Jesús kausarichisqa karqa

Jesús wañupusqantawan, qhapaj runa Joseqa, Pilatowan parlamorqa Jesuspa ayanta rakhu kʼaspimanta uraykuchinanpaj. Jesuspa ayanta, sumaj qʼapayniyoj qhorasta sumaj lino telaman churaykuspataj maytʼuykorqa. Chantá mosoj sepulturaman churaykuspa rumiwan atiykucherqa. Kuraj sacerdotestaj Pilatota nerqanku: “Llakikushayku Jesuspa discipulosnin ayanta suwaspa, wañuymanta kausarinpun ninankumanta”, nispa. Pilatotaj nerqa: “Sepulturanta sellaykuychej, qhawanankupajtaj soldadosta churaychej”, nispa.

Kinsa dianmantaj wakin warmis sutʼiyayta sepulturaman rispa, sepulturaj punkunmanta rumita tanqasqata rikorqanku. Chay ukhupitaj uj ángel kasharqa, nerqataj: “Ama manchikuychejchu, Jesús kausarinpun. Discipulosninman niychej Galileaman rinankuta Jesuswan tinkunankupaj”, nispa.

María Magdalenataj Pedrotawan Juantawan usqhayllata maskʼamuspa nerqa: “Jesuspa ayanta apakapusqanku”, nispa. Paykunataj sepulturaman usqhayllata rispa, chʼusajta tariparqanku, wasinkumantaj kutiporqanku.

Chantá Mariaqa sepulturaman kutispa, chay ukhupi iskay angelesta rikorqa. Paykunatataj nerqa: “Maymanchus Señorniyta apakapunku”, nispa. Uj runata rikuspataj, yuyarqa huertata qhawaj runa kasqanta. Chayrayku payta nerqa: “Wiraqochíy, maymanchus churasqaykita niway”, nispa. Jesustaj nerqa: “¡María!”, nispa. Paytaj Jesús kasqanta reparaspa nerqa: “¡Yachachejníy!”, nispa. Paymantataj japʼiykukorqa. Jesustaj nerqa: “Hermanosniyman willamuy rikuwasqaykita”, nispa. Mariataj usqhayllata willamorqa.

Chay diallataj, tardeyaykuyta iskay discípulos Jerusalenmanta Emausman rishajtinku, uj runa paykunaman qayllaykorqa. Taporqataj imamantachus parlashasqankuta. Paykunataj nerqanku: “¿Nichu yachanki? Kinsa diaña kashan kuraj sacerdotes Jesusta wañuchichisqankumanta. Kunantaj wakin warmis nishanku Jesús kausashasqanta”, nispa. Chay runataj nerqa: “¿Nichu profetaspi creenkichej? Paykunaqa nerqanku Jesucristo wañuchisqa kananta, kausarimunanta ima”, nispa. Chantá Diospa Palabranmanta parlallarqapuni. Emauspitaj, chay discipulosqa payta quedacherqanku. Mikhushajtinkutaj, chay runaqa tʼantata oqharispa orakorqa. Ajinapi repararqanku Jesús kasqanta. Jesustaj chinkariporqa.

Chay iskay discipulostaj Jerusalenpi apóstoles tantasqa kasharqanku chayman rispa tukuy imata willarqanku. Chaypitaj Jesusqa paykunaman rikhurerqa. Apostolestaj mana creerqankuchu Jesús kasqanta. Chayrayku Jesús nerqa: “Makisniyta qhawariychej, llankhariwaychejtaj. Qhelqasqa kashan Cristoqa wañusqas ukhumanta kausarimunan”, nispa.