58 yachachiy
David Goliatwan tinkun
FILISTEOSQA watiqmanta Israelwan maqanakuq jamurqanku. Davidpa kimsa wawqisnin Saulpa soldadosnin kanku. Juk pʼunchay Isaí tatanqa Davidta kamachin: ‘Kay jankʼata, kay tʼantastawan wawqisniykiman apay. Imaynachus kasqankuta watukamuy’, nispa.
David maqanakuchkanku chayman chayaspa, wawqisninta maskʼan. May jatun filisteo Goliatqa, israelitasta 40 tuta pʼunchaytaña asipayachkarqa. Qhaparin: ‘Qamkuna ukhumanta ñuqawan maqanakunanpaq jukta akllakuychik. Sichus ñuqawan maqanakuspa atipawanqa chayqa, ñuqayku kamachisniykichik kasqayku. Ñuqachus payta atipasaq chayri, qamkuna ñuqaykup kamachisniyku kankichik. Kachamuwaychik juk runata ñuqawan maqanakunanpaq’, nispa.
Davidqa soldadosta tapun: ‘¿Imatataq chay filisteota wañuchiqman qunqanku, amaña Israelta kʼumuykachachinanpaq?’, nispa.
‘Saúl may achkha qullqita qunqa. Ususintapis warmin kananpaq qullanqataq’, nispa juk soldado kutichin.
Goliat may jatun runa kasqanrayku tukuy israelitakuna manchachikunku. Payqa 3 metruyuq, escudontapis wak apaykachapun.
Wakin soldadosqa Saulman, David Goliatwan maqanakuyta munasqanta willarqanku. Saultaq Davidta nirqa: ‘Mana atinkichu. Wawallaraq kanki, chay filisteotaq waynamantapacha maqanakuyta yachan’, nispa. Davidtaq kutichirqa: ‘Ñuqa tataypa ovejitasninta apakapuptinku juk osota, juk leontawan wañuchirqani. Kunanqa kay filisteota kikillantataq ruwasaq. Jehová yanapawanqa’, nispa. Chayrayku Saúl nirqa: ‘Riy, Jehovataq qamwan kachun’, nispa.
David juk wayqʼumanta, phichqa rumista akllarqa. Chaymanta warakʼanwan filisteowan maqanakuq wicharirqa. Goliatqa Davidta rikuspa pisipaq qhawarqa. Usqhayta wañuchinanta yuyarqa.
‘Jamuy kayman, chay aychaykita ankakunaman, animalesman qarasaq’, nispa Goliat waqyarqa. Davidtaq kutichirqa: ‘Qamqa espadawan jamuchkawanki, jinallataq tʼuqsina lanzawan, jabalina tʼuqsinawan ima, ñuqataqrí Jehová Diospa sutinpi jamuchkayki. Kunanpacha Jehovaqa qamta makisniyman churasunqa, ñuqataq wañuchisqayki’, nispa.
Davidqa Goliatman correspa chimpaykun. Wayaqamanta rumita urqhuytawan warakʼanman churaspataq, tukuy kallpanwan Goliatman warakʼaykun. ¡Rumiqa Goliatpa umanman satʼikun, paytaq wañusqa chuqakun! Filisteosqa Goliatta pampapi rikuspa ayqinku. Israelitastaq filisteosta qhatispa tukuyninta wañuchirqanku.