59 yachachiy
Imaraykutaq David ayqin
DAVID Goliatta wañuchisqantawan, Abner kuraq kaq soldado Davidta Saulman apan. Saultaq Davidta soldadosninta kamachinanpaq churan, wasinmantaq tiyakunanpaq pusaykun.
Warmikuna israelitas filisteoswan maqanakusqankumanta kutimuptinku, takirqanku: ‘Saulqa waranqasta wañuchin, Davidtaq chunka waranqasta wañuchin’, nispa. Saulqa Davidta astawan jatunchasqankumanta phiñakurqa. Saulpa churin Jonatanqa Davidta munakun, mana tatanjinachu. Davidpis payta munakullantaq. Chayrayku, mana jaykʼaq phiñanakunankupaq saqinakunankupaq parlarqanku.
Davidqa sumaqta arpata waqarichispa Saulpa sunqunta mayta kusichin. Chaywanpis, Saulpa saqra qhawanakuynin saqra ruwayman tanqan. David arpata waqarichichkaptin, Saúl juk lanzawan Davidman chuqaykuspa nin: ‘¡Davidta pirqaman kaywan satʼisaq!’, nispa. Davidtaq ayqin. Astawan qhipaman, Saúl Davidta watiqmanta lanzawan chuqaspa mana japʼichinchu. Davidqa Saulmanta jarkʼakunanta yacharqa.
¿Yuyarinkichu imatachus Saúl Davidman nirqa? Payqa, pichus Goliatta wañuchiq chayman ususiyta warmin kananpaq qusaq nirqa. Kunantaq Saúl Davidta nin, ususiy warmiyki kananpaq 100 filisteosta wañuchinayki tiyan, nispa. Mana chayqa allinchu ¿ichari? ¡Saulqa filisteos Davidta wañuchinanta munarqa! Davidtaq mana wañunchu, chayrayku Saulqa Davidman ususinta warmin kananpaq qurqa.
Juk pʼunchay, Saúl Jonatanta tukuy kamachisninta ima, Davidta wañuchinankuta kamachirqa. Jonatantaq nirqa: ‘Ama ima saqratapis Davidta ruwaychu. Pay mana ima saqratapis qamta ruwasunkichu. Astawanpis, payqa yanapasunki. Mana wañuytapis manchachikunchu Goliatta wañuchichkaspa. Qam chayta rikuspataq mayta kusikurqanki’, nispa.
Saúl churinta uyarispa, Davidta mana imatapis ruwananpaq parlarqa. Chayrayku, Davidqa Saulpa wasinman kutimun, chaypitaq qallariypijina Saulpaq llamkʼan. Chaywanpis, juk pʼunchay David arpata waqachichkaptin, Saulqa lanzawan chuqaykullantaq, manataq japʼichinchu. ¡Kaywanqa kimsa kutiña! ¡Kunanqa David ayqinanta yachan!
Chay chʼisiqa David wasinman rin, Saultaq wañuchinankupaq runasta kachan. Micalqa Saúl Davidta wañuchiyta munasqanta yachaspa, Davidta nin: ‘Manachus kunan chʼisi ayqinki chayqa, qʼayapaq wañusqa rikhurinki’, nispa. Chay chʼisi Micalqa ventananta ayqinanpaq Davidta yanapan. Davidqa 7 watata Saulmanta pakakuspa kayman jaqayman purin.