywaykusqaykichej’, nispa”. 6 Chayta uyarispa Israelmanta kuraj kamachejkunapis, jinallataj reypis Diospa ñaupaqenpi kʼumuykukorqanku,+ nerqankutaj: “Jehová Diosqa cheqa kajtapuni ruwan”, nispa. 7 Jehová Diosqa paypa ñaupaqenpi kʼumuykukusqankuta rikorqa, chayrayku Jehová Diosqa Semayaman kayta nerqa: “Paykunaqa ñaupaqeypi kʼumuykukunku. Mana paykunataqa tukuchisajchu,+ tumpamantawan paykunata librasaj. Manataj Sisacnejtachu Jerusalenman phiñakuyniytaqa apachimusaj. 8 Jinapis paykunaqa Sisacpa kamachisnin kanqanku, jinamanta yachanqanku imachus aswan allin kasqanta, noqata sirvinawankuchus, waj nacionespa reyesninkuta sirvinankuchus”, nispa.
9 Egiptomanta rey Sisacqa Jerusalenman maqanakoj jamorqa. Rey Sisacqa valorniyoj imasta apakaporqa Jehová Diospa wasinmanta,+ reypa wasinmantapis.* Sisacqa tukuy imatapuni apakaporqa, Salomonpa ruwachisqan chay qori escudostapis.+ 10 Rey Rehoboamtaj cobremanta escudosta ruwacherqa chay qori escudospa cuentanmanta. Chay cobre escudostaqa guardiaspa kuraj kamachejkunasninkuman qorqa cuidanankupaj. Paykunaqa reypa wasi punkunta qhawaj kanku. 11 Maypachachus reyqa Jehová Diospa wasinman jamoj chaypacha, guardiasqa jamuspa chay escudosta apamoj kanku, chantá kutichipullajtaj kanku guardiaspa cuartonkuman. 12 Reyqa Diospa ñaupaqenpi kʼumuykukorqa, chayrayku Jehová Diospa phiñakuynin tiyaykorqa,+ manataj paykunata chinkasqata chinkacherqachu.+ Chantapis Judapeqa allin imas karqaraj.+
13 Rey Rehoboamqa Jerusalenpi aswan atiyniyojman tukuspa kamachillarqapuni. Rehoboamqa 41 watasniyoj kashaspa rey jina kamachiyta qallarerqa. Payqa 17 watasta Jerusalenpi kamacherqa. Jerusalentaqa Jehová Dios ajllakorqa Israelpa tukuy ayllusnin* ukhumanta, chayman sutinta churananpaj. Reypa mamanqa ammonita+ karqa, sutintaj Naamá karqa. 14 Rehoboamqa sajra imasta ruwarqa, payqa mana tukuy sonqochu Jehová Diosta maskʼarqa.+
15 Rehoboampa kausayninmantaqa qallariymantapacha tukukuyninkama qhelqasqa kashan familiasmanta listaspi, profeta Semayaj+ parlasqasninpi, profeta Idoj*+ parlasqasninpipis. Rehoboamwan Jeroboanwanqa guerraspi tinkullajpuni kanku.+ 16 Chantá Rehoboamqa ñaupa tatasnin jina wañuporqa, Davidpa Llajtanpitaj+ pʼampakorqa. Chantá wawan Abiasñataj+ paypa cuentanmanta rey karqa.