2 Crónicas
16 Rey Asá 36 watastaña Judapi kamachishajtin, Israelmanta rey Baasaqa+ Judá nacionwan maqanakoj rerqa. Chantá Ramá+ llajtata watejmanta ruwayta qallarerqa,* ni pi llojsinanpaj, nitaj yaykunanpaj Judamanta rey Asaj+ jallpʼasninman. 2 Chayrayku rey Asaqa Jehová Diospa wasinpi,+ reypa wasinpipis* karqa chay jallchʼana cuartosmanta qolqe metalta, qoritawan orqhomuspa Siriamanta rey Ben-Hadadman apacherqa,+ payqa Damasco llajtapi tiyakusharqa. Asaqa Ben-Hadadman kayta willacherqa: 3 “Qanwan noqawanqa uj tratoyoj kanchej, jinallataj tataywan tataykiwanpis. Qolqetawan qoritawan apachimushayki. Israelmanta rey Baasawan trato ruwasqaykichejta amaña valechiychu, paytaj noqamanta ayqekonqa”, nispa.
4 Ben-Hadadtaj rey Asata kasorqa, chayrayku soldadosninpa capitanesninta kacharqa Israelpa llajtasninwan maqanakunankupaj. Paykunataj rispa japʼikaporqanku Ijón llajtata,+ Dan+ llajtata, Abel-Maim llajtata, jinallataj Neftalí+ llajtaspi karqa chay tukuynin mikhuykunata jallchʼana lugarestapis. 5 Rey Baasataj chayta uyariytawan chay ratopacha Ramá llajtata ruwayta saqerparqa, niña ruwarqachu. 6 Rey Asataj tukuynin Judamanta kajkunawan rispa Ramá+ llajtamanta apakanporqanku tukuynin rumista, tukuynin maderastapis, mayqenwanchus rey Baasá chay llajtata ruwachisharqa chaykunata.+ Chay imaswantaj rey Asaqa Gueba+ llajtata, Mizpá+ llajtatawan watejmanta sayaricherqa.*
7 Chaypacha Diospa sutinpi parlaj Hananiqa+ Judaj reynin Asaman jamorqa, nerqataj: “Qanqa Siriaj reyninpi atienekushanki, nitaj Jehová Diosniykipichu. Chayrayku Siriaj reyninpa soldadosnenqa makiykimantaña lluspʼinku.+ 8 ¿Manachu etiopespis libiospis jatun ejército karqanku, ashkha carretasniyoj, caballospi purej ashkha soldadosniyojtaj? Chaypacha qanqa Jehová Diospi atienekorqanki, paytaj makiykiman paykunata churaykorqa.+ 9 Jehová Diospa ñawisnenqa jallpʼantinta qhawamushan,+ payta tukuy sonqo sirvejkunata yanapananpaj.*+ Kunantajrí qanqa wampu jina ruwanki. Kunanmantapachataj contraykipi guerras kallanqapuni”,+ nispa.
10 Asaqa chayta uyarispa sinchʼita phiñakorqa. Diospa sutinpi parlaj runapaj manchayta rabiakuspataj carcelman* payta wisqʼaykucherqa. Chaypacha Asaqa wakin llajta masisnintapis ñakʼarichiyta qallarerqa. 11 Asajpa kausayninmantaqa qallariymantapacha tukukuykama qhelqasqa kashan Judajpa, Israelpa Reyesninmanta Libropi.+
12 Rey Asá 39 watastaña kamachishajtin chakisninmanta onqoykorqa, onqoynintaj sinchʼiyaykorqa. Ajina onqosqa kashaspapis manapuni Jehová Diosmanta yuyarikorqachu, astawanpis jampejkunallawan jampichikorqa. 13 Chantá Asaqa ñaupa tatasnin jina wañuporqa.+ Payqa 41 watastaña kamachishaspa wañuporqa. 14 Chantá paytaqa pʼamparqanku sumaj sepulturapi, chay sepulturataqa payllataj ruwachikusqa Davidpa Llajtanpi.+ Cuerpontaqa uj camillapi siriykucherqanku,* chay camillaqa bálsamo aceitewan churasqa kasharqa, jinallataj sumaj qʼapayniyoj imaswan wakichisqa jawinawanpis.+ Pʼampashajtinkutaj ninata jatunta lauracherqanku.*