¿Imaynatá runaj sonqonman chayasunman?
1. ¿Imaynatá Jesuspa yachachisqan discipulosninta yanaparqa?
1 Jesusqa runaspa sonqonkuman chayarqa. Chayrayku Bibliaqa nin uj kutipi discipulosninpa sonqonku ‘kʼajarisqanta’ (Luc. 24:32). Diostaqa tukuy sonqo kasukuna. ¿Imaynatá yanapasunman yachakojkunata Diospa nisqanman jina kausanankupaj? (Rom. 6:17.)
2. ¿Imataj yanapawasun runaj sonqonta mana nanachinapaj?
2 Entiendena, nitaj sonqonta nanachinachu. Ashkha runasqa imachus allin imatajchus mana allin kasqanta nejtinchejpis mana kausayninkuta tijrachinkuchu. Chantapis runasqa imaspichus creesqanku mana cheqachu kasqanta Bibliawan sutʼinchajtinchej, manaña uyariyta munawasunchu. Yanapanapajqa imajtinchus chaypi creesqankuta, imaraykutajchus ajina kasqankuta yachananchej tiyan. Allinta tʼukurispa mana sonqonta nanachinapaj jina tapurejtinchejqa imatachus yuyasqankuta niwasun (Pro. 20:5). Chantá yachasun ima versiculostachus leepunata. Chayrayku paykunata yanapanapaj kallpachakuna, pacienciakunataj (Pro. 25:15). Yuyarikuna, mana tukuychu kikinta ñauparisqankuta. Tiempo pasasqanman jina Jehovaj espíritu santon yanapanqa yuyayninta, ruwasqanta ima tijrachinanpaj (Mar. 4:26-29).
3. ¿Imaynatá yachakojkunata kʼachas kanankupaj yanapasunman?
3 Yanapanchejwanqa kʼachas kanqanku. Jehová kʼacha kasqanmanta, munakuyninmanta parlaj versiculosta leeripojtinchejqa, paykunapis ajina kanqanku. Dios munakuwasqanchejta reparanankupajqa Salmo 139:1-4; Lucas 12:6, 7 versiculosta leeripusunman. Jehovataqa astawan munakunchej pay munakuwasqanchejta reparaspa (Rom. 5:6-8; 1 Juan 4:19). Chantapis ruwasqankuta Jehová rikushasqanta yachakuspaqa, kusichinankupaj jina, jatunchanankupaj jinataj imatapis ruwanqanku (Sal. 78:40, 41; Pro. 23:15).
4. ¿Imaynatá Jehová jina ruwanchej wajkunata yachachispa?
4 Jehovaqa mana tanqawanchejchu kamachisqanta kasukunanchejpaj. Manaqa allinninchejpaj kasqanta rikuchiwanchej (Isa. 48:17, 18). Yachakojkuna entiendenankupaj jina yachachispaqa Jehová jina ruwashanchej. Chantapis yachakojkunaqa mana uj ratollachu allin kausayniyoj kanqanku (Rom. 12:2). Ajinamanta astawan Jehovaman qayllaykonqanku, payqa ‘runaj yuyayninta’ qhawan (Pro. 17:3).