Jehovaqa garantiata qowanchej jallpʼanchej paraisoman tukunanpaj

1. ¿Imatataj Isaías israelitasman sutʼita niyta munasharqa?

PROFETA Isaiasqa Jehovamanta nerqa ‘cheqa Dios’ kasqanta. “Cheqa” palabrata oqharisqanqa, hebreo parlaypi niyta munan “amén” (Isa. 65:16). Amén palabrataj niyta munan “ajina kachun” chayri “ajinapuni”. Bibliapeqa amén palabrata ashkha kutista oqharin Jehovawan Jesuswan imatachus nisqanku, chayri ruwasqanku cheqapuni kasqanta rikuchinanpaj. Chayrayku Isaiasqa israelitasman kayta sutʼita niyta munasharqa: Imatachus Jehová ñaupajmantaña nisqanqa juntʼakusqantapuni. Jehovataj tukuy nisqasninta juntʼaspa ajinapuni kasqanta rikuchinña.

2. 1) ¿Imaraykutaj Jehová imatachus aswan qhepaman ruwananta nisqanpi atienekusunman? 2) ¿Ima tapuykunamantaj kay yachaqanapi kutichisun?

² Noqanchejrí, ¿imatachus Jehová qhepaman ruwananta nisqanpi atienekusunmanchu? Profeta Isaías kausakusqanmanta 800 watasninman jina, apóstol Pabloqa sutʼincharqa imaraykuchus Jehovaj nisqasninpi atienekuyta atisqanchejta. Diosmanta pay nerqa: “Nitaj jaykʼajpis llullakunmanchu”, nispa (Heb. 6:18). Yachanchej jina, uj yaku juturillamantaqa mana ujllapi llojsimunmanchu miskʼi yakuwan, millu kʼara yakuwanqa. Ajinallatataj Jehovamanta cheqa kaj jamusqanrayku, mana paymanta llulla imas jamunmanchu. Chayrayku Jehovaj tukuy nisqasninpi atienekusunman, aswan qhepaman imastachus ruwananta nisqasninpipis. Kay yachaqanapi kay tapuykunaman kutichisun: ¿Imata aswan qhepaman ruwanantataj Jehová nin? ¿Ima garantiatataj qowanchej chay nisqanta juntʼananpajpuni?

¿IMATÁ JEHOVÁ NIWANCHEJÑA?

3. 1) ¿Jehovaj ima nisqantaj kamachisninpaj may sumajpuni? (Apocalipsis 21:3, 4). 2) ¿Imatá wakin runas ninku kay textota leeripojtinchej?

³ Kunan parlarisunchej imatachus Dios ruwananta nisqanmanta, chaytaj mundo enteromanta Diospa kamachisninpaj may sumajpuni (Apocalipsis 21:3, 4 leey). Jehová niwanchej: “Manañataj wañuy kanqachu, nitaj llakiypis, nitaj waqaypis, nitaj nanaypis”, nispa. Chay textotaqa predicashaspa ashkha kutista oqharinchej runasta sonqocharinapaj, imaynachus kausay paraisopi kanantapis willarinapaj. ¿Imatá wakin runas ninku chayta uyarispa? Paykuna ninku: “Chayqa may sumajpuni kanman, pero mana creenichu ajina kanantaqa”, nispa.

4. 1) ¿Ima iskay imastataj Jehová yacharqaña? 2) ¿Imatachus ruwanallantachu Jehová niwarqanchej?

⁴ Jehovaqa paraisomanta chay nisqanta apóstol Juanwan qhelqachishajtin, yacharqaña kay tiempopi predicashaspa chay textota oqharinanchejta. Yachallarqataj ashkha runasqa “mosoj imasta” ruwananta nisqanpi mana creenallankuta (Isa. 42:9; 60:2; 2 Cor. 4:3, 4). Chanta, ¿imaynatá runasta yanapasunman Apocalipsis 21:3, 4 nisqan juntʼakunanpipuni atienekunankupaj? Noqanchejrí, ¿imatá ruwasunman Jehovapi, nisqasninpipis astawan atienekunapaj? Jehovaqa mana imatachus ruwanallantachu willawarqanchej, manaqa imaraykuchus chay nisqanpi atienekunanchejtapis willallawarqanchejtaj. Qhawarina chay imasta.

JEHOVAQA NISQANTA JUNTʼANANPAJ GARANTIATA QOWANCHEJ

5. ¿Ima versiculospitaj Jehová niwanchej nisqanta juntʼanantapuni, chanta imatá chay versiculospi nin?

⁵ Qhepan versiculospi reparanchej imaraykuchus Jehová paraíso kananta nisqanpi atienekuyta atisqanchejta. Chaypi nin: “Kamachina tiyanapi tiyasqa kajqa nerqa: ‘Tukuy imata mosojyachishani’, nispa. Nillarqataj: ‘Qhelqay, kay palabrasqa atienekunapaj jina kanku, cheqataj kanku’, nispa. Niwarqataj: ‘¡Juntʼakunña! Noqa kani Alfataj Omegataj, qallariytaj tukukuytaj’”, nispa (Apo. 21:5, 6 qallariynin).

6. ¿Imaraykutaj Apocalipsis 21:5, 6 yanapawanchej Jehovaj nisqanpi astawan atienekunapaj?

⁶ ¿Imaraykutaj chay versiculospi nisqan, Jehovaj nisqanpi astawan atienekunapaj yanapawanchej? Apocalipsis libro chay versiculosmanta kay jinata sutʼinchan: “Chay versiculospi Jehovaqa payta kasukojkunapaj uj garantiata jina firmaykushan, nisqanta juntʼananpajpuni”, nispa.b Apocalipsis 21:3, 4 versiculospi kashan Jehová imatachus nisqan, 5 y 6 versiculospitaj uj documentotapis firmaykushanman jina kashan. Chaywantaj garantiata jina qowanchej nisqanta juntʼananpaj. Kunantaj qhawarina chay garantiapi imastachus nisqanta.

7. ¿Pitaj 5 versiculopi parlayta qallarin, imaraykutaj chay may sumaj?

⁷ Jehová garantiata jina qowasqanchejpeqa ñaupajta kay jinata nin: “Kamachina tiyanapi tiyasqa kajqa nerqa”, nispa (Apo. 21:5 qallariynin). Chaytaj may sumajpuni, Apocalipsis libropi Jehová kinsa kutista parlasqanpa qallariynin kasqanrayku. Chayrayku Jehová kikinpuni chay garantiata qowanchej, manataj uj atiyniyoj angelchu, nitaj Jesuschu. Chaytaj qhepan versiculospi imastachus nisqanpi astawan atienekunapaj yanapawanchej. Imajtinchus Jehovaqa “mana jaykʼaj llullakoj” Dios (Tito 1:2). Chayrayku imatachus Apocalipsis 21:5, 6 nisqanpeqa atienekuyta atinchejpuni.

“TUKUY IMATA MOSOJYACHISHANI”

8. ¿Imatá Dios nin nisqanta juntʼanantapuni rikuchinanpaj? (Isaías 46:10).

⁸ Chantá Diosqa nin: “Tukuy imata mosojyachishani”, nispa (Apo. 21:5). Chaypi Jehovaqa imastachus aswan qhepaman ruwananmanta parlashan. Jinapis chaymanta parlan chayta ruwashanmanñapis jina, juntʼanantapuni yachasqanrayku (Isaías 46:10 leey).

9. 1) ¿Ima iskay imaspitaj yuyachiwanchej Jehová “tukuy imata mosojyachishani” nisqan? 2) ¿Imataj pasanqa kay tiempopi “cielowan” “jallpʼawan” ninakoj imaswan?

⁹ Kunan parlarina imatachus Apocalipsis 21:5 nisqanmanta. Chaypi nin: “Tukuy imata mosojyachishani”, nispa. Bibliapi kay capitulopi chayta nisqanqa, Jehová iskay imasta ruwananpi yuyachiwanchej: wajta cuentanmanta churananpi, allinchananpi ima. Ñaupajtaqa wajta cuentanmanta churananmanta parlarina. Apocalipsis 21:1 nin: “Chay ñaupaj cielopis chay ñaupaj jallpʼapis chinkarisqankuña”, nispa. Chay ‘ñaupaj cieloqa’ ninakun gobiernoswan, pikunachus Satanaspa atiyninpi, demoniosninpa atiyninpiwan kashanku chaykunawan (Mat. 4:8, 9; 1 Juan 5:19). Bibliapi jallpʼa palabrataqa wakin kutis oqharin kay jallpʼapi tiyakoj runasmanta parlananpaj (Gén. 11:1; Sal. 96:1). Chayrayku “chay ñaupaj jallpʼapis” nispaqa kay tiempopi sajra runasmanta parlashan. Jehovataj “cielotawan” “jallpʼatawan” mana tumpa tumpasllatachu allinchanqa, manaqa qʼalata chinkachenqa, ‘uj mosoj cielota, uj mosoj jallpʼatawantaj’ cuentanmanta churanqa. Chayqa niyta munan uj mosoj gobierno cheqan runasta kamachinanta.

10. ¿Imastataj Jehová mosojyachillanqataj?

¹⁰ ¿Imaynamantawán Jehová ‘tukuy imata mosojyachillanqataj’? (Apo. 21:5). Jehovaqa jallpʼata, runastapis allinchanqa mana pantayniyoj kanankukama. Isaías nisqanman jina tukuynin jallpʼa uj paraisoman tukonqa, Edén huerta jina manchay kʼachituman. Noqanchejpis sapa ujninchej mosojyachisqa kasunchej. Jehovaqa cojitosta, cieguitosta, joqʼaritasta sanoyachenqa, wañojkunatapis kausarichimonqa (Isa. 25:8; 35:1-7).

“KAY PALABRASQA ATIENEKUNAPAJ JINA KANKU, CHEQATAJ KANKU”, “¡JUNTʼAKUNÑA!”

11. ¿Imatataj Jehová Juanman nerqa, chanta imaraykutaj?

¹¹ Jehová garantiata jina qowasqanchejpi, ¿imatá nillarqataj? Jehovaqa Juanman nerqa: “Qhelqay, kay palabrasqa atienekunapaj jina kanku, cheqataj kanku”, nispa (Apo. 21:5). Jehovaqa mana qhelqanallantachu nerqa, nillarqataj imaraykuchus qhelqanantapis. Pay nerqa: “Kay palabrasqa atienekunapaj jina kanku, cheqataj kanku”, nispa. Chaytaj niyta munan Diospa nisqasnenqa atienekunapaj jinapuni, mana pantayniyojtaj kasqankuta. Jehová “qhelqay” nejtin walejtachá Juanqa chayta qhelqarqa. Chayta qhelqasqanrayku, paraisomanta imatachus Jehová nisqanta leeyta atinchej, aswan qhepaman ima sumaj bendicionestachus japʼinanchejpitaj tʼukuriyta atinchej.

12. ¿Imajtintaj Jehová niyta atin “¡juntʼakunña!” nispa?

¹² Chantá Jehovaqa nerqa: “¡Juntʼakunña!”, nispa (Apo. 21:6). ¿Imajtintaj Jehová nerqa “¡juntʼakunña!” nispa? Munasqanta juntʼananpaj ni ima jarkʼayta atisqanrayku. Jehovaqa garantiata jina qowasqanchejpi uj imatawan nerqa, imatachus nisqan juntʼakunantapuni rikuchinawanchejpaj. ¿Imatá nerqa?

“NOQA KANI ALFATAJ OMEGATAJ”

13. ¿Imajtintaj Jehová nin “noqa kani Alfataj Omegataj” nispa?

¹³ Yachakunchej jina, Jehovaqa Juanman mosqoypi jina rikuchisqanpi kinsa kutita pay parlarqa (Apo. 1:8; 21:5, 6; 22:13). Jehovaqa chay kinsantin kutispi nerqa: “Noqa kani Alfataj Omegataj”, nispa. Alfa letraqa griego alfabetopi ñaupaj kaj letra, omega letrataj qhepa kaj letra. Jehovaqa “Alfataj Omegataj” kani nikuspa, imatachus qallarisqanta tukuchasqantapuni nishawanchej.

14. 1) ¿Maykʼajtaj Jehová “Alfa” nerqa, chanta maykʼajtaj “Omega” nenqa? 2) ¿Ima garantiatataj Jehová qowanchej Génesis 2:1-3 versiculospi?

¹⁴ Jehovaqa Adantawan Evatawan ruwaytawan, paykunaman nerqa imatachus runaspaj, jallpʼapajpis munasqanta. Biblia nin: “Diosqa paykunata bendecispa nerqa: ‘Miraychej, ashkhayaychejtaj. Jallpʼantinman juntʼaykuychej, tarpuychejtaj’”, nispa (Gén. 1:28). Jehovaqa imachus munaynin kasqanta willashaspa, “Alfa” nispapis nishanman jina karqa. Aswan qhepaman Adanpatawan Evajtawan kasukoj miraynenqa kay jallpʼaman juntʼaspa paraisoman tukuchenqanku, mana pantaj runastaj kanqanku. Chay juntʼakojtintaj Jehovaqa “Omega” nispapis ninman jina kanqa. Jehovaqa cielota, kay jallpʼata, chaypi kajkunatawan ruwayta tukuspa, uj garantiata jina qowarqanchej munayninta juntʼananpaj. ¿Imaynamanta? Qanchis kaj pʼunchayta paypaj tʼaqaspa (Génesis 2:1-3 leey). ¿Ima niytá munan chay? Chay diata tʼaqasqanta imatachus runaspaj, jallpʼapajpis munasqanta juntʼananpaj. Chay qanchis kaj día tukukuytataj munaynenqa tukuynin juntʼakonqa.

15. ¿Imaraykutaj Jehovaj munaynin mana juntʼakuyta atinanpaj jinachu karqa?

¹⁵ Adanwan Evawanqa Jehovaj contranpi oqharikuspa juchasapasman tukorqanku, wawasninkumantaj juchata wañuytawan herenciata jina saqerqanku (Rom. 5:12). Chanta, ¿imaynatá Jehová kay jallpʼaman payta kasukoj runasta, mana pantaj runasta juntʼachinman karqa? Satanaspa juchanrayku, ¿nichu Jehová ni jaykʼaj niyta atinman karqa “Omega” nispa? Ajina kaspa jinarqa. Satanasqa ichapis yuyarqa Jehovaqa nisqanta mana juntʼayta atinanta. Ichapis yuyarqa Jehovaqa Adantawan Evatawan chinkachinanta, waj mana pantaj qhariwarmitataj rikhurichinanta munayninta juntʼananpaj. Jinapis Jehová chayta ruwanman karqa chayqa, Diabloqa Jehovata “llulla” ninman karqa. ¿Imarayku? Imaraykuchus Génesis 1:28 nisqanman jina, Jehovaqa Adanman Evamanwan nerqa mirayninku kay jallpʼaman juntʼananta.

16. ¿Imaraykutaj Satanás Jehovata niyta atinman karqa munayninta mana juntʼayta atisqanta?

¹⁶ ¿Imatá Diablo Jehovamanta yuyallanmantaj karqa? Ichapis yuyarqa Jehovaqa Adantawan Evatawan wawasniyoj kanankuta saqenallanta, jinapis chay wawasninkoqa ni jaykʼaj mana pantaj runasman tukunankuta (Ecl. 7:20; Rom. 3:23). Ajina kanman karqa chaytaj, Satanasqa Jehovata ninman karqa munayninta mana juntʼayta atisqanta. ¿Imarayku? Kay jallpʼamanqa mana pantayniyoj runas mana juntʼankumanchu karqa, chayraykutaj Diospa munaynenqa mana juntʼakunmanchu karqa.

17. ¿Imatá Jehová ruwarqa Satanaswan, Adanwan, Evawan contranpi oqharikojtinku, chayrayku imataj aswan qhepaman kanqa? (Dibujostawan qhawariy).

¹⁷ Satanaswan, Adanwan, Evawan Jehovaj contranpi oqharikusqankuta imaynatachus Jehová allinchasqanqa, maytachá Satanasta tʼukucherqa (Sal. 92:5). Jehovaqa Adantawan Evatawan wawasniyoj kanankuta saqespa, sutʼita rikucherqa mana llullachu kasqanta, manaqa nisqanta juntʼasqantapuni. Chantapis rikuchillarqataj imatapis ruwananta nejtin, ni ima chayta ruwananpaj jarkʼayta atisqanta. Chayrayku payqa uj ‘mirayta’ rikhuricherqa, Adanpatawan Evajtawan kasukoj mirayninta salvananpaj. Ajinamanta munayninta juntʼananpaj (Gén. 3:15; 22:18). Satanasqa nichá yuyallarqapischu Jehovaqa chay miraynejta runasta kacharichinanta. ¿Imarayku? Ajinata kacharichinanpaj jatun munakuy necesitakusqankurayku (Mat. 20:28; Juan 3:16). Satanastaj payllapi yuyasqanrayku mana ajinata munakuyta atinchu. Jehová kacharichiwasqanchejrayku, ¿imataj kanqa? Waranqa watas tukukuyta Adanpatawan Evajtawan kasukoj miraynenqa kay jallpʼapi uj paraisopi kausakonqanku, mana pantaj runastaj kanqanku, imaynatachus Jehová qallariypi munarqa ajinata. Chaypacha Jehovaqa “Omega” nispa niyta atenqa.

JEHOVÁ PARAÍSO KANANTA NISQANPI ASTAWAN ATIENEKUNA

18. ¿Ima kinsa imastataj Jehová niwanchej nisqanta juntʼananpi atienekunapaj? (“Kay kinsa imasrayku Jehová nisqanta juntʼananpi atienekunchej” nisqa recuadrotawan qhawariy).

¹⁸ Kay yachaqanapi yachakusqanchejqa sutʼita rikuchiwanchej, kay jallpʼaqa uj paraisoman tukunanta. ¿Imatá wajkunaman nisunman Jehová munayninta juntʼananmanta mana iskayrayanankupaj? Kay kinsa imasta nisunman: Ñaupaj kaj, Jehová kikinpuni chayta ruwananta nisqanta. Apocalipsispi nin: “Kamachina tiyanapi tiyasqa kajqa nerqa: ‘Tukuy imata mosojyachishani’, nispa”. Jehovaqa chay nisqanta juntʼayta munan, chayta ruwananpajtaj payqa yachayniyoj, atiyniyoj ima. Iskay kaj, Jehovaqa yachan nisqanta juntʼanantapuni, chaynejta juntʼanmanñapis jina parlan. Chayrayku payqa niwanchej “kay palabrasqa atienekunapaj jina kanku, cheqataj kanku” nispa. Chantá nillawanchejtaj “¡juntʼakunña!” nispa. Kinsa kaj, Jehovaqa imatachus qallarisqanta tukuchanpuni. Chaytataj kay nisqan sutʼita rikuchiwanchej: “Noqa kani Alfataj Omegataj”. Jehovaqa rikuchenqa Satanasqa llulla kasqanta, munayninta juntʼananpajtaj mana jarkʼayta atisqanta.

19. ¿Imatá ruwasunman pillapis kay jallpʼanchej uj paraisoman tukunanta mana creejtin?

¹⁹ Predicacionpi Jehová chay garantiata qowasqanchejmanta parlaspaqa, nisqasninta juntʼananpi astawan atienekusunchej. Chayrayku Apocalipsis 21:4 versiculota runasman leeripojtinchej, paykunataj “chayqa may sumajpuni kanman, pero mana creenichu ajina kanantaqa” nispa niwajtinchej, ¿imatá ruwasunman? Sumaj kanman 5, 6 versiculosta leeripunanchej, chantá sutʼincharinanchej. Reparachinataj Jehovaqa munayninta juntʼananpaj uj garantiata qowasqanchejta. Chaytaj uj documentopi paypunipis firmaykunman jina kashan (Isa. 65:16).