Tapuykuna

◼ Tantakunapaq Wasipi casarakuqkuna umallarichiyta munaptinku, ¿imasmantataq ancianoswan parlananku tiyan?

Casarakuyta Bibliap nisqanmanjina ruwaptinkuqa Jehovata jatunchan, astawanraq Tantakunapaq Wasipi ruwakuptinqa. Llaqtanchikpi, imaschus Tantakunapaq Wasipi ruwakusqanqa, imaynachus Diospa llaqtan kasqanta rikuchin. Chayrayku, Tantakunapaq Wasita casaranankupaq mañakuptinku, ancianos paykunawan parlananku tiyan, jinamanta ‘tukuy ima allin, maychus kaqta ruwakunanpaq’ (1 Cor. 14:40).

Casarakuqkuna, Tantakunapaq Wasita mañakunankupaq, aswan ñawpaqmanta juk cartata qillqananku tiyan. Chay cartataqa, chay Tantakunapaq Wasipi juknin qutuchakuypa comité de servicio nisqaman qillqananku tiyan, chaypitaq willanqanku ima pʼunchaychus, ima horachus ruwakunanta, chantapis casarakuqkunaqa yuyarinanku tiyan, ancianosqa mana, paykunaraykuchu, wak horapi tantakuyta ruwanankuta. Chantapis, sapa jukninkuqta kawsayninkuqa, allinpaq qhawasqa, Bibliap yuyaychasqanmanjina, Jehovap kamachiyninmanjina, kanan tiyan.

Casarakusqanku, Diosta jatunchananpaqjina kananpaq, ñawpaqtaqa comité de servicio nisqaman imaynatachus ruwayta munasqankuta willananku tiyan. Ancianosqa mana paykunap munayninkumanjinachu ruwachinqanku, chaywanpis imallatapis mana allin kaqta rikunku chayqa, casarakuqkunaqa allinchananku tiyan. Qhawarina kaykunata: takiykunataqa, Tantakunapaq Wasipi Melodías del Reino nisqallata churakunan tiyan, chayri imatachus takikun chayllata churananku tiyan. Chantapis, Tantakunapaq Wasita imaynatachus kʼachanchasqankuta, sillasta churasqankuta ima, qhawanqanku. Chantá fotosta, chayri videota grabakuptinqa, ñawpaqmanta parlanqanku, Diosninchikta jatunpaq qhawaspa ruwanankupaq. Casarakuqkunaqa Tantakunapaq Wasipi wakichikuyta atinkuman, chaywanpis mana ni ima kaptillan ruwananku kanman. Mana, waqyarikusqankuta tableroman churanankuchu tiyan, chaywanpis, qutuchakuypi Willayta Yachanapaq Tantakuypi, pisillapi Tantakunapaq Wasipi casarakuy kananta willarikunman.

Casarakuqkunap qayllanpi kaqkunaqa, mana bautizasqapunichu kananku tiyan; chaywanpis mana allinchu kanman, Bibliap yuyaychasqanta mana kasukuq, chayri, mana allinpaq qhawasqa kaqkunaqa, mana chaypi kayta atinkumanchu. Casamientopiqa, kaptinqa juk anciano umallirichinqa, imaraykuchus ancianosqa Diospa Palabranmanta yachachinankupaq churasqa kanku, jinamanta Bibliap nisqanmanjina chay casamiento ruwakunanpaq (1 Tim. 3:2).

Chay casamiento imaynatachus ruwakusqanqa, rikuchillanqataq chay umallirichiq anciano imaynachus kasqanta, chayrayku payqa, imaynatachus chay casamiento ruwakunanta, yachanan tiyan. Chaypaqtaq, casarakuyta munaqkunawan tantakunqa tapurinanpaq, paykuna riqsinakuchkaspa mana ima khuchichakuymanpis urmasqankuta yachananpaq, chantá paykunapis mana pakaspa sutʼita willakunanku tiyan. Chantá jukninku ñawpaqta casarasqa karqanku chayqa, kunan Bibliap yuyaychasqanmanjina, suyunpi kamachiykunamanjina ima, juktawan casarakuyta atisqanta rikuchinan tiyan (Mat. 19:9). Chay niyta munan, divorcio papelta ancianoman rikuchinanta.

Casarakuyta munaqkuna ancianoswan parlariptinku, paykunap yuyaychasqanmanjina ruwaptinku ima, chay casamientoqa tukuypaq may kusiy kanqa (Pro. 15:22; Heb. 13:17).