Imaynata chiqa religionta tarina

Diospa masin kayta munaspaqa chiqa religionninpi kananchik tiyan. Jesús nirqa, ‘chiqamanta yupaychaqkuna’, Diosta yupaychanqanku ‘chiqa’ nisqanmanjina (Juan 4:23, 24). Juk ñanlla tiyan chiqamanta Diosta yupaychanapaqqa (Efesios 4:4-6). Chiqa religionqa wiñay kawsayman pusan, llulla religiontaq wañuyman pusan (Mateo 7:13, 14).

Yachasunman mayqinchus chiqa religión kasqanta ruwayninta qhawarispa. Jehovaqa kʼacha, payta chiqamanta yupaychaqkunapis kʼachallataq kananku tiyan. Imaynachus juk allin naranja sachʼa sumaq naranjakunata puqun, kikillantaq chiqa religionqa sumaq runakunata puqun (Mateo 7:15-20).

Jehovap masinkuna Bibliata may jatunpaq qhawanku. Yachanku Biblia Diosmanta jamusqanta. Chayrayku, kawsayninkupi Bibliawan yanapachikunku, chʼampayninkutapis allinchachikunku, astawan Diosta riqsinankupaqpis yanapachikunku (2 Timoteo 3:16). Astawanqa, willasqankumanjina imatapis ruwayta munanku.

Jehovap masinkuna puraqmanta munanakunku. Jesusqa runata Diosmanta yachachispa, unqusqakunata jampispa, munakuyninta rikuchirqa. Chiqa religionpi kaqkunaqa runa masinkuta munakullankutaq. Wakchakunata, wak ayllumanta runata, wak laya runatapis, mana chiqnikunkuchu. Jesus nirqa runa yachanqa, pikunachus yachaqiykuna kasqankuta puraqmanta munanakusqankuta rikuspa (Juan 13:35).

Diospa masinkuna, Jehovap sutinta jatunpaq qhawanku: Pillapis mana sutinchikta uqhariyta munaptin, ¿munasqa masinchik kanmanchu? Mana ichari. Masinchiktaqa, sutinmanta wakyanchik sumaqtataq paymanta rimanchik. Chayrayku, Diospa masin kayta munaspaqa sutinta uqharinanku tiyan, wakkunamanpis sutinta willananku tiyan. Jehovataq chayta ruwananchikta munan (Mateo 6:9; Romanos 10:13, 14).

Jesusjina Diospa masinkuna, runaman Diospa Reinonmanta yachachinku. Diospa Reinonqa, janaqpachamanta kamachiynin, kay reinotaq Jallpʼata paraisoman tikrachinqa, Diospa masinkuna, kay Reinomanta sumaq willaykunata runaman riqsichinku (Mateo 24:14).

Jehovamanta Sutʼinchaqkuna Diospa masinkuna kayta munanku. Bibliata jatunpaq qhawanku, puraqmantataq munanakunku. Chantapis, Diospa sutinta uqharinku, jatunpaqtaq qhawanku, wak runamanpis Diospa Reinonmanta yachachinku. Chayrayku Jehovamanta Sutʼinchaqkuna kunanqa chiqa religión kanku.