1. ¿Imastataj Bibliaj profeciasnin willawanchej?

¿IMATAJ Diospa llajtanwan pisimantawan kanqa? Chaytaqa sutʼita yachasunman. Imaraykuchus Bibliaj profeciasnenqa, imastachus tumpamantawan rikunanchejta willawanchej. Uj profeciaqa parlan, kay mundopi aswan atiyniyoj gobiernos imatachus ruwanankumanta. Chay profeciataj Daniel 11 capitulopi kashan. Chaypeqa iskay reyes enemigos kasqankumanta parlan. Ujnenqa norte ladomanta chayri “wichay ladomanta”. Ujnintaj sur ladomanta chayri “uray ladomanta”. Chay profeciamanta khuskan kurajqa juntʼakunña. Chayrayku chay profeciamanta imaschus manaraj juntʼakunchu, chaypis juntʼakonqapuni.

2. Génesis 3:15; Apocalipsis 11:7; 12:17 nisqanpi piensariytawan, ¿imastataj ruwananchej tiyan Daniel 11 capitulopi profeciata entiendenapaj?

² Daniel 11 capitulopi profeciata entiendenapajqa, chay iskay reyes mayqen gobiernoswanchus ninakusqankuta yachananchej tiyan. ¿Tukuynin gobiernoschu kankuman? Mana. Chaykunaqa kanku, maykunapichá Diospa llajtanmanta ashkhas tiyakunku, chay nacionespi kamachej gobiernoslla, chayri Diospa llajtanta ñakʼarichej gobiernoslla. Diospa kamachisnenqa Jehová Diosta, Jesustawan kasukunku. Paykunataj mundontinpi runasmanta nisqaqa, may pisilla kanku. Jinapis Satanaswan paypa makinpi kajkunawanqa, paykunata chinkachiyta munanku. Chayrayku gobiernosqa Diospa kamachisninman churanakunku (Génesis 3:15; Apocalipsis 11:7; 12:17 leey). Chantapis Daniel 11 capitulopi profeciata entiendenapajqa, Bibliaj waj profeciasnintawan igualachina tiyan. Chayrayku waj profeciastawan qhawarisun.

3. ¿Imastá kay yachaqanapi, qhepan yachaqanapiwan yachakusun?

³ Imastachus iskay parrafopi nikusqanpi piensarispa, kunanqa Daniel 11:25-39 versiculosta estudiasunchej. Yachasuntaj 1870 watamanta 1991 watakama, mayqen gobiernoschus wichay ladomanta reywan, jinallataj uray ladomanta reywan ninakusqankuta. Chantá yachakullasuntaj, imaraykuchus chay profeciamanta wakin imasta, waj jinamanta entiendenanchej kasqanta. Qhepan yachaqanapitaj, Daniel 11:40 al 12:1 versiculosta estudiasunchej. Chaypitaj aswan sutʼita entiendesun, imachus kananta 1991 watamantapacha Armagedón chayamunankama. Kay iskay yachaqanasta estudiashaspaqa, “Iskay reyes tukukuy tiempopi maqanakunku” nisqata qhawarina. Jinapis ñaupajtaqa, yachananchej tiyan pichus wichay ladomanta rey, pitajchus uray ladomanta rey kasqanta.

WICHAYMANTA CHAYRI URAYMANTA REYTA ¿IMAYNATÁ REJSISUNMAN?

4. Wichaynejmanta reywan uraynejmanta reywan, ¿ima kinsa imaspitaj rijchʼakunku?

⁴ Qallariypi, ¿pikunataj ‘wichay ladomanta reywan’, ‘uray ladomanta reywan’ karqanku? Israel llajtaj pata ladonpi, uranejninpiwan kaj reyes karqanku. ¿Imaynatá chayta yachanchej? Qhawarina imatachus uj ángel profeta Danielman nisqanta. Pay nerqa: “Kunanqa allinta willasunaypaj jamuni, imachus qhepa pʼunchaykunapi llajta masisniykiman jamonqa, chayta”, nispa (Dan. 10:14). Pentecostés 33 watakamaqa, Israel llajta Diospa ajllakusqan llajta karqa. Jinapis chay watamantapacha, Jehová Diosqa Jesuspa discipulosnintañataj llajtan kananpaj ajllarqa. Chayrayku Daniel 11 capitulopi profeciamanta khuskan kurajpuni, Jesuspa discipulosninpi juntʼakorqa, manataj Israel llajtapichu (Hech. 2:1-4; Rom. 9:6-8; Gál. 6:15, 16). Wichay ladomanta rey, jinallataj uray ladomanta reypis, tiempo pasasqanman jina imaymana gobiernoswan ninakorqanku. Jinapis chay gobiernosqa kinsa imaspi rijchʼakunku. 1) Chay gobiernosqa maypichus Diospa kamachisninmanta ashkhas tiyakunku, chaypi kamachinku. Chayrí Diospa kamachisninta qhatiykachanku. 2) Chay gobiernosqa Diospa llajtanpa contranpi kaspa, Jehová Diosta chejnikusqankuta rikuchinku. 3) Chay gobiernosqa atiyniyoj kayta munaspa purajmanta maqanakunku.

5. Kay 100 watamanta 1870 watakama, ¿yachakorqachu mayqen gobiernochus wichaynejmanta rey chayri uraynejmanta rey kasqanta?

⁵ Apóstoles wañupusqankumanta qhepaman, llulla cristianosqa congregacionman juntʼaykorqanku. Paykunaqa llulla religionmanta jamoj yachachiykunata japʼikorqanku, Diospa Palabranmanta cheqa yachachiykunatataj qʼewerqanku. Chay tiempomanta 1870 wata chaynejkama, mana yachakorqachu pikunachus Jehová Diospa cheqa kamachisnin kasqankuta. Llulla cristianosqa cizaña qhora jina wiñarqanku. Cheqa cristianostaj chinkapuspa jinarqanku (Mat. 13:36-43). Chayta yachayqa rikuchiwanchej, 100 watamanta 1870 watakama, ni mayqen gobiernopis wichaynejmanta reywan, jinallataj uraynejmanta reywan ninakusqanta. Imaraykuchus chay wataspeqa, mana yachakorqachu pikunachus Diospa llajtan kasqankuta. Jina kajtintaj, ni mayqen gobiernopis paykunata ñakʼarichiyta aterqachu. Chayrayku mana yachakorqachu, mayqen gobiernochus wichaynejmanta rey chayri uraynejmanta rey kasqanta.b Jinapis 1870 watamantapacha, chayqa yachakuyta aterqa. Qhepan parrafospi yachakusun, imaraykuchus chayta nisqanchejta.

6. ¿Maykʼajtaj yachakorqa pikunachus Diospa llajtan kasqanku?

⁶ Kay 1870 watamantapacha, pikunachus Diospa llajtan kasqanku yachakorqa. Chay watapeqa hermano Russell, waj runaswan khuska Bibliata estudianankupaj tantakuyta qallarerqanku. Chaypacha paykunaqa Bibliaj ujnin profecianta juntʼarqanku. Chay profeciaqa nerqa, Diospa ‘willarajnin ñanta wakichinanta’. Chaytataj ruwanan karqa, Mesías niraj Rey jina churasqa kashajtin (Mal. 3:1). Hermano Russellwan compañerosninwantaj, chay profeciata juntʼaspa Diospa llajtanman tukorqanku. Chay tiempopi, ¿karqachu mundontinpi atiyniyoj gobierno Danielpa profecianta juntʼananpaj? Chayta qhepan parrafospi yachakusun.

¿PITAJ URAYNEJMANTA REY?

7. Primera Guerra Mundial chaynejkama, ¿mayqen suyutaj uray ladomanta rey karqa?

⁷ Kay 1870 watapaj, Gran Bretaña suyoqa mundo enteropi may atiyniyoj karqa. Ni mayqen suyupis Gran Bretaña jina astawan armasniyoj, soldadosniyoj ima karqachu. Chay suyoqa Danielpa ujnin profecianta juntʼarqa. Danielqa chay profeciapi uj “juchʼuy” wajrita, kinsa wajrasta tʼirasqanta nerqa. Chay wajritataj Gran Bretañawan ninakorqa. Chay kinsa wajrastaj karqanku: Francia, España, Países Bajos ima. Gran Bretañataj kinsantinkuta atiparqa (Dan. 7:7, 8). Ajinamanta Gran Bretañaqa, Primera Guerra Mundial chaynejkama uray ladomanta reywan ninakorqa. Chay tiempollapitaj, Estados Unidospis manchayta qhapajyaykorqa, atiyniyojmantaj tukorqa. Chantá iskaynin suyus khuska llankʼayta qallarerqanku.

8. Primera Guerra Mundialmantapacha, ¿pikunataj uray ladomanta reywan ninakunku?

⁸ Primera Guerra Mundial kashajtin, Estados Unidosqa Gran Bretañawan ujchaykukorqa. Iskayninkutaj waj nacioneswan guerrapi maqanakorqanku. Ajinamanta Gran Bretañawan Estados Unidoswan, mundontinpi aswan atiyniyoj nacionesman tukorqanku. Chantapis uj gobiernollapis kankuman jina llankʼayta qallarerqanku. Chaypitaj Danielpa kay profecian juntʼakorqa: ‘Uray ladopi kaj reytajrí, may atiyniyoj ashkha soldadosniyoj kanqa’ (Dan. 11:25). Gran Bretañawan Estados Unidoswanqa, Primera Guerra Mundialpi khuska llankʼasqankumantapacha uray ladomanta reywan ninakunku.c Qhepan parrafopi yachakusun, mayqen gobiernochus wichay ladomanta rey kasqanta.

WICHAYNEJMANTA REY RIKHURILLANTAJ

9. 1) ¿Maykʼajtaj wichaynejmanta rey watejmanta rikhurillarqataj? 2) ¿Imaynatá Daniel 11:25 juntʼakorqa?

⁹ Wichaynejmanta reyqa, 1871 watapi watejmanta rikhurillarqataj. Chaytaj karqa, hermano Russellwan waj runaswan Bibliata estudiayta qallarisqankumanta watanman. ¿Imastaj 1871 watapi karqa? Otto von Bismarck sutiyoj runa, ashkha llajtasta ujchaykorqa. Ajinamanta manchay atiyniyoj Alemania nación rikhurerqa. Chay nacionpa ñaupaj kaj reynenqa, Prusia llajtayoj Guillermo I karqa. Paytaj Bismarck runata canciller kananpaj churarqa, nisunman gobiernonpi aswan jatun cargota qorqa.d Qhepan watasninman Alemaniaqa, Africamantawan Océano Pacificomantawan ashkha suyusta japʼikaporqa. Chantá Gran Bretañaj contranpi oqharikuyta qallarerqa (Daniel 11:25 leey). Alemaniaqa may chhika soldadosta tantarqa, guerrapaj barcosninpis casi Gran Bretañajta jina karqa. Chaykunawantaj Primera Guerra Mundialpi enemigosninwan maqanakorqa.

10. ¿Imaynatá Daniel 11:25, 26 juntʼakorqa?

¹⁰ Danielqa profecianpi willallarqataj, imachus Alemaniawan, soldadosninwan ima kananta. Profecianpi nerqa, wichay ladomanta rey ‘mana sayayta atinanta’. ¿Imajtintaj mana sayayta atinmanchu karqa? Daniel nerqa: “Imaraykuchus kikin soldadosnillanmantataj wakenqa paypa contrampi rikhurenqanku. Mikhunankupaj paypa wajyarikusqasnillantaj payta phiriykonqanku”, nispa (Dan. 11:25 tukukuynin, 26 qallariynin). Danielpa tiemponpi, reypa ‘wajyarikusqasnenqa’ karqanku: ‘kamachinan wasipi sirvejkuna’, soldadosta kamachejkuna, waj cargoyoj runas ima (Dan. 1:5). ¿Imaynatá chay profecía Alemaniapi juntʼakorqa? Alemaniapeqa reyta yanapaj jatun cargoyoj runas kallarqankutaj. Chaykunamanta wakenqa karqanku: generales, guerrapi maqanakunankupaj yuyaychajkuna ima. Chay runasqa reyta wijchʼorqanku, chaymantapachataj rey jina kamachiy chinkaporqa.e Profeta Daniel nillarqataj, wichay ladomanta rey imapichus tukunanta uray ladomanta reywan maqanakojtin. Pay nerqa: “Soldadosnenqa atipasqa kanqanku, paykunamantataj ashkhas wañurachisqa kanqanku”, nispa (Dan. 11:26 tukukuynin). Chaytaj juntʼakorqapuni. Primera Guerra Mundialpeqa, Alemaniaj soldadosnin “atipasqa” karqanku, ashkhastaj “wañurachisqa” karqanku. Chay tiempokama ni mayqen guerrapipis chay chhika runas wañorqankuchu.

11. ¿Imatataj wichaynejmanta reywan uraynejmanta reywan ruwarqanku?

¹¹ Daniel 11:27, 28 versiculosqa, Primera Guerra Mundial qayllata imaschus kananta willawanchej. 27 versiculoqa wichay ladomanta reymanta, uray ladomanta reymantawan nin: “Khuska tiyarikonqanku mikhunankupaj. Chaypitaj llullata purajmanta ninakonqanku”, nispa. Chaytaj juntʼakorqapuni. Gran Bretañawan Alemaniawanqa, purajmanta ninakorqanku allin kausayta munasqankuta. Jinapis 1914 watapi Primera Guerra Mundial qallarejtin, paykunapis maqanakorqanku. Chaytaj rikucherqa imatachus ninakusqankoqa llulla kasqanta. Daniel 11:28 versiculotaj, wichay ladomanta rey ‘ashkha imasta tantananta’ nin. Chaypis juntʼakullarqataj. Kay 1914 wata ñaupajta Alemaniaqa manchayta qhapajyaykorqa. Mundontinpeqa uj nacionlla paymanta aswan qhapaj karqa. Chantá uray ladomanta reywan maqanakamorqa, atipachikorqataj. Ajinamanta Daniel 11:29 nisqan, 30 versiculoj qallariyninpi nisqanpis juntʼakorqa.

ISKAYNIN REYES DIOSPA LLAJTANTA CHEJNIKUNKU

12. Primera Guerra Mundial kashajtin, ¿imatataj iskaynin reyes ruwarqanku?

¹² Kay 1914 watamantapacha, iskaynin reyesqa astawan chejninakorqanku, Diospa llajtantapis chejnikullarqankutaj. Primera Guerra Mundial kashajtin, Alemaniamanta gobiernoqa, guerraman mana riyta munaj cristianosta qhatiykacharqa. Gran Bretañamanta gobiernopis chayllatataj ruwarqa. Estados Unidosmanta gobiernotaj, predicacionta ñaupajman apaj hermanosta carcelman wisqʼaykucherqa. Jinamanta chay gobiernosqa, Apocalipsis 11:7 al 10 versiculospi nisqanta juntʼarqanku.

13. Kay 1933 watamantapacha Segunda Guerra Mundialkama, ¿imatataj wichaynejmanta rey ruwarqa?

¹³ Kay 1933 watamanta Segunda Guerra Mundialkama, wichay ladomanta reyqa, Diospa llajtanta mana khuyarikuspa ñakʼaricherqa. Alemaniapi nazis nisqa partido gobiernopi kashajtin, Hitlerwan runasninwanqa Jehovaj testigosninta niña tantakojta, nitaj predicajta saqerqankuchu. Chantapis 1.500 cristianosta jina wañuracherqanku, aswan ashkhastataj sinchʼita trabajachinankupaj carcelesman aparqanku. Danielqa chaykuna kananta profecianpi willarqaña. Wichay ladomanta reyqa, Diospa llajtanta manaña predicajta saqerqachu. Ajinamantataj ‘Diospa templonta chʼichicharqa’, “Diosman sapa pʼunchay jaywana kajtapis” sayacherqa (Dan. 11:30 tukukuynin, 31). Alemaniata kamachej Hitlerqa, juraspa nerqa Diospa llajtanta chay suyumanta chinkachinanta.

WICHAYNEJMANTA MOSOJ REY

14. Segunda Guerra Mundial pasayta, ¿pitaj wichaynejmanta rey karqa?

¹⁴ Segunda Guerra Mundial pasayta, Unión Sovieticañataj wichaynejmanta chayri norte ladomanta reyman tukorqa. Chay gobiernoqa Alemaniaj atiyninpi karqa chay lugaresta japʼikaporqa. Chantapis nazis jinallataj, Jehovaj testigosninta mayta qhatiykacharqanku. Imaraykuchus hermanosninchejqa, runasta kasunankumantaqa Diosta astawan kasukorqanku.

15. Segunda Guerra Mundial pasasqantawan, ¿imatataj wichay ladomanta rey ruwarqa?

¹⁵ Segunda Guerra Mundial pasasqantawan, wichaynejmanta mosoj reyqa, nisunman Unión Soviética, payman ujchasqa suyus ima, Diospa llajtanta mayta qhatiykacharqanku. Apocalipsis 12:15 al 17 versiculosqa, chay reypa ruwasqanta ‘mayuwan’ kikinchan. Chay profeciaman jinapunitaj, wichay ladomanta reyqa hermanosninchejta manaña predicajta saqerqachu. Chantapis may chhika hermanosta Siberiaman apacherqa. Wichay ladomanta reyqa, tukukuy tiempo qallarisqanmantapacha, Diospa llajtanta qhatiykachashallanpuni. Jinapis willayninchejtaqa manapuni sayachinchu.f

16. ¿Imaynatá Unión Soviética Daniel 11:37-39 nisqanta juntʼarqa?

¹⁶ (Daniel 11:37-39 leey). Danielqa wichay ladomanta kaj reymanta nerqa: “Ñawpa tatasnimpa diosninkuta mana kasuta ruwanqachu”, nispa. ¿Imaynatá chay juntʼakorqa? Unión Sovieticaqa religionesta chinkachiyta munarqa. Chaypajtaj atiyninkuta qhechuyta munarqa. Gobierno soviético nisqaqa, 1918 watapiña uj kamachiyta orqhorqa, escuelaspi, colegiospiwan Diosmanta mana yachachinankupaj. Chantá, ¿imaynatá wichay ladomanta rey “sinchʼi jarkʼachasqa wasispa diosninta” yupaycharqa? Unión Sovieticaqa atiyniyoj kanallanpajpuni, soldadosninta, armasnintawan ashkhayachinanpaj may chhika qolqeta gastarqa. Wichay ladomanta reypis uray ladomanta reypis, may chhika runasta wañuchinankupaj jina armasniyoj karqanku.

ISKAY ENEMIGOS KHUSKA TRABAJANKU

17. ¿Imawantaj ninakun ‘millay lanti’?

¹⁷ Wichay ladomanta reywan uray ladomanta reywanqa, uj imapi khuska llankʼarqanku. Paykunaqa “thuñej millay lantita” churarqanku (Dan. 11:31, La Biblia. Traducción del Nuevo Mundo). Chay ‘millay lanteqa’, Naciones Unidaswan ninakun.

18. ¿Imaraykutaj Naciones Unidasta ‘millay lanti’ nikun?

¹⁸ ¿Imaraykutaj ‘millay lanti’, Naciones Unidaswan ninakun? Imaraykuchus chay organizacionqa, kay jallpʼaman allin kausayta apamuyta atisqanta nin. Jinapis chaytaqa Diospa Gobiernollan ruwayta atin. Chanta, ¿imajtintaj chay millay lanti “thuñej” kasqanta nikun? Imaraykuchus Naciones Unidasqa, llulla religionesta chinkachenqa (“Iskay reyes tukukuy tiempopi maqanakunku” nisqata qhawariy).

PROFECIAJ JUNTʼAKUYNINTA YACHANAPUNI

19, 20. 1) Daniel 11:25-39 versículos, ¿juntʼakusqachu? 2) ¿Imatataj qhepan yachaqanapi yachakusun?

¹⁹ Kaykama rikunchej jina, Daniel 11:25-39 versiculospi nisqanqa, 1870 watamanta 1991 watakama juntʼakorqapuni. Chayrayku Daniel 11:40 al 12:1 versiculospis juntʼakullanqataj.

²⁰ Unión Sovieticaqa 1991 watapi chinkaporqa. Chayrayku, ¿mayqen gobiernotaj kay tiemponchejpi wichay ladomanta reywan ninakun? Qhepan yachaqanapi chayta yachakusun.

1, 2. ¿Imatataj kay yachaqanapi estudiasun?

KUNANQA astawan sutʼita yachanchej, kay mundoj tukukuynin qayllitapiña kashasqanta. Tumpamantawanqa, Jehová Dioswan Jesuswan, Diospa Gobiernonman churanakoj gobiernosta chinkachenqanku. Chay tiempo chayamunankama, wichaynejmanta reywan uraynejmanta reywan maqanakullanqankupuni, Diospa llajtanwanpis japʼinakullanqankupuni.

² Kay yachaqanapeqa, Daniel 11:40 al 12:1 versiculospi profeciata estudiasun. Chaypitaj yachasun, kay tiempopi mayqen gobiernochus wichaynejmanta reywan ninakusqanta. Chayta yachaytaj, jamoj imasta mana manchikunapaj yanapawasun.

WICHAYNEJMANTA MOSOJ REY RIKHURIN

3, 4. Kay tiempopi, ¿pitaj wichaynejmanta rey, imaraykutaj chayta ninchej?

³ Unión Soviética 1991 watapi chinkapojtin, japʼiyninpi karqa chay llajtasqa tʼaqakaporqanku. Autoridadestaj hermanosninchejta Diosta yupaychajta saqellarqankuña. Ajinapi Danielpa kay profecian juntʼakorqa: “Uj pisita yanaparisqas kanqanku” (Dan. 11:34). Chayrayku chay suyusmanta hermanosqa, watejmanta predicayta aterqanku. Pisi tiempollapitaj ashkha runas Diospa llajtanman yaykumorqanku. Chantá Rusia, paywan ujchasqa suyuswan, pisimanta pisi wichaynejmanta reyman tukorqanku. ¿Imaraykú chayta ninchej? 19 yachaqanapi yachakunchej jina, mana tukuy gobiernoschu wichaynejmanta reywan, uraynejmanta reywan ima ninakunku. Chay reyeswan ninakoj gobiernosqa, kay kinsa imasta juntʼananku tiyan: 1) Chay gobiernosqa, maypichus Diospa kamachisninmanta ashkhas tiyakunku, chaypi kamachinanku tiyan. Chayrí Diospa kamachisninta qhatiykachananku tiyan. 2) Chay gobiernosqa Jehová Diosta, llajtantawan chejnikunanku tiyan. 3) Chay gobiernosqa paykunapura maqanakunanku tiyan.

⁴ Rusiawan paywan ujchasqa suyus ima, ¿chay kinsa imasta juntʼashankuchu? Arí. 1) Paykunaqa chay lugarpi tiyakoj hermanosninchejta manaña predicajta saqenkuchu, may chhika hermanosninchejtataj qhatiykachashanku. 2) Chayta ruwaspaqa Jehová Diosta, llajtantawan chejnikusqankuta rikuchishanku. 3) Paykunaqa uray ladomanta reywan, nisunman Gran Bretañawan Estados Unidoswan ima maqanakushanku. Chayrayku ninchej, kay tiempopi Rusiawan paywan ujchasqa suyuswan, wichay ladomanta chayri norte ladomanta rey kasqankuta. Qhepan parrafospi yachakusun, imaraykuchus chayta nisqanchejta.

URAYNEJMANTA REYWAN MAQANAKUSHAN

5. ¿Imamantataj Daniel 11:40 al 43 parlashan?

⁵ Daniel 11:40 al 43 (leey) versiculospi profeciaqa, tukukuy tiempopi imaschus kananmanta parlashan. Chay versiculosqa, wichay ladomanta reywan uray ladomanta reywan maqanakunankumanta astawan parlashan. Profeta Danielpa kay nisqan juntʼakunan karqa: “Maypachachus tukukuy hora chayamonqa chaypachaqa, uray ladomanta kaj rey jatarenqa, wichay ladomanta kaj reypa contrampi sayaykonqa” (Dan. 11:40).

6. ¿Imaynapí yachanchej wichaynejmanta reywan uraynejmanta reywan japʼinakushasqankuta?

⁶ Wichaynejmanta reywan uraynejmanta reywanqa, mundontinpi atiyniyoj kayta munaspa japʼinakushallankupuni. Kaypi piensarina: Segunda Guerra Mundial pasayta, Unión Soviética, payman ujchasqa suyuspiwan, Europamanta ashkha suyusta dominayta qallarerqanku. Chayta rikuspa, uray ladomanta reypis waj suyuswan ujchaykukorqa. Paykunaqa uj tratota ruwarqanku, enemigosninkumanta jarkʼakunankupaj. Chay tratoqa, Organización del Tratado del Atlántico Norte (OTAN) nisqa sutikun. Iskaynin reyestaj astawan ashkha soldadosniyoj, armasniyojtaj kanankupaj, may chhika qolqeta gastashallankupuni. Chantapis Africapi, Asiapi, América Latinapiwan guerrasman chayri chʼajwasman satʼikorqanku. Ajinamanta chay iskay reyesqa, purajmanta maqanakorqanku. Kay qhepa watasllapi, Rusia, paywan ujchasqa suyuspiwan mundontinpi may atiyniyojman tukorqanku. Chantapis uray ladomanta reywan computadorasnejta maqanakushanku. Iskaynin reyestaj Internetnejta imaymana programasta apaykachasqankumanta tumpanakunku. Ninkutaj chay programasnejta qolqenkuta pierdechiyta munasqankuta, gobiernonkutapis urmachiyta munasqankuta.

‘SUMAJ KʼACHITU JALLPʼAMAN YAYKUN’

7. “Sumaj kʼachitu jallpʼa”, ¿imawantaj ninakun?

⁷ Daniel 11:41 nisqanman jina, wichay ladomanta reyqa, ‘sumaj kʼachitu jallpʼaman’ yaykunan karqa. ¿Ima jallpʼamantataj Daniel parlasharqa? Ñaupa tiempopeqa, Israel llajta chay “sumaj kʼachitu jallpʼa” karqa. Runasqa chay llajtamanta nej kanku: “Tukuy jallpʼasmanta aswan sumajpuni”, nispa (Eze. 20:6). Chay llajtaqa sumajpaj qhawasqa karqa, imaraykuchus chaypi Jehová Diosta yupaychaj kanku. Jinapis Pentecostés 33 watamantapacha, chay ‘sumaj kʼachitu jallpʼaqa’ manaña uj lugarchu. ¿Imaraykutaj chayta ninchej? Imaraykuchus Jehová Diospa kamachisnenqa, kay tiempopi jallpʼantinpi kashanku. Chayrayku chay ‘sumaj kʼachitu jallpʼaqa’, Diospa llajtanmanta kajkuna imaynatachus kausakusqankuwan ninakun. Paykunaqa kausayninkupi Jehová Diosta yupaychayta ñaupajman churanku. Chayrayku tantakunku, predicanku ima.

8. ¿Imaynatá wichaynejmanta rey ‘sumaj kʼachitu jallpʼaman’ yaykorqa?

⁸ Tukukuy tiempopi, wichaynejmanta reyqa ashkha kutispi chay ‘sumaj kʼachitu jallpʼaman’ yaykuykun. Imaynatachus Alemania chayta ruwasqanmanta parlarina. Segunda Guerra Mundialpi, chay nación wichaynejmanta rey karqa. Alemaniapi nazis nisqa partido gobiernopi kashajtin, hermanosninchejta qhatiykacharqanku, ashkhastataj wañucherqanku. Ajinamanta wichay ladomanta reyqa, ‘sumaj kʼachitu jallpʼaman’ yaykorqa. Segunda Guerra Mundial pasayta, Unión Sovieticañataj wichaynejmanta rey karqa. Paykunapis hermanosninchejta qhatiykacharqanku, waj llajtamantaj presota jina aparqanku. Ajinamanta chay reyqa ‘sumaj kʼachitu jallpʼaman’ yaykullarqataj.

9. Rusiawan paywan ujchasqa suyuswan, ¿imaynatá ‘sumaj kʼachitu jallpʼaman’ yaykorqanku?

⁹ Kay qhepa wataspi, Rusia paywan ujchasqa suyuswan, wichay ladomanta rey kashanku. Paykunapis ‘sumaj kʼachitu jallpʼaman’ yaykullankutaj. ¿Imaynatá chayta ruwarqanku? Paykunaqa 2017 watapi, Jehovaj testigosninta niña predicajta, nitaj tantakojtapis saqerqankuchu. Wakin hermanostapis carcelman wisqʼaykorqanku. Chantá publicacionesninchejta, Diospa Palabran Biblianchejtawan niña apaykachakunanta kamacherqanku. Chantapis Rusiapi Betel wasita, Jatun Tantakuna Wasista, salonestawan japʼikaporqanku. Chayrayku Diospa Llajtanta Kamachejkunaqa, 2018 watapi willawarqanchej, Rusiawan paywan ujchasqa suyuswan, wichay ladomanta rey kasqankuta. Diospa kamachisnenqa, sinchʼi qhatiykachasqa kajtinkupis, mana mayqen gobiernoj contrantapis oqharikunkuchu, nitaj chay gobiernosta cambiayta maskʼankuchu. Astawanpis Biblia nisqanman jina “tukuy kamachejkunapaj” Diosmanta mañapunku. Chaytataj astawan ruwanku, chay kamachejkuna Diosta yupaychayta jarkʼayta munashajtinku (1 Tim. 2:1, 2).

WICHAYNEJMANTA REY ¿URAYNEJMANTA REYTA ATIPANQACHU?

10. Wichay ladomanta rey, ¿uray ladomanta reyta atipanqachu?

¹⁰ Daniel 11:40 al 45 versiculospi profeciaqa, wichay ladomanta rey imatachus ruwananmanta astawan parlan. Jinapis chayqa mana ninayanchu, wichay ladomanta rey uray ladomanta reyta atipananta. Imaraykuchus Jehová Dioswan Jesuswan tukuy gobiernosta Armagedonpi chinkachishajtinku, uray ladomanta reyqa ‘kausashanqaraj’ (Apo. 19:20). ¿Imaynatá chayta yachanchej? Chaypajqa qhepan parrafospi, Daniel libromanta Apocalipsis libromantawan wakin profeciasta qhawarisun.

11. ¿Imatá Daniel 2:43-45 qhepa kaj gobiernomanta willawanchej? (Kay revistaj tapanpi dibujota qhawariy).

¹¹ (Daniel 2:43-45 leey). Daniel libroqa, tukuy laya metalesmanta runaman rijchʼakoj jatun lantimanta parlan. Chay lantitaj ashkha atiyniyoj gobiernos rikhurisqankuwan ninakun. Chay gobiernosqa, maypichus Diospa kamachisninmanta ashkhas tiyakunku, chaypi gobernarqanku. Chay lantej chakisnenqa, fierrowan tʼuruwan ima chajrusqa karqa. Chaytaj qhepa kaj atiyniyoj gobiernowan ninakun, nisunman Gran Bretañawan Estados Unidoswan ima. Danielpa profecianman jina, Diospa Gobiernon tukuy gobiernosta chinkachishajtin, Gran Bretañawan Estados Unidoswanqa kashanqankuraj.

12. Phiña animalpa qanchis kaj uman, ¿pikunawantaj ninakun, chanta imaynatá chayta yachay yanapawanchej?

¹² Apóstol Juanpis mundontinpi atiyniyoj gobiernosmanta parlallarqataj. Chay gobiernosqa, maypichus Diospa kamachisninmanta ashkhas tiyakunku, chaypi gobernananku karqa. Juanpa profecianpi, chay gobiernosqa qanchis umasniyoj ‘millay phiña animalwan’ ninakunku. Chay animalpa qanchis kaj umanqa, Gran Bretañawan Estados Unidoswan ninakun. Juanqa mana nerqachu, chay phiña animalmanta waj umapiwan llojsinanta. Chayrayku Jesuswan cielopi soldadosninwan, chay phiña animalta chinkachishajtinku, qanchis kaj umaqa gobernashanqaraj (Apo. 13:1, 2; 17:13, 14).b

¿IMATATAJ WICHAYNEJMANTA REY TUMPAMANTAWAN RUWANQA?

13, 14. 1) ¿Pikunawantaj ninakun ‘Magog jallpʼamanta Gog’? 2) ¿Imajtintaj Gog Diospa llajtanta chinkachiyta munanqa?

¹³ Wichay ladomanta reywan uray ladomanta reywanqa chinkachisqa kanqanku. Ezequiel libromanta uj profeciataj, chinkachisqa kananku qayllata imaschus kananta willawanchej. Kay textospi rikhurej profeciasqa, kikin tiempomantasina parlashanku: Ezequiel 38:10-23; Daniel 2:43-45; 11:44–12:1; Apocalipsis 16:13-16, 21 ima. Jina kajtin, ichá qhepan parrafospi nikusqanman jina kanqa.

¹⁴ Manchay ñakʼariy tiempo qallarisqanmanta qhepaman, ‘jallpʼantinmanta gobiernos’ ujchaykukonqanku (Apo. 16:13, 14; 19:19). Bibliapeqa chay ujchasqa nacionesta, ‘Magog jallpʼamanta Gog’ nispa sutichan (Eze. 38:1, 2). Chay nacionesqa Diospa llajtanta chinkachiyta munanqanku. Chaypajtaj uj runa jinalla contrankupi sayaykonqanku. ¿Imajtintaj chayta ruwanqanku? Juanqa chay tiempomanta parlaspa nerqa, cielomanta jatuchaj granizos Diospa enemigosninman urmamunanta. Chay granizosqa ichá juchachana willaykunawan ninakun, mayqentachus chay tiempopi willasun chaywan. Magogmanta Gogqa, ichá chayrayku Diospa llajtanta chinkachiyta munanqa (Apo. 16:21).

15, 16. 1) Daniel 11:44, 45 versículos, ¿imamantataj parlaspa jinallantaj? 2) ¿Imataj kanqa Magogmanta Gogwan, wichay ladomanta reywan ima?

¹⁵ Juchachana willaykunamanta, Diospa enemigosnin llajtanpa contranpi oqharikunankumanta ima parlarqanchejña. Daniel 11:44, 45 (leey) versiculosqa, chayllamantatajsina parlashan. Chaypi profeta Daniel nerqa: “Inti llojsimuynejmanta, wichaynejmantawan willaykuna chayamonqanku. Chayta uyarispa, wichay ladomanta kaj reyqa [...] may phiñasqa llojsenqa, ashkhasta wañurachiyta yuyaspa”, nispa. ‘Ashkhas’ nispa, Diospa llajtanmantasina parlashan.c Jina kajtin, Danielqa ichá parlashan, Armagedón qayllata Diospa enemigosnin llajtanta chinkachinankupaj sayaykunankumanta.

¹⁶ Wichaynejmanta reywan, mundontinmanta gobiernospiwan Diospa llajtanta chinkachinankupaj oqharikojtinku, Tukuy Atiyniyoj Jehová Diosqa mayta phiñakonqa. Chaypachataj Armagedón guerra qallarenqa (Apo. 16:14, 16). Chay guerrapeqa Magogmanta Gogwan ninakoj naciones chinkachisqa kanqanku. Wichay ladomanta reypis, chay nacionesmanta ujnin kasqanrayku chinkachisqallataj kanqa, “manataj pipis payta yanaparej kanqachu” (Dan. 11:45). 

17. 1) Daniel 12:1 versiculopi “kuraj kaj ángel” Miguel nispa, ¿pimantataj parlashan? 2) ¿Imatataj Miguel kay tiempopi ruwashan, chanta imatá qhepaman ruwanqa?

¹⁷ Daniel 12:1 (leey) astawan sutʼita willawanchej, imaynatachus wichay ladomanta rey, payman ujchasqa gobiernos ima chinkachisqa kanankuta. Willallawanchejtaj imaynatachus salvasqa kananchejta. ¿Imastá chay versículo niwanchej? Chaypi Miguelmanta parlan. Miguelqa Reyninchej Jesucristoj ujnin sutin. Payqa 1914 watapi Diospa Gobiernonpi Rey jina churasqa karqa. Chaymantapachataj Diospa llajtanta ‘qhawashan’. Tumpamantawantaj Jesusqa, Armagedón guerrapi Diospa enemigosninta chinkachinanpaj “rikhurimonqa”. Chay guerrapitaj, Danielpa nisqan “llakiy” tiempo tukukonqa. Pay nerqa: “Chay jina llakeyqa manapuni jaykʼajpis karqachu runas kasqankumantapacha”, nispa. Apóstol Juanqa Apocalipsis libropi “manchay ñakʼariymanta” parlarqa. Chaytaj Armagedón ñaupajta qallarenqa, Armagedón guerrawantaj tukukonqa (Apo. 6:2; 7:14).

¿SUTINCHEJ ‘LIBROPICHU’ KASHAN?

18. ¿Imata yachaytaj mayta kallpachawanchej?

¹⁸ Profeta Danielwan apóstol Juanwan willarqanku, Jehová Diostawan Jesustawan sirvejkuna, manchay ñakʼariy tiempomanta kausashaj llojsinankuta. Chayta yachayqa mayta kallpachawanchej. Daniel nerqa: “Libropi sutisninku qhelqasqa kajkunalla salvasqa kanqanku”, nispa (Dan. 12:1). ¿Imatá ruwasunman sutinchej chay libropi qhelqasqa kananpaj? Jesuspi creesqanchejta ruwasqanchejwan rikuchinanchej tiyan. Paymin “Diospa Corderonqa” (Juan 1:29). Chantapis Jehová Diosman kausayninchejta jaywapuspa, bautizakunanchej tiyan (1 Ped. 3:21). Diospa Gobiernon kamachinanta munasqanchejtataj rikuchinanchej tiyan. Chaytataj runasman Jehová Diosmanta yachachispa ruwasunman.

19. ¿Imatá ruwananchej tiyan, chanta imaraykutaj?

¹⁹ Tumpamantawan Diospa Gobiernonqa, wichaynejmanta reyta uraynejmanta reytawan chinkachenqa. Chayrayku tukuy atisqanchejta ruwana Jehová Diospi, llajtanpiwan astawan atienekunapaj. Chantapis Gobiernonta kausayninchejpi ñaupajman churana. Chay imasta ruwasun chayqa, chay iskay reyes chinkachisqa kashajtinku salvakusunchej.

Kay urapi ashkha profecías rikhurin. Chaykunamanta wakenqa, kikin tiempopi juntʼakorqanku. Tukuynin profeciastaj, ‘tukukuy tiempopi’ kausashasqanchejta rikuchiwanchej (Dan. 12:4).

• 

  

  Textos: Apo. 11:7; 12:13, 17; 13:1-8, 12.

  Profecía: ‘Millay phiña animalqa’, may chhika watasta jallpʼapi gobiernan. Tukukuy tiempopitaj qanchis kaj umanta khuchunku. Chantá chay khuchusqanku sanoyapun, “jallpʼantinmanta tukuy runastaj” chay millay animalpa qhepanta rinku. Satanasqa chay phiña animalmanta valekuspa, “warmej mirayninmanta puchojkunawan” maqanakun.

  Juntʼakuynin: Jatun Para pasayta, Jehová Diospa contranta oqharikoj gobiernos rikhurerqanku. 3 mil watasninman jinataj, Primera Guerra Mundialpi Gran Bretañaj atiynin pisiyan. Chantá Estados Unidoswan ujchaykukun, watejmantataj atiyniyojman tukun. Satanasqa tukukuy tiempopi gobiernosnejta Diospa llajtanta qhatiykachashan.

• 

  Textos: Dan. 11:25-45.

  Profecía: Tukukuy tiempopeqa, wichay ladomanta reywan, uray ladomanta reywan maqanakonqanku.

  Juntʼakuynin: Alemaniaqa Gran Bretañawan Estados Unidoswan ima maqanakorqa. 1945 watapi, Unión Soviética paywan ujchasqa suyuspiwan, wichay ladomanta reyman tukorqanku. 1991 watapitaj, Unión Soviética chinkaporqa. Chantá Rusia, paywan ujchasqa suyuspiwan, wichaynejmanta chayri norte ladomanta reyman tukorqanku.

• 

  Textos: Isa. 61:1; Mal. 3:1; Luc. 4:18.

  Profecía: Jehová Diosqa nerqa: “Willarajniyta kachamusaj, ñanta wakichipunawampaj”, nispa. Chaytaj kanan karqa, Mesías niraj Rey jina churasqa kashajtin. Chay willarajqa, “sumaj willaykunata wajchasman” willayta qallarinan karqa.

  Juntʼakuynin: 1870 wata qallariyta, hermano Russell, paywan llankʼajkuna ima, Bibliata allinninmanta estudiarqanku, imatachus yachachisqanta sutʼita yachachinankupaj. 1881 watapi, paykunaqa Diospa kamachisnin predicananku kasqanta repararqanku. Chayrayku kay yachaqanasta orqhorqanku: “Se solicitan 1.000 predicadores”, “Ungidos para predicar”.

• 

  Textos: Mat. 13:24-30, 36-43.

  Profecía: Uj runa jallpʼanpi sumaj trigo mujuta tarpusqa, enemigontaj cizaña qhorata trigoman tarpuykusqa. Trigowan cizaña qhorawanqa, cosechakama khuska wiñasqanku. Cosecha tiempopitaj, cizaña qhorata trigomanta tʼaqakunan karqa.

  Juntʼakuynin: 1870 watamantapacha, pikunachus cheqa cristianos, pikunatajchus llulla cristianos kasqanku sutʼi yachakorqa. Tukukuy tiempopi, cheqa cristianosta llulla cristianosmanta tʼaqakun.

• 

  Textos: Dan. 2:31-33, 41-43.

  Profecía: Jatun lantej chakisnenqa, “khuskan fierromanta, khuskantaj tʼurumanta karqanku”. Chay lanteqa tukuy laya metalesmanta ruwasqa karqa.

  Juntʼakuynin: Tʼuroqa Estados Unidospa kamachiyninpi, Gran Bretañaj kamachiyninpiwan kaj runaswan ninakun, pikunachus chay gobiernosman churanakunku, chaykunawan. Paykunaqa mana saqenkuchu, chay gobiernos ñaupajta jina atiyniyoj kanankuta. Chayrayku niña fierro jina sinchʼi atiyniyojchu kanku.

• 

  

  Textos: Mat. 13:30; 24:14, 45; 28:19, 20.

  Profecía: ‘Trigota pirwaman’ jallchʼakun. Chantá patronqa ‘allin kamachi yuyayniyojta’ churan, ‘kamachisninta’ atiendenanpaj. “Diospa Gobiernonmanta sumaj willaykunapis jallpʼantinpi” willakuyta qallarikun.

  Juntʼakuynin: 1919 watapi, Jesusqa ‘allin kamachi yuyayniyojta’ churarqa Diospa llajtanta atiendenanpaj. Bibliamanta Yachaqajkunataj, ni jaykʼaj jina willayta qallarerqanku. Kunantaj Jehovaj testigosnenqa, 200 kuraj suyuspi predicashanchej. Bibliamanta publicacionestataj, waranqa kuraj parlaykunapi orqhoshanchej.

• 

  Textos: Dan. 12:11; Apo. 13:11, 14, 15.

  Profecía: Iskay wajrasniyoj phiña animalqa, runasman nin qanchis umasniyoj phiña animalpa “lantinta” ruwanankuta. Chantá chay lantiman “kausay samayta” qon.

  Juntʼakuynin: Gran Bretañawan Estados Unidoswan, Sociedad de Naciones nisqa rikhurinanpaj ñaupajpi karqanku. Waj nacionespis chay organizacionman yaykorqanku. Wichay ladomanta reypis, chay organizacionman yaykullarqataj. Jinapis 1926 watamanta 1933 watakamalla chaypi karqa. Chantá Sociedad de Nacionespa cuentanmanta, Naciones Unidas (ONU) nisqa rikhurerqa. Runasqa iskaynin organizacionesmanta ninku, mundontinpi allin kausayta apamuyta atinankuta. Jinapis chaytaqa Diospa Gobiernollan ruwayta atin.

• 

  

  Textos: Dan. 8:23, 24.

  Profecía: Uj machu machu rey, “tʼukunapaj jina tukuy imatapis phirenqa”.

  Juntʼakuynin: Estados Unidoswan Gran Bretañawan may ashkha runasta wañuracherqanku, ashkha imastataj phirerqanku. Estados Unidospa ruwasqanmanta parlarina. Segunda Guerra Mundial kashajtin, iskay bombasta waj nacionman kachaykorqa, chay nación Gran Bretañajta, paypajtawan enemigonku kasqanrayku. Chay bombasqa tukuy imata thuñerqa, may chhika runastataj wañuracherqa.

• 

  Textos: Dan. 11:31; Apo. 17:3, 7-11.

  Profecía: Chunka wajrasniyoj “puka millay phiña” animalqa, chinkay ukhumanta llojsimun, pusaj kaj reytaj. Daniel libropeqa, chay animalta ‘thuñej millay lanti’ nikun.

  Juntʼakuynin: Segunda Guerra Mundial kashajtin, Sociedad de Naciones chinkaporqa. Chay guerra pasaytataj, Naciones Unidasta ‘churarqanku’. Runasqa chay iskaynin organizacionesmanta ninku, mundontinpi allin kausayta apamuyta atisqankuta. Jinapis chaytaqa Diospa Gobiernollan ruwayta atin. Naciones Unidasqa religionesta chinkachenqa.

• 

  

  Textos: 1 Tes. 5:3; Apo. 17:16.

  Profecía: Nacionesqa nenqanku: “Tukuy imapis allillan, ni imamanta llakikuna kanchu”, nispa. Chantá “chunka wajras, jinallataj chay millay phiña animalpis”, “khuchi warmita” chejnispa chinkachenqanku. Chaymantataj nacionespis chinkachisqallataj kanqanku.

  Juntʼakuynin: Nacionesqa nenqanku: “Kunanmantapacha ni imamanta manchachikuspa allinta kausakusun”, nispa. Chantá Naciones Unidaspi satʼisqa naciones, tukuynin llulla religionesta chinkachenqanku. Ajinamanta manchay ñakʼariy tiempo qallarenqa. Chaytaj tukukonqa, Jesús Satanaspa mundonmanta puchojkunata Armagedonpi chinkachejtin.

• 

  Textos: Eze. 38:11, 14-17; Mat. 24:31.

  Profecía: Gogqa Diospa llajtanpa contranpi sayaykonqa. Chantá angelesqa, Diospa ‘ajllasqasninta’ tantaykonqanku.

  Juntʼakuynin: Wichay ladomanta rey, tukuy gobiernoswan khuska, Diospa llajtanta chinkachinankupaj sayaykonqanku. Chay qhepatataj, kay jallpʼallapiraj kaj ajllasqa cristianosqa cieloman apasqa kanqanku.

• 

  Textos: Eze. 38:18-23; Dan. 2:34, 35, 44, 45; Apo. 6:2; 16:14, 16; 17:14; 19:20.

  Profecía: ‘Yuraj caballopi lloqʼasqa kajqa’, Gogta soldadosnintawan chinkachispa ‘atipanqa’. “Millay phiña animaltaj”, “azufrewan laurashaj nina qochaman” wijchʼuykusqa kanqa. Uj rumitaj jatun lantita tʼunarparenqa.

  Juntʼakuynin: Diospa Gobiernonmanta Rey Jesusqa, Diospa llajtanta salvanqa. Payqa 144 mil ajllasqaswan, cielopi soldadosninwan ima, tukuy nacionesta chinkachenqa, nisunman Satanaspa mundonmanta tukuy gobiernosta.