2 Crónicas
26 Chantá Judamanta tukuy runasqa Uziasta+ churarqanku reyninku kananpaj, tatan Amasiaspa cuentanmanta. Chaypacha Uziasqa 16 watasniyoj kasharqa.+ 2 Uziasqa Elot+ llajtata Judapaj qhechukapuytawan watejmanta sayaricherqa. Payqa chayta ruwarqa tatan Amasías ñaupa tatasnin jina wañupusqanmantaña.+ 3 Uziasqa+ kamachiyta qallarishajtin 16 watasniyoj kasharqa, Jerusalenpitaj 52 watasta kamacherqa. Mamanqa Jecolías sutikorqa, Jerusalén llajtayojtaj karqa.+ 4 Uziasqa Jehová Diospa qhawayninpi allin imasta ruwarqa, tatan Amasías jina.+ 5 Payqa Diosta sirverqa Zacarías kausakushajtin. Zacariasqa Uziasta yachacherqa cheqa Diosta* manchachikuyta. Uzías Jehová Diosta sirverqa chay wataspeqa, cheqa Dios payta bendicerqa.+
6 Uziasqa filisteoswan+ maqanakoj rerqa, japʼikaporqataj Gat llajtata,+ Jabné+ llajtata, Asdod llajtatawan perqasninkuta juskʼuspa. Chantá llajtasta sayaricherqa Asdod+ jallpʼaspi, jinallataj filisteospa jallpʼasninkupipis. 7 Cheqa Diosqa Uziasta yanapallarqapuni filisteoswan maqanakushajtin, Gurbaalpi tiyakoj arabeswan+ maqanakushajtin, meunimkunawan maqanakushajtinpis. 8 Ammonitasqa+ Uziasman impuestota pagayta qallarerqanku. Uziasqa may atiyniyojman tukorqa, chayrayku payqa Egiptopipis may rejsisqa karqa. 9 Chantapis Uziasqa Jerusalenpi torresta+ ruwachillarqataj Esquina Punku+ qayllapi, Wayqʼo Punku+ qayllapi, Perqa Sayachina Machones* qayllapipis, chaykunatataj sinchʼita sayacherqa. 10 Chantá chʼin pampaspi torresta+ ruwachillarqataj, yakuta tantananpajpis ashkha tʼoqosta allacherqa* (paypataqa ashkha uywasnin tiyaporqa). Kikillantataj ruwarqa Sefelapi, pata pampaspipis. Paypataqa tiyaporqa orqospipis, Carmelopipis chajrapi llankʼaj runasnin, tiyapullarqataj uva huertaspi trabajaj runasninpis. Payqa chajra sonqo karqa.
11 Chantá aswan qhepaman Uziaspata tiyaporqa guerrapaj sumaj wakichisqa soldadosnin. Paykunataj tropa tropa llojsej kanku guerrapi maqanakoj. Paykunataqa yuparqanku, listamantaj churarqanku+ secretario+ Jeiel, kamachej Maaseya ima, paykunaqa reypa ujnin kamachin Hananiaspa mandonpi kasharqanku. 12 Chay wapu soldadosmantaqa encargados kasharqanku familiasmanta umas kajkuna, chay encargadostaj karqanku 2.600. 13 Paykunaj mandonkupeqa karqanku 307.500 soldados, guerrapaj wakichisqa. Chay ejercitoqa manchay wakichisqa kasharqa, reyta yanapananpaj enemigosninpa contranta sayaykunan kajtin.+ 14 Uziasqa tukuynin soldadosman jaywarqa escudosta, tʼojsina lanzasta,+ monterasta, pecherasta,+ flechana arcosta,* warakʼanapaj rumistapis.+ 15 Chantá Jerusalenpi ruwachillarqataj guerrapaj maquinasta, ingenieros rikhuricherqanku chay maquinasta. Chaykunatataj churarqanku torre+ patasman, perqa esquinasmanpis, chay maquinasqa flechasta flechaj kanku, jatuchaj rumistapis chʼanqaj kanku. Ajinamanta Uziasqa tukuynejpi rejsisqa karqa, Dios payta yanapasqanrayku, manchay atiyniyojmantaj tukorqa.
16 Jinapis Uziasqa manchay atiyniyojman tukuytawan umata oqharerqa, chaytaj payllatataj jatun desgraciaman chayacherqa. Payqa Jehová Diosninpa contranta juchallikorqa, Jehová Diospa templonman yaykorqa inciensota qʼoshñichinanpaj incienso altar patapi.+ 17 Chay ratopachataj paypa qhepanta yaykorqanku sacerdote Azarías, Jehová Diospa waj 80 wapu sacerdotesninpis. 18 Paykunaqa rey Uziasman sayaykuspa nerqanku: “Uzías, Jehová Diospaj inciensota qʼoshñicheyqa mana qanpa ruwanaykichu.+ Sacerdoteslla inciensotaqa qʼoshñichiyta atinku, Aaronpa mirayninmanta kasqankurayku.+ Paykunaqa Diospaj tʼaqasqa kanku. Llojsiy kay santo lugarmanta. Qanqa juchallikunki, kay ruwasqaykimantataj Jehová Diosqa mana jatunpajchu qhawasonqa”, nispa.
19 Uziastaj sinchʼita phiñarikorqa, payqa inciensota qʼoshñichinanpaj incienso qʼosñichinata japʼisharqa.+ Sacerdotespaj sinchʼita phiñakushajtintaj frentenpi lepra onqoy+ rikhurerqa, sacerdotespa ñaupaqenpi kashajtin, Jehová Diospa wasinpi, incienso qʼoshñichina altarpa ladonpi. 20 Chantá kuraj sacerdote Azarías chay waj sacerdotespis Uziasta qhawarispa repararqanku frentenpi lepra onqoy rikhurisqanta. Chay ratopachataj chaymanta orqhomorqanku, rey Uziaspis usqhayllata llojsimorqa, Jehová Dios chay onqoywan castigasqanrayku.
21 Rey Uziasqa wañupunankama lepra onqoyniyoj karqa. Payqa lepra onqoyniyoj kasqanrayku waj wasipi tiyakorqa,+ manañataj saqerqankuchu Jehová Diospa wasinman rinanta. Wawan Jotantaj reypa wasinmanta* cuentayoj karqa, nacionmanta runastapis juzgasharqa.+
22 Uziaspa tukuy kausayninmantaqa Amozpa wawan profeta Isaías+ qhelqarqa qallariymantapacha tukukuykama. 23 Chantá Uziasqa ñaupa tatasnin jina wañupullarqataj, pʼamparqankutaj maypichus ñaupa tatasnin pʼampasqa kasharqanku chaypi. Runasqa nerqanku: “Lepra onqoyniyoj”, nispa, chayrayku reyespa sepulturasninkupaj karqa chay jallpʼasllapi pʼamparqanku. Wawan Jotantaj+ paypa cuentanmanta rey jina kamachiyta qallarerqa.