¿Imaraykú Jesús mayta parlarqa Diospa Reinonmanta?

Ñaupa yachaqanapi rikorqanchej jina, Jesusqa “Diospa reinon evangeliomanta” maytapuni willarqa (Lucas 8:1-3). Jesusqa mayta kallpachakuspa, karusta purispataj, tukuy Israel llajtapi Diospa Reinonmanta yachacherqa. Jesuspa nisqasnenqa, tawa evangeliospi qhelqasqa kashan, chay evangeliospi “Reino” palabra, pachajmanta astawanraj rikhurin. Casi chay tukuy palabrastaj, Jesuspa siminmanta llojserqa. Mana chayllachu, Diospa Reinonmanta maytaraj parlarqa (Juan 21:25).

¿Imaraykú Jesús mayta parlarqa Diospa Reinonmanta? Imaraykuchus Diosqa, Jesusta ajllarqa chay Reinomanta Rey kananpaj (Isaías 9:6; Lucas 22:28-30). Chaywanpis Jesusqa mana jatunchakuytachu chayri atiyniyoj kaytachu munarqa (Mateo 11:29; Marcos 10:17, 18). Jesusqa sumajta entienderqa imaraykuchus chay Reinomanta willananpuni kasqanta. Pay yacharqa, kunanpis yachallantaj chay Reinoqa munasqa Tatanpaj, yachachisqasninpaj ima, allin imasta ruwananta.a

¿IMATATAJ CHAY REINO JESUSPA TATANRAYKU RUWANQA?

Jesusqa Tatanta mayta munakun (Proverbios 8:30; Juan 14:31). Kʼacha kaykunasnintapis sumajpaj qhawan, nisunman munakuyninta, khuyakuyninta, cheqan kaynintapis (Deuteronomio 32:4; Isaías 49:15; 1 Juan 4:8). Chayrayku Jesusqa Tatanpaj ima llullallatapis parlasqankuta chejnikun. Sutʼincharina, wakin runas ninku Diosqa noqanchejmanta mana llakikusqanta, astawanpis ñakʼarinanchejta munasqanta. Chayrayku Jesusqa, Diospa Reinonmanta mana saykʼuspa willarqa. Imajtinchus chay Reinoqa, Tatanpa sutinta llimphuchanqa (Mateo 4:23; 6:9, 10). ¿Imaynatá chayta ruwanqa?

Tukuy runaspaj sumaj kausayta apamuspa. Jehovaqa Reinonejta “tukuy waqayta ñawisninkumanta pichanqa”, imachus waqachiwanchej chaykunata chinkachenqa, “manañataj wañuy kanqachu, nitaj waqaypis, nitaj qhapariypis, nitaj nanaypis” (Apocalipsis 21:3, 4). Arí, chay Reinonejta tukuy ñakʼariykunata chinkachenqa.b

Chayraykuchá Jesusqa Diospa Reinonmanta mayta yachachej, imajtinchus chay gobiernoqa Tatanpa khuyakuyninta, atiynintawan rikuchenqa (Santiago 5:11). Chantapis Diospa Reinonqa, Jesuspa munasqa yachachisqasninpajpis allin imasta ruwallanqataj.

¿IMATATAJ CHAY REINO JESUSPA YACHACHISQASNINRAYKU RUWANQA?

Jesusqa niraj Jallpʼaman jamushaspa, may unaytaña Tatanwan khuska karqa. Payqa Tatanta yanaparqa janaj pachata, may chhika chʼaskasta, Jallpʼanchejta, chaypi tukuy kausajkunata ima ruwaysispa (Colosenses 1:15, 16). Chay tukuy ima ruwasqa kajkunamanta, Jesusqa runasta astawan munakorqa (Proverbios 8:31).

Chay munakuynintaj astawan willananpaj kallpacharqa. Pay nerqa “sumaj willanasta” wajchasman willananpaj jamusqanta (Lucas 4:18, 19). Payqa mana parlallajchu, astawanqa nisqanta ruwajpuni. Sutʼincharina, uj kuti ashkha runas payta uyarinankupaj tantakorqanku, Jesustaj paykunata ‘khuyaspa, onqosqasninkuta sanoyacherqa’ (Mateo 14:14). Waj kutipitaj, uj sinchʼi onqoyniyoj runa nerqa: “Munankichus chayqa, atinki onqoyniymanta llimphuchawayta”, nispa. Jesusqa payta khuyakuspa nerqa: “Arí, munani; llimphuchasqa kay”, nispa (Lucas 5:12, 13). Ujpacha Lázaro wañuporqa, hermanan Mariataj chaymanta waqasharqa. Jesustaj chayta rikuspa “sinchʼita phutikorqa, sonqontaj wawayarqa” (Juan 11:32-36). Chayrayku tʼukunapaj jina uj milagrota ruwarqa, Lázaro tawa pʼunchaytaña wañusqa kashajtinpis Jesusqa kausaricherqa (Juan 11:38-44).

Jesús yacharqa chay milagrosta ruwasqan, uj tiempollapaj kasqanta. Imaraykuchus chay jampisqan runas, kausarichisqan runas ima watejmanta onqonankuta, wañupunankuta ima yacharqa. Yachallarqataj Reinoj ruwasqasnin wiñaypaj kananta. Chayrayku mana milagrosllatachu ruwarqa, astawanqa mana saykʼuspa Diospa Reinonmanta willarqa (Mateo 9:35). Milagrosta ruwasqanqa, rikuchin imatachus Diospa Reinon tumpamantawan astawanraj ruwananta. Qhawarina imatachus Biblia nisqanman jina ruwananta.

• 

  Manaña onqoykuna kanqachu.

  “Chaypacha ciegospis rikuyta atenqanku, joqʼaraspa ninrisninkupis kicharisqa kanqa. Cojosqa tarukas jina phinkiykachanqanku; opapis kusiywan takirenqa. Chʼin pampapi yakus phullchimonqa, chʼin jallpʼapitaj correshaj yakus kanqa”. Chantapis “mana pipis nenqachu: Onqosqa kani”, nispa (Isaías 33:24; 35:5, 6).

• 

  Wañoyqa chinkaponqa.

  “Cheqan runasqa kay pachata herenciankupaj japʼenqanku, chaypitaj wiñaypaj kawsanqanku.” (Salmo 37:29.)

  “Payqa wañuyta wiñaypaj chinkachenqa, tukuypa waqaynintataj Tukuy Atiyniyoj Tata Diosqa pichanqa.” (Isaías 25:8.)

• Wañusqas kausarinponqanku.

  “Tukuy pʼampasqa kajkunaqa Runaj Churimpa parlasqanta uyarenqanku. [...] Jatarimonqanku[taj].” (Juan 5:28, 29.)

  “Runas wañuymanta kawsarimp[onqanku].” (Hechos 24:15.)

• 

  Tukuypis wasiyoj, llankʼayniyoj ima kanqanku.

  “Chaypi wasista ruwakuspa, tiyakonqanku. Uva huertasta churanqanku, poqoynintataj mikhonqanku. Wasistaqa mana wajkunalla tiyakunankupajchu ruwanqanku, jinallataj uva huertastapis mana wajkuna mikhunankupajchu churanqanku. [...] Ajllasqasniypis makisninkoj tarpusqanta mikhurikonqanku.” (Isaías 65:21, 22.)

• 

  Guerras chinkanqa.

  “Tukuy kay pachapi chʼajwasta chʼinyachin.” (Salmo 46:9.)

  “Nitaj mayqen naciompis waj naciompa contranta maqanakunampaj wakichikonqachu, nitaj wañuchinaku chʼajwapajpis oqharikonqachu.” (Isaías 2:4.)

• 

  Ashkha mikhuna kanqa.

  “Jallpʼaqa sumajta poqon, Diosninchejtaj bendeciwanchej.” (Salmo 67:6.)

  “Nacionnimpeqa ashkha trigo kachun; orqo puntaspipis trigoqa wayrawan pujllachun.” (Salmo 72:16.)

• Wajcha kausay chinkanqa.

  “Wajchasrí manapuni qonqasqachu kanqanku.”(Salmo 9:18.)

  “Payqa wajchata salvanqa paymanta mañakojtin; mana piniyoj ususqa runatapis salvallanqataj, mana pi yanapajtimpis. Llampʼu sonqoyojkunata khuyakonqa, wajchakunatataj wañuymanta salvanqa.” (Salmo 72:12, 13.)

Diospa nisqasninta ukhunchariytawan, ¿reparankichu imaraykuchus Jesús Diospa Reinonmanta mayta parlasqanta? Payqa uyariyta munajkunaman chay Reinomanta parlarqa. Imajtinchus chay Reinoqa tukuy chʼampaykunasninchejta allinchanqa.

Imatachus Dios tumpamantawan ruwananta yachaspa, ¿kusikunkichu? Ajina kajtin, ¿imaynatá astawan Reinomanta yachakuwaj? Chay bendicionesta japʼinaykipaj, ¿imatá ruwawaj? Qhepan yachaqanapi chay tapuykunaman kutichisun.