Leejkunaj tapuyninku

¿Mesiaspa ñaupa tatasnin kuraj wawaspunichu karqanku?

Wakin kuti nej kanchej, Mesiaspa ñaupa tatasnin kuraj wawas kasqankuta. Chaytataj nej kanchej Hebreos 12:16 versículo nisqanman jina. Chaypi nin: ‘Esauqa Diospata kaj imasta pisipaj qhawaj. Payqa kuraj kaj wawa kasqanrayku imatachus japʼinanta, uj plato mikhunaraykulla Jacobman chhalarparerqa’, nispa. Kay versiculomanta parlaspa nej kanchej, Jacobqa Mesiaspa ñaupa tatan kasqanta, kuraj kaj wawaman tukusqanrayku (Mat. 1:2, 16; Luc. 3:23, 34).

Jinapis Bibliata astawan ukhunchaspaqa, reparanchej Mesiaspa ñaupa tatasnin, mana kuraj wawaspunichu kasqankuta. Chaymanta astawan yachakuna.

Jacobqa iskay warmisniyoj karqa, ujnenqa Lea karqa, ujnintaj Raquel. Jacobqa Raquelta astawan munakoj. Jinapis kuraj wawanqa Rubén karqa, pitachus Lea nacechikorqa. Tiemponmantaj Raquelpis wawayoj karqa. Paytaj José karqa. Rubén juchallikusqanraykutaj, Joseqa kuraj wawaman tukorqa (Gén. 29:31-35; 30:22-25; 35:22-26; 49:22-26; 1 Cró. 5:1-3). Jinapis Rubenwan Josewanqa mana Mesiaspa ñaupa tatasninkuchu karqanku, manaqa Judá karqa. Judataj mana kuraj wawachu karqa, manachayqa tawa kaj karqa, Leaj wawasninmanta (Gén. 49:10).

Lucas 3:32 versiculopitaj, phishqa runasmanta parlan, pikunachus Mesiaspa ñaupa tatasninku karqanku. Chay versículo nisqanman jinataj, ichá Boazpa kuraj wawanqa Obed karqa. Obedpa kuraj wawantaj ichapis Jesé karqa (Rut 4:17-22; 1 Cró. 2:10-12).

Jesej wawantaj David karqa. Davidtaj Mesiaspa ñaupa tatallantaj karqa. Payqa pusaj wawasmanta, sullkʼa kaj karqa (1 Sam. 16:10, 11; 17:12; Mat. 1:5, 6). Davidpa wawan Salomonpis, sullkʼallataj karqa. Jinapis Salomonqa Mesiaspa ñaupa tatan karqa (2 Sam. 3:2-5).

Chanta, ¿imaynatá israelitas kuraj wawasta qhawaj kanku? Paykunaqa jatunpaj qhawaj kanku. Tatasqa kuraj wawasman tukuy kapuyninkumanta iskay tʼaqa herenciata qoj kanku. Tata wañupojtintaj, kuraj kaj wawa familiamanta encargakunan karqa (Gén. 43:33; Deu. 21:17; Jos. 17:1).

Jinapis wakin kutispeqa, kuraj wawa imatachus japʼinanta, sullkʼan japʼiyta atej. Imaynachus Abrahanpa wawasninwan karqa, ajinata. Abrahanpa kuraj wawan Ismael japʼinantaqa, Isaac japʼerqa. Abrahán Ismaelta wasinmanta kachapusqanrayku (Gén. 21:14-21; 22:2). Ajinallataj Rubenwanpis karqa. Payqa kuraj wawa kasqanrayku imatachus japʼinanta, José japʼerqa.

Kunantaj imatachus Pablo Hebreos 12:16 versiculopi nisqanmanta astawan yachakuna, chaypi nin: “Allinta qhawakullaychejtaj, ama qankuna ukhupi khuchichakoj runa kananpaj. Amallataj kachunchu Esaú jina Diospata kaj imasta pisipaj qhawajpis. Esauqa kuraj kaj wawa kasqanrayku imatachus japʼinanta, uj plato mikhunaraykulla chhalarparerqa”, nispa.

Reparanchej jina Pabloqa, mana Mesiaspa ñaupa tatasninmantachu parlasharqa. Manaqa cristianosta yuyaychasharqa: ‘Chakisniykichejpaj ñanta cheqanchallaychejpuni. Allintataj qhawakuychej, Diospa jatun khuyakuyninta tukuy japʼinaykichejpaj. Ama qankuna ukhupi khuchichakoj runa kananpaj’, nispa (Heb. 12:12-16). Cristianos khuchichakuy juchapi urmankuman karqa chayqa, “Esaú jina Diospata kaj imasta pisipaj” qhawasqankuta rikuchinkuman karqa.

Unay tiempopeqa, Jehová Diospaj uywasta qʼolachej kanku, familiankoj juchankurayku. Imaynatachus Noé, Abrahán, Job ima qʼolachej kanku, ajinata. Ichá Esaupis Diospaj uywasta qʼolachillajtaj, kuraj kaj wawa kasqanrayku (Gén. 8:20, 21; 12:7, 8; Job 1:4, 5). Jinapis “Esauqa kuraj kaj wawa kasqanrayku imatachus japʼinanta, uj plato mikhunaraykulla chhalarparerqa”. Esauqa ichá chayta ruwarqa mana ñakʼariyta munaspa. Imajtinchus Abrahanpa miraynenqa ñakʼarinan karqa (Gén. 15:13). Chantapis Esauqa, “Diospata kaj imasta pisipaj” qhawasqanrayku, Diosta mana yupaychaj iskay warmiswan casarakorqa. Chaytaj tatasninta mayta llakicherqa (Gén. 26:34, 35). Jacobtajrí, Diosta yupaychaj warmiwan casarakunanpaj tukuy atisqanta ruwarqa (Gén. 28:6, 7; 29:10-12, 18).

¿Imatataj kay yachaqanamanta yachakunchej? Yachakunchej Mesiaspa ñaupa tatasnin, mana kuraj wawaspunichu kasqankuta. Judiospis chayta sumajta yacharqanku. Imaraykuchus paykunaqa suyarqanku Cristo, Jesejpa sullkʼa wawan Davidnejta jamunanta (Mat. 22:42).