Sumaq kapuyninchikta wakkunaman jaywarina
1 Tukuypis Diospa Palabranpi may chhika sumaq yachachiykuna kasqanta yachanchik (Sal. 12:6; 119:11, 14). Juk kuti Jesús, Diospa Reinonmanta, rikchʼanachinaswan parlaytawan, yachachisqasninta tapurqa: ‘¿Tukuy parlasqayta japʼiqankichikchu?’, nispa. Paykunataq kutichirqanku arí nispa, chantá pay nirqa: ‘Chayrayku Diospa kamachin, sumaq yachachisqa runa juk qhapaq wasiyuqman rikchʼakun. Payqa jallchʼasqa qhapaq qhuyasninmanta urqhumun musuq qhuyasta unay qhuyastapis’, nispa (Mat. 13:1-52, Dios Parlapawanchej).
2 ¿Imastaq chay mawkʼa qhuyas? Chaykunaqa, imatachus qallariypi Bibliamanta yachakusqasninchik. ¿Musuqkunarí? Diospa Palabranmanta, musuq yachaykunata sapa kuti astawan yachakusqanchik (1 Cor. 2:7). Chantapis, ‘allin kamachi, yuyayniyuq’ yanapayninwan, musuq yachaykunata yachakusqanchik ima (Mat. 24:45).
3 Diosmanta yachakusqanchik musuqpis, mawkʼapis kachun, may sumaqpaq qhawanchik. Chayrayku, Diospa Palabranmanta, sumaqta wakichikuyta, yachachiyta ima, munanchik, jinamanta kay may sumaq chiqa yachachiykunata wakkunaman willarinapaq.
4 Jesusmanta yachakuna. Jesús, Diosmanta wakkunaman yachachinanrayku tukuy imata ruwasqanqa, sutʼita rikuchiwanchik paypaq chay ruway may allin kasqanta. Payqa may saykʼusqa kachkaspapis wakkunaman Diosmanta willallarqapuni (Juan 4:6-14).
5 Runasqa Diosmanta pisita yachakurqanku, chayrayku Jesusqa paykunata munakusqanrayku chiqa kaq yachachiykunamanta willarqa (Sal. 72:13). Khuyakusqanraykutaq payqa, Diosta mana riqsiqkunaman, ‘tukuy imata yachachirqa’ (Mar. 6:34).
6 Payjina ruwana. Ñuqanchikpis, Jesusjina yachakusqanchikta may sumaqpaq qhawanchik chayqa, runaman Bibliamanta chay sumaq yachachiykunata mayta willamuyta munasun (Pro. 2:1-5). Chantá, saykʼusqas kachkaspapis, tukuy sunqu willallasunpuni (Mat. 6:34). Chayrayku kay sumaq kapuyninchikta, may sumaqpaq qhawasqanchikrayku, kallpachakuna willayninchikta astawan yapanapaq.