Kʼacha kay

Jesuspa ruwasqan

VIDEO: Jesús uj ciego runata sanoyachin

1. VIDEOTA qhawariy chayri Juan 9:1-7 leeriy. Chantá kay tapuykunapi tʼukuriy:

1. ¿Imatá Jesús ñaupajta ruwarqa, chay ciego runatachu sanoyacherqa chayri sumaj willaykunatachu payman willarqa? (Juan 9:35-38 qhawariy).

2. ¿Imaraykutaj chay runa Jesusta uyariyta munallarqa?

¿Imatá Jesusmanta yachakunchej?

2. Ichapis uj runaqa uyariyta munallawasun paymanta llakikusqanchejta reparaspa.

Jesús jina ruway

3. Runaspa lugarninkuman churakuy. Runas imaynachus kashasqankupi piensarinaykipaj kallpachakuy.

1. Tapurikuy: “¿Imastaj ichapis llakichishanman? ¿Imamantataj yachakuyta munanman chayri imataj yanapanman?”, nispa. Kay tapuykunapi tʼukureyqa runaswan kʼachapuni kanaykipaj yanapasonqa.

2. Uj runamanta llakikusqaykita rikuchiy sumajta uyarispa. Sichus pay imaynachus kashasqanta chayri uj llakiyninta willarisunki chayqa, ama waj imasmanta parlaychu.

4. Kʼachamanta, respetowantaj parlay. Wajkunamanta khuyakusqanchej, yanapariytapuni munasqanchejpis, imaynatachus parlasqanchejpi yachakun. Chayrayku imatachus ninaykipi, imaynatachus ninaykipipis sumajta piensariy. Ama imatapis parlaychu runaj sonqonta nanachinaykipaj chayri phiñachinaykipaj jinaqa.

5. Yanapariy. Atikusqanman jina, pimanchus willashanki chay runata imaynallamantapis yanapariy. Paywan kʼacha kaspaqa ichapis sumajta parlariyta atinki.