Bibliaqa ashkhata Diospa Reinonmanta parlan. Jehová Diosqa chay Reinonejta imastachus ñaupajmantaña runaspaj munarqa chayta juntʼanqa. Kay leccionpi, qhepan iskay leccionespipis kay tapuykunaman kutichisun: ¿Imataj Diospa Reinon? ¿Imaynapí yachanchej kamachishasqantaña? ¿Imatataj kunankama ruwanña? ¿Imatataj aswan qhepaman ruwanqa?

1. ¿Imataj Diospa Reinon, chanta pitaj chay Reinopi Rey kanqa?

Diospa Reinonqa uj Gobierno, chay Gobiernotaqa kikin Jehovallataj sayaricherqa. Chay Gobiernopeqa Jesucristo Rey kanqa, cielomantapachataj kamachimonqa (Mateo 4:17; Juan 18:36). Paymanta parlaspa Biblia nin: “Wiñaypaj rey jina kamachenqa”, nispa (Lucas 1:32, 33). Jesusqa Diospa Gobiernonmanta Rey kasqanrayku kay jallpʼapi tukuy runasta kamachenqa.

2. ¿Pikunataj Jesuswan khuska kamachimonqanku?

Jesusqa mana sapallanchu kamachimonqa, manaqa 144.000 runaswan khuska. Chay runasqa kanku “tukuy ayllusmanta, tukuy parlaykunamanta, tukuy laya runasmanta, tukuy nacionesmantawan” (Apocalipsis 5:9, 10). Jesús kay jallpʼapi kashajtin, ashkha runas Jesusmanta yachakorqanku, cristianosmantaj tukorqanku. Jinapis 144.000 runaslla cieloman ripunku Jesuswan khuska kamachimunankupaj (Apocalipsis 14:1-4 leey). Chantá tukuy cristianos kay jallpʼapi kausakonqanku Diospa Gobiernonpa kamachiyninpi (Salmo 37:29).

3. ¿Imaraykutaj Diospa Gobiernollan aswan sumaj?

Wakin gobiernosqa allin kajta ruwayta munaspapis, mana chayta ruwayta atillankuchu. Chantapis paykunaj cuentankumanta waj gobierno yaykojtenqa niña runasmanta llakikunchu. Diospa Gobiernonwantajrí mana jinachu. Chay Gobiernoj cuentanmantaqa, mana waj gobierno yaykonqachu. Diospa Gobiernonqa “ni jaykʼaj chinkachisqachu kanqa” (Daniel 2:44). Jesús kay jallpʼata kamachimushaspaqa, mana wakillanmanchu sayasqa kanqa, manaqa tukuy runasta yanapanqa pay jina kʼachas, munakuyniyoj kanankupaj, cheqan kajtataj ruwanankupaj (Isaías 11:9 leey).

4. Diospa Gobiernon jallpʼantinta kamachimonqa

Waj gobiernosmanta nisqa, Jesucristolla kamachinanpaj sumaj wakichisqa, aswan atiyniyojtaj. Mateo 28:18 leeriychej, chantá yachakojta tapuriy:

• ¿Imaraykutaj Jesuslla sumaj kamachej kanqa?

Kay jallpʼamanta gobiernosqa uj suyullata kamachinku, kamachiyninkutaj mana wiñaypajchu. Diospa Gobiernonwantajrí mana jinachu kanqa. Daniel 7:14 leeriychej, chantá yachakojta tapuriy:

• ¿Imaraykutaj Diospa Gobiernon “mana chinkachisqachu” kanan may allin?

• ¿Imaraykutaj Diospa Gobiernon jallpʼantinta kamachinan may allin?

5. Gobiernospa kamachiyninku tukukonqa

Tukuy gobiernospa cuentankumantaqa, Diospa Gobiernollanña kamachenqa. VIDEOTA qhawariychej, chantá yachakojta tapuriy.

VIDEO: ¿Imastataj Diospa Gobiernon ruwanqa? (uj chhikan) (1:41)

• ¿Imaynataj kay tiempomanta gobiernospa kamachiyninku?

Eclesiastés 8:9 leeriychej, chantá yachakojta tapuriy:

• ¿Kay tiempopi gobiernospa cuentankumanta Diospa Gobiernon kamachinan allinchu kanman? ¿Imaraykú chayta ninki?

6. Diospa Gobiernonpi kamachejkunaqa entiendewanchej

Reyninchej Jesusqa kay jallpʼapi tiyakorqa. Payqa “pantaj runas kasqanchejta yachan, chayrayku khuyakuwanchej” (Hebreos 4:15). Jehová Diosqa 144.000 qharista, warmista ajllarqa Jesuswan khuska kamachimunankupaj. Paykunaqa kanku “tukuy ayllusmanta, tukuy parlaykunamanta, tukuy laya runasmanta, tukuy nacionesmantawan” (Apocalipsis 5:9). Tukuy imapitaj Diosta kasukunku.

• ¿Jesuswan 144.000 ajllasqaswan entiendewajchu kasqanchej? ¿Imaraykú chayta ninki?

7. Diospa Gobiernonpa leyesnenqa runaspa allinninkupaj

Kay tiempomanta gobiernosqa leyesta orqhonku runasta yanapanankupaj, wakin imasmanta jarkʼanankupaj ima. Diospa Gobiernonpis leyesta orqhollantaj kamachiyninpi kajkuna juntʼanankupaj. 1 Corintios 6:9-11 leeriychej, chantá yachakojta tapuriy:

• ¿Imaynataj kausay kanman tukuyninchej Diospa leyesninta kasukojtinchej?a

• ¿Jehová munanchu Gobiernonpi kajkuna kamachiykunasninta juntʼanankuta? ¿Imajtintaj chayta nisunman?

• ¿Diosta mana kasukojkunapis cambiayta atinkumanchu, ima niwajtaj? (11 versiculota qhawariy).

¿IMASTÁ YACHAKUNCHEJ?

Kaypi yachakunchej Diospa Gobiernonqa cielopi kashasqanta, tukuy jallpʼantintataj kamachimunanta.

Yuyarikunapaj

• ¿Pikunataj Diospa Gobiernonpi kamachimonqanku?

• ¿Imaraykutaj Diospa Gobiernollan aswan sumaj?

• Diospa Gobiernonpa kamachiyninpi kajkuna, ¿imata ruwanankutataj Jehová munan?

ASTAWAN YACHAKUNAYKIPAJ

¿Maypitaj Diospa Gobiernon kashan? Chayta yachanaykipaj kayta leeriy.

“¿Diospa Gobiernon sonqonchejpichu kashan?” (Chaytaqa Internetpi jw.org nisqapi tarinki)

¿Imaraykutaj Jehovaj testigosnin Diospa Gobiernontapuni kasukunku? Chayta yachanaykipaj kay videota qhawariy.

Diospa Gobiernollanta apoyanchej (1:43)

Jesuswan khuska 144.000 runas kamachimonqanku. Paykunamanta astawan yachanaykipaj kayta leeriy.

“¿Pikunataj cieloman renqanku?” (Chaytaqa Internetpi jw.org nisqapi tarinki)

Uj presochasqa warmita Jehová Dios justiciata ruwananta yachay yanaparqa. Paymanta astawan yachanaykipaj kayta leeriy.

“Maykʼajchus justicia kananta yachakorqani” (¡Despertad!, noviembre de 2011)

Diospa Gobiernonqa 1914 watapi cielopi kamachiyta qallarerqa. Chay watallapitaj kay mundomanta gobiernospaj qhepa pʼunchaykuna qallarerqa. ¿Imatataj Biblia chaymanta nin? ¿Imaynataj kausay chay watamantapacha karqa? ¿Imaynataj runaspis karqanku? Chayta kaypi yachakusun.

1. ¿Imatataj Biblia nerqa Diospa Gobiernonmanta?

Daniel libropi willawanchej Diospa Gobiernonqa, “qanchis tiempos” pasasqanmantaraj kamachinanta (Daniel 4:16, 17). Aswan qhepatataj Jesusqa chay tiempomanta parlaspa nerqa “nacionespa señalasqa tiemponku” kasqanta. Chantapis nillarqataj chay tiempoqa manaraj tukukusqanta (Lucas 21:24). Kaypitaj yachakusun chay qanchis tiemposqa 1914 watapi tukukusqanta.

2. ¿Imaynataj kausay 1914 watamantapacha?

Jesusta discipulosnin taporqanku: “¿Ima señaltaj kanqa kutimunayki tiempomanta, kay mundoj imasninpa tukukuyninmantawanri?”, nispa (Mateo 24:3). Jesustaj nerqa cielopi kamachiyta qallarisqantawan imaschus pasananta. Payqa nerqa: guerras, yarqhay, terremotos ima kananta (Mateo 24:7 leey). Chantapis Bibliapi nerqa ‘qhepa pʼunchaykunapi kausay mayta sajrayananta’ (2 Timoteo 3:1-5). Jesuspa nisqanqa 1914 watamantapacha juntʼakushan, chay watamantapacha runaspis astawan sajrayashanku.

3. Jesús Rey kasqantawan, ¿imaraykutaj kausay mana allinman tukorqa?

Jesús Diospa Gobiernonpi Rey jina kamachiyta qallarisqantawan, cielopi uj maqanakuy karqa. Chaypitaj Jesusqa Satanaswan demonioswan maqanakorqa. Biblia nin jinataj Satanás chay maqanakupi atipachikorqa, ‘jallpʼamantaj wijchʼuchikamorqa, angelesninpis paywan khuska wijchʼuchikamorqanku’ (Apocalipsis 12:9, 10, 12). Satanasqa yachan pisimantawan chinkachisqa kananta. Chayrayku may phiñasqa kashan, runastataj kay jallpʼapi llakichishan, sufrichishan ima. Chayrayku kausayqa mana allinchu kashan, jinapis Diospa Gobiernonqa tukuy chay llakiykunata tukuchenqa.

ASTAWAN YACHAKUNA

4. Bibliaj nisqan 1914 watapi juntʼakun

VIDEO: Diospa Gobiernonqa 1914 watamantaña kamachishan (5:02)

Diosqa ñaupa Babiloniamanta rey Nabucodonosorman uj mosqoypi rikucherqa imachus aswan qhepaman kananta. Chay mosqoyninta, imachus niyta munasqantapis Biblia willawanchej. Chay mosqoyninpeqa rikorqa imachus gobiernonwan kananta, imachus Diospa Gobiernonwan kananta ima (Daniel 4:17 leeriychej).a

Daniel 4:20-26 leeriychej, chantá dibujosta qhawarispa kay tapuykunaman kutichiychej:

• A) ¿Imatataj Nabucodonosor mosqoyninpi rikusqa? (20, 21 versiculosta qhawariy).

• B) ¿Imatataj sachʼawan ruwananku karqa? (23 versiculota qhawariy).

• C) “Qanchis tiempos” juntʼakojtin, ¿imataj kanan karqa? (26 versiculota qhawariy).

Nabucodonosor mosqoypi rikusqan sachʼa, Diospa Gobiernon ima

PROFECÍA (Daniel 4:20-36)

Kamachin

A) Uj jatun sachʼa

Manaña kamachinchu

B) “Kʼutuychej chay sachʼata”, “qanchis tiempos pasanankama”

Watejmanta kamachin

C) “Watejmanta kamachinki”

Ñaupaj kutipi juntʼakusqan

• D) ¿Piwantaj sachʼa ninakun? (22 versiculota qhawariy).

• E) ¿Maykʼajtaj kamachiyta saqen? (Daniel 4:29-33 leeriychej).

• F) ¿Imataj karqa “qanchis tiempos” juntʼakojtin? (Daniel 4:34-36 leeriychej).

ÑAUPAJ KUTIPI JUNTʼAKUSQAN

Kamachin

D) Babiloniamanta rey Nabucodonosor

Manaña kamachinchu

E) Nabucodonosor 606 wata pasayta J.n.j.b locoyapun. Qanchis watastataj mana kamachinchu

Watejmanta kamachin

F) Nabucodonosor yuyayninman churakun, watejmantataj kamachin

Iskay kaj juntʼakuynin

• G) ¿Pikunawantaj sachʼa ninakun? (1 Crónicas 29:23 leeriychej).

• H) ¿Maykʼajtaj kamachiyta saqeporqanku? ¿Imaynapí yachanchej Jesús kay jallpʼapi kashajtin Diospa churasqan reyes mana kamachishasqankuta? (Lucas 21:24 leeriychej).

• I) ¿Maypitaj chanta maykʼajtaj chay gobierno watejmanta sayarichisqa karqa?

ISKAY KAJ JUNTʼAKUYNIN

Kamachin

G) Israelitas ukhumanta reyes Diospa sutinpi kamachej kanku

Manaña kamachinchu

H) 607 watapi J.n.j. Jerusalén thuñisqa karqa. Ajinapi manaña israelita reyes karqankuchu 2.520 watasta

Watejmanta kamachin

I) Jesusqa 1914 watapi Rey jina Diospa Gobiernonpi kamachiyta qallarerqa

5. Kausayqa 1914 watamantapacha uj jinaman tukun

VIDEOTA qhawariychej.

VIDEO: 1914 watamantapacha kay mundoqa uj jinaman tukun (1:10)

Jesusqa nerqa kamachiyta qallarejtin imaynachus kausay kananta. Lucas 21:9-11 leeriychej, chantá yachakojta tapuriy:

• Kaypi nisqanmanta, ¿mayqenkunatataj juntʼakojta rikorqanki chayri uyarerqanki?

Apóstol Pabloqa kay mundomanta gobiernospa kamachiynin tukukushajtin, imaynachus runas kanankuta nerqa. 2 Timoteo 3:1-5 leeriychej, chantá yachakojta tapuriy:

• ¿Kay versiculospi nisqanman jinachu kay tiempo runas kanku?

6. Diospa Gobiernon kamachishasqanpi creesqaykita rikuchiy

Mateo 24:3, 14 leeriychej, chantá yachakojta tapuriy:

• ¿Ima señaltaj rikuchiwanchej Diospa Gobiernon kamachishasqantaña?

• ¿Imatataj ruwawaj kay profecía juntʼakusqanpi qanpis yanapakunaykipaj?

Diospa Gobiernonqa cielopi kamachishanña. Pisimantawantaj kay jallpʼata kamachimonqa. Hebreos 10:24, 25 leeriychej, chantá yachakojta tapuriy:

• ¿Imatataj ruwananchej tiyan “Diospa pʼunchaynin qayllaykamushasqanta reparaspa”?

¿IMASTÁ YACHAKUNCHEJ?

Kaypi yachakunchej Diospa Gobiernon kamachishasqantaña. Chayrayku Diospa Gobiernonmanta willamunchej, tantakuykunamanpis rinchej.

Yuyarikunapaj

• Qanchis tiempos juntʼakusqantawan, ¿imataj cielopi pasarqa?

• ¿Imaraykutaj ninchej Diospa Gobiernon 1914 watapi kamachiyta qallarisqanta?

• ¿Imastataj ruwawaj Diospa Gobiernon kamachishasqantaña yachasqaykirayku?

ASTAWAN YACHAKUNAYKIPAJ

1914 watamantapacha kausay cambiarqa. Chaymanta astawan yachanaykipaj kayta leeriy.

“¿Maykʼajmantapachataj runas pierdekapunku?” (¡Despertad!, abril de 2007)

¿Imaynatá Mateo 24:14 nisqan uj runata yanaparqa? Chayta yachanaykipaj kayta leeriy.

“Béisbol mayta gustawaj” (Torremanta Qhawaj, 3 kaj 2017)

¿Imaynapí yachanchej Daniel 4 capitulopi nisqan juntʼakushasqanta? Chayta yachanaykipaj kayta leeriy.

“¿Maykʼajmantapacha Diospa Reinon kamachiyta qallarerqa? (Ñaupaj kaj)” (Torremanta Qhawaj, 1 de octubre de 2014)

¿Imaynapí yachanchej “qanchis tiempos” 1914 watapi tukukusqanta? Chayta yachanaykipaj kayta leeriy.

“¿Maykʼajmantapacha Diospa Reinon kamachiyta qallarerqa? (Iskay kaj)” (Torremanta Qhawaj, 1 de noviembre de 2014)

Diospa Gobiernonqa kamachishanña. Pisimantawantaj allin imasta kay jallpʼapi ruwanqa. Kaypi yachakusun allin imasta Diospa Gobiernon ruwananta, imajtinchus chayta yachay kusichiwasqanchejtapis.

1. ¿Imatá Diospa Gobiernon ruwanqa allin kausay, justicia ima kananpaj?

Jesusqa Diospa Gobiernonmanta Rey jina Armagedón maqanakupi chinkachenqa sajra runasta, gobiernostapis (Apocalipsis 16:14, 16). Chaypachaqa Bibliaj nisqan juntʼakonqa. Biblia nin: “Uj chhikamantawanqa niña sajra runas kanqankuñachu”, nispa (Salmo 37:10). Diospa Gobiernon kamachimonqa chaypachaqa jallpʼantinpi allin kausay kanqa, justicia ima (Isaías 11:4 leey).

2. ¿Diospa munaynin kay jallpʼapi ruwakojtin imaynataj kausay kanqa?

Diospa Gobiernon kamachimushajtin kausayqa may sumaj kanqa. “Cheqan runasqa kay jallpʼata herenciata jina japʼenqanku, kay jallpʼapitaj wiñaypaj kausakonqanku” (Salmo 37:29). Chaypachaqa runas kʼachas kanqanku, Jehovata munakonqanku, purajmantataj munanakonqanku. Chantapis ni pi onqonqachu, niñataj wañonqachu.

3. ¿Diospa Gobiernon imatataj ruwanqa sajra runasta chinkachiytawan?

Jesusqa sajra runasta chinkachiytawan waranqa watasta kamachenqa. Paywan khuskataj 144.000 runas kamachimonqanku. Tukuyninkutaj runasta yanapanqanku pisimanta pisi mana juchayojman tukunankupaj. Chay waranqa wataspi jallpʼanchejqa uj kʼachitu paraisoman tukonqa. Runaspis Jehovaj leyesninta kasukusqankurayku kusisqas kausakonqanku. Chay qhepatataj Jesusqa Tatan Jehovaman Gobiernota jaywaponqa. Chaypacha ‘Diospa sutenqa ni jaykʼaj jina jatunchasqa kanqa’ (Mateo 6:9, 10). Chantapis sutʼi yachakonqa Jehová sumaj kamachej kasqan, kamachiyninpi kajkunamanta llakikusqan ima. Jehovaqa chinkachenqa Satanasta, demoniosta, kamachiyninpa contranpi oqharikojkunatapis (Apocalipsis 20:7-10). Diospa Gobiernonpa ruwasqanqa wiñaypaj kanqa.

ASTAWAN YACHAKUNA

4. Diospa Gobiernonqa gobiernosta chinkachenqa

“Runaqa tukuy tiempo runa masinta chakisnin uraman churan, chaytaj runallata ñakʼarichin” (Eclesiastés 8:9). Chayrayku Jehová Diosqa Gobiernonnejta tukuy imata allinchanqa.

Daniel 2:44; 2 Tesalonicenses 1:6-8 leeriychej, chantá yachakojta tapuriy:

• ¿Imatataj Jehovawan Jesuswan ruwanqanku kay jallpʼamanta gobiernoswan, chay gobiernos ladomanta kajkunawan ima?

• Jehovamanta, Jesusmanta yachakusqaykiman jina, ¿creenkichu paykuna ni mayqenman kutikuspa cheqan kajtapuni ruwanankuta?

5. Jesusqa uj sumaj Rey

Jesusqa Diospa Gobiernonpi Rey kaspa, kay jallpʼapi tukuy runaspaj allin imasta ruwanqa. Jesusqa runasta yanapayta munan, yanapananpajtaj atiyniyoj. VIDEOTA qhawariychej.

VIDEO: Jesusqa gobernamushaspa ashkha allin imasta ruwanqa (1:13)

Jesús kay jallpʼapi kashaspa imastachus ruwasqanqa, Diospa Gobiernonpi kashaspa imatachus ruwananta rikuchin. ¿Jesuspa ima ruwasqasnintaj juntʼakunanta munawaj? Chaypaj qhepan cuadromanta tukuynin versiculosta leeriychej.

6. Diospa Gobiernon kamachimushajtin allin kausay kanqa

VIDEO: Ima bendicionestachus qhepaman japʼinanchejpi yuyana (4:38)

Salmo 145:16 leeriychej, chantá yachakojta tapuriy:

• Jehová Diosninchej tukuy runasman ‘munasqankuta qonanta’ yachay, ¿kusichiwanchejchu, ima niwajtaj?

¿IMASTÁ YACHAKUNCHEJ?

Kaypi yachakunchej Diospa Gobiernon jallpʼata uj paraisoman tukuchinanta, chaypitaj Jehovata yupaychajkunalla wiñaypaj kausakunankuta.

Yuyarikunapaj

• ¿Imatá Diospa Gobiernon ruwanqa Diospa sutinta jatunchananpaj?

• ¿Imaraykú mana iskayrayanchejchu Diospa Gobiernon Bibliaj nisqasninta juntʼananmanta?

• ¿Diospa Gobiernon imastataj ruwanqa? ¿Mayqentaj juntʼakunallantaña munawaj?

ASTAWAN YACHAKUNAYKIPAJ

¿Imataj Armagedón kanman? Chayta yachanaykipaj kayta leeriy.

“¿Imataj Armagedón?” (Chaytaqa Internetpi jw.org nisqapi tarinki)

¿Imastaj kanqa Jesús “manchay ñakʼariy” kananmanta parlarqa chay tiempopi? (Mateo 24:21). Chayta yachanaykipaj kayta leeriy.

“¿Imataj manchay ñakʼariy tiempo?” (Chaytaqa Internetpi jw.org nisqapi tarinki)

Familia jina Diospa Gobiernon imastachus ruwananpi piensarinaykipaj kay videota qhawariy.

Paraisopi piensariy (1:50)

Uj politicota imachus yanapasqanta yachanaykipaj, “Ashkha tapuykuna kapuwarqa” nisqata leeriy.

“Bibliaqa cambianankupaj yanaparqa” (La Atalaya, 1 de enero de 2012)