Guerraspis chʼajwaspis niña kanqachu

DIOS TUKUY GOBIERNOSTA CHINKACHENQA

Diosqa Armagedóna guerrapi tukuy gobiernosta chinkachenqa (Apocalipsis 16:16). Biblia nin chay guerraqa “Tukuy Atiyniyoj Diospa jatun pʼunchayninpi” kananta. Chay guerrapi ‘jallpʼantinmanta reyes’, nisunman gobernantes tantakonqanku, Diospa contrantataj oqharikonqanku, jinapis atipachikonqanku (Apocalipsis 16:14). Ajinapi Diosqa Armagedonpi tukuy guerrasta chinkachenqa.

Diosqa Gobiernonta churanqa chay waj gobiernospa cuentanmanta. Gobiernonqa cielomantapacha kamachimonqa, nitaj jaykʼajpis chinkachisqachu kanqa (Daniel 2:44). Diosqa Wawan Jesucristota ajllan chay Gobiernopi kamachinanpaj (Isaías 9:6, 7; Mateo 28:18). Jesusqa chay Gobiernomantab parlarqa discipulosninman orakuyta yachachishaspa (Mateo 6:9, 10). Tukuy runasqa uj gobiernoyojllaña kanqanku, chay Gobiernopitaj Jesús kamachenqa.

Jesusqa kamachishaspa mana allinnillantachu maskʼanqa kay jallpʼamanta gobiernos jinaqa. Payqa cheqan kajtapuni ruwanqa, tukuyta uj rejllata qhawanqa, nitaj pitapis ñakʼarichenqachu culturanrayku chayri rijchʼayninraykoqa (Isaías 11:3, 4). Runasqa derechosninkuta valechinankupaj manaña chʼajwasta ruwanqankuchu, imaraykuchus Jesusqa tukuyta yanapanqa. “Pay pobresta salvanqa yanapata mañakuspa qhaparikojtinku. Salvallanqataj wajchasta, mana piniyojkunatapis. [...] Paykunataqa ñakʼarichej runasmanta, sajra runasmantawan salvanqa” (Salmo 72:12-14).

Diospa churasqan Gobiernoqa runasta wañuchinankupaj oqharinku chay tukuynin armasta chinkachenqa (Miqueas 4:3). Chantapis chinkachillanqataj maqanakuyllatapuni munanku chay runasta, jinallataj wajkunata ñakʼarichejkunatapis (Salmo 37:9, 10). Tukuy qharis, warmis, wawaspis maypi kaspapis niña ni imata manchachikonqankuchu (Ezequiel 34:28).

Diospa churasqan Gobierno kamachishajtenqa tukuy imapis may sumaj kanqa. Chʼajwasta rikhurichej imasqa niña kanqachu, nisunman wajchayay, yarqhay, mana wasiyoj kaypis. Sumaj mikhunasqa tukuypaj jinantin kanqa, wasinkupis tukuy imayoj kanqa (Salmo 72:16; Isaías 65:21-23).

Diospa Gobiernon kay jallpʼata kamachimushajtenqa, ima llakiykunastachus guerras rikhuricherqa chay imasta chinkachenqa. Guerras kasqanrayku mana sanoschu qhepakojkunatapis sanoyachenqa, llakiyninkutapis qonqachenqa. Chay guerraspi wañojkunapis watejmanta kausarimonqanku kay jallpʼapi tiyakunankupaj (Isaías 25:8; 26:19; 35:5, 6). Familiasqa watejmanta ujchasqas kanqanku. Ima llakiykunastachus guerrasmanta runas yuyarikusqankutapis qonqasqata qonqaponqanku (Apocalipsis 21:4).

DIOS JUCHATA CHINKACHENQA

Diospa Gobiernon kamachimushajtin runasqa ujchasqa Jehovác Diosllata yupaychanqanku. “Paymin munakuyniyoj, sonqo tiyaykuytataj qon” (2 Corintios 13:11). Tukuy runas yachakonqanku wajkunawan allinta kausakuyta (Isaías 2:3, 4; 11:9). Diosta kasukojkunaqa juchamanta kacharichisqa kanqanku, niñataj jucharayku sufrenqankuchu (Romanos 8:20, 21).

DIOSQA SATANASTA, DEMONIOSTAWAN CHINKACHENQA

Diospa Gobiernonqa Satanasta, demoniostawan chinkachenqa, ajinamanta niña runasta tanqanqankuchu guerrasta ruwanankupaj (Apocalipsis 20:1-3, 10). Chinkachisqaña kajtinku allin kausay wiñaypaj kanqa (Salmo 72:7).

Diosqa guerrasta, maqanaku chʼajwastapis chinkachiyta atin, chinkachiytataj munan. Chayrayku ama iskayrayanachu chay imasta chinkachisaj nisqanta juntʼananmantapuni.

• Diosqa atiyniyoj guerrasta, maqanaku chʼajwastawan chinkachinanpaj, yachantaj imaynatachus chayta ruwananta (Job 9:4). Paytaqa ni imapis jarkʼanmanchu (Job 42:2).

• Diosqa mana munanchu runas sufrinankuta (Isaías 63:9). “Payqa chejnikun maqanakusta gustachikojkunata” (Salmo 11:5).

• Diosqa imatachus nisqanta juntʼanpuni, payqa ‘mana jaykʼaj llullakoj Dios’ (Isaías 55:10, 11; Tito 1:2).