2 Crónicas
11 Rehoboamqa Jerusalenman chayaytawan, chay ratopacha Judamanta, Benjamín+ ayllumantawan* tukuynin qharista tantachimorqa. 180.000 sumajta maqanakoj* soldadosta tantachimorqa israelitaswan maqanakunankupaj. Rehoboamqa chayta ruwarqa tukuynin Israelpa reynillanpuni kananpaj.+ 2 Chaypacha Jehová Diosqa kamachin Semayaman+ nerqa: 3 “Kayta niy Judamanta Salomonpa wawan rey Rehoboamman, Judamanta, Benjaminmantawan tukuynin israelitasmanpis: 4 ‘Jehová Diosqa kayta nisunkichej: “Ama riychejchu hermanosniykichejwan maqanakoj. Tukuyniykichej wasiykichejman kutipuychej, noqamin kaytaqa ruwachini”,+ nispa’”. Paykunataj Jehová Diospa nisqanta kasukuspa wasisninkuman kutiporqanku, manataj Jeroboanwan maqanakoj rerqankuchu.
5 Rehoboamqa Jerusalenpi tiyakorqa, Judapitaj sumaj jarkʼachasqa llajtasta sayacherqa. 6 Payqa sayaricherqa Belén+ llajtata, Etam llajtata, Tecoa+ llajtata, 7 Bet-Zur llajtata, Socó llajtata,+ Adulam+ llajtata, 8 Gat llajtata,+ Maresá llajtata, Zif llajtata,+ 9 Adoraim llajtata, Lakís+ llajtata, Azecá llajtata,+ 10 Zorá llajtata, Ayalón+ llajtata, Hebrón+ llajtatawan. Chay llajtas sayarichisqa karqanku Judapi, Benjaminpiwan. 11 Chantapis chay sumaj jarkʼachasqa llajtasta aswan sumaj llajtasman tukucherqa. Chay llajtasmanqa comandantesta churarqa, qorqataj mikhuykunata, aceiteta, vinotapis. 12 Chay tukuynin llajtasman qollarqataj jatuchaj escudosta, tʼojsina lanzastapis. Ajinamanta chay llajtasta sinchʼiyacherqa. Judawan Benjaminwanqa paypa mandollanpipuni karqanku.
13 Tukuynin Israelpi tiyakusharqanku chay sacerdoteswan levitaswanqa jallpʼasninkuta saqespa Rehoboamman kʼaskaporqanku. 14 Jeroboanwan wawasninwanqa levitasta manaña saqerqankuchu Jehová Diospa sacerdotesnin kanankuta.+ Chayrayku paykunaqa pasto jallpʼasninkuta, tukuy imasninkutawan saqespa+ Judamanwan Jerusalenmanwan jamporqanku. 15 Jeroboanqa paylla sacerdotesninta churakorqa pata lugarespi sirvinankupaj,+ cabraman rijchʼasqa demoniosta+ sirvinankupaj,* ruwasqan waka uñastapis sirvinankupaj.+ 16 Israelpa ayllusninmanta pikunachus tukuy sonqo munarqanku Israelpa Diosnin Jehovata sirviyta, chaykunaqa sacerdotespa qhepankuta, levitaspa qhepankuta Jerusalenman riporqanku, chaypi ñaupa tatasninkoj Diosninku Jehovaman jaywanasta jaywanankupaj.+ 17 Ajinamanta paykunaqa kinsa watata Judá nacionpa gobiernonta sinchʼita sayacherqanku, Salomonpa wawan Rehoboammantaj sayasqa karqanku. Paykunaqa kinsa watata Davidpa ruwasqanta, Salomonpa ruwasqanta ruwarqanku.
18 Chantá Rehoboamqa Mahalatwan casarakorqa. Mahalatpa tatanqa Davidpa wawan Jerimot karqa, mamantaj Eliabpa wawan Abihail karqa. Eliabqa+ Jesejpa wawan karqa. 19 Tiemponmantaj Mahalatpata Rehoboampatawan kaykuna wawasninku karqa: Jeús, Semarías, Zaham ima. 20 Chantá Rehoboamqa Absalonpa+ allchhin Maacawan casararqa. Tiemponmantaj kaykuna wawasninku karqa: Abías,+ Atái, Zizá, Selomit ima. 21 Rehoboamqa Absalonpa allchhin Maacatapuni astawan munakoj tukuynin warmisninmanta, tukuynin tanta warmisninmanta* nisqaqa.+ Rehoboamqa 18 warmisniyoj karqa, 60 tanta warmisniyojtaj. Qhari wawasnenqa 28 karqanku, warmi wawasnintaj 60 karqanku. 22 Rehoboamqa Maacaj wawan Abiasta churarqa tukuynin hermanosninpa kamachejninku kananpaj, kurajtaj kananpaj. Rehoboamqa ajinata ruwarqa Abiasta reyta churayta munasqanrayku. 23 Rehoboamqa sumajta yuyaycharikuspa wakin qhari wawasninta kacharqa Judapi, Benjaminpi kaj tukuynin llajtasman, chay sumaj jarkʼachasqa llajtasman.+ Chantá paykunaman tukuy imata qorqa, ashkha warmistataj paykunapaj maskʼaporqa.