Bibliap 61 kaq libron: 2 Pedro

Qillqaq: Pedro

Maypitaq qillqakurqa: Babiloniapi (?)

Maykʼaqtaq qillqakuyta tukukurqa: 64 wata chayniqpi

PEDRO iskay kaq cartanta qillqachkaspa, yachakurqa pisimantawan wañupunanta. Chayrayku payqa, mayta hermanosninta yuyarichiyta munarqa, chiqa kaq yachayta, imaptinchus chiqa kaq yachayqa, Diospa Reinonmanta willanallankupaqpuni yanapanman karqa. ¿Kanchu imallapis, Pedro kay cartata qillqasqanmanta, iskaychachinawanchikpaq? Mana, imaptinchus kay cartallataq sumaqta sutʼinchan pichus qillqaqnin kasqanta, jinata nispa: “Noqa Simón Pedro kani, Jesucristoj kamachin, apostolnintaj” (2 Ped. 1:1). Chantapis nillantaq: “Kaywanqa iskay cartastaña qankunaman apachimuykichej”, nispa (3:1). Pedroqa, Jesús imaynatachus uyan lliphipirirqa pʼachasnintaq kʼancharirqa chayta rikusqanta willawanchik, chaytataq Santiagowan, Juanwan, khuska rikurqanku chayrayku payqa, tukuy sunqu chay rikusqanmanta qillqarqa (1:16-21). Pedroqa, Jesús niraq wañuchkaptin wañunanta willasqanta, nin (2 Ped. 1:14; Juan 21:18, 19).a

² Chaywanpis kay 2 Pedro jukjinamanta qillqasqa kasqanrayku, wakinkunaqa mana Pedrochu kay cartata qillqasqanta ninku. Jukjinamanta qillqakusqanqa, mana juk chʼampaychu, imaraykuchus, imapaqchus, imamantachus kay carta qillqakusqanqa, mana Pedropta ñawpa kaq cartanjinachu. Chantapis Pedroqa, ñawpa kaq cartanta ‘Silvanowan qillqachirqa’, paymantataq nin, chiqa sunqu hermano kasqanta, Silvano qillqasqanraykutaq jukjina karqa, kay iskay kaq cartantataq ichapis manaña Silvanochu qillqanman karqa, kaytaq allinta sutʼinchan imaraykuchus iskaynin cartas mana kikinkamalla kasqankuta (1 Ped. 5:12). Wakinqa kay cartata mana Diospa yuyaychasqanchu ninku, “Padres mana anchata kay cartamanta parlasqankurayku”. Chaywanpis “unay tiempomanta Bibliamanta Griego Qillqakunawan” khuska kay carta tarikun, chantapis achkha religionta apaykachaqkuna, niraq kimsa kutita, Cartagopi tantakuchkaptinku, kay 2 Pedro cartata Bibliap librosninwan khuskata apaykachachkarqanku.

³ ¿Maykʼaqtaq 2 Pedro carta qillqakurqa? Ichapis 64 wata chayniqpi qillqakunman karqa, Babiloniapi mana chayri qayllanpi, ichá ñawpaq cartanta qillqasqanmanta pisi tiemponman kay cartata qillqarqa, chaywanpis mana sutʼita yachakunchu mayniqpichus qillqakusqanta. Pedro Iskay kaq cartanta qillqachkaptin, Pablop cartasnintaqa, qutuchakuykunapi apaykachachkarqankuña, Pedrotaq chay cartasta Diospa yuyaychasqantajinapuni qhawarqa. Pedroqa iskay kaq cartanta qillqarqa, ‘payjina may valorniyuq iñiyta japʼiqkunaman’, chantapis pikunamanchus ñawpa kaq cartanta apachisqanman, jinallataq pikunamanchus Diosmanta willarqa chaykunaman. Imaynatachus ñawpaq carta tukuyniqman chayarqa, kikillantataq kay cartapis may riqsirqa karqa (2 Ped. 3:15, 16; 1:1; 3:1; 1 Ped. 1:1).

IMAYNATATAQ YANAPAWANCHIK

⁸ Chiqa kaqta yachayqa, ¡may sumaqpuni! Pedro Hebreo qillqakunamanta chʼuwata yachasqanta kay qillqasqanpi yachachinanpaq sumaqta khuskachan. Sutʼinchantaq tukuy kaykuna Diosninchikpa yuyaychasqan kasqanta, jinata nispa: “Ñawpajta kayta yachaychej: Diosmanta Qhelqasqapi profetaspa sutʼinchasqankoqa mana paykunaj yuyayninkuman jinallachu karqa, imaraykuchus profetaspa sutʼinchasqankoqa mana jaykʼajpis runaj munayninmantachu jamorqa”. Rikuchillantaq Pabloman ‘Dios yachayta qusqanta’ (1:21; 3:15). Diosninchikpa yuyaychasqan, qillqakunata ñawiriyqa, chiqa kaq yachachiymanta sumaqta japʼikunapaq yanapawasun. Manataq Pedro wakin runasmanta nirqajina parlasunchu, pikunachus ninku: “Qallariypi jina imaynachus karqa, pachallampuni kakushan”, nispa (3:4). Chantapis Pedro 2 kaq cartanpi yachachiwanchik imatachus ruwananchik tiyan mana pantasqata yachachiqkunap tuqllanman urmananchikpaq, astawanpis Pedrop qillqasqanta, Bibliamanta wak librosninta ima, astawan ukhunchanallanchikpuni tiyan. Kay yachachiykunaqa, ‘chiqa kaqta yachasqanchikpi sinchita sayanallanchikpaqpuni’ yanapawanchik chantapis pacienciawan, mana saykʼuspa ‘Diospa qhasilla kʼacha yanapayninpi wiñaspa, jinallataj Salvawaqninchik Señor Jesucristopi riqsiypiwan’ (1:12; 3:18).

⁹ “Dios Tatata, Señorninchej Jesucristota ima” riqsinapaq, Pedro usqhayllata kallpachakunanchikta, cristianosjina allinta kawsakunanchikpaq yuyaychawanchik. Chay yuyaychaykunatataq kay 2 Pedro 1:5-7 pʼitikunapi tarinchik. Chaymantataq 8 pʼitipi jinata nispa yapaykun: “Chay imaschus qankunapi kashanku, ashkhayashankutaj chayqa, yanapasonqanku kawsayniykichej ama qhasillakanampaj, Señorninchej Jesucristota rejsisqaykichejpi mana jinalla kanaykichejpaj”. Kayqa may sumaq kallpachay, pikunachus Diosninchikpaq sumaqta llamkʼachkanku kay saqra pʼunchaykunapi, chaykunapaq (1:2).

¹⁰ May allinpuni tukuy atisqanchikta ruwananchikqa, Jehová “jatuchaj may jina valorniyoj qosaj nisqasninta” japʼinanchikpaq. Chayrayku Pedro akllasqa cristianosta ñawpaqmanta yuyaychan, Diosninchikpaq Reinonta mana saykʼuspa suyanallankupaqpuni, jinata nispa: “may kʼuchi kaychej wajyasqas, ajllasqastaj kasqaykichejpi sumajta sayanaykichejpaj. Sichus chay imasta ruwankichej chayqa, mana jaykʼajpis urmankichejchu. Chay jinamanta, Señor Jesucristo Salvawajninchejpa wiñay reinonman may kusiypi pusaykusqa kankichej”. Chantá Pedro Jesuspa jatun kamachiyninmanta parlawanchik, mayqintachus Jesuspa uyan, pʼachanpis lliphipirichkaptin rikurqa, chayrayku payqa jinata nin: “Chayta uyarispa, repararqayku profetaspa willasqanku jinapuni kasqanta”. Tukuy profecías Diospa Reinonmanta parlasqanqa chiqamantapuni juntʼakunqa. Chayrayku ñuqanchikpis tukuy sunqu, Pedrojina, profeta Isaiaspa qillqasqanmanta uqharisqanta, nisunman: “Suyashanchej mosoj cielota, mosoj jallpʼatawan, Dios ruwasaj nisqanman jina, maypichus cheqan kawsaylla kanqa, chayta” (2 Ped. 1:4, 10, 11, 19; 3:13; Isa. 65:17, 18).

[Sutʼinchaynin]