Ñawpamantaña willawarqanchik

Jehovaqa mana saqra runakuna Paraisota tukuchinankuta saqinqachu. Diospa masinkunalla Paraisopi kawsakunqanku. ¿Saqra runakunataqri? Kay tapuyman kutichinapaqqa Noep kawsayninta qhawarina. Noé unayña kawsakurqa. Sumaq runataq karqa, tukuy kallpanwantaq Jehovap munayninta ruwarqa. Wakin runakunataq juchapi piqtusqa karqanku. Chayrayku, Jehovaqa jatun parata apachimusaq tukuy saqra runakunata chinkachinaypaq, nispa Noeta nirqa. Ajinallatataq kamachirqa arkata ruwananta, pay aylluntin Jatun Para jamuptin mana wañunankupaq (Génesis 6:9-18).

Noeqa ayllunwan arkata ruwarqanku. Noeqa wak runakunaman Jatun Para jamunanmanta willarqa, manataq pipis uyarirqachu. Juchallapipuni karqanku. Noeqa arka ruwayta tukuytawan uywakunata chayman qhatiykurqa, chaymantataq pay ayllunwan yaykurqa. Chaymanta, Jehovaqa yakuta tʼuqyachimun. Tawa chunka pʼunchawta, tawa chunka tutata pararqa, yakutaq tukuy Jallpʼata pʼampaykurqa (Génesis 7:7-12).

Saqra runakunaqa wañurqanku, Noetaq ayllunwan kawsakurqanku. Jehová Noeta Jatun Paramanta jarkʼarqa, saqra ruwaymanta llimphu Jallpʼamantaq pusaykurqa (Génesis 7:22, 23). Biblia nin, Jehovaqa mana chiqan ruwaqkunata watiqmanta chinkachinqa. Kʼacha runatataq jarkʼanqa, Paraíso Jallpʼapi wiñaypaq kawsakunankupaq (2 Pedro 2:5, 6, 9).

Kunan, achkha runa saqra ruwaykunata ruwachkanku. Kay pachaqa chʼampaykunamanta juntʼa. Jehovataq, paymanta Sutʼinchaqkunata runaman willanankupaq kutin kutita kachan, yaqha tukuy runataq Jehovap rimayninkunata mana uyariyta munankuchu. Mana wistʼu kawsayninkuta chiqanchayta munankuchu, chantapis imachus allin, imachus mana allin Dios ninanta mana munankuchu. ¿Imapi kay runakuna tukunqanku? ¿Maykʼaqllapis tikrakunkumanchu? Achkha runa mana jaykʼaq tikrakunqankuchu. Saqra runaqa wiñaypaq chinkanqanku, chay pʼunchawtaq qayllaykamuchkanña (Salmo 92:7).

Jallpʼaqa mana chinkanqachu, Paraisoman tukunqa. Dioswan masichakuqkunaqa Paraíso Jallpʼapi wiñaypaq kawsakunqanku (Salmo 37:29).